YES Initiative

مش لاقي شغل؟ طيب مش يمكن تكون بتدور غلط؟...
أكيد في وظايف كتير متاحة في سوق العمل...ولازم تعرف إن نسبة البطالة في البلد بتقل يوم بعد يوم ، لكن نسبة العجز فعلياً هي في الفجوة بين مهارات الخريجين وقدراتهم وعدم تأهيل الشباب لمتطلبات سوق العمل... طيب إنت مطلوب منك إيه؟
أولاً: حدد المجال إللي إنت حابب تشتغل فيه أو درسته والوظيفة إللي بتتمنى تشتغل فيها، وبالتالي حتعرف إيه هي متطلبات الوظيفة دي وتبتدي تشتغل على الموضوع ككل...
ثانياً: حاول تطور من مهاراتك وقدراتك وخصوصاً لو الوظيفة إللي إنت نفسك تشتغل فيها محتاجة مهارات أو متطلبات معينة...
ثالثاً: سيبك من أي تجارب سلبية من إللي حواليك، وركز علي نفسك، مفيش حد بينجح غير لما بيشتغل على نفسه كويس ويبعد عن أي كلام سلبي من المحيطين بيه...
رابعاً: استخدم شبكة علاقاتك واعرف ناس في مجالك علي قد ما تقدر، وابدأ حدد الشركات إللي أنت مهتم تشتغل في المجال بتاعها، وشوف الفرص المتاحة فيها...
خامساً: ابتدي تابع المواقع الإلكترونية الخاصة بالتوظيف وحاول تحضر المعارض المتخصصة في هذا المجال...
إحنا حنحاول نساعدك باستمرار، تابعنا الفترة الجاية وحنحاول معاك نوصل للوظيفة إللي بتحلم بيها...

هتتخرج وتشتغل وتتنقل من مكان لمكان!!! الموضوع ده ممكن يتكرر معاك أكتر من مرة. !يه الكلام ده؟...
في بعض الإحصاءات بتقول إن الفرد في بداية حياته العملية بيتنقل ما بين أكتر من 5 لـ 7 وظائف... وده بسبب عدم توافقهم أو عدم قدرتهم في التعامل مع مديرهم في العمل!!! وبسبب إنك بتحاول تثبت نفسك في الشغل الجديد ممكن تتعامل بطريقة غلط تؤدي معاك لتركك للعمل نهائي... طيب إزاي تتعامل بطريقة صحيحة في شغلك ومع مديرك؟ دي شوية نصايح ليك علشان تعرف تتعامل صح...
-حط نفسك مكان مديرك. ولازم تفكر دايماً حتعمل إيه لو كنت مكانه...
-إنت محتاج شوية صبر عشان تقدر تتكيف مع المكان الجديد، وحاول تتعرف أكتر على مديرك، تسأله عن خبراته، دراسته، ولازم تديله مساحة كبيرة إنه يقول رأيه فيك بكل صراحة...
-حاول تتصرف دايماً بإسلوب مهني في أول لقاء ليك بمديرك وخليك إيجابي، لإن من مصلحتك إن علاقتك بيه تكون قوية ومبنية على اساس الثقة والإحترام المتبادل...
-ابعد عن إنك تحكم على شخص من أول مرة تقابله فيها، لإن لو بدأت علاقتك بأي شخص بالطريقة دي وحكمك طلع غلط هتبني علاقة ضعيفة وبداية غلط وإنت مش محتاج لده في بداية حياتك...
-إلتزم دايماً بكلمات تدل علي احترامك ليه زي (حضرتك، يا فندم، من فضلك، وهكذا...)...
ما تجاملش كتير... المجاملة الكتير شئ مش كويس وفعل مكروه ويفضل إنك تلتزم باسلوب يشمل الاحترام والمحبة علشان تكسب إحترام جميع زملائك في العمل...
-الاجتهاد والإخلاص في العمل والإلتزام بالمواعيد من أكثر العادات إللي تكسبك احترام وتقدير مديرك...
-لا تكون دائم الشكوى وما تتكلمش علي حاجات مش في نطاق شغلك...
إحنا حنحاول نساعدك باستمرار، تابعنا الفترة الجاية وحنحاول معاك نوصل للوظيفة إللي بتحلم بيها...

إيه هو الإبداع ومين هما المبدعين...؟
الإبداع ببساطة....هي العملية إللي بتحصل عشان تبتكر فكرة جديدة وتكون مقبولة إجتماعياً وقابلة للتنفيذ... رأي أخر بيشوف إن الإبداع هو مزج بين الخيال والواقع وتطعيم الأفكار القديمة بأفكار أخرى لتطويرها....
طب مين هما المبدعين...؟
يعتقد البعض إن الأشخاص المبدعين بيكتسبوا الإبداع بالفطرة ولا تدخل منهم في ده.. بس ممكن يكون الرأي ده خاطئ تماماً
مثااال...
رجل أعمال يقف بطابور فى إحدى المطارات... لاحظ إن غلاف تذاكر السفر بيضاء وخالية من أي تفاصيل أو صور.. فكر رجل الأعمال في طبع الإعلانات على أغلفة التذاكر وتوزيعها على شركات الطيران مجاناً...
وبالفعل عرض المشروع على شركات الطيران ووافقت الشركات على تنفيذ المشروع... والنتيجة كانت أرباح بملايين الدولارات...

