Banggnarson

Dr Schiri luegt uff d Uhr, hebt dr Arm und pfifft.
Draumkombinatione, Steilpass und dr Ajeti trifft.
Tabälle hed nur no Blätzli wyter hinde, wird Euch gfalle,
isch laider nur e Fata Morgana gsi, wäg dr Hitz in St. Galle.

Im 2008 hänn die Vereinigte Emirat fir ganz ganz viil Gäld,
e grosses Dürmli baut. Mit 828m dr heggschti uf däre Wält.
Syt geschter luegt dr Scheich aber druurig us sym Schloss.
S'heggschte Bauwärk isch jetz im Heiko Vogel si hoochs Ross.

In Lampebärg do sinn nit alli immer häll.
E Zwilling entschaidet zwar gärn schnäll.
Schultz hänn alli andere. Kritik darfs nit gää.
Dorum duet me wiider dr Vogel us dr Volière nää.

In Basel isch gmietlig bitzli am spaziere,
e Vari-Aff das ka au mol bi uns bassiere.
Lauft z’Nacht duur d Stadt, kai Saich.
Es bestoot kai Gfoor in kaim Beraich.

Do schreggt kain uff ab dääne Mäldige,
denn dä isch härzig und aifach z‘bändige.
Bi dr Schwoobe e Lai, kasch nit muurre.
Sogar entloffene Dier hänn dert die gresser Schnuure.

Syydlich vo Berlin am ummezottle,
e Laie-Maitli usbyyxt bi groosse Dottle.
Lauft z’Nacht duure Wald, hed Biss
und vo allem Fremde groossi Schiss.

D’AFD schreggt uf ab dääne Mäldige,
als Maskottli wänn sie’s sofort bändige.
Dr Lai basst wirgligg perfäggt, ich stuun.
Nit wägem Biss! Nai, dä isch au bruun.

Ych wach uff nach ere sehr unruige Nacht.
Wäge Nervoosideet! Ha mr kaine Sorge gmacht.
D’Gnei sinn bitz waich, surrt bitz im Maage,
aber das due ych hitt saugärn erdraage.

Ych mach mi fertig, ab in mi gliebti Stadt.
Zies rotblaue Liebli a, hoff s goot alles glatt.
Es sinn alli baraat, d Stadt isch zimpftig voll.
Frinde, Familie, Alti und Jungi. Es wird doll.

E Fuessballspiil – mee nit? Nit unseri Sicht!
Es isch vyyl mee, hitte goot’s um Gschicht.
Unseri Gschicht mit Dir – in Rot und Blau!
Mir liebe Di und das waisch du ganz genau.

Du gheersch zu uns und duets au mool wee,
Liebe FCB: hitte wänn mr alli zämme mee.
FCB-Fan kasch nit wärde, das muesch sy.
Und doorum sinn mir an dinere Siete drbi.

S goot richtig Joggeli. Euphorie in dr Luft.
Volli Drämmli, Bier und au Petardeduft.
S’Stadion fillt sich. Alli sinn do aane ko.
Uff dini Steergge kenne mir is verloo.

Mir draage di derfiir die ganzi Zyt.
Aber mir hänn e wirgligg groossi Bitt.
Hol das Ding. Wird’s au no so hart.
Hitte wänn mir das Floränz erstarrt.

E Fescht mit eme Pokal als Gschängg.
In dere Saison? Wär hätti das dänggt.
Aber jetzt kasch du das wirgligg schaffe.
Trotz 57 Spiil muesch di noonemool ufraffe.

Bring das Ding haim. Fir dr Babbe, dr Sohn,
d‘Dochter, Alti und Jungi. S isch unsre Lohn.
Und denn isch s kai Spruch und kai Gerede:
Denn kennt is in Europa aber wirgligg jede.

Meh gheert ebbis entfärnt bitz schalle.
Dumpf, diffus, singe und au lutt knalle.
S kunnt immer neecher, s dreent und vibriirt.
Rotblau und schwarz sinn sie uniformiirt.

Vo dr Ponte Vecchio bis zer Kathedrale,
gsesch die Gsichter dr Daag lang strahle.
D Mannschaft verbasst sich dr letztschti Schliff.
D Minute rinne. Jetzt kunnt scho dr Apfiff.

Hinter dir duet dr zwelfti Maa wieder stoo.
Sie sinn ins Stadion oder vor e Färnseh ko.
Was mir mit dir erläbe, isch hoch emozional.
Jetzt bringet uns alli in dä verdammti Final.

Vorwärts FC Basel 1893

Dr Blick duet wiider mool gege Basel hetze
und d'Headlines mit aim vo dr Xhakas bsetze.
D'Super-League-Saison wird wool ooni Di ände,
aber Tauli: Du blyybsch fir immer unseri Legände.

Bildquelle: .34