Jheegu

𑐠𑑁𑑄 𑐀𑐣𑑂𑐟𑐬𑐬𑐵𑐲𑑂𑐚𑑂𑐬𑐶𑐫 𑐡𑐵𑐳𑐟𑐵 𑐄𑐣𑑂𑐩𑐹𑐮𑐣 𑐡𑐶𑐰𑐳
𑐫𑐾𑑃, 𑑑𑑒 𑐠𑐶𑑄𑐮𑐵𑐠𑑂𑐰 : 𑐴𑐮𑐶𑑄𑐫𑐵 𑐠𑐷𑐠𑐷 𑐡𑐾𑐳𑐫𑑂 𑐠𑑁𑑄 𑐀𑐣𑑂𑐟𑐬𑐬𑐵𑐲𑑂𑐚𑑂𑐬𑐶𑐫 𑐡𑐵𑐳𑐟𑐵 𑐄𑐣𑑂𑐩𑐹𑐮𑐣 𑐡𑐶𑐰𑐳 𑐣𑑂𑐫𑐵𑐫𑐾𑐎𑐾𑐟𑑂𑐫𑑄𑐐𑐸 𑐡𑐸 𑑋

𑐩𑐵𑐣𑐰 𑐟𑐳𑑂𑐎𑐬𑐷, 𑐖𑐧𑐬𑐖𑐳𑑂𑐟𑐷 𑐱𑑂𑐬𑐩, 𑐫𑑁𑐣 𑐱𑑀𑐲𑐞𑐵, 𑐧𑐵𑐮𑐱𑑂𑐬𑐩, 𑐖𑐧𑐬𑐖𑐳𑑂𑐟𑐷 𑐂𑐴𑐶𑐥𑐵 𑐣𑐵𑐥𑑄 𑐩𑐳𑑂𑐟𑐫𑑂𑐟 𑐳𑐱𑐳𑑂𑐟𑑂𑐬 𑐡𑑂𑐰𑐣𑑂𑐡𑑂𑐰𑐫𑑂 𑐖𑐧𑐬𑐖𑐳𑑂𑐟𑐷 𑐨𑐬𑑂𑐣𑐵 𑐫𑐵𑐫𑐾𑐐𑐸𑐮𑐶𑐳𑐾𑑄𑐫𑐵 𑐡𑐵𑐳𑐟𑑂𑐰𑐫𑐵 𑐁𑐢𑐸𑐣𑐶𑐎 𑐳𑑂𑐰𑐬𑐸𑐥 𑐰𑐶𑐬𑐸𑐡𑑂𑐢 𑐴𑐮𑐶𑑄𑐣𑑂𑐫𑑄𑐎𑑄 𑐔𑐾𑐟𑐣𑐵 𑐣𑑂𑐫𑑄𑐎𑐾𑐐𑐸 𑐠𑑂𑐰 𑐡𑐶𑐰𑐳𑐫𑐵 𑐩𑐹 𑐁𑐖𑑂𑐖𑐸 𑐏𑑅 𑑋

𑐳𑑄𑐫𑐸𑐎𑑂𑐟 𑐬𑐵𑐲𑑂𑐚𑑂𑐬𑐳𑐒𑑂𑐑𑑄 𑐳𑐣𑑂 𑑑𑑙𑑔𑑙 𑐫𑐵 𑑒 𑐜𑐶𑐳𑐾𑐩𑑂𑐧𑐬𑐫𑑂 𑐩𑐵𑐣𑐰 𑐧𑐾𑐔𑐧𑐶𑐏𑐣 𑐣𑐵𑐥𑑄 𑐫𑑁𑐣 𑐱𑑀𑐲𑐞 𑐥𑐣𑐾𑐐𑐸 𑐳𑐩𑑂𑐧𑐣𑑂𑐢𑐷 𑐩𑐴𑐵𑐳𑐨𑐵 𑐳𑐒𑑂𑐎𑐮𑑂𑐥 𑐥𑑂𑐬𑐳𑑂𑐟𑐵𑐰 𑐥𑐵𑐬𑐶𑐟 𑐫𑐵𑑅𑐐𑐸 𑐡𑐶𑑄𑐫𑐵 𑐮𑐸𑐩𑐣𑑂𑐟𑐶𑐂 𑐡𑑃𑐫𑑂𑐡𑐳𑑄 𑐠𑑂𑐰 𑐡𑐶𑐰𑐳 𑐣𑑂𑐫𑐵𑐫𑐾𑐎𑐵𑐔𑑂𑐰𑑄𑐐𑐸 𑐡𑐸 𑑋

𑐬𑐵𑐲𑑂𑐚𑑂𑐬𑐳𑐒𑑂𑐑𑐫𑐵 𑐎𑐠𑑄 𑐠𑑁𑑄 𑐟𑐎𑑄 𑐴𑐮𑐶𑑄𑐣𑑂𑐫𑑄𑐎𑑄 𑐣𑑂𑐫𑐵𑐐𑐹 𑐎𑑂𑐰𑐟𑐶 𑐩𑐣𑐹 𑐁𑐢𑐸𑐣𑐶𑐎 𑐡𑐵𑐳𑐟𑑂𑐰𑐫𑐵 𑐖𑑀𑐏𑐶𑐩𑐫𑑂 𑐮𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐠𑐸𑑄𑐶𑐥𑑄 𑐩𑐢𑑂𑐫𑐾 𑐀𑐥𑑂𑐰𑑅 𑐫𑐵𑐣𑐵𑑅 𑐩𑐶𑐳𑐵𑐥𑐶𑑄 𑐰 𑐩𑐳𑑂𑐟 𑐧𑐮𑐥𑐹𑐬𑑂𑐰𑐎 𑐱𑑂𑐬𑐩 𑐫𑐵𑐫𑐾𑐟 𑐧𑐵𑐢𑑂𑐫 𑐫𑐵𑐣𑐵𑐟𑑅𑐐𑐸 𑐡𑐸 𑑋

