Think_Suez

كورس مهم لأي حد عاوز يعمل CV قوي ويستعد لأي انترفيو 💪♥️

المواضيع اللي هيغطيها الكورس:
-ازاي تكتب CV
-ايه الاخطاء الشائعة اللي بنقع فيها
-ال cover letter وازاي نكتب أصلا formal mail
-الاستعداد قبل الانترفيو من أول ما يتصلوا بيك لحد ما تبقي جوه الانترفيو.
-أشهر الأسئلة في الانترفيو وكيفية الرد عليها بحكمة ومنطق.
نعمل ايه بعد ما نخلص الانترفيو

مدة الكورس ساعتين يبدأ 9:00 مساء
سعر الكورس ٥٠ جنيه
العدد محدود ✌️
سجل من خلال اللينك التالي وهنتواصل معاك: https://bit.ly/3iEKExE

او اتصل مباشرةً على: 01030976022

حابين نعرفكم اكتر عننا 😉
احنا فريق بدأ في شهر 10 اللى فات 😁
طب احنا هدفنا ايه🤔
- توفير كل الكورسات اللي الناس محتاجاها بأعلي جودة وأقل تكلفة ممكنة
- حابين نقضي علي مصطلح محتاج اي كورس سافر القاهرة او اسكندرية..
تعالو نخليها محتاج اي كورس اطلع علي بيدج ثينك 😉
طب احنا عملنا ايه :👀
- ايفنت start your project في الأسبوع العالمي لريادة الأعمال
- كورس Hysys لطلبة كلية هندسة بترول وتعدين
- كورس فوتوشوب
-3 ورش للخط العربي " ديوانى و رقعة "
-ايفنت Web design Start-up مع Gam3a tech
-ايفنت خلطبيطة بالصلصة مع سواعد السويس
وعملنا اكتر من كامبين علشان نساعد بعض
- كامبين بعنوان
- كامبين بعنوان .. تابعوها
* كلام كبار لل
Freelancing , Personal branding & IELTS Preparation
ان شاءالله مستمرين بدعمكم وهنوفرلكم كل احتياجاتكم
تابعنا علشان تشوف الخطوة الجاية
وطبعا لو عندك اي استفسار قول في الكومنتات وهنرد عليك

We are back😁
بس جايبنلكم حاجة محترمة جدا ....... تتوقعوا ايه الخطوة الجاية !!!!!🤔
توقع صح وخد عيديتك من Think خصم 50% على الكورس الجاي😉
الجايزة مقدمة لاول توقعين صح

ثينك في بورسعيد !
عُشّاق الفنان الكبير خضير وكتاباته ❤️
الخط العربي من المواهب والفنون اللي كلنا بنستمتع برؤية أعمالها، واللى بيتذوق الفنون دي وبيلمسها عن قرب بيكون عنده رغبة كبيرة إنه يبدع فى الفن ده :D

وعلشان أهل بورسعيد مغرمين دائما بالفن والفنون العريقة، إستغلينا فرصة إن الخطاط الدائم بتاعنا ومقدم ورش تعليم الخط العربي هيكون فى بورسعيد وقررنا نعمل ورشة مكثفة لتعليم الخط الديواني مدتها 15 ساعة
مع تقديم وإعداد الخطاط الرائع : محمود هداية ^_^

المكان : بورسعيد – شيفت أكاديمي – شارع رمسيس واوجينا أمام مدرسة سانت ماري
الموعد : من يوم السبت 14/7 ل يوم الأربعاء 18/7 كل يوم من 4 ل 7 مساءًا
الحجز : من خلال الفورم ديه 👇
http://bit.ly/2KW2XRG
او عن طريق التواصل مع الصفحة
وعلشان دي أول مرة لينا فى بورسعيد، الورشة هتكون ب 200 جنيه بس، شاملة مصاريف القاعة والأدوات كلها اللي هتستخدمها طول الورشة
وعلشان العدد محدود جدا إلحق إحجز مكانك :')

سألوا عالم ادارة لو هنسلب منك كل مهاراتك ويكون ليك الخيار انك تبقي على مهارة واحده بس هتبقي على ايه ؟
فكانت اجابة : اكيد فن الالقاء والتحدث للجمهور لان بيها هقدر اخلق فرص جديده وهكون جمهورى وهنقل علمى وافكارى بسهولة و هأثر فى الناس..

