MindMasters

الحكاية مش مجرد فكرة، الحكاية أكبر من كده بكتير.

أسفين جدًا على التقصير.

كل واحد في ذا كريتڤ أد مؤمن إن بييجي علينا فترات بتخلينا نقصر، نقصر في حق الناس اللي بنحبهم، واحنا هنا بنحبكم، وعشان كده لازم نقولكم إحنا أسفين لإننا مقدمناش اللي كُنا بنحطط ليه، بس جيه الوقت اللي نرجع تاني ونكون قريبين منكم.

و البوست ده الغرض منه إننا نقولك إننا رجعنا نشاركك رحلتك يا كريتڤ.

هي الإعلانات هيكون شكلها ايه في الميتافيرس؟

تعتلى نشوف في حلقة يوم الجمعة. 💛

لكل كريتڤ، كريتڤ بلوك.

ده أمجد 👨🏻‍💼
أمجد داخل الشغل وهو رايق وبيصفر، وبيصبح على زمايله كالعادة، فـ لقى زميله قاعد حاطط إيده على خده، أستغرب جدًا، دا إحنا لسة في أول اليوم!

فـ سأل زميله أحمد وقاله: ماله المعلم؟
= قاله مافيش دا عنده Creative Block.

قرر أمجد إنه هيساعد زميله، ودخل عمل سيرش عن إزاي نتخلص من الـ Creative Block، ومقالات تشيله ومقالات تحطه، لحد ما قال، وجدتها!💡

وخد زميله على جنب، بس مش علشان يعرفه غلطه لأ، علشان يشرحله أسباب البلوق وحلوله.

وده بسبب ضغط الشغل والضغوطات النفسية والروتين اللي أتعود عليه، وأغلب الناس في الـ Creative industry بيمروا بيه، سوا Content Creator أو Designer، حتى الرسامين والمُلحنين بيعدي عليهم بلوق.

ويبتدي يظهر عليه حالة من فقدان الشغف والسخونية، وهتلاقي على لسانة جملة واحدة بس، "أنا مش لاقي أفكار"!

والـ Creative Block مش سببه بس فقدان الشغف أو الضغوطات، لأ.

ده كمان بيعتمد على أسباب نفسية وأسباب علمية

وهي
1• بيكون عندك حالة من الخوف من الفشل والأنتقادات اللي بتخليك تتراجع عن أفكارك، و تستنفذ كل طاقتك الأبداعية، وتغرق نفسك في الشك في قدراتك، وموهبتك، فـ الحل إنك تسمح لنفسك تفشل، ومتقلقش من النتيجة.

2• وجودك وسط مكان عشوائي، متلغبط، سواء مكتب مش نضيف أو أوضة مش مترتبة، ده بيخليك مشتت جدًا، وتايه، والحل إنك تهتم بالبيئة اللي حواليك علشان تكون أهدى وأنت بتطلع أفكار وتقدر تسيطر عليها وتدونها من غير خوف من الـ Deadline.

3• قرب من الحاجات اللي ممكن تفصلك، سواء فيلم أو ميوزك لطيفة بتحبها، أو جيم على موبايلك، أو حتى تقوم تتحرك في المساحة اللي حواليك، شم هوا من البلكونة، ده هيساعدك تفصل وتاخد بريك، وممكن وقتها تلقط فكرة من الفيلم وتعمل عليها إسقاط، وكدة بقى معاك طرف خيط الأفكار.

4• كافئ نفسك قبل الشغل، وأتعامل معاها على إنها طفل وأسأل نفسك كام سؤال
- جعان؟
- عطشان؟
- زهقان؟
-متضايق، جاضض؟
أتطمن عليها كل شوية، وكان عندها حق سنيكرز لما قالت، أنت مش أنت وأنت جعان، فـ متشتغلش على معدة فاضية، لإنك هتفقد تركيز، ومش هتعرف تنتج أفكار.

* حسس نفسك إنك مدربة يوجا، شغلها معتمد على الهدوء والأسترخاء، وخلي بالك إنك بتعمل ده علشان بتحب شغلك والمفروض يكون ممتع ليك.

