Balance

رسالة لكل أب فاكر إن دوره بس في الشغل والصرف…
صدقني، ولادك مش هيفتكروك عشان دخلتهم احسن مدارس ونوادى ولا لبستهم ماركات،بس هيفتكروك لما تبقى معاهم، لما تضحك، لما تسمعهم، لما تحضنهم وقت انجازهم ووقت وقوعهم .
الراجل اللي في البوست ده اشتغل وسهر وادّى من عمره سنين علشان ولاده، بس كلمة واحدة وجعته… لأنه اكتشف إنه كان غايب عن مساحة مشاعر واهتمامات ولاده.
فمش كفاية تكون بتصرف، لازم تكون حاضر.
كل لحظة بتفوت من غير ما تشاركهم فيها، هتتحوّل بينكم لمسافة، وكل ما الوقت بيعدّي المسافة دي بتكبر.

خلى بالك الزمن بيمشي، والأبوة مش شغلانة تتأجل لبعدين،
فمتستناش كلمة توجعك علشان تفوق وتكتشف إنك كنت بعيد.
ادخل حياتهم قبل ما يقفلوا بابهم، واحجز مكانك جوا قلوبهم مش بس في دفتر المصاريف..
وزى ما قريتها مرة مش فاكرة فين "من لا يشعر بوجوده في حياة أولاده، لن يجد لنفسه مكانًا في ذاكرتهم."
Psy.Eman Anwar

هو انتِ هدفك إن الحاجة تتعمل على أكمل وجه ؟
ولا هدفك إن ولادك يتعلموا يشيلوا مسؤلية نفسهم من بدري ؟

لو هدفك هو الكمال ، فانتِ ياهتجيبي لولادك إحباط إنهم مش عارفين يرضوكِ و يحسوا بعدم الكفاءة دايمًا
يا هتضطري إنك تعملي كل حاجة بنفسك و تطلعي ناس اتكالية !

و افرحي إنهم صحيوا رتبوا سريرهم حتى لو كان بالنسبالك منعكش
الهدف إتحقق و هو إنهم يتعوّدوا على النظام و شيل المسؤولية

بالتشجيع و التقبل هيطوروا مهارتهم بسرعة

اشهر واغرب متلازمه ياصديقي سمعت عنها كانت اي؟!

متلازمة مونخهاوزن أو (Munchausen Syndrome)

هو في الحقيقة سلوك نادر بيتمثل في تزييف الشخص لأعراض مرضية أو إلحاق أذى جسدي بنفسه وهو في كامل وعيه عمداً لاجتذاب الاهتمام الطبي أو العاطفي من اي شخص .

وفي الأغلب هتلاقي السلوك ده متكرر في بعض الأضطرابات النفسيه ذي اشهرهم الشخصية البينيه أو Borderline Personality Disorder والحقيقه هو إحساس متكرر داخل الفرد الي بيعمل السلوكيات دي بيكون عنده شئ من الخواء الداخلي

تعددت الأسباب ولاكن غالباً ما ترتبط بصدمات الطفولة أو الحرمان العاطفي، مع ميل لتعويض النقص في الحنان عبر لعب دور المريض للعائله او الأصدقاءاو الطبيب .

السلوكيات تشمل اختلاق أعراض معقدة ممكن مش تكون منطقيه بربط الكلام بالواقع الفعلي للمريض او جتي رصد الإعراض من قريب ،وممكن الموضوع يوصل ل إجراء عمليات إجرائية غير ضرورية، والتنقل بين المستشفيات فقط لإبهار الفِرق الطبية.

في اضطرابات كثييره تانيه بيذدهر فيها السلوك ومن ثاني أشهرهم هو الهيستريا من بقا أظهار سلوكيات غير طبيعيه بالمره .

وفي الآخر المتلاذمه دي مش معروفه كثيير عند الأطباء والمعالجين في الطب النفسي ولاكن ضروري جدا نسلط الضوء عليها .

استنونا في الجزء الثاني ♥️

Psy.Osama Al-Junaidi

ابنك ممكن يبقى صوته خشن، وعضلاته قوية،
بس لسه مش راجل…
لأن الرجولة الحقيقية تبدأ لما يتحمل مسؤولية نفسه.

