Layyah Media House Layyah

لیہ(لیہ میڈیا ہاوس ) وزیراعلیٰ پنجاب مریم نواز شریف کے احکامات پر شہریوں کے مسائل ان کی دہلیز پر حل کرنے کے لیے بہادر ڈیجیٹل لائبریری میں کھلی کچہری منعقد ہوئی جس کی صدارت کمشنر ڈیرہ غازی خان ڈویژن اشفاق احمد چوہدری اور ریجنل پولیس آفیسر ڈیرہ غازی خان اظہر اکرم نے کی۔ کھلی کچہری میں شہریوں نے مختلف نوعیت کے مسائل بالخصوص ریونیو، بلدیاتی امور، ستھرا پنجاب، پولیس، صحت اور دیگر محکموں سے متعلق درخواستیں پیش کیں جن کے حل کے لیے متعلقہ افسران کو فوری احکامات جاری کیے گئے۔اس موقع پر کمشنر ڈیرہ غازی خان ڈویژن اشفاق احمد چوہدری نے کہا کہ وزیراعلیٰ پنجاب مریم نواز شریف کی ہدایت پر شہریوں کے مسائل کے فوری اور ترجیحی بنیادوں پر حل کے لیے وہ خود لیہ آئے ہیں تاکہ عوام کو اپنے مسائل کے حل کے لیے دفاتر کے غیر ضروری چکر نہ لگانا پڑیں اور انہیں بروقت ریلیف فراہم کیا جا سکے۔انہوں نے کہا کہ شہریوں کے مسائل کا حل انتظامیہ کی اولین ترجیح ہے اور اس مقصد کے لیے تمام متعلقہ افسران اپنی ذمہ داریاں پوری تندہی اور احساس ذمہ داری کے ساتھ ادا کریں۔ انہوں نے ہدایت کی کہ شہریوں کی درخواستوں پر محض کارروائی تک محدود نہ رہا جائے بلکہ مسائل کے عملی حل کو یقینی بنایا جائے اور متعلقہ افسران شہریوں کے مسائل کے حل میں کوئی دقیقہ فروگزاشت نہ کریں افسران اپنے دفاتر کے دروازے شہریوں کے لیے کھلے رکھیں اور عوامی مسائل سن کر ان کے حل کے لیے مؤثر اقدامات کریں انتظامیہ کی ذمہ داری ہے کہ شہریوں کو سہولیات کی فراہمی اور ان کے جائز مسائل کے حل میں ہر ممکن تعاون فراہم کیا جائے۔ریجنل پولیس آفیسر ڈیرہ غازی خان اظہر اکرم نے کہا کہ پنجاب پولیس شہریوں کے جان و مال کے تحفظ اور امن و امان کے قیام کے لیے پوری ذمہ داری کے ساتھ کوشاں ہے پولیس سے متعلق شہریوں کے مسائل کے فوری ازالے کے لیے مؤثر اقدامات کیے جا رہے ہیں جبکہ عوام کو محفوظ اور پرامن ماحول کی فراہمی پولیس کی بنیادی ذمہ داری ہے۔ انہوں نے کہا کہ شہری پولیس سے متعلق اپنے مسائل بلاجھجک پیش کریں تاکہ ان کے حل کے لیے قانون اور میرٹ کے مطابق بروقت کارروائی عمل میں لائی جا سکے۔اس موقع پر ڈپٹی کمشنر لیہ آصف علی ڈوگر، ڈسٹرکٹ پولیس آفیسر حسن جاوید اور مختلف محکموں کے افسران موجود تھے۔