𑐖𑐵𑐟𑐷𑐫 𑐰𑐶𑐨𑐾𑐡, 𑐐𑐬𑐷𑐧𑐷, 𑐳𑐵𑐩𑐵𑐖𑐶𑐎 𑐧𑐴𑐶𑐲𑑂𑐎𑐵𑐬 𑐣𑐵𑐥𑑄 𑐀𑐳𑐩𑐵𑐣𑐟𑐵𑐫𑑂 𑐮𑐶𑐢𑐣𑐵𑐔𑑂𑐰𑑄𑐐𑐸 𑐰𑑂𑐫𑐰𑐴𑐵𑐬𑐫𑐵 𑐴𑐸𑐣𑐶𑑄 𑐕𑐸𑑄 𑐳𑐩𑐸𑐡𑐵𑐫𑐥𑐶𑑄 𑐀𑐗𑑄 𑐣𑑄 𑐱𑑀𑐲𑐞𑐫𑐵 𑐐𑐩𑑂𑐨𑐷𑐬 𑐖𑑀𑐏𑐶𑐩𑐫𑑂 𑐮𑐵𑐣𑐵𑑅𑐔𑑂𑐰𑑄𑐐𑐸 𑐡𑐸 𑑋 𑐥𑑂𑐬𑐰𑐵𑐳𑐷 𑐣𑐵𑐥𑑄 𑐀𑐳𑐸𑐬𑐎𑑂𑐲𑐶𑐟 𑐱𑑂𑐬𑐩𑐶𑐎𑐟𑐫𑑂𑐟 𑐕𑐾𑑃𑐫𑐵 𑐖𑑂𑐫𑐵𑐫𑑂, 𑐣𑐶𑐬𑑂𑐩𑐵𑐞, 𑐎𑐺𑐲𑐶, 𑐰𑐳𑑅 𑐄𑐡𑑂𑐫𑑀𑐐𑐣𑐶𑐳𑐾𑑄 𑐫𑑁𑐣 𑐎𑑂𑐲𑐾𑐟𑑂𑐬𑐫𑑂 𑐟𑐎 𑐠𑐷𑐠𑐷 𑐁𑐬𑑂𑐠𑐶𑐎 𑐱𑑀𑐲𑐞𑐫𑑂 𑐟𑐫𑐾𑐐𑐸 𑐫𑐵𑐣𑐵𑐟𑑅𑐐𑐸 𑐏𑐣𑐾𑐡𑐸 𑑋

𑐀𑐣𑑂𑐟𑐬𑐬𑐵𑐲𑑂𑐚𑑂𑐬𑐶𑐫 𑐱𑑂𑐬𑐩 𑐳𑐒𑑂𑐐𑐛𑐣𑑄 𑐡𑐵𑐳𑐟𑑂𑐰 𑐰 𑐁𑐢𑐸𑐣𑐶𑐎 𑐱𑑀𑐲𑐞 𑐀𑐣𑑂𑐟𑑂𑐫 𑐫𑐵𑐫𑐾𑐟 𑐳𑐬𑐎𑐵𑐬, 𑐣𑐵𑐐𑐬𑐶𑐎 𑐳𑐩𑐵𑐖 𑐣𑐵𑐥𑑄 𑐳𑐩𑐸𑐡𑐵𑐫 𑐡𑐠𑐸𑐂 𑐩𑑄𑐎𑐵𑑅𑐖𑑂𑐫𑐵 𑐫𑐵𑐫𑐾𑐩𑐵𑑅𑐐𑐸 𑐢𑐵𑐳𑐾𑑄 𑐥𑐷𑐜𑐶𑐟𑐫𑐵 𑐄𑐡𑑂𑐢𑐵𑐬, 𑐥𑐸𑐣𑑅𑐳𑑂𑐠𑐵𑐥𑐣𑐵, 𑐣𑑂𑐫𑐵𑐫 𑐰 𑐡𑐷𑐬𑑂𑐑𑐎𑐵𑐮𑐷𑐣 𑐳𑐸𑐬𑐎𑑂𑐲𑐵𑐫𑑂 𑐧𑑅 𑐧𑑂𑐫𑐹𑐐𑐸 𑐡𑐸 𑑋

