Dr.Walaa Rafaat

العلاج المعرفي السلوكي أو الـCBT بيقوم على فكرة بسيطة جدًا لكنها قوية، و هي إن أفكارنا ومشاعرنا وتصرفاتنا متشابكين مع بعض وبيأثروا في بعض بشكل كبير
يعني الفكرة اللي بتيجي في دماغنا بتولد شعور، والشعور ده هو اللي بيخلينا نتصرف بطريقة معينة، وعشان كدا نفس الموقف ممكن يخلي شخصين يحسوا بشكل مختلف تمامًا، وكمان يتصرفوا بشكل مختلف، وده لأن كل واحد فيهم فسره بطريقة مختلفة

★ تخيل مثلا واحد عنده مقابلة شغل، و أول فكرة جت في دماغه " أكيد هفشل وهيضحكوا عليا " طبيعي يحس بتوتر وقلق وممكن حتى يقرر مايروحش، واحد تاني في نفس الموقف قال لنفسه " هحاول أقدّم نفسي بأحسن شكل، ولو ما نجحتش أتعلم للمرة الجاية " هنا التوتر هيقل وهيكون قادر يواجه الموقف
وبكدا نفهم إن الموقف كان واحد، بس الفكرة هي اللي صنعت الفرق في الإحساس والسلوك
و العلاج المعرفي السلوكي بيركز على النقطة دي، إنك تتعلم تراجع أفكارك وتعرف إيه منها منطقي و واقعي، وإيه منها مُبالغ فيه أو مش صح
المعالج هنا مش بيجي يقولك فكر كده وما تفكرش كده، لكن بيعلمك إزاي تسأل نفسك هل الفكرة دي حقيقية ؟ هل في دليل عليها ؟ هل في تفسير تاني للموقف ؟

★ الـCBT اتأسس في الستينات على إيد آرون بيك، اللي لاحظ إن مرضى الاكتئاب بيكون عندهم أفكار تلقائية سلبية عن نفسهم وعن العالم، والأفكار دي كانت بتزود المشكلة أكتر، ولما بدأ يشتغل معاهم على إنهم يشوفوا الأفكار دي ويميزوا الصح من المبالغ فيه أو الغلط، لقى إن حالتهم بدأت تتحسّن، ومن وقتها العلاج ده بقى من أشهر وأكتر طرق العلاج النفسي استخدامًا في العالم

★ الـCBT يعتبر علاج عملي جدًا، ومش بيعتمد على الكلام بس، لأن في الجلسات المعالج بيشتغل معاك كفريق، وبيكون فيه واجبات أو تمرينات بين الجلسات، زي إنك تكتب المواقف اللي حسيت فيها بمشاعر قوية، والأفكار اللي جات في دماغك وقتها، وساعات كمان بيطلب منك تعمل " تجارب سلوكية " علشان تختبر صحة أفكارك بنفسك، يعني الهدف مش بس إنك تتحسن وقت الجلسات، لكن إنك تتعلم أدوات تستخدمها لوحدك بعدين

★ و النوع ده من العلاج مفيد لاضطرابات كتير زي الاكتئاب، القلق، الرهاب الاجتماعي، الوسواس القهري، اضطرابات الأكل، وحتى مشاكل النوم، وبيتميز إنه عادة قصير المدى مقارنة بعلاجات تانية
و اللي بيخلي الـCBT مختلف إنه بيركز على الحاضر مش بيقعد يحلل الماضي أو الطفولة إلا لو ليهم علاقة مباشرة بالمشكلة اللي بتحاول تحلها دلوقتي، لأنه بيعتمد على فكرة إزاي نتعامل مع اللي بيحصل دلوقتي علشان نتحسن دلوقتي
و الميزة الكبيرة فيه إنه مدعوم بأبحاث علمية كتير بتثبت فعاليته، علشان كده منظمات صحية كبيرة بتوصي بيه كخيار أول لعلاج اضطرابات معينة

★ يعني باختصار كدا، العلاج المعرفي السلوكي بيعلمنا نفكر بطريقة مختلفة عن نفسنا وعن المواقف حوالينا، بيخلينا نعرف إن الأفكار مش دايمًا حقائق، وإننا نقدر نغيّرها ونختار ردود أفعالنا، وده بيخلينا نعيش بشكل أهدا وأكتر سيطرة على حياتنا ومشاعرنا

تحيا مصر🇪🇬وعاش رجالتها