لا شك أنها تونس

زكرة_بريك

شكون فيكم ما سمعش ب” زكرة بريك” وشكون فيكم يعرف معناها.
يقولو :” ناضت زكرة بريك بين فلان و علان “. و يقولو ” فلان طاحت فيه زكرة بريك ” أو “ركحت فيه زكرة بريك”. لكن قليلون هم من يعرفون أصل هذا القول الضارب قدما في تاريخ البلاد التونسية.
فمن هو “بريك” ؟ و ما قصة “زكرته” التي لا تغيب عن حديث التونسيين و مجالسهم؟
القصة كاملة:
منذ عقود ، إبان النزاع بين الحسينية و الباشية في الإيالة التونسية من أجل السطوة و الحكم و سعيا من كل طرف لبسط نفوذه على الإيالة ، كانت العائلة الباشية هي اللي تملك أداة “العنف الشرعي” و المتمثلة في فرق من العساكر كانت تخرج من قصر باردو في اتجاه مختلف جهات البلاد و تتكون هذه الفرق أساسا من عناصر من الجيش الإنكشاري و عسكر زواوة (الأول في الحرب و الآخر في الراتب هكذا يصفه الأجداد ) ومعهم بعض “الصبايحية” و عدد رماة المدفعية . و تسمى كل “دورية مشتركة” من هذا النوع بالمحلة.
و تتمثل المهمة الاولى للمحلة في اخضاع العروش المعارضة للعائلة الباشية و جمع الجباية و البت في النزاعات الناشبة على مستوى محلي.
و كانت كل محلة تضم زيادة على العناصر العملياتية ، عنصرا له مهمة مختلفة و هي إصدار ألحان معينة من آلة موسيقية كانت تسمى “الكريرو” تشبه الترومبات الحديثة و قد سماها سكان الايالة أنذاك بالزكرة.
تلك الألحان لا يفهمها الا العساكر ؛ يعني بعضها الهجوم فيما يعني بعضها الآخر إما التراجع أو التجمع …
و كانت من بين أشرس المحلات و أكثرها عنفا و بطشا على الإطلاق ؛ محلة يشغل فيها عسكري يسمى ” مبروك الزواوي” مهمته النفخ في “الكريرو” و يكنى صاحبنا مبروك ب “بريك” .
فكان نفخ “بريك” في “زكرته” إيذانا ببدأ الهجوم على الأهالي و البطش بهم .
لذلك كان الناس بعد أكل نصيبهم من بطش المحلة ضربا و شتما و تهجيرا … ؛ يروون الحادثة بالقول : “آش بش نحكيلك وليد عمي ، اليوم طاحت فينا زكرة بريك”.

Journal Quoi de 9

نشرة الأخبار الإيجابية لهذا اليوم
© Seif Eddine Cherif

Journal Quoi de 9

نشرة الأخبار الإيجابية لهذا اليوم
© Seif Eddine Cherif

في علاقة .. في علاقة.. في علاقة .. في علاقة .. في علاقة.. في علاقة .. في علاقة .. في علاقة.. في علاقة ..

ياااسر الحق :|

Journal Quoi de 9

نشرة الأخبار الإيجابية لهذا اليوم

Journal Quoi de 9

التفاصيل على هذا الرابط
هذا الرابط :
https://m.facebook.com/story.php?story_fbid=1800672060071377&id=100003858027976

حكايات تونسية منسية

المثل اقول: إلي يشتها ش**ة اديرها في عشاه. في الحجر الصحي العام الحق شتهيت لبلابي، و لا نهج غانا محلول لا حطاب ولا بيبي ولا حتا صباط الدزيرى. هاني درتها في عشايا و ربي تستر هااليلة من الغازات المضادة للكورونا ،:) ليلتكم سعيدة
#tunisian #tunisie🇹🇳 #تونس #lablabi #لبلابي