‘𑐳𑐴𑐬𑐷 𑐮𑐵𑐐𑐵𑐫𑑂 𑐔𑐎𑑄𑐐𑐸 𑐠𑐵𑐫𑑂 𑐩𑐵𑑅’
𑐫𑐾𑑃, 𑑑𑑒 𑐠𑐶𑑄𑐮𑐵𑐠𑑂𑐰 : 𑐳𑐬𑑀𑐎𑐵𑐬𑐰𑐵𑐮𑐵𑑄 𑐫𑐾𑑃𑐫𑑂 𑐠𑐾𑑃𑐖𑐵𑑅𑐐𑐸 𑐳𑐴𑐬𑐫𑑂 𑐔𑐎𑑄𑐐𑐸 𑐠𑐵𑐫𑑂𑐫𑐵 𑐳𑑄𑐬𑐎𑑂𑐲𑐞 𑐫𑐵𑐫𑐾𑐩𑐵𑑅 𑐢𑐵𑑅𑐐𑐸 𑐡𑐸 𑑋
𑐳𑑀𑐩𑐧𑐵𑑅 𑐳𑐘𑑂𑐔𑐵𑐬𑐶𑐎𑐵 𑐳𑐩𑐹𑐴𑐥𑐵𑐏𑐾𑑄 𑐫𑐾𑑃𑐫𑑂 𑐐𑑂𑐰𑐳𑐵𑑅 𑐐𑑂𑐰𑑅𑐐𑐸 𑐕𑐐𑐹 𑐀𑐣𑑂𑐟𑐬𑐎𑑂𑐬𑐶𑐫𑐵𑐫𑑂 𑐧𑑂𑐰𑐟𑐶𑐎𑐵𑑅𑐥𑐶𑑄 𑐰𑐶𑐱𑐾𑐲𑐖𑑂𑐘 𑐰 𑐀𑐢𑐶𑐎𑐵𑐬𑐷𑐥𑐶𑑄𑐳𑑄 𑐥𑑂𑐬𑐵𑐎𑐺𑐟𑐶𑐎 𑐰𑐶𑐥𑐡𑑂𑐫𑐵 𑐂𑐮𑐫𑑂 𑐳𑐬𑑂𑐰𑐳𑐵𑐢𑐵𑐬𑐞𑐫𑐵 𑐳𑐸𑐬𑐎𑑂𑐲𑐵𑐫𑐵 𑐣𑐶𑑄𑐟𑐶𑑄 𑐔𑐎𑑄𑐐𑐸 𑐠𑐵𑐫𑑂 𑐩𑐡𑐫𑐵𑐰𑑄𑐐𑐸 𑐴𑐵𑐠𑑂𑐫𑐵 𑐖𑐸𑐫𑐵 𑐰𑐣𑐵𑐔𑑂𑐰𑑄𑐐𑐸 𑐢𑐵𑑅𑐐𑐸 𑐡𑐸 𑑋
𑐖𑑂𑐫𑐵𑐗𑑂𑐰𑐮𑐫𑑂 𑐰𑐶𑐖𑑂𑐘𑐥𑐶𑑄𑐳𑑄 𑐣𑐾𑐥𑐵𑑅 𑐨𑐹𑐎𑐩𑑂𑐥𑐷𑐫 𑐎𑐠𑑄 𑐳𑑄𑐰𑐾𑐡𑐣𑐱𑐷𑐮 𑐖𑐹𑐐𑐸𑐮𑐶𑑄 𑐳𑐒𑑂𑐑, 𑐥𑑂𑐬𑐡𑐾𑐱 𑐰 𑐳𑑂𑐠𑐵𑐣𑐷𑐫 𑐟𑐐𑐶𑑄 𑐳𑐎𑐮𑐾𑑄 𑐖𑐵𑐣𑐵𑑅 𑐔𑐎𑑄𑐐𑐸 𑐠𑐵𑐫𑑂 𑐰𑑂𑐫𑐰𑐳𑑂𑐠𑐵𑐥𑐣𑐫𑐵𑐟 𑐣𑐷𑐟𑐶𑐐𑐟 𑐥𑑂𑐬𑐵𑐠𑐩𑐶𑐎𑐟𑐵𑐫𑑂 𑐟𑐫𑐾𑐩𑐵𑑅𑐐𑐸 𑐧𑐶𑐔𑐵𑑅 𑐟𑐮 𑑋 𑐰𑐵𑐟𑐵𑐰𑐬𑐞 𑐰 𑐳𑐴𑐬𑐷 𑐰𑐶𑐎𑐵𑐳𑐧𑐵𑐬𑐾 𑐀𑐢𑑂𑐫𑐫𑐣 𑐫𑐵𑐣𑐵𑑅 𑐰𑐫𑐵𑐔𑑂𑐰𑑄𑐩𑑂𑐴 𑐥𑐟𑑂𑐬𑐎𑐵𑐬 𑐩𑐸𑐎𑐾𑐱 𑐥𑑀𑐏𑐬𑐾𑐮𑐫𑐵 𑐎𑐠𑑄 𑐳𑑂𑐰𑐣𑐶𑐐𑑅𑐫𑐵 𑐩𑐸𑐎𑑂𑐎𑑄 𑐎𑑂𑐲𑐾𑐟𑑂𑐬𑐦𑐮 𑐠𑑂𑐫𑑄𑐩𑐠𑑂𑐫𑑄 𑑗𑑒𑑑 𑐰𑐬𑑂𑐐 𑐎𑐶𑐮𑑀𑐩𑐶𑐚𑐬 𑐖𑐹𑐐𑐸 𑐏𑑅𑐳𑐵𑑄 𑐣𑑄 𑐔𑐎𑑄𑐐𑐸 𑐠𑐵𑐳𑐫𑑂 𑐟𑐳𑐎𑑄 𑐩𑑂𑐴𑑀 𑐖𑐎 𑐡𑐸 𑑋 𑐎𑐵𑐛𑐩𑐵𑐜𑑁𑑃 𑐄𑐥𑐟𑑂𑐫𑐎𑐵 𑐰𑐶𑐎𑐵𑐳 𑐥𑑂𑐬𑐵𑐢𑐶𑐎𑐬𑐞𑐫𑐵 𑐟𑐠𑑂𑐫𑐵𑐒𑑂𑐎𑐎𑐠𑑄 𑐠𑐣 𑑔𑑐 𑐣𑐶𑐳𑐾𑑄 𑑕𑑐 𑐥𑑂𑐬𑐟𑐶𑐱𑐟 𑐔𑐎𑑄𑐐𑐸 𑐠𑐵𑐫𑑂 𑐡𑐫𑐾𑐩𑐵𑑅𑐠𑐵𑐫𑑂 𑐁𑑅 𑑐.𑑕𑑑 𑐥𑑂𑐬𑐟𑐶𑐱𑐟 𑐖𑐎 𑐔𑐎𑑄𑐐𑐸 𑐠𑐵𑐫𑑂 𑐡𑐸 𑑋
𑐖𑐮𑐰𑐵𑐫𑐸 𑐰 𑐖𑐣𑐖𑐷𑐰𑐶𑐎𑐵 𑐰𑐶𑐖𑑂𑐘 𑐡𑐶𑐣𑐾𑐱 𑐐𑐸𑐬𑐸𑐒𑑄 𑐔𑐎𑑄𑐐𑐸 𑐠𑐵𑐫𑑂𑐫𑐵 𑐩𑐴𑐟𑑂𑐰𑐧𑐵𑐬𑐾 𑐔𑐬𑑂𑐔𑐵 𑐖𑐹𑐐𑐸 𑐏𑑅𑐳𑐵𑑄 𑐣𑑄 𑐳𑑄𑐳𑑂𑐠𑐵𑐐𑐟 𑐫𑐵𑐫𑐾𑐟 𑐠𑐵𑐎𑐸𑐫𑐵𑐔𑑂𑐰𑑄𑐐𑐸 𑐢𑐫𑐵𑐡𑐶𑐮 𑑋 𑐰𑐶𑐥𑐡𑑂 𑐰𑑂𑐫𑐰𑐳𑑂𑐠𑐵𑐥𑐣 𑐋𑐣 𑐡𑐸𑐳𑐵𑑄 𑐣𑑄 𑐠𑐸𑐎𑐷𑐫𑐵 𑐥𑑂𑐬𑐨𑐵𑐰𑐎𑐵𑐬𑐷 𑐎𑐵𑐬𑑂𑐫𑐵𑐣𑑂𑐫𑐫𑐣 𑐫𑐵𑐫𑐾𑐟 𑐴𑐵𑐠𑑂𑐫𑐵 𑐡𑐹𑐐𑐸 𑐰𑐫𑑂𑐎𑑅𑐫𑐵 𑐢𑐵𑐥𑐹 𑐡𑐸 𑑋
𑐖𑑂𑐫𑐵𑐗𑑂𑐰𑐮𑐫𑑂 𑐧𑑂𑐰𑐟𑐶 𑐎𑐵𑑅𑐥𑐶𑑄 𑐩𑐾𑐩𑐾𑐥𑐶𑑄𑐳𑑄 𑐳𑐵𑐬𑑂𑐰𑐖𑐣𑐶𑐎 𑐖𑐐𑑂𑐐𑐵 𑐀𑐟𑐶𑐎𑑂𑐬𑐩𑐞 𑐀𑐥𑑂𑐰𑐫𑐵𑐰𑑄𑐐𑐸 𑐰 𑐔𑐎𑑄𑐐𑐸 𑐠𑐵𑐫𑑂 𑐳𑑄𑐬𑐎𑑂𑐲𑐞𑐫𑑂 𑐳𑐬𑐎𑐵𑐬𑐷 𑐣𑐶𑐐𑐬𑐵𑐣𑐷 𑐎𑐩𑐖𑑀𑐬 𑐖𑐹𑐐𑐸𑐮𑐶𑑄 𑐳𑑂𑐠𑐵𑐣𑐷𑐫 𑐟𑐐𑐶𑑄𑐫𑐵 𑐖𑐣𑐥𑑂𑐬𑐟𑐶𑐣𑐶𑐢𑐶 𑐀𑐥𑑂𑐰𑑅 𑐖𑐶𑐩𑑂𑐩𑐾𑐰𑐵𑐬 𑐖𑐸𑐂𑐩𑐵𑑅𑐐𑐸 𑐕𑑂𑐫𑐵𑐟𑐵 𑐧𑑂𑐫𑐹𑐐𑐸 𑐡𑐸 𑑋

