Albanian Fire Protection and Rescue Association AFPRA

🚒 Mbështetje për Shërbimin Zjarrfikës Gramsh!

Në kuadër të bashkëpunimit të vazhdueshëm që AFPRA ka ndërtuar me partnerë dhe miq nga Austria dhe Gjermania, me profile dhe nga fusha të ndryshme, por të bashkuar nga i njëjti qëllim, lufta kundër zjarreve dhe shpëtimi i jetës; u realizua një tjetër kontribut për forcimin e mëtejshëm të kapaciteteve të Shërbimit Zjarrfikës Gramsh, përmes mbështetjes me logjistikë dhe pajisje teknike zjarrfikëse.

Gjatë ceremonisë së organizuar në Gramsh, në shenjë respekti dhe mirënjohjeje, AFPRA dorëzoi një certifikatë mirënjohjeje për Lions Club Mühldorf-Waldkraiburg, si lokomotiva e kësaj mbështetjeje.

AFPRA shpreh vlerësimin për të gjithë ata që kontribuojnë në iniciativa konkrete dhe të koordinuara me nevojat dhe mundësitë reale të shërbimeve zjarrfikëse, me një qëllim të përbashkët: forcimin e shërbimeve zjarrfikëse dhe rritjen e sigurisë për çdo shtetas, vendas dhe të huaj.

Por përtej çdo donacioni, ky është edhe një moment reflektimi. Mbështetja nga partnerët dhe miqtë është e çmuar, por sistemi i mbrojtjes nga zjarri dhe shpëtimit nuk mund të mbështetet vetëm mbi donacione. Ai ka nevojë për investime të qëndrueshme, planifikim afatgjatë, pajisje moderne, trajnim të vazhdueshëm dhe vëmendje institucionale në çdo nivel.

AFPRA do të vijojë të jetë një urë bashkëpunimi mes partnerëve ndërkombëtarë dhe shërbimeve zjarrfikëse në vend, por qëllimi ynë mbetet më i madh: forcimi real dhe i qëndrueshëm i të gjithë sistemit të mbrojtjes nga zjarri dhe shpëtimit në Shqipëri.

🤝🇦🇱🇩🇪 Kur bashkëpunimi kthehet në veprim, përfiton i gjithë komuniteti

Një tjetër projekt zhvillimor i AFPRA, i mbështetur nga Ambasa e Polonisë dhe PolishAid, u përmbyll me sukses duke forcuar më tej bazat për zhvillimin e Qendrës së Trajnimit për Zjarrfikësit në Shqipëri.

Projekti përfshiu pajisje teknike zjarrfikëse, simulator për “Hyrjen me Forcë”, si dhe trajnimin e trajnerëve mbi temat “Hyrja me Forcë” dhe “Mbijetesa e Zjarrfikësit”.

Trajnimi i parë u zhvillua pranë Bashkisë Kamëz, në praninë e Ambasadorit të Polonisë Sh.T.Z. Wojciech Unolt, duke treguar se bashkëpunimi ndërkombëtar, përkushtimi lokal dhe angazhimi vullnetar mund të sjellin zhvillim real për shërbimin e MZSH-së.

Mirënjohje për taksapaguesit polakë, PolishAid dhe Ambasadën e Polonisë për mbështetjen e vazhdueshme ndaj rritjes së sigurisë publike në Shqipëri.

Ftojmë të gjitha strukturat e MZSH-së dhe institucionet e tjera të sigurisë të na kontaktojnë për trajnim dhe bashkëpunim në këto tema.

Zjarret nuk njohin kufij, dhe as bashkëpunimi në luftën kundër tyre

Falë bisedimeve të nisura nga përfaqësuesi i AFPRA-s në Gjermani, Grei Papa, me International, pas një rrugëtimi disi të gjatë, patëm mundësinë të vizitonim nga afër një ushtrim fushor stërvitor, si dhe një trajnim të avancuar për ekipet e shuarjes së zjarreve në pyje nga toka.

Ky ekip përbëhej nga persona me profesione të ndryshme, të ardhur nga fusha të ndryshme të shoqërisë, por të bashkuar nga një qëllim i përbashkët: përgatitja, reagimi dhe mbrojtja e jetës, natyrës dhe komuniteteve nga zjarret në pyje.

Gjatë kësaj vizite, ekipi ynë u njoh nga afër me strukturën e , mënyrën e organizimit, automjetet, mjetet ajror, pajisjet teknike zjarrfikëse të shuarjes së zjarreve ne pyje. Gjithashtu, patëm kënaqësinë të shihnim se si praktikat më të mira amerikane janë ndërthurur me rregullin, disiplinën dhe precizionin Gjerman.

