Miss Rania

سعات بسأل نفسي بجد
انا ليه سبت كليات القمة عشان ادخل كلية تربية خاصة ؟
و هو يعني هستفيد ايه و لا هكسب ايه ؟
و اشمعنة الكلية دي؟
طب مكنت ادخل حاجة ليها علاقة بالناس اللي بيتقال عليهم عاديين !
و بعدين بفتكر ان محدش فينا عادي !
كلنا عندنا حرب بنخوضها ...بس الفرق ان الحرب بتاعت ذوي القدرات الخاصة باينه علي ملامحهم فاحنا بنقعد نشاور عليها !
لكن الحقيقة اني دخلت المجال دا عشان اتعلم منهم مش عشان اعلمهم
دخلت اتعلم ازاي اتحدي الاعاقة اللي المجتمع حطها في وشي مش انا اللي معاق
و ازاي اقدر اثبت لكل اللي حوليا اني اقدر حتي لو انتو شايفني صغير فانا مش هشوف نفسي بعينكم و هنجح غصب عنكم!
عارفة ان مش كل ذوي القدرات الخاصة قدرو يحققو كل دا...بس اللي متأكدة منه اني هتعلم كتير اوي من التعامل مع كل حد فيهم ❤
مش لأنهم مختلفين بس لأن حربهم صعبة و الحرب الصعبة بتصنع ابطال ...

فعلو الهاشتاج

اضطراب طيف التوحد
امتي احس بمشكلة عند ابني؟ او ايه المؤشرات اللي تخليني ابدأ احس بمشكلة؟
مبدأيا كدا التوحد بيعتمد علي حاجتين
١. مشكلة اجتماعية
٢. انماط سلوكية متكررة
طب ايه دول و هعرفهم ازاي ؟
نبدأ بالمشكلة الاجتماعية في البوست دا
لو طفلك عنده حاجة من الحجات دي ممكن تروحي تطمني افضل :
*مبيستجيبش لما تناديه كأنه بيتجاهلك مع ان سمعه سليم جدا
* مبيحبش الاحضان و التفاعل و تحسيه عايز يلعب لوحده دايما في عالمه الخاص
* ميحبش يبص في عنيكي ابدا و هو بيكلمك
* بعد ميكون اكتسب كلام ممكن يرجع كل حاجة في كلامه تتدهور تاني

ابني معاق !
غلط !
مفيش حاجة اسمها انسان معاق!
تخيل لو انت كفيف و كل حاجة حوليك مكتوبة ببرايل و معمول حسابك في الشوارع و المباني و الدراسة و كل حاجة زي اي شخص طبيعي ...
اكيد ساعتها هتحقق كل احلامك و هتبقي انسان سوي و قابل اختلافك الي حد كبير
مانت زيك زي اي حد معمول حسابه في كلللل حاجة فالدنيا حتي الدراسة و الشغل و الطرق
طيب تخيلت؟
نرجع للواقع بقي 💔
هو ايه معني الاعاقة؟
فيه فرق بين كلمة خلل و اعاقة
الخلل بيبقي حاجة فسيولوجية زي فقد البصر او السمع او مشاكل فالمخ
طب الاعاقة؟ ان الحاجة دي و المجتمع بيعيقو الشخص انه يمارس حياته بشكل طبيعي
طب لو المجتمع مساعد الشخص يمارس حياته بشكل طبيعي؟
هيبقي مفيش اعاقة !
دايما علمو ولادكو مفيش شخص معاق انما فيه مجتمع يعيق و اندي مش مجرد شعارات بنقولها و بس

علم نفس النمو 🤩
ليه لازم يبقي عندك فكرة عامة عنه كأم؟
عشان تعرفي ان فيه مشكلة لاااازم تكوني عارفة الرينج الطبيعي لكل حاجة عن الطفل فالسن دا
مثلا اللغة
امتي تعرفي تحددي ان ممكن يكون عنده تأخر لغوي عشان تعملي تدخل مبكر؟
الرينج دا ممكن يقل او يزيد بسبب الفروق الفردية
بس لو لاحظتي اي تأخر زيادة عند الطفل لاااازم تقييم ثم تدخل في مكان متخصص و الف خط تحت متخصص
متستقربيش اي مكان للطفل و خلاص لأن ناس كتييير غير مؤهلة بتشتغل تربية خاصة
التدخل دا هو اللي هيحدد مصيره فابحثي و دوري و متروحيش غير لحد متخصص و بس