𑐬𑐵𑐖𑐡𑐹𑐟 𑐟𑐸𑐮𑐵𑐢𑐬 𑐐𑐿𑐬𑐁𑐰𑐵𑐳𑐷𑐫 𑐬𑐵𑐖𑐡𑐹𑐟𑐫𑑂 𑐣𑐶𑐫𑐸𑐎𑑂𑐟
𑐫𑐾𑑃, 𑑑𑑒 𑐠𑐶𑑄𑐮𑐵𑐠𑑂𑐰 : 𑐬𑐵𑐲𑑂𑐚𑑂𑐬𑐥𑐟𑐶 𑐬𑐵𑐩𑐔𑐣𑑂𑐡𑑂𑐬 𑐥𑑁𑐜𑐾𑐮𑑄 𑐜𑐾𑐣𑐩𑐵𑐬𑑂𑐎𑐫𑐵 𑐣𑐶𑑄𑐟𑐶𑑄 𑐣𑐾𑐥𑐵𑑅𑐫𑐵 𑐁𑐰𑐵𑐳𑐷𑐫 𑐬𑐵𑐖𑐡𑐹𑐟 𑐳𑐸𑐩𑑂𑐣𑐶𑐩𑐵 𑐟𑐸𑐮𑐵𑐢𑐬𑐫𑐵𑐟 𑐣𑐬𑑂𑐰𑐾 𑐀𑐢𑐶𑐬𑐵𑐖𑑂𑐫𑐫𑐵 𑐣𑐶𑑄𑐟𑐶𑑄 𑐣𑐾𑐥𑐵𑑅𑐫𑐵 𑐐𑐿𑐬𑐁𑐰𑐵𑐳𑐷𑐫 𑐬𑐵𑐖𑐡𑐹𑐟 𑐥𑐡𑐫𑑂 𑐣𑐶𑐫𑐸𑐎𑑂𑐟 𑐫𑐵𑐣𑐵𑐡𑐷𑐐𑐸 𑐡𑐸 𑑋

𑐬𑐵𑐲𑑂𑐚𑑂𑐬𑐥𑐟𑐶 𑐥𑑁𑐜𑐾𑐮𑑄 𑐠𑑁𑑄 𑐣𑐾𑐥𑐵𑑅𑐫𑐵 𑐳𑑄𑐰𑐶𑐢𑐵𑐣𑐫𑐵 𑐢𑐵𑐬𑐵 𑑒𑑘𑑒 𑐫𑐵 𑐄𑐥𑐢𑐵𑐬𑐵 (𑑑) 𑐎𑐠𑑄 𑐩𑐣𑑂𑐟𑑂𑐬𑐶𑐥𑐬𑐶𑐲𑐡𑑂𑐫𑐵 𑐳𑐶𑐦𑐵𑐬𑐶𑐳𑐫𑑂 𑐜𑐾𑐣𑐩𑐵𑐬𑑂𑐎𑐫𑐵 𑐣𑐶𑑄𑐟𑐶𑑄 𑐣𑐾𑐥𑐵𑑅𑐫𑐵 𑐬𑐵𑐖𑐡𑐹𑐟 𑐟𑐸𑐮𑐵𑐢𑐬𑐫𑐵𑐟 𑐣𑐬𑑂𑐰𑐾 𑐀𑐢𑐶𑐬𑐵𑐖𑑂𑐫𑐫𑐵 𑐣𑐶𑑄𑐟𑐶𑑄 𑐣𑐾𑐥𑐵𑑅𑐫𑐵 𑐐𑐿𑐬𑐁𑐰𑐵𑐳𑐷𑐫 𑐬𑐵𑐖𑐡𑐹𑐟 𑐥𑐡𑐫𑑂 𑐣𑐶𑐫𑐸𑐎𑑂𑐟 𑐫𑐵𑐣𑐵𑐡𑐷𑐐𑐸 𑐬𑐵𑐲𑑂𑐚𑑂𑐬𑐥𑐟𑐶𑐫𑐵 𑐖𑑂𑐫𑐵𑐎𑐸𑐠𑐶𑑄 𑐢𑐵𑑅𑐐𑐸 𑐡𑐸 𑑋

