Naila Rathore- Poetess

ادب لطیف کے شمارے میں شامل میری غزل اور نثری نظم
ز

تمہارے خواب سے رستہ جدا ہے

دیا تھا زخم جو اب تک ہرا ہے

بھلی لگنے لگی ہے تیری فرقت

کہ تیرے ہجر کا اپنا مزا ہے

زمانہ پوچھتا ہے کون ہو تم

بتاؤ کیا کہیں اب کیا چھپا ہے

زباں بندی میں بھی ہے حشر برپا

وہ چپ رہ کر بھی سب کچھ کہہ گیا ہے

کسی کے واسطے گر کچھ نہیں میں

تو کیوں گھر گھر میں میرا تزکرہ ہے

ترے لہجے میں کیوں ہے زہر اتنا

نجانے کون نفرت بو گیا ہے

اسیران وفا ڈرتے نہیں ہیں

کہ جاں سے پیارا یہ عہد وفا ہے

جلاتا کون ہے یوں گھر کو اپنے

مرا دشمن بھی مجھ پر ہنس رہا ہے

یہ تخت و تاج ہیں اسکی امانت

مرا حاکم فقط میرا خدا ہے

جو پس منظر میں بھی رہ کر عیاں ہوں

مرے ایقان کا ہی یہ صلہ ہے
نائلہ راٹھور
تخئیل

میں تم سے دور رہ کر بھی تمہیں محسوس کر سکتی ہوں
بدلتے موسموں میں
فضا کی خنکی میں تمہارے شہر سے آنے والے موسموں کی گیلاہٹ ہے
لگتا ہے شب بھر کسی نے یاد میں آنسو بہائےہیں
ہوا کی سرسراہٹ میں تمہاری نظموں کی سرگوشیاں سنائ دیتی ہیں
چاندنی تمہارے در پر ماتھا ٹیک کر فسوں انگیز ہو جاتی ہے
صبح کی کرنیں تمہارے آتشدان سے آگ کی تپش لے کر ابھرتی ہیں
اداسی روح میں جال بچھاتی چلی جاتی ہے
وجود خامشی کے طلسم میں موم کی صورت پگھلتا ہے
پہاڑوں سے پرے دور دیس میں
کوئی کسی بات پر کھلکھلا کر ہنستا ہے
مسکراہٹ جھرنا بن کے پہاڑوں سے میری اور سفر کرتی ہے
فضا نکھرنے لگتی ہے
بادلوں پر پیام لکھ کر بھیجا تھا بارش بن کر اسکے آنگن میں برسا ہو گا
تب ہی تو آنکھوں کا درپن گیلا تھا
آج وہاں پورا چاند ہو گا
مجھے بھی چاندنی اوڑھ کر سونا ہے
سپنوں کا میلا لگے گا
خوابوں کی انگلی تھامے تم بھی یہاں چلے آنا
خوابوں پر صرف نیند کاپہرہ ہوتا ہے
زمینی سرحدیں کب خوابوں کا رستہ روک سکتی ہیں
آج شب بھی میں جلد سو جاءونگی
نائلہ راٹھور