تابع مباديء تعديل السلوك
المبدأ الرابع : التعميم
يعني ايه؟
دلوقتي الولد بقي شاطر و كويس جدا في الحضانة او المركز او المدرسة بسبب انه اتعمله تعديل سلوك ...طب و بعدين؟
بييجي البيت بقي و يرجع لكل سلوكياته الغلط و يبهدل الدنيا ☹
يبقي كدا محصلش تعميم !
اللي هو؟
التعميم ببساطة هو ان التعديل اللي حصله في مكان ما (المدرسة او الحضانة او المركز) يفضل معاه في ايييي مكان تاني (فالبيت و الجنينة و غيره)
مثال ...الولد بيشتم مثلا و عملناله تعديل سلوك و بطل يشتم في المدرسة
التعميم بقي انه يبطل يشتم في اي حتة سواء مدرسة بيت شارع جنينة .........
بس كدا

تابع مباديء تعديل سلوك
المبدأ الثالث : التمييز 🤩
التمييز ببساطة هو ان الطفل يقدر يميز بين السلوك الصح و السلوك الغلط
عن طريق ايه؟
التعزيز و العقاب اللي اتكلمنا عنهم
السلوك الحلو دايما بعديه بيبقي فيه حاجة حلوة (تعزيز) و السلوك الوحش بعديه حاجة وحشة (عقاب)
و هنا يقدر الطفل بدماغه الطفولية يميز و يبدأ يحاول يعمل السلوك الحلو عشان بعديه فيه تعزيز حلو
بس كدا

تابع: مباديء تعديل السلوك
المبدأ الثاني : العقاب 💔
طب كويس دانا بهري ولادي ضرب انا كنت متأكدة انه صح 😂😂😂
لأ و الف لأ
مبدأ العقاب دا اول نقطة بنستخدمه ككارت اخير
تاني نقطة بقي مبنضربش !
اه و الله زي مبقولك كدا !
الضرب دا محتاج بوست لوحده لشرح اثاره بس فكرة الضرب نفسها ملهاش اي لازمة !
ازاي؟ دانا ابني مبيتعدلش غير بعد علقة محترمة !
الضرب دا فعلا عامل زي المسكن مفعوله سريع لكن مبيحلش المشكلة
لأنه بيحلها مؤقتا فقط!
بيخلي الطفل يحسن من سلوكه بسبب الخوف طب اول ميكبر كدا و يبقي مراهق و الخوف يتشال ؟ ....بصي عايزة تخوضي التجربة دي خضيها و هتلاقي تمرد و عند بالذات لما يكبر شوية و عينك متشوف الا النور ! 💔
طب نرجع للعقاب !
امال هعاقبه ازاي بقي؟ 😕
فيه نوعين من العقاب
١. عقاب بانك لما الطفل يعمل حاجة غلط تبدأي مثلا توبخيه او تعاقبيه بأي طريقة غير الضرب و تفهميه و حطي الف خط علي تفهميه ان دا بيحصله لأنه عمل حاجة غلط
النوع دا بيشمل توبيخ (مش تنمر) او naughty corner للصغيرين او تخليه ينضف الشقة و هكذا بس بصراحة انا مبرجحش النوع دا ابدا و بعتبره اخر كارت خالص بعد انتهاء كلللل حلول الارض
٢. النوع التاني دا بالنسبة لي افضل و هو العقاب بحرمانه من حاجة بيحبها
ازاي؟
يعني مثلا نقلل المصروف انهردة او نحرمه من اللعب مع صحابه او من السهر قدام التلفزيون في يوم اجازته و هكذا
بس تاني و تالت و رابع مع شرح مفصل للطفل احنا ليه عملنا كدا !
مش نسيبه لدماغه و لو مهتم كنت فهمت 😂 دا مش خطيبك دا ممكن لو مشرحنلهوش دماغه الطفولية تقوم مقدماله شرح طفولي يقوله ((انا عملو معايا كدا عشان انا وحش او عشان مبيحبونيش او او او )) و كلها تفسيرات لو فضلت معاه هتخليه لما يكبر يدفعك ٥٠٠ جنيه في جلسة مدتها ساعة مع دكتور نفسي
فبلااااااش
و زي مقولنا العقاب بنوعيه دا اخخخخر كروت بنستخدمها مع الطفل
الطفل في اول ٦ سنين بالذات بيكون حساس جدااا لأي حاجة بتحصله و حرفيا بيكبر بيها و بيصدقها فخلو بالكم و انتو بتستخدمو الكارت دا جدااا