𑐠𑐣𑐶𑐣𑐶𑐳𑐾𑑄 𑐧𑐣𑑂𑐡𑐷𑐥𑐸𑐬 𑐩𑐴𑑀𑐟𑑂𑐳𑐰
𑐡𑐩𑑁𑐮𑐷 (𑐟𑐣𑐴𑐸𑑃), 𑑖 𑐠𑐶𑑄𑐮𑐵𑐠𑑂𑐰 : 𑐥𑐬𑑂𑐫𑐚𑐣 𑐥𑑂𑐬𑐰𑐡𑑂𑐬𑑂𑐢𑐣𑐫𑐵 𑐁𑐖𑑂𑐖𑐸 𑐖𑑂𑐰𑐣𑐵𑑅 𑐟𑐣𑐴𑐸𑑃 𑐄𑐡𑑂𑐫𑑀𑐐 𑐰𑐵𑐞𑐶𑐖𑑂𑐫 𑐳𑐒𑑂𑐑𑐫𑐵 𑐐𑑂𑐰𑐳𑐵𑐮𑐫𑑂 𑐥𑐬𑑂𑐫𑐚𑐎𑐷𑐫 𑐣𑐐𑐬 𑐧𑐣𑑂𑐡𑐷𑐥𑐸𑐬𑐫𑑂 𑐠𑐣𑐶𑐣𑐶𑐳𑐾𑑄 𑐧𑐣𑑂𑐡𑐷𑐥𑐸𑐬 𑐩𑐴𑑀𑐟𑑂𑐳𑐰 𑐖𑐸𑐂𑐟𑑂𑐫𑑄𑐐𑐸 𑐡𑐸 𑑋

‘𑐄𑐡𑑂𑐫𑑀𑐐, 𑐰𑑂𑐫𑐵𑐥𑐵𑐬, 𑐥𑐬𑑂𑐫𑐚𑐣 𑐰 𑐎𑐺𑐲𑐶𑐫𑐵 𑐥𑑂𑐬𑐰𑐡𑑂𑐬𑑂𑐢𑐣 𑑅 𑐳𑑂𑐠𑐵𑐣𑐷𑐫 𑐎𑐮𑐵 𑐰 𑐳𑑄𑐳𑑂𑐎𑐺𑐟𑐶𑐫𑐵 𑐳𑑄𑐬𑐎𑑂𑐲𑐞’ 𑐣𑐵𑐬𑐵 𑐖𑑂𑐰𑐣𑐵𑑅 𑐧𑐣𑑂𑐡𑐷𑐥𑐸𑐬 𑐐𑐵𑐄𑑃𑐥𑐵𑐮𑐶𑐎𑐵–𑑔 𑐚𑐸𑑃𑐜𑐶𑐏𑐾𑐮𑐫𑑂 𑐠𑑂𑐰 𑐴𑐾 𑐩𑐒𑑂𑐳𑐶𑐬 𑑒𑑑 𑐐𑐟𑐾𑐟𑐎 𑐩𑐴𑑀𑐟𑑂𑐳𑐰 𑐳𑐘𑑂𑐔𑐵𑐮𑐣 𑐖𑐸𑐂𑐟𑑂𑐫𑑄𑐐𑐸 𑐡𑐸 𑑋

𑐩𑐴𑑀𑐟𑑂𑐳𑐰𑐫𑑂 𑐣𑐶𑐐𑐹 𑐮𑐏 𑐥𑐬𑑂𑐫𑐚𑐎𑐟𑐫𑑂𑐳𑑄 𑐀𑐰𑐮𑑀𑐎𑐣 𑐫𑐵𑐂𑐐𑐸 𑐰 𑐀𑐣 𑐣𑑂𑐫𑐵𑐐𑐹 𑐎𑑂𑐰𑐟𑐶 𑐖𑑂𑐰𑑅𑐫𑐵 𑐎𑐵𑐬𑑀𑐧𑐵𑐬 𑐖𑐸𑐂𑐐𑐸 𑐀𑐣𑐸𑐩𑐵𑐣 𑐫𑐵𑐣𑐵𑐟𑑅𑐐𑐸 𑐄𑐡𑑂𑐫𑑀𑐐 𑐰𑐵𑐞𑐶𑐖𑑂𑐫 𑐳𑐒𑑂𑐑 𑐜𑐸𑐩𑑂𑐬𑐾 𑐊𑐎𑐵𑐂 𑐳𑐨𑐵𑐥𑐟𑐶 𑐑𑐣𑐱𑑂𑐫𑐵𑐩 𑐄𑐥𑐵𑐢𑑂𑐫𑐵𑐫𑑄 𑐬𑐵𑐳𑐳𑐫𑐵𑐟 𑐢𑐫𑐵𑐡𑐶𑐮 𑑋

𑐩𑐴𑑀𑐟𑑂𑐳𑐰𑐫𑑂 𑐰𑐂𑐥𑐶𑑄 𑐥𑐬𑑂𑐫𑐚𑐎𑐫𑐵𑐟 𑐏𑐜𑑂𑐐𑐡𑐾𑐰𑐷 𑐡𑐾𑐐𑑅, 𑐥𑐴𑐵𑐜𑐥𑐵𑐣𑐷 𑐩𑐴𑐵𑐡𑑂𑐫𑑅, 𑐰𑐶𑐣𑑂𑐢𑑂𑐫𑐰𑐵𑐳𑐶𑐣𑐷, 𑐠𑐵𑐣𑐷𑐩𑐵𑐃, 𑐩𑐴𑐵𑐮𑐎𑑂𑐲𑑂𑐩𑐷, 𑐔𑐵𑐩𑐸𑐞𑑂𑐜𑐵𑐩𑐵𑐃, 𑐨𑐸𑐟𑑂𑐫𑐵𑐴𑐵 𑐧𑐬𑐵𑐴𑐵, 𑐳𑐣𑑂𑐟𑐵𑐣𑐾𑐱𑑂𑐰𑐬 𑐩𑐴𑐵𑐡𑑂𑐫𑑅, 𑐩𑐞𑐶𑐩𑐸𑐎𑐸𑐸𑐣𑑂𑐡 𑐳𑐾𑐣 𑐡𑐬𑐧𑐵𑐬, 𑐚𑑃𑐸𑐜𑐶𑐏𑐾𑐮, 𑐬𑐵𑐣𑐷𑐰𑐣𑐫𑐵 𑐨𑑂𑐬𑐩𑐞 𑐫𑐵𑐎𑐾𑐐𑐸 𑐰𑐫𑑂𑐎𑐮𑑄 𑐢𑐫𑐵𑐡𑐶𑐮 𑑋

