Fshati Rekë

A po bëhet normale mungesa e ujit në Rekë?

Me keqardhje duhet ta themi se duket sikur askujt nuk po i intereson më ky problem serioz që po e përjetojnë banorët e Rekës çdo ditë. Përveç 4 ose 5 banorëve që na kontaktojnë vazhdimisht dhe shprehin shqetësimet e tyre, heshtja është bërë e zakonshme.

Jemi të zhgënjyer nga të gjithë ata që kanë pasur dhe kanë përgjegjësi për këtë çështje, nga Komuna e Mitrovicës, pushteti i kaluar dhe ai i tanishëm, si dhe nga Kompania Rajonale e Ujësjellësit. Premtime ka pasur shumë, por zgjidhje ende jo.

Si faqe jemi njoftuar se kryetari i Komunës së Mitrovicës, z.Faton Peci, është i informuar për këtë problem dhe se gjatë fushatës ishte premtuar zgjidhja e tij. Megjithatë, banorët e Rekës vazhdojnë të përballen me të njëjtën gjendje çdo ditë.

Imagjinoni të punoni gjithë ditën dhe kur të ktheheni në shtëpi të mos keni asnjë pikë ujë. Në vitin 2026, kjo nuk duhet të jetë luks, por e drejtë elementare.

Reka nuk po kërkon privilegje. Po kërkon ujë. Dhe mbi të gjitha, po kërkon që dikush më në fund të flasë dhe të veprojë për këtë problem. Heshtja nuk e mbush asnjë rezervuar. 💧❌

Të nderuar banorë të Rekës,

Gjatë ditëve të fundit kemi vërejtur se problemet me furnizimin me ujë kanë filluar të shfaqen përsëri. Në disa raste uji është ndërprerë, ndërsa në shumicën e kohës shtypja e ujit ka qenë shumë e dobët.

Teksa po e publikojmë këtë njoftim, ora shënon 19:25 dhe furnizimi me ujë është ndërprerë plotësisht.

Kjo situatë na rikthen shqetësimin e vitit të kaluar, kur fshati ynë u përball me ndërprerje të vazhdueshme të ujit, që nga muaji qershor e deri në fund të vitit. Përkundër vështirësive të mëdha që përjetuan banorët, asnjëherë nuk u dha një sqarim i qartë nga ndërmarrja e ujësjellësit apo nga Komuna për arsyet e këtyre ndërprerjeve.

Shpresojmë që këtë vit të mos përballemi me të njëjtin problem. Megjithatë, bazuar në gjendjen aktuale, ekziston frika se reduktimet dhe mungesat e ujit mund të përsëriten edhe gjatë kësaj vere.

Po aq shqetësues mbetet edhe fakti se nuk kemi vërejtur interesim nga askush, për të marrë përgjegjësinë e përfaqësimit të fshatit tonë si kryetar i fshatit Rekë. Përderisa problemet grumbullohen, mungon një zë i organizuar që t’i adresojë ato tek institucionet përgjegjëse.

Si duket, vazhdojmë të presim që dikush tjetër të vijë dhe t’i zgjidhë problemet dhe brengat tona, ndërsa vetë mbetemi pa përfaqësim dhe pa përgjigje.

Kërkojmë nga Komuna dhe nga ndërmarrja e ujësjellësit që të informojnë qytetarët për gjendjen aktuale dhe të ndërmarrin masat e nevojshme, për të siguruar furnizim të rregullt me ujë për banorët e Rekës.

Uji është nevojë themelore dhe jo privilegj!

Me fat Kurban Bajrami! 🤍

Në emër të fshatit Rekë, ju përcjellim urimet më të sinqerta të gjithë kusherinjve, miqve, dashamirëve, bashkëfshatarëve tanë dhe të gjithë besimtarëve muslimanë kudo që ndodhen.

Qoftë kjo festë e bekuar një ditë paqeje, dashurie, afërsie dhe begatie për çdo familje. Le të sjellë në zemrat tona më shumë mirëkuptim, respekt e lumturi, ndërsa sofrat tona të jenë gjithmonë të mbushura me mirësi e buzëqeshje.

Me shumë respekt,
Fshati Rekë

NJOFTIM!

Me dhimbje e pikëllim të thellë njoftojmë kusherinjtë, miqtë, dashamirët dhe gjithë farefisin, se sot ndërroi jetë kusheriri ynë i dashur 𝗡𝗲𝘅𝗵𝗺𝗲𝗱𝗶𝗻 𝗕𝗲𝗷𝘁𝘂𝗹𝗹𝗮𝗵𝘂.