Duke qenë se AFPRA dhe International ndajnë të njëjtin vizion dhe filozofi në fushën e emergjencave, u diskutua gjatë mbi mundësitë dhe format e bashkëpunimit në të ardhmen. Ky komunikim u finalizua me nënshkrimin e një Memorandumi Bashkëpunimi, duke hapur rrugën për shkëmbim eksperiencash, trajnime dhe iniciativa të përbashkëta.

Shumë shpejt presim edhe vizitën e kthimit të miqve tanë, në mënyrë që edhe ata të njihen nga afër me terrenin, natyrën fantastike dhe potencialin që vendi ynë ofron në këtë drejtim.

🤝 Zjarret nuk njohin kufij, ashtu siç nuk njeh kufij edhe vëllazëria kundër zjarrit.

AFPRA mori pjesë me ftesë të Bashkia Himarë në aktivitetin e çeljes së sezonit turistik 2026, duke sjellë për publikun një eksperiencë të drejtpërdrejtë me botën e zjarrfikjes dhe shpëtimit.

Për tre ditë radhazi, banorë dhe turistë vendas e të huaj patën mundësinë të njihen nga afër me automjetet dhe teknikën zjarrfikëse që disponon AFPRA, si dhe të provojnë vetë pajisjet përmes sfidave praktike. Pa dyshim, sfida më tërheqëse ishte simulimi “Hyrja me Forcë” (mundësuar nga PolishAid), ku pjesëmarrësit testuan aftësitë e tyre në një situatë sa reale, aq edhe sfiduese.

Një tjetër aspekt shumë pozitiv i këtij aktiviteti ishte interesi i lartë i të rinjve nga Himara dhe zonat përreth për t’u njohur me shërbimin zjarrfikës. Vullnetarët tanë patën mundësinë të ndajnë eksperiencën e tyre, duke shpjeguar jo vetëm sfidat e profesionit, por edhe vlerën e angazhimit vullnetar, një mision që shkon përtej një pune të zakonshme.

Bashkia Himarë mbetet një nga bashkitë e pakta në vend që e ka kuptuar në thelb përgjegjësinë për garantimin e shërbimit zjarrfikës në territorin e saj. Hapat konkrete në rritjen e kapaciteteve dhe përmirësimin e këtij shërbimi jetik janë dëshmi e një qasjeje serioze dhe në përputhje me kërkesat e kohës.

AFPRA përgëzon këtë angazhim dhe shpreh gatishmërinë për të thelluar më tej bashkëpunimin profesional dhe afatgjatë me Bashkinë Himarë.

Sezon të mbarë, me sa më pak alarme dhe sa më shumë vullnetarë!

Të qenit zjarrfikës është një nga profesionet më fisnike në botë. Por të jesh zjarrfikës në Shqipëri shpesh është sfiduese, për shkak të kushteve jo gjithmonë optimale dhe vështirësive nga më të ndryshmet në terren.

Pavarësisht këtyre sfidave, AFPRA ka dhënë gjithashtu një kontribut të çmuar dhe të vazhdueshëm në zhvillimin dhe përmirësimin e këtij shërbimi jetik për funksionimin e një shoqërie moderne.

Në këtë ditë të veçantë, gjejmë rastin ti urojmë nga zemra të gjithë zjarrfikësve shqiptarë: Gëzuar Ditën Ndërkombëtare të Zjarrfikësve!

🌍🔥 AFPRA partnere në projektin europian HARMONY

AFPRA është partnere në projektin europian HARMONY – Harmonised Protocols for Transnational Environmental Impact Assessment & Emergency Management, një iniciativë trevjeçare që synon përmirësimin e menaxhimit të emergjencave në zona ndërkufitare.

Projekti fokusohet në harmonizimin e protokolleve të reagimit ndaj rreziqeve mjedisore, forcimin e kapaciteteve vendore, përmirësimin e sistemeve të paralajmërimit të hershëm, si dhe rritjen e koordinimit ndërinstitucional dhe ndërkufitar.

Në këtë kuadër, më 27 Prill 2026, u zhvillua një workshop në Bashkinë Pustec, si pjesë e aktiviteteve të projektit në zonën pilot. AFPRA do të kontribuojë në pilotimin e menaxhimit të rrezikut nga zjarret në pyje në zonën Shqipëri – Maqedoni e Veriut, përmes zhvillimit të protokolleve të përbashkëta operative, organizimit të trajnimeve dhe ushtrimeve praktike, analizës së kapaciteteve ekzistuese dhe testimit të mjeteve inovative për paralajmërim të hershëm.

Pjesë e këtij takimi ishin strukturat përgjegjëse të Bashkisë Pustec dhe përfaqësues nga Maqedonia e Veriut, si dhe aktorë të rëndësishëm si AKMC, AdZM dhe Policia e Shtetit, të cilët kanë rol të drejtpërdrejtë në menaxhimin e emergjencave dhe për të cilët ky projekt sjell vlerë konkrete.

