Biotech-Research

خمس أنواع لشركات التكنولوجيا الحيوية لازم تكون عارفهم..

طبعا من أهم الأفكار اللي بحاول أنشرها بإستمرار هي فكرة خلق فرصة العمل مش مجرد إنتظار الفرصة رغم ان دا وارد في اول حياة أي خريج، ولكن بعد كده من المهم إن يكون عندك فكرة مستقبلًا عن شكل حياتك. مش بنقول إن كل الناس هتفتح شركات ولكن على الأقل يكون عندهم مفهوم خلق الفرص بدلًا من إستغلالها. مع العلم طبعا إن خلق الفرص أصعب ومحتاج إعداد وتأهيل أكبر بكتيييير اوي من لو استغليت فرصة عمل متواجدة بالفعل.

خلونا نبدأ بأنواع شركات التكنولوجيا الحيوية وهم خمس أنواع طِبقًا لمصدر هيكون الرابط بتاعه متواجد في التعليقات، ونبدأ في سرد الأنواع كالتالي:

: «Big Biotech» وبترمز للشركات العملاقة.

والنوعية دي من الشركات بتمتلك خطوط إنتاج كاملة وضخمة وأرباح كبيرة جدًا وبتنافس بشكل صريح الشركات العملاقة في مجال الأدوية. وعندهم رأس مال كافي لتمويل العمليات لدعم كافة إحتياجاتهم سواء البحثية أو التكنولوجية اللي بتناسب خطط أعمالهم. *جدير بالذكر إن الشركات العملاقة في التكنولوجيا الحيوية مش بتكتفي بالدخول في قِطاع واحد من الاعمال سواء الزراعي أو الصحي أو غيره، لأنها بتهدف للإستدامة بالتالي ممكن تلاقي الشركات العملاقة بتنافس في كل المجالات.

: «One Trick Ponies» وبترمز للشركات ذات القِطاع الواحد من الأعمال.

ودي الشركات الكبيرة ولكن في قِطاع واحد من الأعمال فقط، وعندها منتجات جيدة وعلى مستوى عالي في مجال واحد زي ما قولنا وكذلك بتمتلك أرباح كافية لدعم عملياتها طِبقا لخطط أعمالها. الشركات دي عادةً بتكون مُستهدفة من شركات الأدوية الضخمة عشان تستحوذ عليها وعلى منتجاتها. ومُصطلح الإستحواذ معناه إن شركات الادوية الضخمة بتسعى لإنها تستثمر فيها وتستولي على عدد من الأسهم لغاية ما تمتلك كل الاسهم وتبقى شركة التكنولوجيا الحيوية مندرجة تحتها. النوعية دي من الشركات لا تمتلك خطوط إنتاج وغالبًا ما يسعى المستثمرين فيها والمديرين على حدٍ سواء إن أحد الشركات الضخمة تستحوذ عليها قبل ما المنتج اللي بيقدموه يفوت عليه الاوان ويخسروا الاستثمار والارباح اللي حققوها.

: «Prolific Pipelines» وبترمز للشركات ذات الإنتاج الغزير من منتج واحد او منتجين على الاكثر.

وهي شركات في مجال التكنولوجيا الحيوية عندها تقنيات لا بأس بها في خطوط الإنتاج ومن الممكن تكون عالية الجودة، منتجاتها غالبًا تتمحور حول العلوم الاساسية يعني أساسها العلمي مش معقد، ومن الممكن يتم تجريبها من خلال تجارب اولية، والشركات دي بتركز في أمريكا على تطوير منتجات عشان تطلب توثيقها من الـFDA واللي هي منظمة الدواء والغذاء في أمريكا المسئولة عن اصدار التراخيص لأي دواء او غِذاء لنزوله في الاسواق. الشركات دي يهمها النجاح التجاري وفي منها بيعتمد على منتج واحد فقط وغالبا ما يتم الإستحواذ عليها.. أما الشركات ذات الاكتر من منتج بتوقف عمليات البحث العلمي او التطوير وبتهتم بتسويق منتجاتها بعد إصدارها. والنوعين دول من الشركات المصدر الرئيسي للمركبات اللي بتستخدمها شركات الادوية العملاقة. *من المهم إننا نعرف إن نوعية الشركات دي مناسبة جدًا لأي حد بيفكر في بيزنس ليه علاقة بالتكنولوجيا الحيوية في مصر، لأن هو مجرد الوصول للمنتج وبتبدأ عملية إستعادة المصاريف وجني الأرباح وبالتالي إحتمالية تطوير الشركة تكون أكبر.

: «Too Little, Too Late» وبترمز للشركات الصغيرة اللي منتجاتها مش بكفائة عالية أو مش بأهمية كبيرة.

النوعية دي من الشركات في مجال التكنولوجيا الحيوية بتنتج منتجات جودتها مش بكفائه عالية نتائجها إيجابية وكمان ممكن تحقق نجاح في إصدار تراخيص منظمة الدواء والغذاء الـFDA. بردو من المحتمل إن المنتجات دي ماتحققش فائدة فعلية في الماركت لأنها بتكون في الادوية او المركبات العامة يعني مش محورية في معالجة مشاكل كبيرة. ولكن ميزة منتجات الشركات دي بمنتجاتها إنها بتحقق أرباح معقولة بالنسبة للنسبة اللي بتستحوذ عليها السوق ككل.

: «Promises, Promises» اللي هي الشركات الواعدة او اللي مستقبلها محتمل يكون كبير، وهي مش بتنتج ولكن بتطور منتجات موجودة بالفعل ومش عندها آلية بحث علمي قائمة بذاتها تخليها تكتشف او تنتج منتجات.

آيه اهمية المعلومات دي بالنسبة لطلاب التكنولوجيا الحيوية في مصر؟ اهميتها انهم يعرفوا التكنولوجيا الحيوية وصلت لآيه في العالم، وازاي ممكن يقدروا يخلقوا من خلال علم بيدرسوه آلاف فرص العمل ومئات الملايين من الدولارات.. يعني ابحث عن فكرة وطورها بالاستعانة بالخبراء اللي حوليك في المجال وإبدأ اسعى لتنفيذها. التكنولوجيا مش هيتم توطينها في مصر طول ما بيتم إستيرادها من الخارج بالتالي لازم الطلاب والخريجين يكون عندهم الفكر دا ومش معنى الكلام دا إنها شئ سهل بالعكس صعب جدًا ولكن مع الإصرار والتخطيط وان كل واحد يشتغل على نفسه اكيد في يوم هيوصل.

وتابعوا معايا إن شاء الله في مزيد من المفاهيم اللي هتوصلكم فكرة ريادة الاعمال والتكنولوجيا الحيوية.

Thanks for my colleagues and my friends for your great and valuable support.

Biotech-Research Biotechnology Company