هاو مارك زوكربرغ ، فد مالكورونا ومن الحجر الصحي إلي في بلادهم، وطاح إبربش في الفايسبوك متاعو ( شكلو إبربش فيه صباح وليل ملي بدات الكورونا ).
قال شنوة احب ياخو راينا في تبربيشو وفي شعمل الستراس فيه ( تباً له وللكورونا ) .
جربتو فايسبوك الجديد ؟؟؟

شفتوها إلي في التصاور ؟ هذي تونسية و إسمها Soumaya Bousaid مانيش باش نحكيلك على إنجازاتها من 2006 لليوم..و مانيش باش نحكي على ميدالياتها و قداش من مناسبة رفعت فيها درابونا في المحافل الدولية..أكيد برشا منكم ما يعرفوهاش بحكم كانو مغيبينها رياضيا، إداريا و إعلاميا من سنين و سنين و كانت محرومة ماديا و غير مدعومة من الوزارة بسبب جوقة و هيئة مديرية من تحت وزارة الرياضة حارقتها من عام 2008 و على خاطر كل جواب أو مكتوب تحاول باش توصلو للوزرة إلي تعاقبو علينا كان يترفض من تحت لتحت و ما يوصلش لأسباب مجهولة..
إلي حبيت نعلمكم بيه إلي سمية توى في المغرب صنعت ستاج لروحها باش تدعم بيه ملفها و تاخذ حقها و تكون بيه آخر فرصة للسلطات التونسية باش تحط الأمور الرياضية في نصابها..(و أهمهم الرياضات الفردية المحقورة)
سمية آخر نداء ليها وقتلي هبطت فيديو نهار 20 جوان في شكل رسالة لرئيس الحكومة بينت فيه مطلبها في حقها في الكونترا و فلوسها المنهوبة لآخر مليم، و محاسبة الجوقة و على رأسهم المدير العام..إلي إذا ثبتت التجاوزات بالوثائق و التسجيلات إلي عندها.. فحق سمية التونسية باش يولي مطلب شعبي.

منقول عن : Seif Cherif

مسلسل ولد الناس - الحلقة الأولى

في ما يخص آخر ليلة

تونس من الفوق
Tunisia From The Sky
La tunisie vu de ciel

المغرفة هذي شكون مازال عندهم منها في الدار ؟

كان يعطيوك طبق حلو تونسي، لشكون تفرق من الأحباب ؟
مركيهم

#صليحة_الكانون
برشا سألوني البارح على أصل إسم صليحة (الطاسة) إلي تتحط فوق الكانون منين !؟ و برشا حبو يعرفو علاش سماوها صليحة؟! و شنية إسمها في جهات أخرى؟!
#الصليحة في تونس (أو بالمفهوم الأصح، حكة الطماطم بوكيلو) في ولايات أخرى نلقاوها تتسمى #مجمارة (جاية من كلمة الجمر) و في ڨفصة مثلا يسميوها #النافخ و #راس_ديڨول..
الصليحة وراها قصة بدات من تونس العاصمة..و تعددت فيها الروايات أما بقات تقريبا فما رواية المتفق عليها على لسان برشا من كبارنا...

* يقولو قبل و كيما نعرفو الناس الكل إلي تقريبا كل العائلات كانت عندها علاقة كبيرة بالكانون..،هو الي إطيبو عليه العشاء، يشويو فيه السلاطة، يدفاو بيه، و حتى يشيحو بيه الحوايج و برشا وضائف أخرين...
في الوقت هذاكا كانت فما مرى محبوبة برشا بين جيرانها ضاع عليها الوقت و ما شعلتش الكانون في وقتو، باش تسخن العشاء لراجلها، و الي بدورو وقت مرواحو قرب..و حار دليلها...(في الوقت هذاكا و من عادات التوانسة يطلعو الكانون قدام عتبة ديارهم باش يضربو الريح و يشعل فيسع).. في النهار هذاكا الجيران كلها طلعت كواننها ما عدى المرى هذي، طلعت كانونها إمخر و بقى الوحيد طافي و ماهيش باش تخلط على الموعد المعتاد...فكرت مليح..بعدها جابت #طاسة و كملت نقبتها من لوطة و حطتها حطان على الهوى (باش تنجم تشعل فتيلة الفحمة لولة في وسطو)..و في فترة زمنية صغيرة ولى كانونها سباق و حامي على الكوانن الي بجنبو الكل و بقات الطاسة فوقو...
و من هنا عيطولها الجران من وقتها يا مرى يا مڨدية ...يا مرى يا صليحة...
مع العلم إلي إسم صليحة في الأصل، هو إسم عربي كان موجود بكثرة قبل..و كانو يعيطو بيه لكل مرى حاذقة و مڨدية في الزمان هذاكا..و نذكرو مثلا ( الفنانة القديرة الراحلة صليحة و إلي في الأصل إسمها، صلوحة بنت إبراهيم بن عبد الحفيظ) و تربط بيها الإسم هذا لأصالتها و حذاقتها في الوقت هذاكا بخلاف كونها فنانة و محبوبة الجماهير...