ماہنامہ بیاض میں شامل میری غزل اور نثری نظم

ادب لطیف میں شامل نثری نظم اور غزل

غزل

یہ ترے مزاج کی تلخیاں کہیں رنجشوں کو ہوا نہ دیں

تو کہے اگر تو کبھی کبھی کا یہ رابطہ بھی گھٹا نہ دیں

ملے اب تو جاں کو کہیں اماں رہیں کب تلک یونہی بے اماں

وہ جو خواب تھا کسی آنکھ کا اسے خواب سے ہی مٹا نہ دیں

تجھے جب ملیں کبھی فرصتیں تو یہ بیٹھ کے ذرا سوچنا

کہ بنے ہوئے ہیں جو راہبر وہی بستیوں کو جلا نہ دیں

کہیں کس سے یہ اپنی داستاں جسے دیکھو وہ ہے دکھا ہوا

یہ جدا مزاج کے لوگ ہیں تجھے پستیوں سے ملا نہ دیں

ہے عجب طرح کی یہ بےکلی نہیں چین ایک بھی پل مجھے

کہ تری انا کے یہ مسئلے کہیں دکھ کا جال بچھا نہ دیں

تو ذرا سنبھل کے اٹھا قدم نہ سمجھ یوں خود کو ہی عقل کل

مرے دوست تیرے حبیب ہی تجھے راستے میں دغا نہ دیں

نائلہ راٹھور

ایسا نہ ہو کہ زندگی میری محال ہو
کچھ تو کرو کہ رابطہ پھر سے بحال ہو

کھویا اسے تو جیسے مکمل ہے پا لیا
لگتا ہے اسکا ہجر بھی جیسے وصال ہو

دیکھا اسے تو دیر تلک دیکھتے رہے
لگتا نہیں تھا اسکو بھی کوئی ملال ہو

سمجھا زمانہ ہم کو نہ سمجھے اسے ہی ہم
الجھا ہوا سا جیسے کوئی اک سوال ہو

کھونے کو کیا تھا پاس کروں جسکا میں ملال
چاہے ملے عروج ،کہ مجھ کو زوال ہو

ہر شخص بدگمان ہے ہر شخص ہے خفا
اتنا بھی چاہتوں کا جہاں میں نہ کال ہو

دل اس کا مستحق تھا کیا اس نے جو کیا
کھلتا نہیں سلوک اگر حسبِ حال ہو

ہم نے تو جیسے تیسے گزارا تھاکر لیا
اللہ کرے ترے لئے اچھا یہ سال ہو
نائلہ راٹھور

( غیر مطبوعہ )

مجھے سمجھنے کا ہے جو دعوٰی تو یہ بتاؤ کہ کیا ہوا ہے
ہے آنکھ نم کیوں یہ دل ہے غمگیں فَضا بھی جیسے خفا خفا ہے

ہے دل کا عالم دھواں دھواں سا' پلک پلک پر ہیں خواب اٹکے
یہ شام اتری ہے کیسی گھر میں دیا جلا ہے نہ در کھلا ہے

میں سر جھکائے کھڑی ہوں کب سے ہے دور تک بس وہی اندھیرا
مرا مقدر ہے یہ سیاہی نہ صبح جاگی نہ دن چڑھا ہے

یوں تم نہ حیرت سے مجھ کو دیکھو یقین مانو کہ سچ یہی ہے
گیا جو اک بار کب ہے لوٹا یہی ہے دیکھا' یہی سنا ہے

نہ راستوں پر گلاب مہکے نہ سایہ کرنے سحاب آئے
کہ یوں ہی کانٹوں پہ چلتے چلتے یہ زندگی کا سفر کٹا ہے

ہوا نے دی تھی یہی بشارت گھڑی دعا کی یہی تھی شائد
ترے تسلّط سے جان نکلی تو پھر ہی اذن سفر ملا ہے

( نائلہ راٹھور )

تمہارے خواب سے رستہ جدا ہے
دیا تھا زخم جو اب تک ہرا ہے

بھلی لگنے لگی ہے تیری فرقت
کہ تیرے ہجر کا اپنا مزا ہے

زمانہ پوچھتا ہے کون ہو تم
بتاؤ کیا کہیں اب کیا چھپا ہے

زباں بندی میں بھی ہے حشر برپا
وہ چپ رہ کر بھی سب کچھ کہہ گیا ہے

کسی کے واسطے گر کچھ نہیں میں
تو کیوں گھر گھر میں میرا تزکرہ ہے

ترے لہجے میں کیوں ہے زہر اتنا
نجانے کون نفرت بو گیا ہے

اسیران وفا ڈرتے نہیں ہیں
کہ جاں سے پیارا یہ عہد وفا ہے

جلاتا کون ہے یوں گھر کو اپنے
مرا دشمن بھی مجھ پر ہنس رہا ہے

یہ تخت و تاج ہیں اسکی امانت
مرا حاکم فقط میرا خدا ہے

جو پس منظر میں بھی رہ کر عیاں ہوں
مرے ایقان کا ہی یہ صلہ ہے
نائلہ راٹھور