5• خدلك تقليبة في الفيس بوك، أو الانستجرام، ساعتها ممكن تظهرلك فكرة، أو أتكلم مع شخص مُلهم بالنسبالك ومناقشته مُثمرة.

✅ كل ده كان الجانب النفسي اللي ممكن يوقفك.

نيجي بقى للجانب العملي.

- أكتب وأقرأ كل يوم، حتى لو حاجة مالهاش علاقة بمجالك.

- عيد صياغة محتوى قدمته قبل كدة، أو شوف ديزان قديم عملته من مدة.

- راجع الوكر اللي بتخبي فيه أفكارك القديم وفصصه، شوف أنت كنت كاتب إيه؟

- غذي عقلك بأساليب مختلفة من كل حتة، هتطلع بحاجات حلوة كتير زيك كدة.❤️

- خلي معاك نوت بوك، دون فيها أي فكرة بتيجي على بالك، هتنفعك بعدين.

وفي الاخر عرف نفسك أنك طبيعي تمر بوقت زي ده، فـ متستسلمش ليه واستغله صح، علشان تخرج منه بأقل الخساير.

وحاجة حصرية من ذا كريتيف أد، الأفكار بتيجي في الحمام. 😁

وطبعًا مش هتصدقني لو قولتلك إن جالي Creative Block قبل ما أكتب البوست ده، هتصدقني صح؟

5 حملات إعلانية مش ممكن يتنسوا.

كل زمن ليه اللي بيميزه، بس إيه رأيك بقى لو قولتلك إن في Campaigns كان مميزة في كل زمن، تعالى نتعرف عليهم سوا.

1- إعلان نايكي - Nike: Just do it

في سنة 1988 كانت مطاعم الدليفري والوجبات السريعة انتشرت في أمريكا بشكل قوي، ودا اتسبب في إن أغلب الأمريكان بقيوا كسولين وتُخان جدًا، الاهتمام بالرياضة وقتها كان قليل فكان محتاج مجهود جبار عشان الناس ترجع تتمرن من تاني.

شركة Nike وقتها كان بتستهدف جزء صغير جدًا من الناس، كانت مش بتشوف قدامها غير الرياضيين المحترفين وطلاب المدارس الثانوية والجامعات، ولسوء حظها حصل ركود اقتصادي بشع كانت نتيجه إن نايكي استغنت عن 20% من العمالة، المبيعات قلت بنسبة 18% والأرباح كمان قلت
بشكل كبير وصلت 40%.

ولإن شركة Reebok كانت ذكية، حللوا ودرسوا السوق كويس ولقيوا إن فيه Trend جديد: الستات مهتمين بالرياضة واللياقة البدنية، عملوا أحذية مناسبة ليهم، وخدوا نصيب الأسد من Nike حرفيًا.

تقوم نايكي تعمل إيه عشان تعدي الأزمة دي؟ وسعت الـ Target Audience بتاعها، بعد ما كان مقتصر على الرجالة بس بقت تستهدف رجالة وستات وأطفال وعواجيز، وفي يوم من الأيام الشعب الأمريكي اتفاجئ بإعلان على التليفزيون مدته 30 ثانية بيظهر فيه عداء الماراثون الأمريكي أيقونة سان فرانسيسكو Walt Stack بيجري في الشارع بالبوكسر، واللي كان وقتها عنده 80 سنة، طلع يقول إنه بيجري مسافة 27 كيلو متر مع شعار Just do it في آخر الإعلان وبس كده!

بساطة الإعلان وتفصيلته الصح حفزت الناس على المشاركة، المبيعات زادت عن السنة اللي قبلها بنسبة 27%، ولما حسبوا المبيعات كانت حوالي 800 مليون دولار في سنة 1988 (سنة إطلاق الحملة الإعلانية) وعدت الـ 9.2 مليار دولار بعد 10 سنين. ولحد دلوقتي شعار نايكي ملهم وسبب أساسي في نمو الشركة.