تقريبا العامل المشترك بين كل العظماء والمؤثرين سواء كانوا علماء او رجال اعمال او سياسيين وقادة هنلاقى العامل المشترك هو قوة البيان ومهارات التحدث امام الجمهور والتأثير فى الناس و سهولة تحفيز الناس ونقل المعلومات ليهم ..

لو شايف ان عندك فكر وعلم و اماكينات ممتازة ومحتاج تنقلها وتوصلها للناس او تأثر فيهم ويبقي ليك جمهورك ومتابعيك او تنقل مهارات او خبرات او حتى حابب تكون متحدث تحفيزى او متحدث عام فالايفنت ده عشانك ❤🌸
Show Up
هتتعرف وهتطبق الاتى :-

- الفرق بين المعلم والمحاضر والمدرب والموجه
- مدارس الالقاء وكيف تستفيد منها جميعا
- مهارات العرض والالقاء
- انواع الجمهور وطرق التعامل مع كل نوع
- صناعة العروض التقديمة و كيفية تحويل اى معرفه او مهارات الى محتوى تدريبى او حقيبة تدريبية
- التسويق الشخصى
- خلال الكورس سنقوم بتطبيق تمارين لقياس الاداء قبل وبعد اكتساب كل مهارة ............................
ايفنت Show UP هيكون مدته 15 ساعة ..3 ايام
ويحصل المتدرب ف نهاية الكورس على شهادة معتمدة من شركة Go
سعر الكورس 150 ج فقط وده لأنه مدعوم بالكامل 😉
تفاصيل اكتر من خلال لينك الايفنت في اول كومنت

في نهاية الانترفيو بيتسأل دايماً سؤال وهو
Do you have any question? عندك اي استفسار
خلي بالك هو مش بيقولك كده فض مجالس فتقوله لا شكرا وتسلم وتاخد بعضك وتمشي لأ
هو عاوز يسمع منك أسئلة فعلاً علي الأقل سؤال وليكن مثلا
-هل الشركة ناوية ت expand وتفتح فروع في دول تانية ؟
-ممكن برضو تسأل في ال Job Description لو فيه حاجة مش واضحالك
-ممكن تسأله عن تجربته في الشركة وهل مبسوط فيها ولا لأ
- لو ضاقت معاك خالص اسأله الرد بيكون في خلال اد ايه ؟
مهمة جدا النقطة ديه خلي بالك 😅
الحمد لله خلصنا الانترفيو 😌😌
بس فيه حاجة اخيرة هنعملها بمجرد ما تروح بيتك وهي إنك تبعت ميل محترم ليه تشكره وإنك كنت مبسوط في الانترفيو واستفدت منه وكده ، ولو فيه حاجة مثلا كنت عاوز تقولهاله في الانترفيو ونسيتها وحاسس انها ممكن تفرق فعلا زودها باختصار في الميل.
هنختم الكامبين اللي بدأنها من أسبوعين بتلات نصايح مهمين جدا 👌
1️⃣ أثناء فترة الدراسة اهتم جدا بالأنشطة الطلابية فعلا بتضيف ليك خبرات وبتتعلم منها كتير وفعلا هتفيدك جدا سواء في ال CV بدل ما هو نص صفحة عشان انت لسه فريش لا هيوصل لصفحة وممكن صفحة ونص كمان وده بسبب ال Extracurricular Activities اللي هتضيفها لل CV بشغلك في الأنشطة الطلابية ، وكمان في الانترفيو هتفيدك جدا انك تعرف تقول مواقف حصلت معاك واتصرفت معاها وهتعرف تتواصل مع الاتش ار كويس و ....
2️⃣️ الأنشطة الطلابية مهمة اه زي ما قولنا بس الأولوية لدراستك وازن بين ده وده ، اوعي تخلي حاجة تيجي علي التانية ، وخد كورسات في مجالك حاول خلال سنين الكلية تكون اخدت كل الكورسات اللي ف تخصصك سواء أونلاين او اوفلاين
3️⃣ ️وأخيرا Fail Fast كونك فشلت في انترفيو ده مش نهاية العالم لأ ، قدم في كذا شركة وادخل اكتر من انترفيو وكل انترفيو هيبقي احسن من اللي قبله لأنك هتكون اتعلمت من خطأك .
هو بكده تكون انتهت كامبين ال Interview Skills يارب تكون استفدت ولو حاجة بسيطة وإلي لقاء في كامبين أخري ✊😉
👻
❤️💪