تعديل السلوك 🤩
لو بحثت علي اي موقع او كتاب عن مباديء تعديل السلوك هنلاقي تقريبا نفس الكلام
فأنا فالبوستات اللي جاية هحاول ابسط المباديء دي قبل مندخل في الخطوات
اول مبدأ هو مبدأ ((التعزيز))
اولا كدا يعني ايه تعزيز و ايه حوار تعزيز سلبي و ايجابي و معنوي ومادي و الكلام دا؟
نبسط الدنيا شوية
التعزيز عامة بيعتمد علي وجود معزز
يعني ايه بقي معزز؟
المعزز دا يا ستي هو باختصار مكافئة او بمعني اصح حاجة الطفل بيحبها و هتبسطه
يعني مش كل طفل ينفع معاه نفس المعزز؟
لأ طبعا
لو طفل مبيحبش الشكولاته و طفل تاني بيحبها يبقي الشكولاته هتكون معزز للطفل التاني و ملهاش اي معني للطفل الاولاني
فلااازم يكون المعزز محبب للطفل
طيب ايه مادي و معنوي دا بقي؟! 😕
المادي دا بيتمسك يعني حاجة مادية حرفيا زي الشكولاتة البسكوت او حتي فلوس المهم انه فعلا اخد حاجة مادية
و طبعا كدا اكيد خمنتي ان المعنوي دا مش حاجة مادية انما كلمة حلوة زي برافو تشجيع نظرة رضا و هكذا
طيب و ايه برضه حوار ايجابي و سلبي دا
بصي يا ست الكل
لما الطفل يعمل حاجة حلوة و انتي عايزة تكافئيه سواء ماديا او معنويا بحاجة هتقديميهاله او كللمة هتوجيهاهاله
دا هو التعزيز الايجابي
طب السلبي؟
دي بقي فيه اختلافات كتير في شرحها بس اللي انا مقتنعة بيه و اتعلمته هو الاتي
التعزيز السلبي هو اني اشيل من الطفل حاجة هو مش حاببها
بمعني؟
الطفل مبيحبش اللبن مثلا (دا مجرد مثال توضيحي)
فانا هقوله لو عملت الواجب مش هتشرب اللبن انهردة
فانا عززته باني شلت منه حاجة مش عايزها او مش بيحبها و هكذا
فيه ناس رأيها ان التعزيز السلبي هو اني اشيل منه حاجة بيحبها بس انا شايفة انه ازاي هيكون تعزيز و انا بعاقبه بس زي مقولت دا اختلاف بين المتخصصين المهم الفكرة الاساسية
ان الطفل عمل حاجة حلوة فبديله تعزيز
تابعو معانا بقي تبسيط باقي المباديء عالصفحة
يومكم حلو 🌷

