Uzpharmcontrol

O‘zbekiston Respublikasi Prezidenti Administratsiyasi Kommunikatsiya departamenti rahbari – O‘zbekiston Respublikasi Prezidenti matbuot kotibi Sherzod Asadov boshchiligidagi delegatsiya Moskva shahriga uch kunlik tashrif davomida Rossiya Federatsiyasi Prezidenti Administratsiyasi rahbari birinchi o‘rinbosari Sergey Kiriyenko, Administratsiya rahbari o‘rinbosari – Prezident matbuot kotibi Dmitriy Peskov, Prezidentning strategik sheriklik va hamkorlik boshqarmasi boshlig‘i Vadim Titov, Prezidentning jamoat loyihalari boshqarmasi boshlig‘i Sergey Novikov hamda Prezidentning AKT va aloqa infratuzilmasini rivojlantirish boshqarmasi boshlig‘i Tatyana Matveyeva bilan uchrashuvlar o‘tkazdi (https://t.me/Press_Secretary_Uz/7448).

Shuningdek, Rossiyaning qator jamoat va yoshlar tashkilotlari, kreativ hamda media sohalari vakillari bilan samarali muloqotlar bo‘lib o‘tdi.

Uchrashuvlarda muntazam professional muloqotni rivojlantirish, matbuot xizmatlari, tahlil markazlari va jamoat tashkilotlari o‘rtasidagi hamkorlikni kengaytirish, shuningdek, qo‘shma ta’lim dasturlari va tadbirlarini tashkil etish masalalari muhokama qilindi.

Delegatsiya boshqaruv kadrlarini tayyorlashga ixtisoslashgan zamonaviy markaz – “Senej” boshqaruv ustaxonasi faoliyati bilan ham yaqindan tanishdi.

O‘tkazilgan uchrashuvlar media va kommunikatsiyalar sohasida ochiq muloqotni rivojlantirish, tajriba almashish hamda istiqbolli qo‘shma loyihalarni amalga oshirish borasidagi o‘zaro manfaatdorlikni yana bir bor tasdiqladi.

O‘zbekiston va Braziliya regulyatorlari o‘rtasida hamkorlik istiqbollari muhokama qilindi

ICHning Braziliyaning Rio-de-Janeyro shahrida bo'lib o'tgan Assambleyasi doirasida Farmatsevtika mahsulotlari xavfsizligi markazi direktori Alisher Temirov Braziliyaning Milliy sanitariya nazorati agentligi (ANVISA) vakillari bilan uchrashuv o‘tkazdi.

Ma’lumot uchun, Braziliya Milliy sanitariya nazorati agentligi (ANVISA) dunyoning yetakchi farmatsevtika regulyatorlaridan biri hisoblanadi. Agentlik dori vositalari, tibbiy buyumlar, vaksinalar, kosmetika va oziq-ovqat mahsulotlari xavfsizligini nazorat qilish bo‘yicha vakolatli organ bo‘lib, Jahon sog‘liqni saqlash tashkiloti tomonidan yuqori salohiyatga ega regulyator sifatida e’tirof etilgan. ANVISA xalqaro standartlarni joriy etish, inspeksiya faoliyati, mahsulotlarni ro‘yxatdan o‘tkazish hamda sifat, samaradorlik va xavfsizlikni baholash sohasidagi ilg‘or tajribasi bilan xalqaro miqyosda tanilgan.

O'zaro muloqot davomida ikki mamlakatning farmatsevtika sohasidagi nazorat qiluvchi organlari o‘rtasidagi hamkorlikni yanada rivojlantirish, ilg‘or tajribalarni o‘rganish va o‘zaro almashish masalalari muhokama qilindi. Xususan, ANVISA ekspertlari bilan to‘g‘ridan-to‘g‘ri hamkorlik mexanizmlarini yo‘lga qo‘yish, mutaxassislar malakasini oshirish hamda tartibga solish amaliyotlari bo‘yicha tajriba almashish istiqbollari yuzasidan fikr almashildi.

Shuningdek, uchrashuvda farmatsevtika mahsulotlari muomalasini tartibga solish, milliy regulyator tizimiga ilg‘or xalqaro standartlarni joriy etish hamda regulyatorlararo hamkorlikni mustahkamlash yo‘nalishlaridagi strategik sheriklik istiqbollari atroflicha ko‘rib chiqildi.

Endi retsept qog‘ozda emas — elektron shaklda!

Elektron retsept tizimi bemor, shifokor va dorixona o‘rtasidagi hamkorlikni yanada tezkor, qulay va shaffof tashkil etadi. Elektron retsept qanday yaratiladi va bemor dori vositasini qanday oladi?