کمشنر ڈیرہ غازی خان ڈویژن اشفاق احمد چوہدری نے کہا ہے کہ امن کسی بھی معاشرے کی بنیادی ضرورت اور اس کی پہچان ہوتا ہے،ضلع لیہ کے عوام نے ہمیشہ امن، بھائی چارے، رواداری اور باہمی احترام کی شاندار روایات کو فروغ دیا ہے، ان روایات کو برقرار رکھنا تمام طبقات کی مشترکہ ذمہ داری ہے۔ انہوں نے کہا کہ معاشرے کے تمام طبقات باہمی تعاون اور ہم آہنگی کے ذریعے ضلع میں امن و امان کے قیام اور پائیداری کے لیے اپنا کردار ادا کریں۔ انہوں نے یہ بات ڈی سی کمیٹی روم میں ضلعی امن کمیٹی اور انجمن تاجران کے اجلاس کی صدارت کرتے ہوئے کہی۔ اجلاس میں ریجنل پولیس آفیسر ڈی جی خان اظہر اکرم، ڈپٹی کمشنر لیہ آصف علی ڈوگر، ڈسٹرکٹ پولیس آفیسر حسن جاوید،اے ڈی سیز شبیر احمد ڈوگر،محمد اویس سرور اور دیگر متعلقہ افسران موجود تھے۔کمشنر اشفاق احمد چوہدری نے کہا کہ ضلع لیہ ایک پرامن علاقہ ہے اور یہاں کے عوام نے ہمیشہ بھائی چارے، مذہبی رواداری اور باہمی احترام کا مظاہرہ کیا ہے امن کے قیام اور اسے برقرار رکھنے کے لیے انتظامیہ، پولیس، علماء کرام، تاجران اور معاشرے کے تمام طبقات کو مشترکہ ذمہ داری کا مظاہرہ کرنا ہوگا۔ انہوں نے کہا کہ عوامی تعاون کے بغیر امن و امان کے انتظامات کو مکمل طور پر مؤثر بنانا ممکن نہیں اس لیے ہر فرد اپنے اردگرد کے ماحول میں امن، برداشت اور رواداری کے فروغ کے لیے مثبت کردار ادا کرے۔ انہوں نے مزید کہا کہ افواہوں، اشتعال انگیزی اور انتشار سے اجتناب کرتے ہوئے باہمی اعتماد اور ہم آہنگی کو فروغ دیا جائے تاکہ ضلع میں قائم پرامن ماحول مزید مضبوط ہو۔ریجنل پولیس آفیسر ڈی جی خان اظہر اکرم نے کہا کہ ضلع میں امن و امان برقرار رکھنے کے لیے پولیس بھرپور انداز میں اپنے فرائض سرانجام دے رہی ہے اور قانون کی عملداری کو یقینی بنانے کے لیے تمام ضروری اقدامات کیے جا رہے ہیں۔ انہوں نے کہا کہ پولیس کی کوششوں کے ساتھ ساتھ شہریوں اور معاشرے کے تمام طبقات کا کردار بھی بنیادی اہمیت کا حامل ہے۔ علماء کرام، تاجر برادری، امن کمیٹی کے اراکین اور شہری پولیس و انتظامیہ کے ساتھ تعاون کرتے ہوئے کسی بھی مشکوک سرگرمی یا امن عامہ سے متعلق مسئلے کی بروقت نشاندہی کریں تاکہ فوری کارروائی ممکن بنائی جا سکے۔اجلاس میں امن کمیٹی اور انجمن تاجران کے ممبران نے اپنے اپنے خیالات اور تجاویز پیش کرتے ہوئے ضلع میں امن و امان کے قیام، مذہبی رواداری، بھائی چارے اور باہمی ہم آہنگی کے فروغ کے لیے ضلعی انتظامیہ اور پولیس کے ساتھ بھرپور تعاون کی یقین دہانی کرائی۔ ممبران نے کہا کہ ضلع لیہ کے پرامن ماحول کو برقرار رکھنے کے لیے تمام طبقات اپنی ذمہ داریاں ادا کرتے ہوئے انتظامیہ اور پولیس کے ساتھ مکمل تعاون جاری رکھیں گے۔

تھر کول پاور پروجیکٹ صرف بجلی کی پیداوار کا منصوبہ نہیں، بلکہ تھر کے عوام کو بااختیار بنانے اور ان کے وسائل سے انہیں براہِ راست فائدہ پہنچانے کا عملی سفر ہے۔