دخلنا الانترفيو في البوست اللي فات وجاوبنا الحمد لله علي أول سؤالين✌️
وعلي فكرة الاتش ار اتكيف جدا من الاجابات 😎 فبعد ما قولت نقاط قوتك بيسألك سؤال بعده وهو :
3️⃣️ نقاط الضعف
يقولك قولي نقاط ضعفك ، بص فيه قاعدة ماشيين عليها وهيا 1:3 يعني ايه ؟
يعني لو قولت تلات نقاط قوة فبتقول نقطة ضعف واحدة 👌
بس خلي بالك انت بتقول نقطة ضعف متأثرش علي الوظيفة اللي مقدم عليها ،
نوضح بمثال :
مدرّسة مقدمة علي شغل في حضانة خاصة مثلا فبيتعملها انترفيو واتسألت السؤال ده وراحت قالت ان من نقاط ضعفي العصبية !
خلي بالك هيا شغلها كله مع أطفال اصلا يعني هتتعصب عليهم وتموتلنا حد منهم 😂
وبالتالي هو الاتش ار مكمل معاها الانترفيو وهو عارف انه هيرفضها 😅 ،
فممكن مثلا تقول ان نقطة ضعفي هيا عدم ترتيب الأولويات ، وتقوم قايل انك فعلا بتحاول تحل المشكلة ديه يعني مثلا بتقول انك حملت تطبيق To Do list وبدأت فعلا تحاول تعالج المشكلة ديه ، وده مهم جدا انك توضحله انك شغال علي نفسك وتحسين نقاط ضعفك .
4️⃣️ ننتقل لسؤال تاني رخم وهو شايف نفسك فين كمان خمس سنين ؟
اكيد مش هتقوله شايف نفسي مكان حضرتك 😂 ، لا لا انت في اجابتك عن السؤال ده بتوصله انك مخطط مش مجرد أمنية لأ ، ده انت مقدم علي الوظيفة ديه اصلا عشان هيا جزء من خطتك هتساعدك علي تنفيذها ، فبتقوله انك شايف نفسك كمان خمس سنين متميز في المجال ده او متخصص فيه وهوصل فيه لمنصب كبير وده هيكون من خلال الخبرة اللي هستفادها واكتسبها من خلال الشغل معاكم فالشركة👌
5️⃣️ سؤال أخير هنتكلم عنه من ضمن الأسئلة اللي بتتسأل باستمرار في الشركات الخاصة تحديدا وهو المرتب المتوقع 🤑
اتفقنا في تاني بوست في الكامبين انك من ضمن الحاجات اللي بتسرش عنها هو رينج المرتبات في الوظيفة ديه في الشركة ديه ،
فبقوله أول حاجة انك محتاج مرتب يكافئك علي شغلك ويغطي مصاريفك وتقدر تحتفظ بجزء منه
فهيقولك اللي هو كام ؟!
فتخبط رقم في الرينج اللي احنا عارفينه 😉
المرة الجايه هنتكلم ازاي تختم الانترفيو بتاعك بشكل كويس وايه اللي هتعمله أول ما تروح البيت ولو فيه حاجة مهمة مثلا نسيت تقولهاله في الانترفيو هتوصلهاله ازاي !
متنساش تمنشن لصاحبك اللي هيتخرج السنادي 😍
👻

