Pika.al

Deri në një stinë të caktuar
Gjethi nga uji jetë do të ketë marrë
Por mbasi stina të ketë mbaruar
Uji do ta ketë kalbur gjethen e tharë
Secili ka stinën e vet
Gjelbërimin dhe tharjen
Bukuria e takimit ruhet
Duke e bërë të bukur ndarjen. ﹾ Fatmir Muja

“Fitimi i turpshëm është më i keq se humbja.”
– Publil Sir

Nuk është vjeshta e fundit fundi i një vjeshte
Ca fjalë janë si gjethe që vyshken në heshtje
Aq sa vend kanë zënë atëherë kur janë thënë
Do t'i ushqejnë rrënjët mbasi të kenë rënë
Ashtu siç kanë lindur bashkë në degë nga ashku
Edhe kur të jenë këputur, do vdesin së bashku
Veç Ai që e di sa gjethe ka pema
Mund ta dijë sa fjalë varrosen në zemra. ~ Fatmir Muja

"...nga Pika nis çdo gjë
Është me ty, kur s’je me Të
Po kur bëhesh i vetëdijshëm
Që s’ka çast të përsëritshëm
Atëherë je edhe me Pikën
Digjesh, por s’jeton pa Dritën..." ৹ Fatmir Muja, Pika.al

Para se të ndahem nga toka, po të flas me gjuhën e qiellit
Uji që ka rritur grurin, patjetër i duhet edhe miellit
Njësoj është edhe zemra, sado që nga ashku rritet
Nëse rrjedha ndalon, buka e shpirtit s'gatitet
Bekimet që përbuzen, thuhet se s'mund të zgjasin
Aq sa të kanë gjallëruar, po aq edhe do të të vrasin
Pa koren e bukës, tuli s'do të mund të jetësohej
Por korja ka duruar zjarrin, që tuli të mund të shijohej
Katër elementet janë bërë bashkë, që buka të gatuhet
Uji e zjarri, toka e ajri brenda një kafshate ruhet
Një kafshatë që shijon, më shumë se një mijë të tjera mbahet mend
Një mijë zemra nuk bëjnë sa një që në zemër ka bërë vend
Shumë zemra do të vijnë e dhembjes do t'i ofrojnë dehje
Ama zemrës s'i duhen shumë, por Një që e kthen në prehje. ~ Fatmir Muja, "Fjalët e një kalorësi"