الصليحة بخلاف كونها تساعد باش تشعل الكانون نلقاو عندها وضائف أخرى عند ناس قبل كيما : يقيسو بيها الصاع ولى يكيلو بيها الزيت، و كيما زادة يستعملوها في (تكييل مونة الكسكسي قبل الزكية)..

و وين تلقى كانون لازم باش تلقى معاه الصليحة و مرافقتها الأنيقة و إلي خذات مقام الريح #المروحة..إلي كي يتحدو ال 3 يولعوها كل عشية...هذاكا علاش نلقاوهم بمثابة : ثلاثي الركشة في أيامات الزهو و الطرب..
#طقاطق_تونسية
#في_أيامات_شتوية
#نهاركم_دافي
© Seif Cherif

#معلومة_صباحية
علاش كيف نقومو الصباح نقولو صباح الخير و صباح النور ؟...حاليا معضم الناس يجاوبو على كلمة "صباح الخير" بقولهم "صباح النور"..الحكاية هذي ماجاتش من فراغ...التحية هاذي متداولة من الحضارات السابقة وقتلي كانو الناس يعتقدو بقوتين للخير والشر يمثلها #النور و #الضلمة.. زوز يتنازعو في السيطرة على هذا العالم...كانو يحييو بعضهم بقولهم " "صباح الخير" ، "صباح النور" إشارة لتأييدهم للخير...
ومن الملاحظ والجميل بلي القولة هاذي حاليا منتشرة في العالم كلو و بكل اللغات حتى ولات حاجة عادية وخالية من الفكر القديم إلي يرجع تاريخو لٱلاف السنين...و ولات كلمة #صباح_الخير هي مجرد كلمة تعبر عن أمنية بيوم جميل للشخص المقابل.
#صباحكم_نوار
© Seif Cherif

