Fatmir Xhafaj

Sot në Ditën Kombëtare të Drejtësisë, nuk kujtojmë thjesht një datë historike siç është Kanuni i Zhurisë, akti i parë juridik i qeverisë së Ismail Qemalit, por kujtojmë themelin mbi të cilin duhet të qëndrojë çdo shtet serioz, drejtësinë që nuk përkulet dhe nuk trembet.

Sot, më shumë se një shekull më pas nga ky akt, Reforma në Drejtësi që ne miratuam një dekadë më parë, mbetet përpjekja më e madhe për ta shkëputur njëherë e mirë drejtësinë shqiptare nga ndikimi i politikës, pandëshkueshmëria dhe kapja e shtetit.

Kam dëgjuar për vite me radhë skeptikë, sulme, baltë dhe përpjekje për ta zhbërë këtë reformë. Por historia nuk shkruhet nga ata që kanë frikë nga drejtësia. Historia shkruhet nga ata që kanë guximin ta çojnë atë deri në fund.

Reforma në Drejtësi nuk ishte një kompromis për të kënaqur politikën. Ishte dhe mbetet një betejë për t’i kthyer qytetarëve besimin se askush nuk është mbi ligjin. Dhe sot, kur shumëkush sheh rezultate që dikur konsideroheshin të pamundura, është e qartë se kjo reformë nuk mund të ndalet më.

Jam krenar që drejtova Komisionin e Posaçëm Parlamentar të Reformës në Drejtësi. Jo sepse ishte një proces i lehtë, por sepse ishte një detyrim historik ndaj Shqipërisë dhe brezave që meritojnë një shtet normal evropian.

Drejtësia e re nuk është perfekte, por është shumë më e fortë se sistemi i vjetër që jetonte mbi frikën, pazarin dhe pandëshkueshmërinë. Dhe kjo është arsyeja pse ata që për vite e përdorën drejtësinë si mburojë personale, sot janë më të shqetësuarit nga ekzistenca e saj.

Reforma në Drejtësi nuk ka kthim pas. Shqipëria nuk do të kthehet më në kohën kur institucionet e drejtësisë ishin zgjatime të politikës e pushtetit dhe ligji vlente vetëm për qytetarët e thjeshtë.

Sfida që ka tani drejtësia e re, është të ofrojë standarde demokratike të panegociueshme për të gjithë qytetarët, e njëjtë si në vendet e BE-së ku Shqipëria do të bëjë pjesë më herët sesa vonë. Vetëm kështu ndërtohet besimi tek shteti dhe një demokraci funksionale që nuk i nënshtrohet askujt përveç Kushtetutës dhe ligjit.

Beteja për drejtësinë vazhdon. Për konsolidimin e institucioneve të saj, për pavarësi dhe përgjegjshmëri, për profesionalizëm dhe transparencë, për jetësimin e standardeve më të mira evropiane!

Sot në “Ditën e Evropës”, kujtojmë vlerat mbi të cilat është ndërtuar projekti evropian paqja, demokracia, solidariteti dhe bashkëpunimi mes popujve.

Kjo ditë është një kujtesë e rëndësishme se, përmes unitetit dhe respektit për vlerat e përbashkëta, mund të ndërtohet një e ardhme më e sigurt dhe më e drejtë për të gjithë qytetarët.

Në këtë ditë simbolike, besojmë tek rruga evropiane, tek forcimi i demokracisë, shteti i së drejtës dhe bashkëpunimi ndërmjet vendeve tona. Rruga jonë drejt BE-së është e afërt.

Synimi ynë duhet të jetë jo thjesht ta çojmë Shqipërinë në Evropë, por ta bëjmë Shqipërinë Evropë këtu, përmes standardeve, institucioneve dhe mundësive që meritojnë qytetarët shqiptarë.

Të jetësojmë standardet evropiane për ta bërë vendin një shtet të së drejtës, ku qeverisin institucionet, forca dhe autoriteti i ligjit të barabartë për të gjithë!

Gëzuar Ditën e Evropës! 🇪🇺

Një lajm i trishtë ky i ndarjes nga jeta e Profesor Servet Pëllumbit!

Ai ishte PROFESORI ynë në rrugën e formimit socialist, në fuqizimin tonë përmes betejash për mbrojtjen e vlerave socialiste! Ai ishte një model për ne me shembullin dhe veprën e tij, me kulturën dhe integritetin e tij!

