Fieri Tv

Përshkallëzohet skandali me Raiffeisen Bank, paratë zhduken edhe nga llogaritë e bllokuara


Situata lidhur me zhdukjen e parave nga llogaritë e Raiffeisen Bank është përshkallëzuar edhe më tej, pasi informacionet më të fundit tregojnë se nuk bëhet fjalë vetëm për qytetarë që kanë rënë viktimë e ndonjë mesazhi mashtrues.

Të dhëna të reja tregojnë se sistemi i sigurisë së vetë bankës është komprometuar tërësisht, duke i lënë llogaritë bankare të shqiptarëve pa mbrojtjen e nevojshme.

Raportimet shqetësuese të qytetarëve tregojnë se, edhe pasi kanë ndërmarrë masa të menjëhershme duke bllokuar kartat e tyre bankare, paratë vijojnë të largohen nga llogaritë, sikur bllokimi të mos kishte ndodhur.

Kjo përjashton përfundimisht çdo pretendim apo justifikim se përgjegjësia qëndron te klientët që kanë klikuar në linqe të dyshimta, pasi në momentin që një kartë bllokohet zyrtarisht nga vetë sistemi, asnjë transaksion nuk duhet të mund të autorizohet.

E gjithë kjo situatë tregon se hakerat apo personat përgjegjës për këtë sulm mund të kenë depërtuar thellë në sistemin qendror të bankës, duke anashkaluar mekanizmat e sigurisë dixhitale. Kur një prej institucioneve më të mëdha financiare në vend nuk është në gjendje të ndalojë humbjen e parave edhe pas bllokimit të kartës dhe, njëkohësisht, fsheh në aplikacion vendndodhjen e transaksioneve, çështja nuk lidhet më vetëm me mënyrën se si qytetarët janë mashtruar, por me pyetjen se sa të sigurta janë në të vërtetë paratë e shqiptarëve në këtë bankë.

Paralajmërim për Ylli Manjanin dhe A***n Currin!

Pas kthimit tim nga një udhëtim i gjatë, u njoha me deklaratat e bëra në emisionin “Top Story” të Grida Dumës në Top Channel, ku ishin të ftuar, ndër të tjerë, ish-ministri Ylli Manjani dhe "opinionisti" Arjan Curri. Edhe sot insertët e këtij emisioni, qellimëshem sillën në rrjetët sociale.
Në atë emision, në adresën time u artikuluan nga z. Manjani akuza dhe pretendime të rënda. Keto akuza janë te pavërteta, janë genjeshtra dhe shpifje që mund ti thot vetëm dikush i PA EDUKATË, PA KARAKTER NJERZOR apo një RRUGAQ

I kundërshtoj ato plotësisht dhe jam i gatshëm t’i përball çdo pretendim prova.
Nuk do të lejoj që gjobëvënsat e tillë të dëmtojnë emrin tim dhe reputacionin e kompanive që kam ndërtuar me dekada pune. Kritika është e ligjshme dhe secili është i lirë të ketë opinionin e tij, qoftë kjo edhe nga kolltuku i rehatisë duke i rënë në qafë njerëzve që punojnë e ju ofrojnë punë mijëra të tjerëve. Por shpifja dhe paraqitja e të pavërtetave si fakte, nëpërmes OFENDIMEVE janë të padurueshme dhe për to secili duhet të mbajë përgjegjësi.

Veprimet ligjore do të përfshijnë edhe z. Arjan Curri. Për këtë të fundit nuk është hera e parë, ky edhe më herët ka shpifur ndaj meje, është denoncuar dhe çështja është duke u ndjekur në rrugë ligjore.
Të hënën do t’u drejtohem institucioneve kompetente dhe Gjykatës në Tiranë dhe në Lugano në mënyrë që gjithçka e thënë publikisht të përballet me fakte, dokumente, përgjegjësi ligjore dhe materiale.

Nuk do të lejoj që emri im dhe puna ime të përdoren për interesa apo qëllimet e zhurmagjive që infektojnë publikun me gënjeshtrat e tyre.
Publiku meriton të informohet mbi bazën e fakteve e jo të gënjeshtrave. Mbase dikush në këtë vend duhet tu tregojë vendin shpifësve dhe SHARLATANAVE që kanë profesion vetëm vrasjen publike me pagesë.