يعني إيه مسؤولية نفسه؟
يعني يعرف إنه لو كذب… ده اختياره
لو غلط… يعرف يعترف
لو أخطأ في حد… يبادر يصلّح

الراجل مش اللي بيغلط ويتحجج،
الراجل هو اللي يواجه، ويقول "أنا آسف"، ويبدأ من جديد.

سيبك من اللي بيقولك "الرجولة ما فيهاش دموع"
الرجولة فيها دموع لو غلطت،
وفيها عرق لو اشتغلت،
وفيها قوة تقول "أنا اتحملت نتيجة قراري".

النبي ﷺ قال:
"كلكم راعٍ وكلكم مسؤول عن رعيته"
يعني حتى الطفل والمراهق مسؤول… عن كلامه، عن سلوكه، عن احترامه للناس.

ولما نعلّم أولادنا إن الرجولة مش بإنك "تبان قوي"
لكن بإنك "تكون قد أفعالك"
ساعتها نكون بنبني رجالة بجد.
---
ونفسياً لما بنربي ابننا على إنه دايمًا ضحية، أو بنغطي على غلطه، أو نلوم الظروف مكانه…
إحنا بنساعده يصنع شخصية هشة، ونخلق جواه بذرة الاضطراب.
وعشان كدا بنلاقى الشخصية دي لما تكبر ممكن تبقى:
– شكاكة زيادة عن اللزوم (paranoid)
– أو اعتمادية وما تعرفش تاخد قرار (dependent)
– أو تلوم الدنيا كلها وتتهرب من المسؤولية (narcissistic or passive-aggressive)

ده مش كلام تخويف…
ده الواقع اللي بنشوفه في العيادات النفسية كل يوم.
الراجل ما بيتخلقش فجأة…
الراجل بيتربى.
Psy.Eman Anwar

"ڤيب؟ ده مش موضة… دي بداية إدمان بشياكة!"

فيه حاجة غريبة بقت بتحصل حوالينا…
تلاقي شاب أو بنت في إعدادي أو ثانوي، ماسك ڤيب كأنه ماسك شوكولاتة!
والأغرب؟ إن بعض الأهالي شايفين إنه مش خطر…
"أهو أرحم من السجاير!"
لكن الحقيقة؟
الڤيب مش بديل آمن… هو شكل جديد من الإدمان، مغطى بنكهات فاكهة!

يعني إيه؟
النيكوتين اللي في أغلب أنواع الڤيب، هو نفس المادة الموجودة في السجاير، وبيشتغل على نفس الدوائر العصبية اللي مسؤولة عن الإدمان.
يعني باختصار: بيعلّق!

الدراسات بتقول إن المراهقين اللي بيجربوا الڤيب، نسبة كبيرة منهم بيتحولوا بعد كده للسجاير أو بيبقوا مدمنين نيكوتين مدى الحياة.

والمشكلة النفسية؟ إنهم بيربطوا بين "الهدوء" أو "التعامل مع التوتر" واستخدام الڤيب.
يعني بيبدأ يحصل تعزيز سلوكي سلبي: كل ما يتوتر، يڤيّب… كل ما يضايق، يڤيّب… وساعتها بيبقى بيدور على الحل برة نفسه.
طب إيه اللي يخليهم يبدأوا؟
الفضول + الضغط الاجتماعي + "الڤيب مش زي السجاير" = وصفة ممتازة للإدمان.

وللاسف ان الڤيب بيظهر في صورة شيء "cool" أو عصري، شكله جذاب، ريحته حلوة، والنكهات كيوت… بس اللي جوّاه؟ مش كيوت خالص.
وعلميًا؟
الاستخدام المتكرر للنيكوتين في سن المراهقة بيأثر على تطور الدماغ، خصوصًا في مناطق زي التحكم في الانفعالات واتخاذ القرار.
نضيف كمان زيادة فرص الإصابة بـ القلق والاكتئاب… لأنه بدل ما يتعلم يواجه مشاعره ويتعامل معاها، بيهرب للڤيب.
اللي محتاجين نفهمه:
ان الڤيب مش وسيلة تقليل ضرر… ده مدخل ناعم للإدمان.