Profesor Serveti do të mbahet mend për dijet e urtësinë e tij dhe do të kujtohet gjatë në memorien socialiste për betejat e forta për demokratizimin e PS-së, për qartësinë, kurajon, vendosmërinë dhe mbrojtjen pa kompromis të parimeve e vlerave socialiste!

Profesori ishte personaliteti me një peshë të veçantë në krijimin, rritjen dhe fuqizimin e Partisë Socialiste ndaj ka lënë gjurmën e tij të pazvendësueshme në historinë e saj duke lënë një trashëgimi të paçmueshme!

Ai do të kujtohet me shumë respekt për drejtimin me aq urtësi e integritet të Kuvendit të Shqipërisë!

Do të ruaj gjatë në memorien time politike këshillat e tij të mençura, fjalët e tij plot urtësi!

Lamtumirë i dashur Profesor!

5 Maji është një ditë kujtese dhe reflektimi, për sakrificën sublime të atyre që dhanë jetën për lirinë dhe dinjitetin e Shqipërisë.

Me përulësi, nderojmë sot Dëshmorët e Kombit dhe Luftën Antifashiste Nacional Çlirimtare. Ne kemi detyrimin moral të mbajmë gjallë amanetin e tyre, duke ndërtuar një shoqëri më të drejtë, më të barabartë dhe më të denjë për sakrificën që ata bënë.

Lavdi e përjetshme dëshmorëve të atdheut! 🇦🇱

Me trishtim mora lajmjn për ndarjen nga jeta të piktorit dhe mikut tim, Skënder Kamberi. Një qytetar i mirë, një burrë i urtë, fisnik dhe i përkushtuar ndaj artit dhe njerëzve. Ai la pas jo vetëm vepra të çmuara, por edhe kujtimin e një personaliteti që frymëzonte me thjeshtësinë dhe mirësinë e tij.

Si artist përtej kohësh, ai i dha ngjyrë shpirtit shqiptar dhe e ngriti pikturën në një dimension të veçantë ndjeshmërie dhe elegance. Çdo punë e tij mbetet një dëshmi e talentit të rrallë dhe e pasionit të pakursyer për artin.

Mjeshtër i ngjyrave, ai do të jetojë gjatë në kujtesën e kulturës sonë kombëtare dhe në zemrat e atyre që patën fatin ta njohin dhe ta vlerësojnë.

Do të jetojë gjatë në kujtesën e Vlorës, qytetit që e mbajti si burim frymëzimi në krijimtarinë e tij. Drita, ngjyrat dhe shpirti i Vlorës u pasqyruan në mënyrë të veçantë në veprat e tij, duke e bërë atë një zë të dallueshëm të artit që buron nga kjo trevë.

Ngushëllimet më të sinqerta familjes, miqve dhe gjithë komunitetit artistik për këtë humbje të madhe.
Kujtimi i tij qoftë i përjetshëm!

Në këtë ditë të shenjtë për të gjithë besimtarët ortodoksë, përcjell urimet e mia më të përzemërta, e ju uroj “Gëzuar Pashkët”!

Kjo ditë le të jetë reflektim për të vazhduar në rrugën e solidaritetit e dashurisë për njëri-tjetrin, paqes në vatrat familjare, si dhe përcjelljen e mirësisë e përgjegjësisë në mbarë shoqërinë, e për brezat e rinj që të bëhen akoma më të mirë!

Qoftë një ditë e bekuar e sjelltë paqe në mbarë botën!

Sot mbush 106 vjet Profesor Ismet Elezi! 💐

Në një ditë të veçantë si kjo, fjala kumton pak, përpara madhështisë së një jete të tërë kushtuar dijes dhe shoqërisë.

Profesor Ismet Elezi është ndër ato figura që nuk maten vetëm me kohën që kanë jetuar, por me gjurmët që kanë lënë në mendjet dhe ndërgjegjen e brezave.

Në një botë ku gjithçka ndryshon shpejt, ai mbetet një kujtesë e fortë se dija e vërtetë nuk plaket, por thellohet dhe ndriçon më shumë me kalimin e viteve.

Jeta e tij është një dëshmi se drejtësia, kultura dhe arsimi nuk janë vetëm profesione, por misione që kërkojnë shpirt, durim dhe dashuri për njeriun.

Në çdo faqe të punës së tij, në çdo student që ka udhëhequr, në çdo ide që ka ndarë, qëndron një filozofi e thjeshtë por e madhe: “njeriu vlen aq sa i shërben dijes dhe së mirës së përbashkët”.