#التڨازة
وقتلي كانت حرفة قبل في التسعينات كانت فما تكازة تتعدى بين الحوم و تعيط بإسمها، تدخل لديار العائلات، تقرى الكف و تاخذ البشارة..عاد من جملة الطقوس الي كانت تعملهم التكازة كانت تضرب لخفيف (هاذي تو نجيوها) وتقرى الكف و تقرى زادة الفنجان و الي في حد ذاتو طريقة يعرفها العالم أجمع، و من هنا بدا إنتشارو....
ﺗعرفت ﻗﺮﺍﺀﺓ ﻓﻨﺠﺎﻥ ﺑإﺳﻢ #ﺍﻟﺘﺎﺳﻴﻮﻏﺮﺍﻓﻲ، Tasseography ﻭ ﻟلفن هذا ﺟﺬﻭﺭ ﻗﺪﻳﻤﺔ ورموز ساهلة يتعلموها، بدى أول مرة في الصين ﺑﻘﺮﺍﺀﺓ حشيشة ﺍﻟتﺎﻱ، ﻭ ﻣﺎﺭﺳوه قلة من رجال الدين. بعدها بفترة تنقل الفن هذا لﻟﺸﺮﻕ ﺍﻷﻭﺳﻂ، وين بدات القهوة البن في بلاصة التاي، بعدها تعرف و تنشر في الهند عن طريق الأتراك..الشي الي خلى برشا ﻳﻌﺘﻘﺪو بأنو ﺃﺻﻞ ﻗﺮﺍﺀﺓ ﺍﻟﻔﻨﺠﺎﻥ ﻳﺮﺟﻊ لﻷﺗﺮﺍﻙ، خاتر ﻛﺎﻧﺖ عندهم ﻋﺎﺩﺓ ﻗﺪﻳﻤﺔ ﻳﻤﺎﺭﺳﻮﻬﺎ في ﺍﻟﻤﻌﺎﺑﺪ،(وقتلي يحب واحد يعرف حاجة على ﺍﻟﻤﺴﺘﻘﺒﻞ، ﻳمشي للﻤﻌﺒﺪ، ﻭﻳﺸﺮﺏ ﻓﻨﺠﺎﻥ ﻭﻳخليه قدام باب المعبد، يﺪﺧﻞ يأدي طقوسه ﺍﻟﺪﻳﻨﻴﺔ، ﻭﻳﺨﺮﺝ باش يلقى الباب يحكيلو على مستقبلو.)
ﻳﺮﺟﻊ ﺍﻧﺘﺸﺎﺭ العادة هاذي في الأصل لﺭﻏﺒﺔ برشا ﻣﻦ ﺍﻟﻨﺎﺱ ﻓﻰ ﻣﻌﺮﻓﺔ ﻣﺴﺘﻘﺒﻠﻬﻢ ﻭ شنية يصير فيه،الشي الي خلى برشا و لوقتنا هذا يتمادى شوية و يمشي لطرق أخرى و ﻭﺳﺎﺋﻞ ﻏﺮﻳﺒﺔ و ماهيش ﻋﻠﻤﻴﺔ كيما ﻗﺮﺍﺀﺓ ﺍﻟﻜﻒ ﻭﺍﻟﻄﺎﻟﻊ ﻭﺍﻷﺑﺮﺍﺝ ﻭﻗﺮﺍﺀﺓ ﻣﻼﻣﺢ ﺍﻟﻮﺟﻪ، و ضربان لخفيف ﻭﻟﻌﻞا ﺃﺷﻬﺮﻫﺎ ﻗﺮﺍﺀﺓ ﺍلكارطة على يد تكازة خاصة كي تشوف الري و الكوال و تفوححها بكلمات كيما (عندك عتبة و غيار و التابعة و هات ماكا اللاوي)..

ما ننساوش زادة إلي قبل كانو أغلب التكازات من اليهود و كانو يخدمو خطبات للبنات بحكم انو الصبايا ماكانوش يخرجو برشا و كانت التكازة بمثابة الفيسبوك و اقوى وسيلة للتنسنيس و رد الخبر عالسريع..

الي في التصويرة صورة نادرة للفنانة المصرية ميرفت أمين تقرى الفنجان لأمها (الأنجليزية الأصل)..
© Seif Cherif

#كأس_ماء_مع_القهوة
صباحكم نوار...في العهد الخشين، عهد البركة والتواضع والخير ومش بعيد برشا على جيل الثمانينات والتسعينات في عاداتنا السمحة كان كيف يجينا ضيف ويضرب "دقداقة" الباب (حكيت عليها في السابق) كان يدخل للسقيفة ويقعد على الدكانة يستنى في كبير الدار، باش يستقبلو.. وما غير مقدمات يجيه طبق من مالي الدار فيه فنجان قهوة عربي مع كاس ماء. بلاش السؤال الكلاسيكي المعزز بالدراما (ٱش نجيبلك تشرب وغيرو...)

