HUNNE BASEL

Alässlig em Niklaus Lang sym runde Geburdsdaag, hänn mir für aimol ihm dörfe e glaine Helge überraiche. Mir HUNNE gratuliere dir zum Wiegefescht und bedangge uns, für die viele tolle Bilder wo du immer vo uns machsch an dr Birsyg-Sinfonie.

Merci viel mol Niggi und bis hoffentligg bald wieder mol!

Hesch Luscht uff e tolli Truppe, machsch gärn Muusig und hesch di Instrumänt im Griff - denn mäld di bis uns!

PS: Au im Vortrab kasch bi uns als vollwärtigs Mitglied mitmache.

Freunde der gepflegten Blasmusik

Laider isch d'Fasnacht 2026 scho wieder Gschicht. Was bliebt, sinn traumhaft schöni Erinnerige: glungeni Ufftritt, e grossartigs Publikum und e toll Sujet.
Unsere Dangg goht an alli, wo die Fasnacht unvergässlig gmacht hänn!!!

Was au no bliebt isch dr Bummel am 15.03., dernoo gohts in die verdienti Pause. Trotzdäm freue mir uns jetzt scho uff e 15.02.2027, wenns wieder heisst "Yystoo".

Hou Hou Hou,
euri HUNNE BASEL

Sujet: Der Dootedanz vo Baasel – e immersivs Erlääbnis

Requisit: Lääbt und vergoot
Vordraab: Fiert d Vergängligkait vor Auge
Major: Giigelet bis zletscht
Spiil: Isch sich synere Stäärbligkait bewusst

Imagine Picasso, Klimt, Hodler und Klee -
Immersivi Uusstellige git s mee und mee,
Und miir vo de HUNNE finde s aifach e Hit,
Und mache dernoo by däm Trend jetz au mit.

Dynamischi Erfaarig und Interaggtion,
Sound, Thäggscht, Design und villicht Projeggtion -
Folg unsere Schritt und dauch mit is yy
In die neischti Foorm vo Carnival Reality (CR™):

Um 1440, esoo nimmt me s aa,
Mache sich der Witz und syyni Gselle draa,
Bim Predigerglooschter eppis Gettligs z erschaffe,
Uff der Kiirchhoofsmuur fir all die wältlige Affe.

Vom Sindefall bis zem jingschte Gricht
Verzellt das Wäärgg die eewig woor Gschicht,
Ass der Schlussaggt, woo me sis Lääbe verloot,
E letschts Dänzli isch, und zwoor mit em Dood.

Aaber au an däm Fresko gnaagt der Zaan vo der Zyt,
Und alli Reschtaurierige bringe halt nyt.
S verjääst soo gryyslig, oh bhiet is Gott,
Dass d Stadt dä Schandflägg besittige loot.

Nur weenigi Bruchstigg het me kenne bewaare,
Woo im Historische Museum iiri Gschicht offebaare.
Und hitt zellt unsere Dootedanz, gopferdoori,
Zu de wäältwyt bikanntischte Memento Mori.

Vor Abryss het der alt Mätti Merian, zem Gligg,
Kupferblatte gmacht vo jeedem ainzelne Stigg,
Und in Buechfoorm het äär s au grad bubliziert,
Dass me waiss, wäär der Gvatter us em Lääbe fiert.

Eb alt, eb jung, eb guet ooder schlächt -
Em Sänsemaa sinn alli ains und rächt.
Eb ryych, eb aarm, eb bees ooder hailig -
Äär holt amänd alli ooni Underdailig.

Elai e Naar erkennt scho uff Äärde,
Dass miir us Staub koo sinn und Staub wäärde wäärde,
Und miir wien e Sandkoorn im Gfääss vo der Zyt
In d Gschicht yyneriis’le wie alli andere Lyt.

Der Dood wiird ändlos uff em Wälteagger danze,
So schafft äär wiider Ruum fir ganz neii Pflanze.
S Saatguet vo morn spriesst uff der Äärde vo gescht,
Und der Reige mit em Gvatter isch aigentlig e Fescht.

Im Momänt waggst vyyl Ungrut, es isch e Gruus,
E mänggi Pflanze versäärblet und stiirbt vill z frie us.
Miir froogen is drum, eb me de Haini kennt bätte,
As äär statt z danze aifach emool richtig wuurd jätte!

Mir freue uns uff's kommende Weekend, wo mir an dr Fasnacht in Thun unterwägs sinn. Viele Dangg Thuner Fasnachtsfreunde für d'Yylaadig.

Nach dr Wiehnacht isch vor dr Fasnacht
Am 10. Januar starte mir mit em zweite Probedaag und zwei Ufftritt in die schönschti Zyt vom Joor. Dernoo folge zwei Ufftritt an ere Benefizveraastaltig in dr Saafre-Zunft, e Weekend in Thun und e Waageyyweihig in Oberwil. Als Start vo dr Basler Fasnacht denn no unser Aapirsche am Samschtig vorhär. Details derzue findsch jewils uff unserer Websyyte.

Bis dört aahne wünsche mir euch e tolle Abschluss und naddürligg e guete Start ins 2026.

Aimol meh, e HÄÄRZLIGG DANGGSCHEEN allne Bsuecher und Gascht-Guggene vom HUNNE Gelaage XIX

Dangge au unserm internationale Gascht, em Alan 😉

Bilder sinn uff www.hunne.ch uffgschalte

Geschter het die zwanzigschti Generalversammlung im Restaurant Fat-Inn stattgfunde. Es bliebt alles bym Alte – mir setze wyterhin uff Kontinuität und freue uns uff e spannends neuis Vereinsjoor!
E paar Mitglieder hänn uns verloo, glichziitig freue mir uns über früsche Wind: neui Interessierti stosse zu uns. Häärzligg Willkomme! 💪😊

Viele Dangg an unser Lieblings-Vroni und ihrne Hälfer für d'Location und d'Bewirtig. Au an d'Barbara Muchenberger e häärzligg Danggscheen für die tolle Caps.

Hou Hou Hou
HUNNE BASEL

PS: Vereinsliebi goht bi gwüssne buechstäbligg unter d'Huut 🤣🤣🤣

Geschter hänn mir unserem Gründigsmitglied und langjöörige Bresidänt zum halbe Joorhundert e Überraschig dörfe überreiche. Mir könne gar nit so viel Dangg ussspräche für all das, wo du für unsere gliebte Verein duesch mache.
Happy Birthday "el Bresidente" und uff alles wo no kunnt!
Hou Hou Hou

Viele Dangg em Titus vo Fasnachtskeramik für das prachtvolle Kunschtwärgg

Die und wyteri tolli Impressione vo dr zb. Birsyg-Sinfonie 2025 findsch in dr Bildergalerie vo unserer Websyyte www.hunne.ch
Häärzligg Danggscheen für die tolle Helge Niggi Lang