Scale Designs

إمتى نمحر حوائط المطبخ والحمام للسيراميك ؟!

لما يكون السيراميك اللى هيركب فى الحوائط مقاسة اكبر من 70 سم , يبقى لازم نمحر الحمام او المطبخ ونلزق السيراميك بمادة لزق (ستوكس يو ) والمادة دى من شركة كيماويات البناء الحديثه CMB

ودة بيكون بسبب :

إن البلاطه بتكون تقيله وطويله ف الصنايعي لما يجي يحط عليها المونه مش هيقدر يتحكم فيها كويس، وممكن تتكسر منه، ف احنا عايزين ماده تكون خفيفه تتحط علي البلاطه عشان الصنايعي يقدر يظبطها صح في مكانها.

مادة اللزق اقوي في التماسك من المونه.

سرعة التركيب .. بمعني لو الصنايعي هيركب بلاطه زي دي بمونه هياخد وقت أطول مما لو ركبها بمادة لزق.

غير كدا ان مادة اللزق بتمنع ظهور أي حشرات فيما بعد لان فيها ماده سامه بتقتل اي نوع من الحشرات فهيبقى مطبخك مفيش فية اى حشرات نهائى زى النمل وغيرة .

مادة اللزق بها مادة بتقفل معايا مسامات المحارة فتعزل رطوبة معانا.

مثلث الحركه في المطبخ

دا مثلث وهمي يعبر عن علاقة الحركة بين أهم ثلاث عناصر في المطبخ وهما الثلاجة والبوتجاز والحوض

فايدة مثلث الحركة إنه بيعلي الأداء الوظيفي داخل المطبخ، وكل ضلع من أضلاع المثلث يعبر عن الحركة المباشرة مابين عنصر والعنصر الأخر

وعشان مثلث الحركة يكون كفائتة عاليه لازم يتوفر فيه ٣ شروط:
أي ضلع من أضلاع المثلث لايقل عن ١.٢٥ متر.
أي ضلع من أضلاع المثلث لايزيد عن ٢.٧٥ متر.
مينفعش أي حاجه تقطع ضلع من أضلاع المثلث.

كل ما توفرت الشروط دي في مثلث الحركة، كل ما كان استخدامنا للمطبخ سهل ومريح

مشكله الرطوبه مش يتواجهك انت بس ، دي بتواجه معظم الناس، يعني تبقي قاعد في أمان الله وتتفاجيء بلوحه فنيه غير مرغوب فيها على حوائط بيتك، فان جوخ بنفسه ميقدرش يرسمها.

و غالبا اللوحه الفنيه دي بيكون سببها إما تسريب في مواسير التغذيه أو الصرف، أو الرمله اللي عملنا بيها السيراميك كانت شاربه مايه كتير ومع الوقت والظروف الجويه المايه دي بتتبخر وتطلع على الحوائط وتعمل الرطوبه.

طبعا بتسأل نفسك دلوقتي ايه اللي وصل المايه للرمله اللي تحت السيراميك!

هقولك انها ممكن تكون شربت مايه اصلا اثناء التشطيبات وظهرت مع مرور الوقت او ممكن يكون حصل تآكل في الفواصل اللي بين السيراميك و المايه بتدخل من خلالهم.

طب و الحل ؟!
اولا لازم نمنع مصدر التسريب، لان طول ما مصدر المايه موجود مهما عالجنا الرطوبه هتظهر تاني.

منعنا التسريب خلاص؟ نبدأ بقا نعالج آثاره فهنكسر الجزء اللي فيه رطوبه ده (الدهانات والمحاره) لحد ما نوصل للطوب.

وهندهن مادة عزل اسمها اديكور M، دي بندهنها وشين علي الطوب.

وهنعمل مرحلة الطرطشه بس هنضيف اديبوند ٦٥ من شركة CMB على مونة الطرطشه.

وبالنسبه لمونة الملو بتاعت المحاره هنضيف عليها اضافه غير منفذه للماء، وبعدها هنشتغل النقاشه بتاعتنا عادي جدا.