𑐀𑐠𑐾 𑐴𑐾, 𑐩𑐴𑑀𑐟𑑂𑐳𑐰𑐫𑑂 𑐳𑐵𑐴𑐳𑐶𑐎 𑐥𑐬𑑂𑐫𑐚𑐣 𑐎𑐵𑐳𑐵, 𑐔𑐚𑑂𑐚𑐵𑐣 𑐁𑐬𑑀𑐴𑐞, 𑐥𑑂𑐫𑐵𑐬𑐵𑐐𑑂𑐮𑐵𑐂𑐜𑐶𑐒, 𑐳𑐾𑐟𑐷 𑐖𑐮𑐫𑐵𑐟𑑂𑐬𑐵 𑐰 𑐳𑐵𑐂𑐎𑑂𑐮𑐶𑐒𑐶𑐫𑐵 𑐰𑑂𑐫𑐰𑐳𑑂𑐠𑐵 𑐫𑐵𑐣𑐵𑐟𑑅𑐐𑐸 𑐡𑐸 𑑋 𑐩𑐴𑑀𑐟𑑂𑐳𑐰𑐫𑑂 𑐑𑐬𑐾𑐮𑐸 𑐣𑐵𑐥𑑄 𑐴𑐳𑑂𑐟𑐎𑐮𑐵, 𑐎𑐺𑐲𑐶 𑐄𑐥𑐖, 𑐳𑐾𑐰𑐵𑐩𑐹𑐮𑐎 𑐳𑑄𑐳𑑂𑐠𑐵, 𑐴𑑀𑐚𑐮 𑐬𑐾𑐲𑑂𑐚𑐸𑐬𑐵𑑃, 𑐳𑐸𑐔𑑄 𑐎𑐾𑐣𑑂𑐡𑑂𑐬 𑐰 𑐳𑐰𑐵𑐬𑐷𑐳𑐵𑐢𑐣𑐫𑐵 𑐥𑑂𑐬𑐡𑐬𑑂𑐱𑐣𑐷 𑐣𑐵𑐥𑑄𑐫𑐵 𑐧𑐶𑐎𑑂𑐬𑐷𑐎𑐎𑑂𑐲 𑐟𑐫𑐵𑐟𑐂𑐐𑐸 𑐖𑐹𑐐𑐸 𑐡𑐸 𑑋

𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷 𑐎𑐵𑐬𑑂𑐎𑐷 𑐥𑐵𑐏𑐾𑑄 𑐩𑐸𑐏𑑂𑐫𑐳𑐔𑐶𑐰 𑐀𑐬𑑂𑐫𑐵𑐮𑐫𑐵𑐟 𑐧𑐶𑐡𑐵𑐂
𑐫𑐾𑑃, 𑑖 𑐠𑐶𑑄𑐮𑐵𑐠𑑂𑐰 : 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷 𑐳𑐸𑐱𑐷𑐮𑐵 𑐎𑐵𑐬𑑂𑐎𑐷𑑄 𑐄𑐩𑐾𑐬 𑐴𑐡𑐫𑐵 𑐴𑐸𑐣𑐶𑑄 𑐠𑐣𑐶𑐣𑐶𑐳𑐾𑑄 𑐀𑐰𑐎𑐵𑐱𑐫𑑂 𑐔𑑂𑐰𑐣𑐵𑐡𑐷𑐟𑑂𑐫𑑄𑐩𑑂𑐴 𑐣𑐾𑐥𑐵𑐮 𑐳𑐬𑐎𑐵𑐬𑐫𑐵 𑐩𑐸𑐏𑑂𑐫𑐳𑐔𑐶𑐰 𑐊𑐎𑐣𑐵𑐬𑐵𑐫𑐞 𑐀𑐬𑑂𑐫𑐵𑐮𑐫𑐵𑐟 𑐧𑐶𑐡𑐵𑐃 𑐫𑐵𑐣𑐵𑐡𑐷𑐐𑐸 𑐡𑐸 𑑋

𑐩𑑂𑐴𑐶𑐐𑑅 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷 𑐮𑐶𑐳𑐾𑑄 𑐩𑐣𑑂𑐟𑑂𑐬𑐶𑐥𑐬𑐶𑐲𑐡𑑂𑐫𑐵 𑐖𑑂𑐫𑐵𑐎𑐸𑐠𑐶𑐂 𑐐𑑂𑐰𑐳𑐵𑑅 𑐐𑑂𑐰𑑅𑐐𑐸 𑐰𑐶𑐱𑐾𑐲 𑐳𑐩𑐵𑐬𑑀𑐴𑐫𑐵 𑐡𑐠𑐸𑐂 𑐰𑐫𑑂𑐎𑐮𑑄 𑐀𑐬𑑂𑐫𑐵𑐮𑐫𑐵𑐟 𑐧𑐶𑐡𑐵𑐂 𑐫𑐵𑐣𑐵𑐡𑐷𑐐𑐸 𑐏𑑅 𑑋

𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷 𑐎𑐵𑐬𑑂𑐎𑐷𑑄 𑐩𑐸𑐏𑑂𑐫𑐳𑐔𑐶𑐰 𑐀𑐬𑑂𑐫𑐵𑐮𑑄 𑐳𑐾𑐰𑐵 𑐀𑐰𑐢𑐶 𑐖𑑅𑐕𑐶 𑐎𑑂𑐫𑐣𑐵𑐡𑐷𑐐𑐸 𑐎𑐬𑑂𑐟𑐰𑑂𑐫𑐣𑐶𑐲𑑂𑐛𑐵 𑐰 𑐫𑑀𑐐𑐡𑐵𑐣𑐫𑐵 𑐎𑐡𑐬 𑐫𑐵𑐳𑐾𑑄 𑐳𑐸𑐨𑐵𑐫𑑂 𑐡𑐾𑐕𑐵𑐣𑐵𑐡𑐷𑐐𑐸 𑐰𑐫𑑂𑐎𑑅𑐫𑐵 𑐳𑐔𑐶𑐰𑐵𑐮𑐫𑑄 𑐢𑐵𑑅𑐐𑐸 𑐡𑐸 𑑋