لالا احنا قضينا ع التوتر خلاص خلال الكام بوست اللي فاتوا فاوعي تتوتر !
خلي بالك الاتش ار مش شرير 🧛‍♂️ ولا قاصد إنه يرخم ويأذنب عليك ، لا والله ده إنسان عادي زيينا بس كل الفكرة ان عنده قاعدة ماشي بيها او عليها وهيا الBusiness need 👌
يعني ايه ؟؟
يعني من الآخر هو عاوز 4 يقوموا بشغل 10 ، فأنت المفروض من خلال الانترفيو تقنعه انك فعلا ادها وانك تساوي 2.25 شخص ( عدّيها سوري ) 😂
بسم الله يالا ندخل الانترفيو ونقول صباح الخير للاتش ار وبتدخل تسلم بثقة وبعد كده بتقعد عادي خالص مفيش اي توتر وبتبدأ المعركة 💥 .....
1️⃣️️ Introduce yourself
سؤال بيتسأل في اي انترفيو بس للأسف ناس كتير بتكتفي انها تقول اسمها وكليتها وخلاص كده، لا لا ركز معايا كده ،،
احنا هنحوله من مجرد إجابة عن سؤال لقصة عنك 👌، يعني بتحكيله انت مين ،،
فبتقوله اسمك - سنك - ساكن فين - كلية ايه - كنت بتعمل ايه في فترة الدراسة في الكلية من حيث الأنشطة الطلابية - ايه الكورسات اللي اخدتها وياريت طبعا تكون متعلقة بالوظيفة - ايه خبراتك السابقة ( لو فيه )
سامعك ياللي بتقول ما كل ده مكتوب عنده في ال CV !😕
بص خلينا متفقين ان الاتش ار بيبص في ال CV من 6 ل 10 ثواني بس وده عشان يعرف انت تستحق الوقت اللي هيقضيه معاك ولا لأ 😅 ، فانسي فكرة ان الحاجات ديه موجودة في ال CV وكده لا قول كل حاجة .
بييجي سؤال بعد كده وهو ...
2️⃣️ قولي نقاط قوتك ؟ 💪
هتقول مثلا تلات نقاط او خلينا نقول مهارات مفيدة للوظيفة اللي انت مقدم عليها 👌
بس خلي بالك من حاجة ⚠️ ان اي مهارة هتقولها مهم جدا تذكر معاها موقف كنت فيه عندك المهارة ديه يعني مثلا انت بتقول ان من مهاراتك القيادة leadership
فتقول مثلا انك خلال فترة الدراسة كنت في نشاط طلابي وكنت فيه ليدر علي 30 واحد وكنت بحط خطة يمشوا عليها و اوزع عليهم تاسكات ... الخ
سمعتك برضو ياللي بتقول هو هيعرف منين اني مش بألّف ؟؟ 🤔
بص هو شخص ذكي جدا وعمل انترفيوهات كتير جداً فبيبقي عارف مين بيألّف ومين بيتكلم صدق ، وهيوقعك لو بتألف يعني مثلا ييجي ف اخر الانترفيو يقولك قولي اسم النشاط اللي كنت شغال فيه او قولتلي كام واحد كنت ليدر عليهم ؟
فلو غيرت كلامك عن اللي قولته الأول بيعرف انك كنت بتألّف او مش بتعرف تكدب وبالتالي قُل وداعا للوظيفة 😣 ، طب لو قولت فعلا نفس الكلام اللي قولته ف الاول فده يحتمل عنده انك فعلا عملت ده او انك بتعرف تكدب وده مطلوب في الوظيفة .....
فاتفقنا انك بتقوله تلات مهارات او اكتر المهم ميقلش عن تلاتة 👌
المرة الجايه هنتكلم عن تلات أسالة مهمة بتتسأل برضو في كل انترفيو ✊
متنساش تمنشن او تشير وتفيد غيرك 😅
👻