Skandal në Raiffeisen/ Qindra qytetarëve u zhduken paratë nga llogaria, dyshohet për vjedhje masive


Një numër gjithmonë e në rritje qytetarësh, të cilët janë klientë të bankës Raiffeisen po denoncojnë publikisht në rrjetet sociale një situatë alarmante; zhdukjen e parave nga llogaritë e tyre në Raiffeisen Bank.

Kapitali ka mundur të verifikojë llogaritë e disa prej tyre, të cilëve u janë marrë shuma të ndryshme parash pa kryer asnjë veprim apo blerje. Shumat e marra variojnë nga 500 euro e ndoshta edhe më shumë.

Një rast i verifikuar nga Kapitali, një qytetari i janë marrë 50 mijë lekë ose mbi 500 euro. Ky qytetar kishte një balancë prej 100 mijë lekësh në llogarinë e tij, nga transaksioni i fundit.

Ditën e sotme, ky qytetar ka bërë një transaksion në vlerën afërsisht 10 euro ose rreth 1100 lekë. Pas kryerjes së kësaj blerje, atij i ka ardhur një sms nga Raiffeisen, ku balanca e llogarisë rezulton rreth më pak se 50 mijë lekë.

Pra, ndonëse ai shpenzoi vetëm 1 mijë lekë me blerjen, nga llogaria, sipas mesazhit të dërguar nga Raiffeisen i janë zhdukur rreth 50 mijë lekë ose rreth 540 euro.




Paralelisht, dhjetra qytetarë të tjerë kanë denoncuar në rrjetet sociale të njëjtin fenomen, ku atyre u rezultojnë të marrë nga llogaritë e tyre shuma nga 500 deri në 1 mijë euro.

Të gjithë këta qytetarë denoncojnë se janë përpjekur me dhjetra herë të kontaktojnë bankën për humbjen e parave të tyre, Raiffeisen nuk u është përgjigjur, pasi linjat e ofruara për kontaktin e klientëve nuk përgjigjen.





Kapitali ka mësuar se Raiffeisen gjendet në një sulm kibernetik, përmes të cilit po merren paratë e qytetarëve. Vetëm dy ditë më parë, banka njoftoi përmes një mesazhi zyrtar klientët e saj se po përballet me sulme kibernetike të tipit “smishing”, të cilat vjedhin të dhënat e klientëve përmes sms-ve mashtruese.



Nuk dihet nëse klientët që po denoncojnë humbjen e parave, kanë rënë pre e këtyre sulmeve. Por e sigurtë është që Raiffeisen ka çedim të sigurisë, jo vetëm për të dhënat e klientëve, por edhe për paratë e tyre.

Sigurisht që në këto raste, banka kompeson plotësisht paratë që u merren qytetarëve. Por rënia pre e një prej bankave më të rëndësishme të vendit e një sulmi kibernetik të këtyre përmasave, ngre sërish pyetjen se sa të përgatitura janë bankat shqiptare në realitetin e ri të dixhitalizimit dhe a kanë investuar ato mjaftueshëm për të garantuar sigurinë e klientëve të tyre./ Kapitali.al

Mazniku sqaron reformën territoriale: Asnjë bashki nuk do të “shkrihet”, do të kemi vetëm bashkim të tyre

TIRANË – Bashkëkryetari socialist i Komisionit të Reformës Territoriale, Arbjan Mazniku, ka deklaruar se harta e re administrative nuk nënkupton shkrirjen e asnjë bashkie në vend, por vetëm bashkimin e tyre për të përmirësuar administrimin e shërbimeve ndaj qytetarëve.

Mazniku sqaroi se projektligji për reformën territoriale pritet të votohet në Kuvend më 8 tetor, ndërsa të hënën do të vijojnë diskutimet në komision.

Lidhur me keqkuptimet rreth këtij procesi, Arbjan Mazniku u shpreh:

“Ky është një proces që do të vijojë me diskutime në komision, të hënën është diskutimi në parim dhe më pas për nen i ligjit, dëgjesat me publikun janë bërë, opinionet janë mbledhur.

Është shumë e rëndësishme t’ia themi edhe publikut që asnjë bashki nuk shkrihet, koncepti i bashkive që shkrihen është një term i gabuar që ngjall një pjesë të debatit. Bashkitë bashkohen, dy-tre bëhen pjesë e një bashkie të madhe, qytetet marrin një statut të ri, kanë administratorin e tyre, kanë kryetarin e qytetit me rolin e kryetarit të bashkisë, kanë buxhetet e tyre; nuk ka shkrirje bashkish, ka bashkim bashkish.”

