Aqualectra Utility

Djaweps, 4 di yüni, nos a selebrá un paso sumamente importante den Kòrsou su futuro energétiko ora nos a yega e punto di mas haltu den konstrukshon di Salu Power Plant!

Ku e kresementu ekonómiko i turístiko di nos isla pero tambe faktornan manera kambio di klima global, demanda pa koriente stabil i konfiabel ta sigui krese. Salu Power Plant ta bai oumentá nos kapasidat di produkshon ku un total di 40 MegaWatt(MW). E forsa adishonal akí, huntu ku nos mulinanan di bientu, e Sistema di Almasenahe di Energia pa medio di bateria (BESS) i e Sistema pa Maneho di Energia (EMS), lo yuda pa e servisio na kliente keda stabil na tur momentu, asta ora e demanda ta haltu. Alabes, e planta nobo akí lo duna nos e espasio pa mantené un skèdjel di mantenshon konsistente durante henter aña pa tur mashin den produkshon.

Aparte di a yega e punto di mas haltu den konstrukshon di Salu Power Plant, e kuater motornan di Wärtsilä ku kapasidat di 10 MW ku lo bai operá na e planta ta instalá na nan lugá. Konstrukshon ta sigui progesá ku pasonan firme i nos ta spera ku pa e último kuartal di e aña akí, e promé kWh lo sali for di Salu Power Plant.

Salu Power Plant ta un invershon importante den Kòrsou su futuro energétiko. Ku kada paso, nos enfoke ta seguridat energétiko, kontinuidat i stabilidat operashonal i bienestar a largo plaso pa kada kas i negoshi na Kòrsou.

Wak e video kompleto pa bo mira e gran progreso i e bríndis di e momentu importante akí.

Trabounan na nos planta nobo di koriente, Salu Power Plant, ta den ful swing i nos ta yegando na un punto importante den e proseso di konstrukshon.

Den e vidio akí, Renaldo de Oliveira ta splika un tiki mas tokante progreso den trabounan riba e planta di koriente. Na momentu di e grabashon ya tabatin 2 di e motornan grandi di Wärtsilä instalá riba e planta i tabata falta solamente 2 mas pa keda instalá. Kada motor ku kapasidat di 10 MW. Na e momentunan akí, tur 4 motor ta na nan lugá den e ‘Engine Hall’ di Salu Power Plant.

Tambe nos a kòmbersá ku Jeffreyson Paris i e ta splika ku konstrukshon di e 'Engine Hall' ta yegando su punto di mas haltu. Salu Power Plant ta bai oumentá nos kapasidat di produkshon ku un total di 40 MegaWatt (MW). Segun plan, nos ta spera ku pa fin di e aña akí e promé kWh por sali for di Salu Power Plant pa bo kas i negoshi.

Ku kada paso, Aqualectra ta dal un stap mas serka di nos kompromiso pa brinda abo servisio konfiabel, pagabel i duradero. Salu Power Plant ta parti di nos esfuersonan pa fundamentalmente sigui sirbi abo.

Si bo a pèrdè nos vidionan anterior tokante desaroyonan di Salu Power Plant, bo por wak nan via e siguiente lenknan:
Promé Video: https://www.facebook.com/share/v/1D9EAUaaBw/
Di dos Video: https://www.facebook.com/share/v/1CnMuoFhxU/