I ndjeri do të kujtohet gjithmonë si një njeri i urtë, i respektuar dhe zemërmirë, që la gjurmë të mira tek të gjithë ata që e njohën. Me sjelljen, mirësinë dhe fjalën e tij të mirë, ai la kujtime që nuk do të harrohen kurrë.
Lusim Allahun e Madhërishëm ta mëshirojë me mëshirën e tij, ta shpërblejë me Xhenet dhe familjes t’i japë forcë e durim për ta përballuar këtë humbje të madhe.

Varrimi i të ndjerit bëhet sot, më 26.05.2026, në ora 16:38 (pas namazit të ikindisë), në varrezat e fshatit Rekë, Mitrovicë.

Ngushëllimet më të sinqerta familjes Bejtullahu, farefisit, miqve dhe të gjithë atyre që e njohën!

Krenaria jonë - KB TREPÇA! 💚🖤

Fshati Rekë i shpreh urimet më të sinqerta dhe më krenare klubit kampion KB Trepça dhe gjithë qytetit të Mitrovicës, për triumfin e madh dhe fitimin e titullit kampion për të tretin vit me radhë!

Me lojë spektakolare, karakter kampioni dhe nivel të jashtëzakonshëm gjatë gjithë sezonit, Trepça tregoi edhe një herë pse konsiderohet një nga klubet më të mëdha dhe më të respektuara në Republikën e Kosovës.
Në finalen ndaj KB Bashkimit, skuadra dominoi bindshëm duke fituar me 20 pikë epërsi, një finale që dëshmoi superioritetin dhe forcën e saj në basketbollin e Kosovës.

Ky sukses është rezultat i punës, përkushtimit dhe shpirtit luftarak të lojtarëve, stafit dhe tifozëve të zjarrtë që e mbështesin klubin në çdo hap.

Urime Mitrovicë!

Perëndimi i diellit nga një kënd tjetër…

Përherë në kujtesën tonë, Ejup Jusufi…

Sot shënohen 8 vite nga ndarja nga jeta e të ndjerit Ejup Jusufi, një ndër burrat e respektuar të fshatit tonë, ish-minator i Trepçës, i njohur për punën, ndershmërinë dhe karakterin e tij të veçantë.

Gjatë jetës së tij, Ejupi u dallua për vlera të larta njerëzore, edukatë dhe kulturë, duke qenë gjithmonë pranë njerëzve dhe duke ditur të bashkojë e afrojë zemrat e të gjithëve. Për këtë, ai gëzonte respekt të madh në Rekë dhe më gjerë.

Edhe pse u nda nga ne në moshën 65-vjeçare, kujtimi dhe vepra e tij vazhdojnë të jetojnë ndër ne. Fshati Rekë e përkujton dhe e nderon me mirënjohje të thellë, duke mos e harruar asnjëherë kontributin e tij.

Lutemi që Allahu ta ketë mëshiruar dhe ta ketë shpërblyer me Xhenet.
Kujtimi i tij do të mbetet përherë i gjallë në zemrat tona.

Një arritje që na bën krenarë: 𝗘𝗿𝘇𝗲𝗻 𝗡𝗶𝗺𝗮𝗻𝗶 emërohet komisar në Gjermani!

Me krenari dhe respekt të veçantë ndajmë me ju një arritje të jashtëzakonshme të bashkëfshatarit tonë, Erzen Nimani, djali i Vehatit dhe nipi i mësuesit Mon.

Erzeni ka përfunduar me sukses të lartë studimet e Policisë në landin Rheinland Pfalz në Gjermani, duke u vlerësuar me notat më të mira të mundshme. Si rezultat i këtij angazhimi dhe përkushtimi të palëkundur, ai do të nis zyrtarisht detyrën si komisar.

Edhe pse i lindur dhe i rritur në Gjermani, ai asnjëherë nuk i ka harruar rrënjët e tij nga fshati ynë Rekë.
Erzeni vjen nga familja e nderuar Nimani, një familje e njohur për arsim, edukatë dhe respekt të veçantë në fshatin tonë.

Në këtë rast, meritë të veçantë kanë edhe prindërit e tij, të cilët me përkushtim të pandërprerë kanë edukuar dhe rritur fëmijët e tyre duke mos i lejuar të harrojnë vendlindjen dhe traditat, pavarësisht jetës dhe punës në diasporë.
Suksese të tilla na bëjnë të gjithëve krenarë dhe na japin besim në të ardhmen e rinisë sonë.

I urojmë Erzenit shëndet, suksese të mëtejshme dhe një karrierë të ndritur në shërbim të drejtësisë dhe sigurisë!

Përshëndetje të gjithëve ju urojmë një fundjavë të mbarë!

Disa pamje panoramike të fshatit Rekë! 🌄