E rëndë në Fier/ Po digjte mbeturinat, por flakët i dolën jashtë kontrollit! Humb jetën 76-vjeçari


Një ngjarje e rëndë është regjistruar në në fshatin Greshicë të Fierit, ku një 76-vjeçar ka humbur jetën në tentativë për të shuar flakët. Sipas informacioneve, i moshuari me iniciale N.C, dyshohet se i kishte vënë zjarrin mbeturinave në tokën e tij, por më pas flakët i dolën jashtë kontrollit.

Për shkak të erës flakët u përhapën me shpejtësi, duke përfshirë edhe sipërfaqen e mbjellë me ullinj.

Në përpjekje për të shuar zjarrin, 76-vjeçari ka humbur jetën.

Erion Dasho ngre alarmin për salmonelën: Kujdes me pulën, vezët, frutat dhe perimet


Mjeku i njohur Erion Dasho, teksa ishte i ftuar në emisionin “News24 Fundjavë”, paralajmëroi për rrezikun e përhapjes së salmonelës në Shqipëri, mënyrat e transmetimit të saj dhe masat që duhen ndërmarrë për parandalimin e infeksionit.

Sipas Dashos, garantimi i higjienës në sektorin e gastronomisë është masa e parë dhe më e rëndësishme. Ai kërkoi që personeli të trajnohet detyrimisht për larjen korrekte të duarve, veçanërisht punonjësit e huaj që vijnë nga vende të Azisë, si India, apo zona të tjera.

Mishi i shpendëve, sidomos p**a, dhe vezët konsiderohen ndër produktet me rrezikun më të madh, nëse nuk përgatiten siç duhet.

Mjeku theksoi se ato duhet të zihen ose të piqen plotësisht, ndërsa shumë restorante kanë eliminuar nga recetat vezën e pagatuar për të shmangur praninë e bakterit.

Rreziku mund të fshihet edhe te frutat dhe perimet barishtore. Ekspertët shpjegojnë se këto produkte mund të ndoten nga përdorimi i plehut organik, ndaj para konsumimit nevojitet larje dhe pastrim i kujdesshëm.

“Enët nuk ishin përdorur prej javësh”/ Helmimi i fëmijëve në kopshtin e Korçës, prindi ngre dyshime për higjienën

Një prind ngre dyshime rreth shkakut të simptomave te fëmijët dhe kërkon që rasti të hetohet në mënyrë të plotë.

Sipas tij, dezinfektimi në kopsht është kryer në fillim të shtatorit, por enët e kuzhinës nuk ishin përdorur deri pak ditë më parë, pasi nuk kishte nisur shërbimi i ushqimit për shkak të mungesës së tenderit.

Prindi thotë se ushqimi nisi të enjten, ndërsa të premten në mbrëmje djali i shfaqi simptoma të një helmimi.

Prindi ngre dyshimin se enët mund të kenë qenë të papastra ose të papërshtatshme për përdorim pas një periudhe të gjatë mosshfrytëzimi.

Prindërit kërkojnë verifikimin e kushteve higjieno-sanitare, ushqimeve të konsumuara dhe enëve të kuzhinës, për të përcaktuar shkakun e simptomave te fëmijët.

“Kam frikë se do t’i bëjë keq babait” / Detaje nga dosja e Xhuana Nikollajt: Ish-i fejuari e kërcënonte vazhdimisht

Top Channel ka siguruar dosjen hetimore për vetëvrasjen e Xhuana Nikollajt, ku zbardhen detaje të reja nga dëshmitë dhe komunikimet e saj para se të ndërmerrte aktin ekstrem.

Në dosjen e siguruar nga gazetarja Brixhilda Deda, është administruar edhe dëshmia e një prej mikeshave me të cilën Xhuana ndante banesën me qira. Po ashtu, hetuesit kanë sekuestruar dhe analizuar komunikimet e saj me të motrën, të zhvilluara pak para ngjarjes.

Nga këto komunikime mësohet se Xhuana i ka treguar motrës për situatën e krijuar dhe shqetësimet që kishte. Motra e ka këshilluar që të shkojë në polici dhe të denoncojë Eraldo Fizin për dhunën e pretenduar.

