Musa Vyshka

Poeti elbasanas Musa Vyshka

Musa Vyshka u lind në Elbasan më 28 qershor 1942. Pasi kreu studimet e mesme pedagogjike në qytetin e lindjes, ndoqi studimet e larta në Universitetin e Tiranës për gjuhë - letërsi shqipe të cilat i përfundoi në vitin 1964.
Në periudhën 1966 - 1971 punoi si mësues në qytetin e Elbasanit dhe të Cërrikut dhe më pas në shkollën e mesme pedagogjike në Elbasan. Për një kohë të gjatë, deri në daljen e tij në pension në vitin 1999, ka qenë pedagog dhe përgjegjës i Departamentit të Letërsisë në Universitetin “Aleksandër Xhuvani” në Elbasan.

Aktivizimi i tij në letërsi nisi që herët, me botime te “Pionieri” dhe “Zëri i rinisë” madje në vitin 1955, në moshën 13-vjeçare, Musa Vyshka fiton edhe çmimin e parë në një konkurs të shpallur nga revista “Pionieri”. Gjithashtu, gjatë viteve kur ndiqte shkollën e mesme, aktivizohej rregullisht në të gjitha organet e shtypit.

Në kohën kur nisi studimet universitare, vëllimi i tij i parë poetik “Ne njëzevjeçarët” ishte pothuaj i gatshëm dhe u botua në vitin 1962 duke u bërë një nga botimet më të bujshme të kohës e duke frymëzuar breza të tërë të rinjsh në vitet në vazhdim.

Musa Vyshka ka lëvruar gjinitë e poezisë, prozës dhe letërsisë për fëmijë. Është autor i disa librave shkollorë dhe i komentarëve “Nëpër faqet e veprave letrare”. Është besnik i natyrës së poezisë së tij ku spikat një frymë e veçantë lirike.