2- إعلان ?California Milk Processor Board: Got Milk

عندك لبن؟

دي الجملة اللي استخدمها مركز معالجة الحليب في ولاية كاليفورنيا الأمريكية في إعلان بسيط وظريف، الإعلان بيقول للجمهور المستهدف بكل بساطة ماتنسوش تشربوا اللبن عشان هو مهم لعضمكم وصحتكم!

والسبب في دا إنهم عملوا تجربة بحثية على مجموعة من الناس سنة 1993، وطلبوا منهم يبطلوا شرب لبن أسبوع كامل، ولما سألوهم حسيتوا بإيه طول الفترة دي، النتيجة كانت إحساسهم إن يومهم كان صعب وناقص حاجة. ومن هنا جت فكرة الإعلان: Got Milk؟

طيب والإعلان اتنفذ ازاي؟

فريق التسويق جت له فكرة دمها خفيف، قالك احنا نكلم شوية ناس من مشاهير أمريكا ونخليهم يشربوا اللبن ويترسم لهم شنب واضح باللبن دا، وفعلًا اتعاونوا مع مجموعة من المغنيين والممثلين وبتوع الرياضة وطبقوا عليهم الفكرة والناس حبتها وتفاعلت معاها. وفي أول سنة من انطلاق الحملة، المبيعات زادت لحد 7%.

مش بس كدا، دا سمعة الإعلان عدت حدود البلد وانتشر بشكل كبير، والناس عملته مادة للسخرية والهزار زي الـ Mems دلوقتي كدا. الجميل في الإعلان إنه ماستهدفش الناس اللي مش بتشرب لبن، لأ دا وجِّه رسالته بشكل لذيذ لناس بتحب اللبن وكان بيفكرهم يشربوه.

3- إعلان De Beers: A Diamond is Forever

تخيل إعلان واحد محطوط في مجلة ولا واخدله كام دقيقة في التليفزيون يغير صناعة كاملة للأبد!

أهو دا بالظبط اللي حصل سنة 1948 لما شركة De Beers -وهي شركة مشهورة بتبيع مجوهرات وألماس- طلعت تقول والله يا جماعة الألماظ مش حكر على التفاخر والزهو الاجتماعي والكلام دا كله، وبدأت تعيد التعريفات واحدة واحدة إن الألماظ بيدوم للأبد وإن وجوده مهم وبلا بلا بلا، من الآخر الكابلز المخطوبين أو المرتبطين حسوا إنه لازم يشتروا ألماظ.

تعمل إيه "دي بيرز" عشان تلفت نظر الناس وتقنعهم أكتر بالفكرة؟

اتفقت مع شركة إعلانات اسمها N.W Ayer عشان تحسن صورة الألماظ وتبرز مميزاته وتزق المبيعات شوية، وده كان جزء من الحملة
اتفقت مع مجموعة من نجوم السيما والمشاهير وصورتهم وهما لابسين الخواتم الألماظ الشيك بتاعتهم

ومن وقتها لحد دلوقتي والماس مهم للشعب الأمريكي بفضل الحملة دي.

4- إعلان Volkswagen: Think Small

كلنا عارفين إن أمريكا بتحب تصنع العربيات الضخمة، بس في الستينيات كان معروف أكتر في الولايات المتحدة وقتها إن الناس هناك مش بتركب غير العربيات الكبيرة الواسعة، وإن العربيات الألماني الصغيرة السحب عليها قليل أوي.
شركة العربيات المشهورة Volkswagen لعبتها صح، قامت اشتغلت على إعلانات في المجالات وشوية يفط Outdoor، لحد هنا الكلام عادي، الكورة جت في الجون لما اعتمدوا على مساحة بيضاء كبيرة والعربية بتاعتهم في نص المساحة دي، وبيقولوا بكل ثقة احنا هنا، عربية صغيرة ولذيذة.

في حين إن البراندات التانية كانت بتملى الإعلانات بتاعتها كوبيز وصور وألوان، وإعلان فولكس فاجن كان مميز وسطهم الزحمة وملفت للأنظار، والأهم من كدا إن الشركة كانت صادقة مع جمهورها ومابعتش الهوا.