Ky 106-vjetor, nuk është vetëm ditëlindje, por një reflektim mbi një jetë të tërë që ka ndriçuar rrugën e të tjerëve. Një jetë që na kujton se koha kalon, por vlera e mendimit dhe trashëgimia e një profesori të vërtetë mbeten të përjetshme.

Gëzuar ditëlindjen Profesor!
Respekt të thellë për kontibutin e vyer që keni dhënë si përfaqësues i mendimit juridik shqiptar.
Mirënjohje nga zemra për mësimet dhe këshillat e vyera!

Pashkë të gëzuara të gjithë besimtarëve katolik!

Në këtë ditë të shenjtë, mesazhi i ringjalljes na fton të reflektojmë mbi fuqinë e shpresës, besimit, urtësisë dhe të rilindjes.

Kjo ditë e bekuar mbart një thirrje të fortë për të përqafuar të mirën, për të besuar te e ardhmja e përbashkët dhe për të ecur përpara me guxim dhe përulësi.

𝐁𝐞𝐬𝐢𝐦𝐢 𝐝𝐡𝐞 𝐦𝐛𝐞̈𝐬𝐡𝐭𝐞𝐭𝐣𝐚 𝐩𝐚 𝐤𝐮𝐬𝐡𝐭𝐞 𝐞 𝐍𝐣𝐞̈𝐬𝐢𝐬𝐞̈ 𝟏𝟎, 𝐟𝐨𝐫𝐜𝐚 𝐦𝐞̈ 𝐞 𝐦𝐚𝐝𝐡𝐞 𝐩𝐞̈𝐫 𝐬𝐟𝐢𝐝𝐞̈𝐧 𝐞 𝐫𝐚𝐝𝐡𝐞̈𝐬 𝐭𝐞 𝐍𝐣𝐞̈𝐬𝐢𝐚 𝟓.

Dua të falënderoj nga zemra çdo anëtar, aktivist dhe qytetar për bashkëpunimin dhe përkushtimin e treguar ndër vite. 🙏

Në Njësinë 10 kam kaluar një pjesë të rëndësishme të angazhimit tim politik dhe njerëzor, si deputet e drejtues politik. Plot 10 vite dhe 5 beteja elektorale së bashku e në të gjitha fitues! Është një komunitet që më ka dhënë besim, mbështetje dhe energji për të përballuar çdo sfidë. Do vazhdoj ti përmbush me të njëjtin përkushtim angazhimet e mia si deputet i tyre edhe për këtë mandat!
Ju jam mirënjohës me zemër! ❤️🤗

Bashkë me drejtuesen politike të Bashkisë Tiranë, Ogerta Manastirliu, bëmë prezantimin e drejtuesit të ri politik, Besfort Lamallari, i cili me mbështetjen e kolegut Bledi Çuçi, jam i bindur se punën e PS-së në këtë njësi do ta çojë përpara me të njëjtin ritëm dhe vendosmëri. Strukturat e Njësisë 10 janë një aset i jashtëzakonshëm dhe garanci për suksesin e çdo objektivi që ka skuadra jonë politike në Tiranë.

Angazhimin te Njësia 5, duke respektuar organizimin e ri të PS-së në Tiranë, e nis me të njëjtin përkushtim, përgjegjësi e përulësi ndaj njerëzve, për të vijuar punën së bashku me strukturat dhe qytetarët, duke e forcuar edhe më tej këtë bastion të rëndësishëm të Partisë Socialiste në kryeqytet. 🤝

Njësia 5 është një nga shtyllat më të forta të familjes sonë politike në Tiranë, një strukturë që ka dëshmuar vazhdimisht peshën dhe rolin e saj në çdo betejë politike që ne kemi bërë. Të angazhohesh këtu do të thotë më shumë përgjegjësi dhe privilegj, besim dhe sfidë e madhe gjithashtu. Ecim përpara me punët për Tiranën dhe Shqipërinë!🇦🇱🇪🇺

Gëzuar Sulltan Novruzin të gjithë besimtarëve bektashinj dhe çdo shqiptari që e feston këtë ditë të shenjtë!

Festë e shpresës, rilindjes së natyrës dhe harmonisë që kujton vlerat më të mira që na bashkojnë si shoqëri: paqen, mirëkuptimin dhe solidaritetin me njëri-tjetrin.

Uroj që kjo ditë e bekuar të sjellë më shumë dritë, shëndet dhe mbarësi në çdo familje shqiptare. Për shumë vjet gëzuar🙏