Basma Alaa

مصممة إنها أمه حتى بعد المسلسل ما خلص 🤣

- مفيش ست صحيت فجأة وقالت: أنا عايزة أطلّق!
مفيش ست قامت الصبح وقالت: يلا نهدّ البيت!
الكلام ده بيقوله اللي عمره ما شاف وجع ست وهي بتحاول تمسك طرف العلاقة بإيديها وسنانها علشان البيت يفضل واقف.

- الست ما بتجريش على الطلاق…
الست بتتجرّ ليه غصب عنها بعد ما تكون جربت كل الطرق اللي البشر يعرفوها واللي ربنا نفسه وسّعها.

الست اللي قررت تمشي…كانت قبلها اتكلمت… واتكسرت… واترجّت… واتنازلت… واتسحلت… واتظلمت… واتوجعت.
كانت كل مرة بتقول:
“هتعدي… بس المرة دي هتبقى آخر مرة.”
وكل مرة كانت بتلاقي نفسها بتبدأ من الصفر…
لحد ما كلمة “كفاية” بقت مش اختيار…بقت نجاة.

-محدش شافها وهي بتعيط لحد الفجر ومحدش سمع صوت قلبها وهي بتتحشرج من كتر الإهانة…
محدش شاف كم مرة وقفت قدام المراية تسأل نفسها:
“هو أنا قليلة؟
ولا أنا بس تعبت؟
ولا أنا ماليش حق أعيش؟”

- محدش شافها وهي بتمثل القوة قدام أهلها…
وتكتم وجعها قدام أصحابها…وتحط وش ثابت وهي من جوه منهارة…
وتقول “تمام” وهي آخر كلمة المفروض تتقال على حالتها.

الناس بتشوف قرار الطلاق…بس محدش بيشوف العمر اللي راح قبل القرار.
محدش بيشوف الروح اللي اتقهرت…ولا الكرامة اللي اتبهدلت…ولا الأيام اللي ماتت جواها وهي لسه عايشة!

- الطلاق مش نصر…ولا هزيمة…
الطلاق خروج من معركة مكسورة كانت بتحارب فيها لوحدها.
الطلاق محطة بتقول فيها للوجع:
“لحد هنا وبس.”

الست اللي اختارت تمشي…
ما اختارتش “وحدة”.
اختارت “نجاة”...اختارت تحافظ على عقلها اللي كان خلاص بيضيع…
وكرامتها اللي كانت بتتسحل في كل أزمة…
ونفسها اللي نَسيتها وهي بتحارب عن بيت محدش حارب معاها عشانه.

الست اللي مشت…ما هربتش...دي أنقذت اللي فاضل منها لما محدش فاضل يسندها.

واللي يجي يقولك “هي خربت البيت”…
قوله:
البيت اتخرب يوم ما رجولتك اتأجلت…ويوم ما صوتها اتقهر…ويوم ما قلبها اتكسّر…مش يوم ما مشت!

- "الطلاق مش نهاية…الطلاق بداية…
بداية مرحلة اسمها:
“أنا هرجع لنفسي… حتى لو رجوعي كان على أنقاضي