Qendra Rinore Devoll

Shtigjet e Devollit 🏃‍♂️

Menkulas-Ponçarë-Braçanj-Dobranj-Fitore

Hoçishti është qendra e Njësisë Administrative me të njëjtin emër dhe një nga fshatrat që mbart vlera të rëndësishme historike, kulturore e arkitekturore, si dhe një traditë të bukur bashkëjetese.
Në Hoçisht gjendet Kisha e Shën Nikollës, me statusin “Monument Kulture”, shtëpia e Marigo Posios, qëndistare e flamurit të Pavarësisë, si edhe Kisha e Shën Kozmait e Shën Damjanit, një vend i shenjtë që çdo vit tërheq qindra vizitorë. Në kodrën me lisa ngrihet edhe Kisha e Shën Ilias, e cila po rindërtohet, ndërsa përreth ka edhe shumë atraksione të tjera që presin të zbulohen.
Duke u ngjitur pak mbi fshat, shfaqet rezervuari i Gracës, ndërsa peizazhi rural, gjelbërimi dhe qetësia të shoqërojnë gjatë gjithë rrugëtimit, në një hapësirë ku njeriu, toka dhe tradita vazhdojnë të jetojnë në harmoni.
Babani mund të cilësohet si një nga qendrat e rëndësishme të LANÇ në Devoll, për numrin e aktivistëve, dëshmorëve, familjeve të angazhuara dhe shtëpive që shërbyen si baza të luftës. Këtu është edhe vendlindja e “Heroit të Popullit”, Fuat Babani. Historia e fshatit mbetet ende e gjallë përmes lapidarëve, përmendoreve, bustit të Fuat Babanit dhe pllakave përkujtimore që dëshmojnë për sakrificat e banorëve të tij për liri.
Stropani, i shtrirë në këmbët e vargmalit të Moravës, në anën juglindore të tij, na pret me një peizazh të bukur rural, të përshkuar nga lumi, toka pjellore dhe njerëz punëtorë. Në hyrje të fshatit, një rrugicë e ngushtë të çon drejt një vendi të shenjtë, të sistemuar me kujdes nga banorët, mes gjelbërimit dhe pranë një çezme, duke krijuar një hapësirë të qetë për këdo që kërkon të ndalet e të shijojë natyrën. Dhe aventura nuk përfundon këtu. Vetëm rreth 10 minuta mbi fshat gjenden katër tunele shkëmbore, dhjetëra metra të gjatë, të fortifikuar me beton e çelik. Këto dëshmi të së kaluarës, të fshehura mes natyrës, mund të kthehen në një atraksion të veçantë dhe kamp pushimi për vizitorët dhe turistët e apasionuar pas historisë, eksplorimit dhe natyrës.

Dita Ndërkombëtare e Shkrim-Leximit 📝📖

Në bashkëpunim me Bibliotekën e Qytetit, organizuam në Ziçisht aktivitetin “Devolli në 100 fjalë”, një takim që bëri bashkë dhjetëra të rinj nga i gjithë Devolli.
Nëpërmjet fjalës, kujtesës dhe krijimtarisë, të rinjtë sollën kujtime nga vendlindja, fjalë dialektore e të huazuara, mendime dhe hamendësime për të ardhmen e Devollit. Por këtë herë, fjalët nuk ngelën vetëm të shkruara… ato u kënduan, u recituan, u luajtën në instrumente dhe u shoqëruan me vallen e bukur të “Devolliçes”. 🎶🎸🕺💃

Fjalët na lidhin me të shkuarën, na tregojnë të tashmen dhe na japin mundësinë të imagjinojmë të ardhmen. Dhe një trevë që ruan fjalët e saj, ruan historinë e saj. Një rini që i jep jetë këtyre fjalëve, i jep jetë së ardhmes.

FTESË
Në kuadër të Ditës Ndërkombëtare të Shkrim-Leximit, iu ftojmë të merrni pjesë në aktivitetin e zhvilluar në bashkëpunim me Bibliotekën e Qytetit në datën 8 Shtator në Ziçisht!

Shtigjet e Devollit 🏃‍♂️

Udhëtimet që kemi ndërmarrë gjatë kësaj nisme, jo vetëm që na kanë njohur më nga afër me fshatrat e Devollit, por dhe na kanë bindur se sa i bukur është ai. Çeta është e vendosur mbi një faqe kodre në luginën e Devollit të Sipërm që përshkohet nga rrjedha e burimit të lumit të kësaj krahine. Ajo që duket nga rruga kryesore, së bashku me urën ende të dëmtuar që të lidh me fshatin, është vetëm një pjesë e vogël e bukurisë që ky fshat mbart. Të bëjnë përshtypje shtëpitë shumë të bukura që kanë rruajtur stilin e vjetër të ndërtimit në gur, ashtu si i gjithë Devolli i Sipërm. Deri në Qytezë na shoqëroi zonja Flora, përmes një shtegu të vjetër që e përdorte për të shkuar në punë si infermjere vite të shkuara. Qyteza është kthyer në kantier ndërtimi dhe gjallon nga rindërtimi i shtëpive sipas stilit të vjetër, por heshtja aty të vriste veshët, a thua po ndërtohet për të qënë e braktisur e alternativë pushimi për ata që kanë mundësi e jo për qytezarët. Rruga e re që lidh gjithë fshatrat e kësaj krahine, e ka lehtësuar punën e lëvizjen. Ujëvara e Sinicës është kthyer në një pikë referimi për turizmin natyror në Devoll. Banorët aty po përpiqen të investojnë dhe të tërheqin turistë e vizitorë. Historia që mbartin përmes objekteve të kultit apo gjurmëve të vjetra që kanë ngelur prej tyre, arkitekturës, ndërthurrjes me natyrën, burimeve ujore e shumë cilësive të tjera, i bëjnë këto fshatra akoma më tërheqës dhe perla të turizmit në Devoll e më gjerë në Shqipëri.