𑐩𑐸𑐏𑑂𑐫𑐳𑐔𑐶𑐰 𑐀𑐬𑑂𑐫𑐵𑐮𑑄 𑐣𑑄 𑐠𑑅𑐐𑐸 𑐎𑐵𑐬𑑂𑐫𑐎𑐵𑐮𑐫𑑂 𑐡𑐹𑐐𑐸 𑐳𑐩𑐬𑑂𑐠𑐣 𑐰 𑐩𑑄𑐎𑐵𑑅𑐖𑑂𑐫𑐵𑐫𑐵𑐟 𑐎𑐫𑐵𑑅 𑐁𑐨𑐵𑐬 𑐥𑑂𑐰𑑄𑐎𑐸𑐳𑐾𑑄 𑐳𑐬𑐎𑐵𑐬 𑐰 𑐡𑐾𑐫𑑂𑐫𑐵 𑐣𑐶𑑄𑐟𑐶𑑄 𑐫𑑀𑐐𑐡𑐵𑐣 𑐧𑐶𑐂𑐡𑐹𑐐𑐸𑐮𑐶 𑐮𑐳𑐟𑐵 𑐥𑑂𑐰𑑄𑐎𑐵𑐡𑐶𑐮 𑑋 𑐰𑐶𑐳𑑄 𑑒𑑐𑑔𑑖 𑐩𑐵𑐑 𑑔 𑐐𑐟𑐾 𑐣𑐵𑐫𑐧 𑐳𑐸𑐧𑑂𑐧𑐵𑐥𑐵𑐏𑐾𑑄 𑐣𑐶𑐖𑐵𑐩𑐟𑐷 𑐳𑐾𑐰𑐵𑐫𑑂 𑐡𑐸𑐴𑐵𑑄 𑐗𑐵𑐫𑐵𑐡𑐷𑐩𑑂𑐴 𑐀𑐬𑑂𑐫𑐵𑐮 𑐰𑐶𑐳𑑄 𑑒𑑐𑑘𑑑 𑐨𑐡𑑁 𑑑𑑓 𑐐𑐟𑐾 𑐩𑐸𑐏𑑂𑐫𑐳𑐔𑐶𑐰𑐫𑑂 𑐣𑐶𑐫𑐸𑐎𑑂𑐟 𑐖𑐸𑐫𑐵𑐡𑐷𑐐𑐸 𑐏𑑅 𑑋

𑐀𑐬𑑂𑐫𑐵𑐮 𑐀𑐣𑐶𑐰𑐵𑐬𑑂𑐫 𑐀𑐰𑐎𑐵𑐱𑐫𑑂 𑐰𑐣𑐷𑐐𑐸 𑐖𑐹𑐐𑐸𑐮𑐶𑑄 𑐠𑑂𑐰𑐳𑐶𑐧𑐾𑑄 𑐣𑑂𑐴𑑂𑐫𑑅 𑐳𑑀𑐩𑐧𑐵𑑅 𑐔𑑂𑐰𑑄𑐐𑐸 𑐩𑐣𑑂𑐟𑑂𑐬𑐶𑐥𑐬𑐶𑐲𑐡𑑂𑐫𑐵 𑐧𑐿𑐛𑐎𑑄 𑐣𑑂𑐴𑐹𑐩𑑂𑐴 𑐩𑐸𑐏𑑂𑐫𑐳𑐔𑐶𑐰𑐫𑐵 𑐎𑐠𑑄 𑐬𑐎𑑂𑐲𑐵 𑐩𑐣𑑂𑐟𑑂𑐬𑐵𑐮𑐫𑐫𑐵 𑐳𑐔𑐶𑐰 𑐳𑐸𑐩𑐣𑐬𑐵𑐖 𑐀𑐬𑑂𑐫𑐵𑐮𑐫𑐵𑐟 𑐣𑐶𑐫𑐸𑐎𑑂𑐟 𑐫𑐵𑐫𑐾𑐐𑐸 𑐣𑐶𑐬𑑂𑐞𑐫 𑐫𑐵𑐫𑐾𑐢𑐸𑑄𑐎𑐹𑐐𑐸 𑐡𑐸 𑑋

𑐢𑐬𑐴𑐬𑐵 𑐳𑐘𑑂𑐔𑐵𑐮𑐣𑐫𑐵 𑐡𑐔𑑂𑐕𑐶𑐫𑐵 𑐡𑐸𑐣𑐾 𑐣𑑂𑐴𑐫𑑂𑐐𑐹 𑐎𑑂𑐰𑐟𑐶 𑑗𑑑 𑐮𑐏 𑐬𑐵𑐖𑐳𑑂𑐰 𑐩𑐸𑐣
𑐫𑐾𑑃, 𑑖 𑐠𑐶𑑄𑐮𑐵𑐠𑑂𑐰 : 𑐥𑐸𑐣𑐣𑐶𑐬𑑂𑐩𑐵𑐞 𑐮𑐶𑐥𑐵 𑐢𑐬𑐵𑐴𑐬𑐵 𑐡𑐸𑐟𑐶𑐣𑐵 𑐮𑑂𑐴𑐵𑐥𑑄 𑐎𑐫𑐵𑑅 𑐳𑐘𑑂𑐔𑐵𑐮𑐣𑐫𑑂 𑐰𑑅𑐐𑐸 𑐡𑐔𑑂𑐕𑐶 𑐥𑐹𑐰𑑄𑐐𑐸 𑐡𑐸 𑑋 𑐠𑑂𑐰 𑐡𑐠𑐸𑐂 𑐣𑑂𑐴𑐫𑑂𑐐𑐹 𑐎𑑂𑐰𑐟𑐶 𑑗𑑑 𑐮𑐏 𑐟𑐎𑐵 𑐬𑐵𑐖𑐳𑑂𑐰 𑐩𑐸𑐣 𑐢𑐵𑑅𑐐𑐸 𑐡𑐸 𑑋

𑐡𑐔𑑂𑐕𑐶𑐫𑐵 𑐡𑐸𑐣𑐾 𑐡𑐸𑐟𑐶𑐣𑐵 𑐮𑑂𑐴𑐵𑐥𑑄 𑐎𑐠𑑄 𑐄𑐮𑐶 𑐬𑐵𑐖𑐳𑑂𑐰 𑐩𑐸𑑄𑐐𑐸 𑐏𑑅 𑑋 𑐠𑐐𑐸𑐣𑐾 𑐩𑐒𑑂𑐳𑐶𑐬 𑑙 𑐐𑐟𑐾𑐣𑐶𑐳𑐾𑑄 𑐳𑐬𑑂𑐰𑐳𑐵𑐢𑐵𑐬𑐞𑐫𑐵𑐟 𑐮𑑂𑐴𑐵𑐥𑑄 𑐥𑐸𑐮𑐵𑑅 𑐡𑐸𑐴𑐵𑑄𑐰𑑄𑐎𑐾 𑐧𑑂𑐫𑐹𑐐𑐸 𑐢𑐬𑐴𑐬𑐵𑐥𑐵𑐏𑐾𑑄 𑐩𑑂𑐴𑐶𑐐𑑅𑐟𑐎𑐫𑐵 𑐡𑐸𑐣𑐾 𑐚𑐶𑐎𑐳 𑐩𑐶𑐫𑐵𑑅 𑐣𑑂𑐴𑐫𑑂𑐐𑐹 𑐎𑑂𑐰𑐟𑐶 𑑗𑑑 𑐮𑐏 𑐟𑐎𑐵 𑐳𑐒𑑂𑐎𑐮𑐣 𑐖𑐹𑐐𑐸 𑐀𑐣𑑂𑐟𑐬𑐶𑐎 𑐢𑐬𑐴𑐬𑐵 𑐳𑐘𑑂𑐔𑐵𑐮𑐣 𑐮𑐶𑐳𑐾𑑄 𑐰𑑂𑐫𑐰𑐳𑑂𑐠𑐵𑐥𑐣 𑐊𑐎𑐵𑐂 𑐳𑐸𑐣𑑂𑐢𑐵𑐬𑐵𑐫𑐵 𑐥𑑂𑐬𑐩𑐸𑐏 𑐩𑐴𑐾𑐱 𑐬𑐵𑐃𑑄 𑐢𑐫𑐵𑐡𑐶𑐮 𑑋