5- إعلان Coke: Share a Coke

الإعلان دا لو جيبت 10 بني آدمين -خصوصًا الشباب وأنت واحد منهم- وسألتهم شاركتوا في إعلان Coca-Cola بتاع الأسامي المطبوعة على علبة الكان ولا لأ، 9 منهم هيأكدوا إنهم تفاعلوا مع الإعلان واشتروا الكانز دي أو على الأقل حبوا الفكرة وشاركوها مع أصحابهم.

الموضوع ابتدى في 2011 في أستراليا، لما كوكاكولا أعلنت عن حركة ظريفة جدًا وهي إن الشركة نزلت الكانز بأسماء ناس كتير من اللي متعودين يشتروا منها، أمريكا ماكدبتش خبر وعلى طول طبّقت الفكرة عندها لما شمت ريحة نجاح كبير جاي في السكة.

وطبعًا لما الفكرة الجامدة دي نزلت هنا في مصر مش محتاج أقول قد إيه كسرت الدنيا، وحققت increase sales وEngagement Rate عالي جدًا جدًا وقتها.

وده يرجع لعبقرية كوكاكولا وطريقتها الجذابة في اللعب بالمشاعر، فالمعروف عنها إنها على طول بتتبنى Concepts زي الفرحة، المشاركة، والسعادة.

الـ 5 إعلانات دول اختلفوا في طريقة التنفيذ، في رؤية المخرج، اختلفوا حتى في العصر اللي اتصور فيه كل إعلان منهم. بس اتفقوا في حاجة مهمة أوي، وهو إن رسالتهم للجمهور كانت واضحة وسهلة، عشان كدا وصلت لقلب كل اللي شافوها.. ولفت العالم.

تفتكر الإعلانات دي نجحت بالصدفة، ولا فعلًا أفكارها كانت عبقرية واتنفذت بصياعة؟

هو انت فعلًا بتحب MacDonald's ولا فيه سر؟

فكرة انك تعمل Campaign تنقذك في وقت الشركة بتاعتك بتنهار ممكن يكون غريب، بس ماك كانوا شايفين ان ده الصح والطريقة اللي هتخليهم مكملين.

ومش بس ال Campaign اللي فضلت مكملة، دي قدمت لينا واحد من أقوى ال Slogan على مستوى العالم.

أتفرج على أول حلقة من ذا كريتڤ أد دلوقتي على ال Youtube وخلينا نقولك أول سر ومتنساش الشير وانت بتاكل ال Big Mac.

لينك الحلقة:- https://www.youtube.com/watch?v=8a2Ucfgbw8I

هو انت فعلًا بتحب Macdonald's؟

سنة 2001 كانت سنة صعبة شويتين على ماكدونالدز، انخفاض في المبيعات، الشركة بتقع ومشاكل في الصورة الإعلانية.

بس وقتها ماكدونالدز في عز ما هي بتغرق أعلنت عن مسابقة بين Global Advertising Agencies في تقديم Campaign جديدة ونجحت Heye & Partner وهي German Agency في الخروج بواحدة من أشهر وأنجح ال campaign على مستوى العالم وهي " I'm lovin it ، أنا بحبه".

أتفرج على الحلقة الأولى من The Creative Ad النهاردة على ال Youtube الساعة 7 عشان تعرف تفاصيل ال Campaign كاملة.

تابعونا على ال Youtube ال Link أول Comment. 👇💛

تفتكر إيه علاقة نابليون بونابرت بالـ Advertising؟

سنة 1798 بدأت الحملة الفرنسية على مصر بقيادة صاحب نظرية الـ Napoleonic propaganda وهي مش مجرد نظرية دعاية لا هي نظرية اللى هيجى على السكة هيزعل.

نابليون بكل بساطة قدر يكون أقوى قائد عسكري يستخدم الدعاية للترويج لصورته ومهاراته بالشكل اللي يخليه يفوز بمعارك قبل ما يدخلها لدرجة أنه أستخدم الـ Advertising أو الـ Propaganda لفرض سيطرته على المجتمع طب.