Zona pilot e përzgjedhur është Bashkia Pustec, për shkak të pozicionit të saj strategjik ndërkufitar dhe rëndësisë së veçantë mjedisore, duke përfshirë edhe Parkun Kombëtar të Prespës.

HARMONY zbatohet në tre rajone ndërkufitare në Europë: Spanjë – Portugali, Greqi – Bullgari dhe Shqipëri – Maqedoni e Veriut, me synimin për të adresuar një sfidë të përbashkët: fatkeqësitë nuk njohin kufij, ndaj edhe menaxhimi i tyre kërkon bashkëpunim, koordinim dhe protokolle të harmonizuara. 🤝

🚒 AFPRA në Kroaci – Dita 3: Nga trajnimi tek bashkëpunimi praktik

Dita e tretë përmbylli një javë intensive aktivitetesh me fokus në zhvillimin profesional dhe bashkëpunimin konkret.

🎤 Konferenca – përfundimi dhe lidhje kontaktesh
Aktivitetet vijuan me sesionet përmbyllëse të konferencës dhe takime me pjesëmarrës nga vende të ndryshme, si dhe me furnitorë të pajisjeve dhe teknologjive në fushën e zjarrfikjes dhe shpëtimit.

📍 Vizitë në qendrën e trajnimit në Šapjane
U njohëm nga afër me trajnimin praktik të zjarrfikësve dhe strukturave të mbrojtjes civile, duke parë standardet dhe metodat moderne të përgatitjes operacionale.

🤝 Të ftuar nderi në mbledhjen vjetore në Krk
AFPRA mori pjesë në një aktivitet të rëndësishëm të shoqatave zjarrfikëse, ku u prezantua organizimi i shërbimeve vullnetare dhe bashkëpunimi i tyre me strukturat profesionale.

🎖️ Një moment i veçantë ishte kalimi i stafetes drejtuese nga një brez tek tjetri pas mbi 40 vite në shërbim.

👉 Një ditë që tregoi qartë se:
trajnimi, teknologjia dhe vullnetarizmi janë shtyllat e një sistemi të fortë zjarrfikës.

🔥 Sepse një sistem i fortë nuk ndërtohet vetëm me mjete,
por mbi të gjitha me njerëz, disiplinë dhe organizim të strukturuar.

🔥 AFPRA përfaqëson Shqipërinë në Konferencën e 20-të të Zjarrfikësve

Gjatë ditës së dytë, AFPRA mori pjesë aktive në konferencën ndërkombëtare të zhvilluar në Opatija.

🎤 Shqipëria u përfaqësua me një prezantim mbi:
• zhvillimin e shërbimit zjarrfikës
• sfidat në gatishmëri dhe ndërhyrje
• realitetin operacional në terren

📍 Një moment kyç ishte analiza e zjarrit me përmasa të mëdha në Gramsh (verë 2025), e prezantuar së bashku me shefin e sektorit të MZSH Gramsh, Komisar Zjarrfikës Ilir Llapushi.

Ky rast solli në vëmendje:
• sfidat reale në terren
• nevojën për koordinim më të fortë
• domosdoshmërinë e zhvillimit të kapaciteteve vendore

🤝 Gjatë konferencës u zhvilluan takime me përfaqësues nga rajoni dhe më gjerë, përfshirë drejtues të lartë të sektorit zjarrfikës kroat, ku u diskutua mbi bashkëpunimin dhe konkretizimin e marrëveshjeve ekzistuese.

👉 Një ditë e rëndësishme për prezantimin e Shqipërisë në nivel ndërkombëtar dhe për pozicionimin e AFPRA si aktor serioz në këtë fushë.

MONOKSIDI I KARBONIT – VRASËSI I PADUKSHËM ⚠️

Monoksidi i karbonit (CO) është një gaz pa ngjyrë, pa erë dhe pa shije, por jashtëzakonisht i rrezikshëm. Ai formohet kur lëndët djegëse nuk digjen plotësisht.

Duhet të keni kujdes maksimal në rast se përdorni :

Sobë, kaldajë ose ngrohëse me gaz/dru të mirëmbajtura keq
Përdorimi i sobave apo grilave brenda në ambient
Gjeneratorë ose motora të ndezur në ambiente të mbyllura
Oxhaqe të bllokuara ose ventilim i pamjaftueshëm.

Ku vendoset detektori i monoksidit të karbonit (CO)

Pranë dhomave të gjumit (jo brenda tyre)

Në ambiente ku ka pajisje djegieje, si:

sobë, kaldajë, oxhak, ngrohëse me gaz

1–3 metra larg pajisjes së djegies

🔹 Lartësia e vendosjes:

Në mur: rreth 1.5 m nga dyshemeja

Të paktën 30 cm larg tavanit