حاول تكون مبدع في مجالك مهما كان إيه هو المجال ده...

شايف نفسك فين كمان 5 سنين ؟؟؟
كلنا شايفين إن دا سؤال صعب نجاوب عليه...
بس قبل ما نجاوب ونظلم الناس إللى بتسألنا الأسئلة دي .. لازم نعرف الغرض من السؤال !!
لو شايف نفسك في مكانة معينة كمان 5 سنين دا معناه إنك عارف مكانتك دلوقتى "عارف إيه هي قدراتك ومهاراتك الشخصية "
بمعني إنك لو عارف قدراتك هتقدر تعرف إنت المفروض تشتغل إيه دلوقتي ومحتاج تطور نفسك في إيه الفترة الجاية عشان توصل لهدفك.
وإحنا هنساعدك في تحديد مستواك وإزاي تطور من نفسك وكمان إيه هي الوظيفة الملائمة ليك وده من خلال مبادرة القاعدة القومية لمهارات الشباب " YES Initiative "
طيب إيه هي مراحل مبادرة “YES Initiative” ...؟
المرحلة الأولى هي مرحلة تحديد القدرات "وهي عبارة عن اختبار تقييم بيحدد مهاراتك وقدراتك الشخصية وميولك الوظيفية ".
المرحلة الثانية هي مرحلة تطوير الذات "وهي عبارة عن تأهيل الشباب لسوق العمل من خلال برامج تدريبية على مهارات العمل الأساسية".
المرحلة الثالثة هي مرحلة التدريب من أجل التشغيل"عبارة عن تدريب متخصص على الوظيفة المرشحة له من قاعدة بيانات الوظائف الخاصة بالمبادرة، حتى تصبح جاهز فعلياً لسوق العمل وللوظيفة المناسبة ليك".
المرحلة الأخيرة هي مرحلة التشغيل "ودي تعتبر آخر مرحلة في المبادرة وبيتم فيها توظيف المتدرب بالوظيفة المختارة له بناءاً على نتيجة الاختبار والتأهيل والتدريب إللي مر بيهم في المراحل الأولى من المبادرة ".
تقدر دلوقتى تسجل في المبادرة مجاناً... إضغط على اللينك دااا....
http://yes.benaa2.com/ini_register
ومتنساش تقولنا في #كومينت
شايف نفسك فين كمان 5 سنين ...؟

كل عام وانتم بخير 😍

من أكتر الأخطاء إنتشاراً... هو إن الخريج الجديد بيطلب راتب مرتفع وطبعاً ده مش بيتوافق مع الوظائف أو الإمكانيات الخاصة بالوظيفة المطلوبة...وبالتالي بيوصل لمرحلة الإحباط لما بيعرف الراتب الحقيقي إللي يستحقه...
علشان كده عليك كا خريج إنك تتعرف على متوسط المرتبات للخرجيين الجدد ومعرفة المهارات والقدرات إللي ممكن تنميها وبالتالي تزيد من راتبك المقترح...

كلنا بندخل سوق العمل وإحنا مش عارفين إيه هي قدراتنا ومهاراتنا... وساعات مش بنلاقي وظيفة أصلاً...علشان كده قبل ما تختار مجال تتعلمه أو تشتغل فيه لازم تعرف الأول إيه هي حالة سوق العمل الحالية... وده عشان تقدر تحدد إيه هي المهارات والقدرات إللي انت محتاج تنميها وتطور من نفسك فيها علشان تلاقي الوظيفة المناسبة...

شبكة معارفك من الأصدقاء والاصحاب تعتبر من أهم الطرق علشان تحصل على وظيفة... وده لأن مسئولي التوظيف بيعتمدوا بشكل كبير في اختياراتهم على المعارف والتوصيات.
وده بناءاً على استبيان من بيت دوت كوم، في فبراير 2013 وجدوا إن 34.5% من المهنيين في الشرق الأوسط وجدوا وظيفتهم من خلال أصدقائهم ومعارفهم.
علشان كده عليك كا خريج التواصل مع أصدقاءك ومعارفك وتطلب منهم المساعدة للحصول على وظيفة.

في بعض الدراسات إللي بتأكد على إن الشخص غالباً ما يحتاج لـ 30 ثانية فقط لتكوين فكرة أولية عن الشخص إللي بيتعامل معاه لأول مرة.. ويعتبر الانطباع الأول من أهم العوامل التي بتحدد مصيرك في قبولك للوظيفة إللي إنت متقدم ليها.
علشان كده لازم تستغل الفرصة كاملة وتتصرف بالمهنية المطلوبة حتى تضمن ترك انطباع قوي.

كل عام وانتم بخير 🙂