Ali Gaber

المقولة اللي بتقول ..الموظف المخلص مش بيشتكي و لا بيعترض، و بيسيب الشغل و يمشي في صمت
مقولة غلط.

المخلص هو أكتر واحد شايف الغلط و حاسس بيه..
وأكتر واحد متضايق لما يشوف الشغل ماشي غلط.
لأنه شايف ان الشغل مسؤولية مش مجرد مرتب.

اعتراضه مش قلة انتماء.. ده حرص.
وكلامه مش مجرد انه عايز يعمل مشكلة، انما دي محاولة إصلاح.

والرحيل مش دايما اختيار سهل عليه..
لان أغلب الناس بتكون محتارة بين إخلاصها و إصرارها علي ان يكون فيه تغيير مع واقع إداري مش بيسمع ورافض للإصلاح او التغيير.

مش أي مفتاح ممكن يفتح أي باب، ومش أي واحد يقعد على كرسي القيادة يبقى يستاهل يدي صفارة البداية.
والمدير اللي مش كفء وفي مكانه الغلط، عامل زي عسكري مرور سايب الشوارع مفتوحة لأي حد فالعربيات كلها تدخل في بعضها و تلاقي حوادث للصبح .. قيس ده علي الشغل مع الوقت المكان بيتحول لدوشة من غير شغل ولا إنتاج. ويوم ورا التاني تلاقي انهيار ورا انهيار ..

يقولك بكل فخر أنا مكتبي مفتوح للجميع دايمًا…
ماشي يا سيدي، المكتب مفتوح فعلًا.
بس أول ما تدخل تكتشف إنك دخلت مثلث برمودا
أفكارك بتختفي ..
طموحاتك بتتبخر..
و كل اهتماماتك بالشغل تضيع واحدة واحدة..

هو بيعرف يسمع علشان يقتل وقت، إنما مايعرفش يفهم علشان يعمل حل..
تدخل تكلمه وانت فاكر إنك هتطلع بخطة،
وتطلع ناسي إنت دخلت ليه،
ونسيت أصلًا إنت اتوظفت ليه و لا انت في شركة ايه😃

وهنا بقى النقطة المهمة اللي كل الناس مش بتاخد بالها منها..
مش كل باب مفتوح دليل وعي، ساعات يبقى وراه عقل مقفول…
واستمرار واحد مالوش رؤية ولا رأي على كرسي القرار
ده تصريح مرور لنتايج آخرها مش خير…
ومكان بيستهلك الناس أكتر ما بيصنع إنجاز..

دمتم ناجحين 😍

لو جبت ناس تقيلة
وسحبت منها القرار
إنت ما عملتش فريق…
إنت عملت متحف مواهب.

الموهبة من غير صلاحيات بتتجمد.
والخبرة من غير مساحة حركة بتضيع.

المحترف مش محتاج مدير يقوله يعمل إيه
محتاج قائد يفتح له الملعب
ويشيل من قدامه العوائق.

الفرق اللي بتكسب
مش أكتر ناس شاطرة،
لكن أكتر ناس مسموح لها تلعب.

فشلك في وقت من الاوقات ده خطوه في طريق نجاحك .
واختيارك الغلط في وقت من الأوقات ده خطوه في طريق تصحيح مسارك.

نصيحة لكل السادة المحترمين اصحاب الشركات تحديدا و السادة رؤساء القطاعات .. اللي بياخد المسئولية لازم يكون فاهم هو هيعمل ايه و لازم يكون معاه كل الصلاحيات اللي تخليه ينجح غير كده اوعي تقبل تشتغل بدون صلاحيات و قول لصاحب الشركة او رئيس القطاع اشتغلها بنفسك و بلاش تعذب الناس معاك .. لان الوضع في الشركات في مصر فعلا و خصوصا في مجال العقارات بقي صعب جدا .. مش كل صاحب شركة ينفع يدير و مش كل top achiever ينفع يدير و مش كل موظف قعد في الشركة سنتين ثلاثة ينفع يدير .. ادارة النفوس ليها نفس أهمية ادارة الفلوس. و يا تختار النجاح لشركتك او تختار انك تدير بنفسك و انت مش فاهم زي اي صاحب محل و تقبل بكل الخساير اللي بتنتهي في الاخر ان مفيش حد عايز يشتغل معاك.

كل عام و حضراتكم بخير .. عيد سعيد🥰