تھر سے 3,000 میگاواٹ سے زائد بجلی نیشنل گرڈ میں شامل ہو رہی ہے، جبکہ اسلام کوٹ کے شہریوں کو 100 یونٹ تک مفت بجلی فراہم کی جا رہی ہے۔ ساتھ ہی مقامی لوگوں کے لیے روزگار کے مواقع پیدا کیے جا رہے ہیں اور خواتین کو بااختیار بنانے کے لیے انہیں ٹرک ڈرائیونگ کی تربیت بھی دی جا رہی ہے۔

یہ وہ خواب ہے جو شہید محترمہ بینظیر بھٹو نے تھر کے عوام کے لیے دیکھا تھا، جسے صدر آصف علی زرداری اور چیئرمین پاکستان پیپلز پارٹی بلاول بھٹو زرداری کی کاوشوں سے عملی تعبیر مل رہی ہے۔

تھر آج صرف پاکستان کو توانائی فراہم نہیں کر رہا، بلکہ تھر پاکستان کی قسمت بدل رہا ہے۔

12 ستمبر عالمی یومِ ابتدائی طبی امداد پر ریسکیو 1122 لیہ کی پہلی پوزیشن، 10,183 لائف سیورز تیار

لیہ: وزیر اعلیٰ پنجاب اور سیکرٹری ایمرجنسی سروسز ڈیپارٹمنٹ ڈاکٹر رضوان نصیر (ستارہِ امتیاز) کی ہدایات اور وژن کے مطابق ڈسٹرکٹ ایمرجنسی آفیسر ریسکیو 1122 لیہ ڈاکٹر سجاد احمد ملک کی زیرِ نگرانی 12 ستمبر عالمی یومِ ابتدائی طبی امداد کے موقع پر ریسکیو 1122 لیہ نے 10,183 افراد کو لائف سیورز کی عملی تربیت فراہم کرکے پنجاب بھر میں پہلی پوزیشن حاصل کی۔

ریسکیو 1122 لیہ کی جانب سے مختلف تعلیمی اداروں اور عوامی مقامات پر وسیع پیمانے پر فرسٹ ایڈ تربیتی سرگرمیوں کا انعقاد کیا گیا، جن کے دوران طلبہ و طالبات اور شہریوں کو ہنگامی حالات میں فوری اور مؤثر ابتدائی طبی امداد فراہم کرنے کے عملی طریقے سکھائے گئے۔

تربیتی سرگرمیوں کے دوران شرکاء کو CPR، شدید خون بہنے کی صورت میں خون روکنے اور دیگر ہنگامی صورتحال سے نمٹنے کے عملی طریقوں کی تربیت فراہم کی گئی تاکہ ریسکیو ٹیم کی آمد سے قبل متاثرہ فرد کو بروقت مدد فراہم کی جا سکے۔

اس تربیتی مہم کا مقصد سیکرٹری ایمرجنسی سروسز ڈیپارٹمنٹ ڈاکٹر رضوان نصیر کے وژن "پاکستان کو لائف سیورز کی قوم بنانے" کو عملی جامہ پہنانا اور "مضبوط کمیونٹی، محفوظ پاکستان" کے عزم کے تحت شہریوں کو ہنگامی حالات میں قیمتی انسانی جانیں بچانے کے قابل بنانا ہے۔

ڈسٹرکٹ ایمرجنسی آفیسر ریسکیو 1122 لیہ ڈاکٹر سجاد احمد ملک نے کہا کہ 10,183 افراد کو لائف سیورز کی تربیت فراہم کرکے پہلی پوزیشن حاصل کرنا ریسکیو 1122 لیہ کی پوری ٹیم کی محنت کا نتیجہ ہے۔ بروقت ابتدائی طبی امداد قیمتی انسانی جان بچانے میں اہم کردار ادا کرتی ہے۔

ریسکیو 1122 لیہ کی جانب سے "Together We Save Lives" کے عزم کے تحت فرسٹ ایڈ تربیت اور عوامی آگاہی کی سرگرمیوں کا سلسلہ آئندہ بھی جاری رکھا جائے گا۔

ریسکیو 1122 ضلع لیہ