Por Xhuana nuk ka pranuar. Në komunikim ajo shpreh frikën se, nëse do të bënte denoncim, Fizi mund t’i bënte diçka të keqe babait të saj.

Një tjetër detaj që del në dosjen hetimore lidhet me mbrëmjen para ngjarjes.

Sipas të dhënave të administruara nga hetuesit, shkak i konfliktit dyshohet të ketë qenë një ekskursion pune ku Xhuana kishte marrë pjesë me rastin e festave të 7 dhe 8 Marsit.

Në dosje thuhet se ekziston dyshimi se Fizi e ka ndjekur Xhuanën pas ekskursionit.

Dëshmitë, komunikimet dhe të dhënat e administruara në dosje po analizohen nga grupi hetimor për të rindërtuar dinamikën e plotë të ngjarjeve që i paraprinë vetëvrasjes së të resë.

U helmuan nga ushqimi në kopësht? 6 të mitur përfundojnë në spitalin e Korçës

Gjashtë fëmijë që frekuentojnë kopshtin nr.17 në Korçë janë paraqitur për ndihmë mjekësore, pasi dyshohet se janë intoksikuar nga ushqimi.

Fëmijët janë dërguar në repartin e Pediatrisë në Spitalin e Korçës, ku po marrin kujdesin mjekësor. Sipas të dhënave paraprake, gjendja e tyre nuk raportohet të jetë e rëndë.

Dyshimet e para lidhen me ushqimin e konsumuar në kopsht, ndërsa ende nuk dihet shkaku i saktë i intoksikimit.

Policia ka nisur hetimet për të zbardhur rrethanat e ngjarjes. Në kuadër të hetimit pritet të verifikohet ushqimi i konsumuar nga fëmijët dhe kushtet në të cilat ai është përgatitur dhe shërbyer.

Autoritetet shëndetësore pritet të kryejnë edhe analizat përkatëse për të përcaktuar shkakun e saktë të intoksikimit.

Drejtori i Drejtorisë së Shëndetit Publik në Korçë, Mikel Llogori, konfirmon se disa fëmijë janë paraqitur në repartin e Pediatrisë. Sipas tij, epidemiologjia ka marrë analizat përkatëse dhe tashmë pritet përgjigjja e tyre.

Llogori thekson se në këtë fazë nuk mund të përcaktohet nëse bëhet fjalë për helmim ushqimor apo për një situatë tjetër infektive, ndërsa shkaku pritet të përcaktohet pas rezultateve të analizave.

Kreditë e strehimit me 0% interes, aplikimet tejkalojnë shtatëfish kuotat e parashikuara


Skema e kredive të strehimit me 0% interes për punonjësit e administratës publike ka tërhequr një numër shumë më të madh aplikantësh sesa kuotat e miratuara. Pas mbylljes së aplikimeve, janë evidentuar 2 164 kërkesa për 300 kredi të reja për blerje banese, çka përfaqëson rreth shtatëfishin e numrit të përfituesve të planifikuar.

Ministria e Shëndetësisë kryeson listën e institucioneve me më shumë aplikime. Nga punonjësit e saj janë dorëzuar 782 kërkesa, ndërsa kuota e përcaktuar për këtë ministri është 70 kredi. Më pas renditet Ministria e Punëve të Brendshme, me 448 aplikime për 70 kuota, e ndjekur nga Ministria e Arsimit, e cila ka marrë 444 aplikime për të njëjtin numër kredish.

Te regjistruara në rang kombëtar janë rreth shtatë herë më të larta se numri i kredive të disponueshme, duke e bërë konkurrencën për përfitim veçanërisht të lartë.

Në kuadër të thirrjes janë vënë në dispozicion 300 kredi pa interes, të destinuara për financimin e blerjes së një banese. Shuma e financimit llogaritet mbi bazën e çmimit të referencës, ndërsa madhësia e banesës përcaktohet në varësi të numrit të anëtarëve të familjes, sipas certifikatës familjare.

Skema u drejtohet personave të punësuar në administratën publike, të cilët duhet të përmbushin kushtet e parashikuara në legjislacionin për strehimin social.

Mes kritereve kryesore janë të mos pasurit e një banese në pronësi ose të pasurit e një banese që nuk plotëson normat e strehimit, kufizimet lidhur me pasuritë në pronësi dhe fakti që aplikanti të mos ketë përfituar më herët nga programe të tjera të strehimit social.