عاد من حلاوات الإستضافة هاذي وحكمتها وخاصة كيف يكون الضيف ماهوش قريب العائلة، كان كيف يتمدلو الطبق فيه القهوة وكاس الماء يتم الإختيار الذاتي منو فيه (وإلي في العادة يكون تلقائي).. كان هز كاس القهوة شربها وبالشفاء ليه.. وكان هز كاس الماء قبل القهوة، وقتها يفهمو مالي الدار أنو إحتمال مافطرش أو أنو جيعان بصيفة عامة.. وقتها تتشمر ليدين وتحضر الميدة ويتم إستضافتو على فطور ولا عشاء..
#قواعد_الزمن_الجميل
#نهاركم_زين
© Seif Cherif

#قوم_أشرب_قهوتك وصحصح مليح باش نرجع بيك شوية سنين لتالي وين باش تسرح مع جيل كان قبل ما يدخل لدارو (تونس) يدق على حلقة نحاس، سقيفة عربي، غربال ذهب، خالتي حليمة..

تونس النوار والياسمين بزناقيها والربط إلي فيها...عشنا فيه سنين من سابع جار للعشرين..
الصباح تسمع صوت المهراس صوت الطاحونة وريحة لفاح...الروبة فيكيا والخبز البايت و الخماس..
ألمربع وولاد الحومة و الترنتينات والهدة للبحر على البسكلات..
الهربة للواد وللصواوي أنجاص على بوصع وسواني..
ألزربوط والكاري والغميضة وطلة على الباراج..7 حجرات وماتش في الحومة على باب الڤاراج ..
الڤازوز للناس الكل في السيزيام وفرحة العوايل،بياع الجيلاط والفريڨيلو في القوايل..
عم نردين هريسة حلوة 150 فرنك مع دعاء الخير..والتكويرة في البطحاء وديما متعادلين...
أول ضحكة مع بنت الجيران،بنت القناعة والخير..الحشمة والخوف كيف يكش عليك كبير...
رمضان وضربان المدفع، تراويح، البني بني والكرماس...قهيوة السوق وتلحليح الدار على المرواح...
عيدنا الصغير، تقاليد الزيارة، الجمال والفيانة..لمة العائلة وفرشان البقلاوة...
وغيرو وغيرو من حكايات صغرنا إلي حلتلنا باب كبير في حياتنا وعطاطنا أمل بكونو الخير مازال موجود وواقف على بركة أجدادنا، وكيما صنعنا صغرنا نصنعو شبابنا.
#زمن_ما_قبل_الأنترنات
#إعادة_نشر
© Seif Cherif

حكايات تونسية منسية

أول راديو تونسي يهتم بالموروث الثقافي التونسي

أهلا بيكم، يفرحني برشا باش نعلن اليوم على نشأة أوّل واب راديو تونسي 100% مهتم بالموروث الثقافي التونسي..، راديو حكايات تونسية منسية. الراديو هذا مازال تقنيا في طور التجربة. وما يولّي بالحق صالح ونافع لينا الكل إلا بملاحظاتكم وبتجربتكم ليه..لذا ما تبخلوش علينا في أي ملاحظة تتعلق بمشروعنا.. والي هو مشروعكم.
للمعلومة فالمستقبل القريب باش يقوم بمهمة التنشيط في القناة : حمودة الياس، Kadhem Ben Mohamed و Seif Cherif. وإن شاء الله في المستقبل كيف نلقاو عباد أخرين مهتمين بالتراث كيفنا أكيد باش ينضموا لينا الكل و يكبر الفريق.
فقط حاجة صغيرة و مهمة ، كفريق حكايات تونسية منسية قاعدين نقومو بعمل متواضع و إن شاء الله يتحسن و هذا على حساب حياتنا الشخصية و صحتنا و خدمتنا. فينا الّي يخدم و فينا البطال لكن هذا ما يمنعش إننا ننقذو الّي نقدرو عليه من تراثنا اللامادي.
يقول القائل ويني وزارة الثقافة ؟ ماناش طالبين حتى دعم لا مادي و لا معنوي من الدولة و لا من وزارة الثقافة ، أحنا توانسة خليونا نحطو اليد في اليد و نقومو بواجبنا تجاه تراثنا و تجاه أولادنا و الأجيال القادمة اللي نتمنى نجمو نخليولهم حاجة يفخرو بيها.
راديو حكايات تونسية منسية في طور التجربة ما تنساوش، وما تبخلوش بآرائكم الكل و مرحبا بيكم وتحيا تونسنا.