يوم الانترفيو 😎
فيه حاجتين مهمين لازم تخلي بالك منهم 👌
أول حاجة الأكل والشرب 😅
بلاش قهوة الصبح صدقني هيا اصلا بتسبب توتر واحنا ماصدقنا قضينا عليه حتي الان بنسبة 80 % ،
وبلاش اي أكل ممكن يتعبك يعني ميكونش عندك قولون وتفطر فول وطعمية هتروح الانترفيو هتبقي مش قاعد علي بعضك اصاد الاتش ار وبطنك بتكركب و حوار 😂
طب وعلي ايه ؟
يبقي بلاش قهوة بلاش اي اكل ممكن يتعبك 😌
الحاجة التانية انك تحسب وقتك بحيث توصل قبل المعاد بربع ساعة او نص ساعة بالكتير بلاش تروح بدري اوي ولا تتأخر عن المعاد طبعا دقيقة واحدة ،،
طيب لو لا قدّر الله حصل حادثة في الطريق 😰 والطريق وقف وهتتأخر هتعمل ايه ؟؟
هتتصل بالرقم اللي بلغك بمعاد الانترفيو وتقوله ان حصل حادثة وهتأخر نص ساعة مثلا ....
الحمد لله وصلنا مكان الانترفيو 😌
وباقي ربع ساعة خلاص وندخل للاتش ار 😎
هنعمل ايه في الوقت ده ؟؟
هتبدأ تسأل نفسك شوية اسألة وجودية زي ايه اللي هيحصل لو اترفضت مثلا ؟!! 😶
هل الدنيا هتقف ؟ هل ده نهاية العالم ؟! ايه اسوأ تصور ممكن يحصل لو عكيت ف الانترفيو ؟! مش هتقبل؟ ايه المشكلة فيه كذا مكان تاني هقدم فيه وتعمل واحدة
Thug life 😂😎
حاجة كمان إنك تكون مهيأ نفسك انك ممكن تتسأل اسألة بره الكوكب مش بره الصندوق 😂 اه وربنا 😅 ، فلو سألك سؤال مش واضح او مفهمتوش متتخضش عادي جدا لو سألته يوضح او يعيدلك السؤال بطريقة أوضح ! ................................
وبكده احنا قضينا علي التوتر بنسبة 100 % وجاهزين لمرحلة الانترفيو😎💪💪
المرة الجايه هندخل الانترفيو سوا وهنشوف ايه الأسئلة اللي ممكن تتسأل وازاي تجاوب عليها بطريقة كويسة 👌
متنساش تمنشن لصاحبك اللي هيتخرج السنادي 👨‍🎓👩‍🎓
🧛‍

اتفقنا المرة اللي فاتت اننا عشان نحول ال Emotional Brain لل Thinking Brain بنمر بكذا مرحلة واتكلمنا المرة اللي فاتت عن أول مرحلة وهيا البحث
واتفقنا اننا هنبحث عن أربع حاجات : الشركة - الوصف الوظيفي - المهارات - المرتب 😉
يالا بينا ندخل علي تاني مرحلة وهيا ليلة الانترفيو👇
*أول حاجة هي انك تجهز الهدوم اللي هتروح بيها الانترفيو وده عشان متجيش قبل الانترفيو تفضل تدور وتشوف هتلبس ايه و الموضوع ده فعلا بيوتر جدا 😣
طيب هتلبس ايه ؟!
خلي بالك أن مظهرك بيدي انطباع عنك وعن شخصيتك وناس كتير بتترفض بسبب مظهرها وانه مكانش مهتم بلبسه 😐
قولنا في البوست اللي فات انك هتسأل في الفون اجي بلبس formal ولا semi-formal ؟؟
خلي بالك ده بيدي انطباع انك مهتم بمظهرك وبالاندماج مع المكان ✌️
لو formal :
فممكن يكون قميص وبنطلون، أو بدلة وكرفتة للولاد، وجيبة وقميص للبنات.
الفورمال يعني لبس سادة خالص (أسود- أبيض- لبني- كحلي)، مينفعش يبقى قميص منقط ولا عليه أشكال سواء بنات أو ولاد.
بالنسبة للأحذية لازم متكونش مفتوحة، مينفعش صندل مثلًا ولا ألوان فاقعة.
للمحجبات الطرحة مينفعش تكون منقوشة أو فيها ألوان كتير، لازم تكون سادة ويبقى طرحة واحدة أو اتنين بالكتير ها 😂
لو semi - formal :
هو زي الفورمال تقريبًا، لكن أقل رسمية منه، مثلًا مش لازم تلبس جاكت وكرافتة للولاد، والبنات ممكن يلبسوا قمصان منقوشة عادي أو فستان فورمال وعليه جاكيت سادة.
* طيب تاني حاجة هيا انك تسأل عن مكان الانترفيو والطريق ليه ياخد اد ايه بحيث تكون عارف بكرة هتركب ايه وهتنزل امتي بحيث متتأخرش علي المعاد ، احنا عاوزين نوصل قبل الانترفيو بربع ساعة 👌
* تالت حاجة وديه مهمة جدا وهيا انك تعمل بروفة مع نفسك اصاد المرايه انك تتكلم وتمرن نفسك علي البرزنتيشن سكيلز وال body language خلي بالك النقطتين دول الاتش ار بيركز فيهم جدا ،، بيركز مع حركة ايديك بيركز مع عينك بتبصله ولا باصص في الأرض ، وانت بتعرّف نفسك وبتتكلم بتتكلم ازاي هل صوتك قوي وواثق من نفسك ولا مكسوف وصوتك واطي ،، خلي بالك كل العوامل ديه مؤثرة جدا 👌
* رابع حاجة والأخيرة انك تراجع الأسئلة الشائعة وتحضر اجابات ليها وديه هنتكلم عنها في البوستات الجايه 😉
المرة الجايه هنتكلم عن يوم الانترفيو الصبح ايه اللي المفروض تعمله واول ما توصل هناك المفروض تعمل ايه بحيث تقضي علي التوتر تماما 😌
انها تقترب 😂💥
🙈