-الولد عادي سيبي الولد بكرا يلقط من صحابه
- دا لسة صغير بكرا يتعلم و يبقي تمام 😕
هكلكم انهردة عن اهمية مفهوم التدخل المبكر 🤩
يعني ايه تدخل مبكر ؟
من الاسم كدا يعني ببدأ الاحظ مشكلة عند الطفل و اشتغل عليها بدري ...بدري اد ايه؟
اقل من ٦ سنين !!!
طب و ليه ادخل الطفل في حوارات ماستني يمكن بكرا يبقي تمام ؟!
بصي يا ستي التدخل المبكر دا هو الحاجة الوحيدة اللي فعلا هتخليه بكرا يبقي تمام !
لأن الطفل في السن دا بيكون اسهل اننا نشكله و نحل المشاكل اللي عنده عشان متطورش طب لو متدخلتش ؟
كل متتأخري كل مالطفل هيلاقي صعوبة في حل مشكلته و هتدفعي فلوس اكتر بكتييير و تروحي لناس كتيير و لازم يكونو شاطرين جدا عشان بس يقدرو يحاولو يحلو المشكلة
طب علي ايه؟ !
ابنك بدأ نطق متأخر؟ بنتك مبتقلدش اللي حوليها ؟ ابنك بيتعامل كأنه مش سامعك؟ ابنك حصيلته اللغوية ضعيفة جدا ؟
دي مشكلة ! و ليها حلول كتيير
و ركن اساسي من الحل هو انتي !
طفلك اغلي ما عندك فمتسيبيش حالته تتدهور و تقولي بكرا يبقي تمام
اتدخلي معاه و لو مشكلته بسيطة يا ستي حاولي تستعيني بحد و تشتغلي حتي معاه فالبيت بس متسيبيهوش كدا و خلاص

الوسائل التعليمية 🤩
ازاي تحدد ايه الوسائل اللي هتفيد ابنك او بنتك؟
و هل اصلا ضروري تستخدم وسائل؟
الاجابة : بتختلف من طفل لطفل و حتي نوع الوسيلة بيختلف من طفل لطفل حسب نمط التعلم المفضل للطفل
يعني ايه؟
فيه طفل بيتعلم افضل من خلال عنيه يعني يحب يشوف الحاجة قدامه عشان يستوعبها و فيه طفل يحب يستخدم ودانه يعني يقعد يسمع قصص مثلا و يحاول يرددها و فيه طفل لازم يستخدم ايده و هكذا
طب اعمل ايه؟
اختاري يا ستي الانشطة اللي فيها اكتر من حاسة و جربي معاه كل الانشطة بس مننساش ايه هدف النشاط؟
هل بينمي انتباه مثلا و لا ادراك ولا ذاكرة ولا كل حاجة؟

و هل الطفل حابب النشاط و لا النشاط ممل بالنسبة له ؟
و ربنا معاكو 🌷

- لأ انا ابني مش صعوبات تعلم دا ذكي جدا !
الجملة دي بالنسبة لأي متخصص جملة متناقضة و ملهاش معني ! ليه بقي؟
لأن كلمة صعوبات تعلم اصلا لا تنطبق غير علي طفل ذكاؤه عادي او فوق العادي !
يعني ابنك او بنتك لو صعوبات فهو معندوش اي قصور في نسبة ذكاؤه بالعكس دا ممكن ذكاؤه يكون اعلي من العادي !
امال فين المشكلة؟!
المشكلة بتظهر لما يكون محتاج طرق او اساليب مختلفة في الدراسة بس !
يعني مثلا يكون محتاج وسائل او طرق تدريس تشد انتباهه و تساعده ...
طيب ثانية وحدة هو ايه دخل الانتباه في الموضوع ؟ 😕
نبسط الدنيا ... عشان نتعلم اي حاجة بنحتاج ٣ حجات (انتباه و ادراك و ذاكرة ) و بنحتاج بعدها (لغة و تفكير) فلو اي طفل عنده اي مشكلة في حاجة من الحجات دي ممكن يحصله صعوبات تعلم !
مثلا انا جيت اعلم الطفل حرف الالف
١. لازم ينتبه للحرف و ليا
٢. لازم يدرك معني الحرف
٣. لازم يخزن في ذاكرته شكل الحرف و صوته
طب لو فيه وحدة من دول فيها خلل؟
هنا هتظهر المشكلة !
بس كدا