Infografika orqali jarayonning barcha bosqichlari bilan tanishishingiz mumkin.

Mahalliy farmatsevtika korxonalari vakillari bilan onlayn muloqot o‘tkazildi

Zoom platformasi orqali dori vositalari ishlab chiqaruvchi mahalliy farmatsevtika korxonalari vakillari ishtirokida navbatdagi onlayn muloqot tashkil etildi. Unda Farmatsevtika mahsulotlari xavfsizligi markazi hamda Farmatsevtika tarmog‘ini rivojlantirish agentligining mas’ul xodimlari qatnashdi.

Unda “A.B.-BIOKOM” MChJ tomonidan davlat ro‘yxatidan o‘tkazish va ro‘yxatdan o‘tkazilganlik guvohnomalarining amal qilish muddatini uzaytirish uchun taqdim etilgan 7 nomdagi dori vositalari, shuningdek, “NOVA PHARM” MChJ XK tomonidan ishlab chiqarilgan 2 nomdagi dori vositasini davlat ro‘yxatidan o‘tkazish bilan bog‘liq masalalar muhokama qilindi.

Uchrashuv davomida tadbirkorlar tomonidan bildirilgan savol va murojaatlarga mutaxassislar tomonidan batafsil javoblar berildi. Shuningdek, mahalliy ishlab chiqarilgan dori vositalarini ekspertizadan o‘tkazish jarayonida aniqlanayotgan kamchiliklarni o‘z vaqtida bartaraf etish, hujjatlarni belgilangan talablarga muvofiq rasmiylashtirish hamda davlat ro‘yxatidan o‘tkazish jarayonlarini jadallashtirish yuzasidan tegishli tavsiya-tushuntirish berildi.

O‘zbekiston Respublikasi Prezidenti Administratsiyasi rahbari Saida Mirziyoyeva AQSH Savdo vaziri o‘rinbosari Devid Fogel bilan uchrashuv o‘tkazdi (https://t.me/SShMirziyoyeva/3969).

Uchrashuv chog‘ida O‘zbekiston va AQSH o‘rtasidagi savdo-iqtisodiy hamkorlikni kengaytirish, investitsiyaviy sheriklikni mustahkamlash hamda ikki tomonlama aloqalarning yangi istiqbolli yo‘nalishlari xususida fikr almashildi.

Ta’kidlanganidek, Amerika biznes doiralarining mamlakatimizda amalga oshirilayotgan investitsiyaviy va infratuzilmaviy loyihalarga qiziqishi tobora ortib bormoqda. Bu esa yaqin istiqbolda yangi kelishuvlar, qo‘shma loyihalar, zamonaviy texnologiyalar va qo‘shimcha ish o‘rinlarini yaratish uchun mustahkam zamin bo‘lib xizmat qilishi mumkin.

Muloqot davomida ikki mamlakat tadbirkorlari o‘rtasida amaliy hamkorlikni rivojlantirish va o‘zaro manfaatli aloqalarni mustahkamlashda muhim o‘rin tutayotgan Amerika–O‘zbekiston Ishbilarmonlik va investitsiya kengashi faoliyatiga ham alohida e’tibor qaratildi.

Faoliyat uchun berilgan litsenziyaning amal qilishini 2026-yil may oyida o‘z xohishiga ko‘ra tugatgan yuridik shaxslar to'g'risida hududlar kesimida axborot

Zarur amaliyotlar (GxP) talablariga muvofiqlikni aniqlash xizmatlari uchun to‘lov miqdorlari davlat ro‘yxatidan o‘tkazildi

Adliya vazirligida Zarur amaliyotlar (GxP) talablariga muvofiqligi yuzasidan farmatsevtik inspeksiyadan o‘tkazish bo‘yicha ko‘rsatiladigan xizmatlar uchun to‘lovlar miqdorini aniqlash tartibi davlat ro‘yxatidan o‘tkazildi (ro‘yxat raqami 3847, 2026 yil 4 iyun).

Maʼlumki, Vazirlar Mahkamasining 2019 yil 18-sentabrdagi 788-son qarorida farmatsevtik inspeksiyalarni o‘tkazish bilan bog‘liq ishlarga haq to‘lash qonunchilikda belgilangan tartibda amalga oshirilishi belgilangan.

👉 Batafsil (https://t.me/huquqiyaxborot/19943)

Farmatsevtika faoliyatini litsenziyalash va farminspeksiya boshqarmasi tomonidan respublikamiz hududida farmatsevtika faoliyati bilan shug‘ullanish huquqiga ega korxonalar va tashkilotlar soniga oid statistik maʼlumotlar yangilandi.