اتفقنا إننا عاوزين نحول ال Emotional Brain لل Thinking Brain طب وهنعمل ده ازاي؟ 🤔
عشان تعمل ده محتاج تبقي مستعد كويس جدا للانترفيو وده هيحصل عن طريق اننا ناخد الموضوع من الأول ، ساعة ماتصلوا بيك يبلغوك إنك اتقبلت 😌
أهم حاجة قبل ما تقفل المكالمة تأكد علي معاد الانترفيو وتستفسر عن المكان كويس جدا وازاي تروحله لو مش عارفه ، وكمان أسأل تيجي فورمال ولا semi formal ✋
حلو عرفنا خلاص كل المعلومات ديه ، بمجرد ما تقفل المكالمة ورقة وقلم تكتب سريعا اللي اتقالك عشان متنساش أي حاجة ✌
بعد كده هننتقل لمرحلة تانية وهيا ال Search هنسرش عن أربع حاجات 🙏
1- الشركة
هتبحث عن الشركة كويس وتعرف بدأت امتي ومين ال CEO بتاعها وايه ال vission وال mission بتاعت الشركة وديه هتفيدك جدا لما يسألك الاتش ار أنا ممكن ااقبلك ليه ؟!
هتقوله ايه المشاكل اللي عندهم وازاي انت بمهاراتك وخبرتك ممكن تشارك في حلها او تطور من أدائها 👌
2- ال Job Description
أصل مينفعش تكون مقدم علي وظيفة وانت مش عارف هتشتغل ايه ولا هتعمل ايه ، لأن ده سؤال متوقع جدا يقولك ايه ال Job Description بتاعتك ؟ فببحثك هتعرف تجاوب علي ده كويس جدا 👌
3- ال Skills
هنسرش عن المهارات المطلوبة للوظيفة ديه وتبتدي تحضر مواقف حصلت معاك مرتبطة بالمهارات ديه ، خلي بالك أي مهارة هتقول انها عندك هيقولك احكيلي موقف كان فيه عندك المهارة ديه 👌
4- ال Salary
المرتب 🙈 مهم جدا تسرش عن رينجات المرتبات في الشركة ديه او في الوظيفة ديه تحديدا ،وده ممكن عن طريق جروبات الفيس الخاصة بالوظائف او من خلال لينكدان توصل لناس شغاله في الشركة ولو عاوز لينكات تفهمك كويس لينكد ان قولنا ف كومنت 😉 ، وطبعا لما تسأل عن المرتب متسألش الشخص انت بتقبض كام 😂 ، لكن قوله رينج المرتبات في الشركة عند حضرتك كام ، وده عشان لما الاتش ار يسألك عن المرتب تبقي عارف هتقول ايه 👌 .............................
وبكده نكون خلصنا مرحلة السيرش وهندخل في مرحلة تانية وهيا ليلة الانترفيو ويوم الانترفيو وده اللي هنتكلم فيه في البوست الجاي 😉✌
شير وفيد غيرك او منشن لحد هيتخرج السنادي 😄
🙈