رسالة لكل مراهق:
انت مش محتاج دخان علشان تبان…
ولا محتاج نكهة توت علشان تهدى.
قوتك مش في الفيب… قوتك فيك.
Psy.Eman Anwar

فيه حاجة بقت بتوجع القلب في الجيل الجديد من الولاد…
فى ميوعة فى مستوى الرجولة وخلل فى المفاهيم
بقوا مش فاهمين يعني إيه "يبقى راجل"!
مش بس من ناحية المسؤولية…
ده حتى مش عارف يحط حد للناس(صحابه) وهما بيقلوا ادبهم عليه،
يسكت لو حد شتمه أو شتم أهله، ويضحك لو الهزار فيه تقليل منه،
وبقى فاكر إن الرجولة بس صوت عالى أو فتح عضلات!
الرجولة مش كده خالص…
الرجولة إنك تربي ابنك يعرف إمتى يقول "لأ"،
يعرف يحترم نفسه واللي حواليه،
ويفهم إن الكرامة مش ضعف…
وان ضبط النفس من شيم الرجال..
وإن احترامه لنفسه مش هينقص من شعبيته، بل العكس.

فى صلح الحديبية؟
قريش كانت بتحاول تقلل من النبي ﷺ حتى في طريقة كتابة اسمه!
وقالوله: “لو نعلم أنك رسول الله ما صددناك”
النبي ما سكتش عن كرامته، بس ما دخلش في خناقة تضيّع القضية.
ووافق يكتب "محمد بن عبد الله" وهو واثق إنه رسول الله… حتى لو أنكروا. والسيرة مليانة مواقف ..

فالرجولة مش إنك ترد الإهانة بإهانة،
الرجولة إنك تختار إزاي ترد...وامتى وفين ترد... من غير ما تخسر نفسك...وتكون حُجتك قوية .

المدرسة بتشتغل، بس البداية من البيت.
كلموا ولادكم، فهموهم يعني إيه يبقوا رجالة بمعنى الكلمة…
اللي بيتعود يسكت على قلة الأدب وبيتخدع بالاهانة المغُلفة،
بيفقد احترامه لنفسه بالتدريج… وبيبقى عادي عنده الناس تدوس عليه.
علموا ولادكم إنهم يقولوا “لأ” لما يتحطوا في موقف يقلل منهم…
حتى لو الناس كلها شايفة ده هزار.
الحدود مش ضعف، الحدود أمان نفسي
والرجولة مش اللي بتتقال، الرجولة اللي بتتعاش.
كفايانا لوسي ابن طنط فاكيهه ✋

انجازات لا يراها أحد !❤
أفخر بانجازاتك كلها ..كلها !❤❤

قد اتقبل كونك إنساناً ناقصاً فالكمال لله .. ولكن لا اتقبل كونك كاذباً تعيش كذبك وتصدقه وتضيع الحقوق وتبخس الناس قدرهم✋🏻
الله يكفينا خبث لطفاء المظاهر

الطلبة الحلوين حبايبي اللى اخدوا الاجازة ومقضينها سهر🫵
دى دراسة نشرت في مجلة نيتشر للصحة النفسية من يومين على ٨٦٠٠٠ شخص اثبتت ان زيادة تعرضنا للضوء في الليل ليه علاقة سلبية بصحتنا النفسية وبيزود احتمالات تعرضنا للاكتئاب ، القلق المعمم واضطراب كرب ما بعد الصدمة ونوبات الهوس والذهان وايذاء الذات..

الأفعال هي التي تؤكد صدق المحبة أما الكلام فالجميع فلاسفة.
" أمّا الود فكلّهم يتظاهرون به، وأمّا المواقف فهي التي تثبت أو تنفي."
لا تهتم أبداً لما يُقَالُ لك ، بل اهتم لما يُفعَلُ مِن أجلكَ فالكلماتُ قد تكذبُ .. ولكنّ التصرفاتِ دائماً تقولُ الحقيقة !

كتييير فى الاستشارات والتقييمات بيبقى نفسي اكتب كدا ..
دور الاب بقا مقتصر على الماديات فقط واغلبهم ميعرفش اى معلومات عن اولاده..
عشان كدا العيال طالعة وخصوصاً الاولاد عندهم ميوعة فى مستوى الرجولة والجدعنة والشهامة..
الاب دوره مهم جدا للتوازن النفسي للطفل
ودوره اهم فى مرحلة المراهقة
بلاش تختزل دورك وتهمش نفسك ابنك فى زمن صعب ومحتاجك.