مكنش سهل على أن إمبراطور عسكري يقدم نفسه كبطل ثوري إلا من خلال أقوى سلاح موجود وهو الـ Propaganda، بكل بساطة نابليون عرف بدري قيمة السلاح ده في وقت الحرب، وبدأ يطبع صحف ومنشورات مختلفة تدعم الجيش بتاعة والجنود عشان يحسسهم انه قريب منهم وبيضحي عشانهم وفي نفس الوقت عشان يفكرهم انه هو البطل بتاعهم الوحيد لإنه كان خايف ان حد ياخد مكانه.

لدرجة أن في حربه مع النمسا كان سلاحه الأول هو الـ Propaganda بس للطرفين بقى، مع جنوده يقولهم اصبروا من خلال الصحف والمنشورات ويحاول يوصل منشورات وصحف للجانب النمساوي موجود فيها معلومات عن قوة الجيش وقد ايه ان النمسا هيتسمح بوشها الأرض.

اللي عملة نابليون موجود دلوقتي وسطنا وفي مننا بيعمله، بس فكرة انك تستخدم الـ Advertising بأفضل شكل مناسب ليك وتعرف قوتها الحقيقية ده مش سهل.

سنة 1941م ظهر أول إعلان على التلفزيون في العالم على الإطلاق، وكان بيسوق وقتها لشركة "Bulova" المعروفة إنها شركة ساعات ومجوهرات فخمة جدًا، واللي يخلي شركة زي دي تعمل إعلان رغم إنها معروفة هو إن السوق مالوش كبير، ومتوقع دايمًا ظهور منافسين في الوقت اللي بتبقى فاكر نفسك مكتسح، ممكن يجي إعلان واحد لشركة منافسة تخطف جمهورك ويعلم مع الناس حاجة كده نفس منهج نابليون بس من غير حرب.

الموضوع موقفش عند نابليون ولا Bulova، لأن سنة 1950م ظهر إعلان من أقدم الإعلانات في مصر، كان عن كروسلي التلاجة الوحيدة ذات الأرفف في العالم، ومن وقتها بدأوا يستخدموا اليُفط ويعلقوها في الطرق، والاعلانات بدأت تاخد كذا شكل تاني غير اليُفط وبس، بقى في إعلان مسموع في الراديو وإعلان بيتعرض على التلفزيون.

و سنة 1980م ظهر إعلان شيكولاتة چيرسي واكلة الجو، والإعلان كان واكل الجو فعلًا، لأن أول مرة المصريين يستخدموا الأغاني في الإعلانات، واللي ساعدهم خفة دمهم، ومن بعدها فهموا إيه أكتر حاجة بتسيب آثر مع الناس.

نابليون مبقاش موجود بس اللي فضل منه درس قوى جدًا للإستخدام الـ Propaganda لدرجة اننا ممكن نكون بنستخدم نفس طريقته بس مش عارفين، وبما اننا بنتكلم عن إمبراطور متنساش بقى بكل ديكاتورية تعمل شير، وتمنشن صاحبك عشان تقوله ان ده أول بوست على ذا كريتڤ أد، خالصة!

أسفين على التأخير.

أول ما بدأنا Creative Ad قررنا اننا نشاككم كل حاجة بنعملها، و أي حاجة وقفت في طريقنا.

احنا اتأخرنا شهر كامل عن المعاد اللي المفروض كُنا هنبدأ فيه، بسبب ال perfectionism، من كتر ما عايزين الحاجة تطلع مثالية وملهاش زي بقينا مركزين على كل خطوة بتتعمل وغيرنا حاجات كتير مره واتنين وتلاته لحد اما اتدخل أكتر من شخص عشان يكون من العيلة وبقينا 8 أشخاص بخلفيات وصناعات مختلفة كلهم مؤمنين بالهدف بتاعنا.

اتأخرنا بس احنا جايين النهاردة هنا، ويوم الأربعاء على ال Youtube
Youtube Link:- https://bit.ly/3sPkW1O

وخليكم فاكرين ان لكل كريتڤ، كريتڤ أد.