𑐖𑐾𑐣𑐖𑐷 𑐁𑐣𑑂𑐡𑑀𑐮𑐣 𑐣𑑂𑐴𑑂𑐫𑑅𑐟𑐎 𑐧𑐸𑐢𑐧𑐵𑑅𑐥𑐟𑐶𑐎𑑄 𑐧𑐣𑑂𑐡 𑐖𑐸𑐂𑐐𑐸 𑐫𑐵𑐣𑐵𑐔𑑂𑐰𑑄𑐐𑐸 𑐢𑐬𑐴𑐬𑐵 𑐮𑐶𑐥𑐵𑑄𑐐𑐸 𑐃 𑐣𑑂𑐴𑐫𑑂𑐣𑑂𑐴𑐸𑑄 𑐴𑐾 𑐔𑐵𑐮𑐾𑐐𑐸 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋 “𑐠𑐐𑐸𑐣𑐾 𑐩𑐒𑑂𑐳𑐶𑐬 𑑙 𑐐𑐟𑐾𑐣𑐶𑐳𑐾𑑄 𑐁𑑅𑐟𑐎 𑐥𑑂𑐫𑑄𑐐𑐹 𑐮𑐏 𑑖𑑙𑑔 𑐩𑑂𑐴 𑐣𑐵𑐐𑐬𑐶𑐎𑑄 𑐢𑐬𑐴𑐬𑐵 𑐐𑐫𑐾𑐢𑐸𑑄𑐎𑐹𑐐𑐸 𑐡𑐸, 𑐠𑐸𑐎𑐷 𑑑𑑒 𑐡𑑃 𑐎𑑂𑐰𑐫𑑂𑐫𑐵𑐥𑐶𑑄 𑐩𑐳𑑂𑐟𑐫𑑂𑐐𑐸 𑐮𑑂𑐫𑐵𑑅𑐔𑐵𑑅 𑐟𑐫𑐾𑐐𑐸 𑐫𑐵𑐣𑐵𑐟𑑅𑐐𑐸 𑐩𑐡𑐸”, 𑐊𑐎𑐵𑐂 𑐥𑑂𑐬𑐩𑐸𑐏 𑐬𑐵𑐃𑑄 𑐢𑐫𑐵𑐡𑐶𑐮 𑑋 𑐳𑐸𑐠𑐳𑐶𑐫𑐵 𑑑𑑐𑑅𑑓𑑐 𑐟𑐵𑑅 𑐂𑐮𑐫𑑂 𑐣𑐶𑐳𑐾𑑄 𑐳𑐣𑐶𑐮𑐫𑐵 𑑓 𑐟𑐵𑑅𑐃 𑐟𑐎 𑐢𑐬𑐴𑐬𑐵 𑐐𑐫𑐾 𑐦𑐂𑐐𑐸 𑐰𑑂𑐫𑐰𑐳𑑂𑐠𑐵 𑐫𑐵𑐣𑐵𑐟𑑅𑐐𑐸 𑐡𑐸, 𑐔𑐶𑐴𑐵𑐎𑑅𑐐𑐸 𑐃𑐫𑐵 𑐡𑐠𑐸𑐂 𑐣𑐵𑐥𑑄 𑐟𑑅𑐮𑑂𑐫𑐵𑐏𑐫𑑂 𑐩𑐣𑐹𑐟 𑐰𑐫𑐾𑐐𑐸 𑐫𑐵𑐣𑐵𑐔𑑂𑐰𑑄𑐐𑐸 𑐰𑐫𑑂𑐎𑐮𑑄 𑐢𑐫𑐵𑐡𑐶𑐮 𑑋 𑐁𑑅 𑐟𑐎 𑐢𑐬𑐴𑐬𑐵 𑐐𑑅𑐥𑐶𑑄𑐏𑐫𑑂 𑐠𑑂𑐫𑑄𑐩𑐠𑑂𑐫𑑄 𑐣𑐷𑐔𑑂𑐫𑐵𑐳𑑅𑐩𑑂𑐴 𑐰𑐶𑐡𑐾𑐱𑐷 𑐣𑐵𑐐𑐬𑐶𑐎𑐟 𑐣𑐵𑐥𑑄 𑐡𑐸 𑑋

𑐋𑐟𑐶𑐴𑐵𑐳𑐶𑐎 𑐢𑐬𑐴𑐬𑐵 𑐐𑐫𑐾𑐟 𑐩𑑂𑐴𑐟𑐶𑑄 𑐣𑐶𑐳𑑅 𑐟𑐎𑐵 𑐥𑐸𑐮𑐾𑐩𑐵𑑅 𑑋 𑐰𑐶𑐡𑑂𑐫𑐵𑐬𑑂𑐠𑐷, 𑐖𑑂𑐫𑐵𑐠𑑅𑐖𑐶𑐠𑐶, 𑐩𑐳𑑂𑐟 𑐰 𑐀𑐥𑐵𑐒𑑂𑐐𑐟𑐵 𑐖𑐹𑐥𑐶𑐣𑐶𑐐𑐸 𑐣𑐶𑑄𑐟𑐶𑑄 𑑕𑑐 𑐥𑑂𑐬𑐟𑐶𑐱𑐟 𑐕𑑂𑐫𑐵𑐥𑑄𑐏𑐫𑑂 𑐢𑐬𑐴𑐬𑐵 𑐐𑐫𑐾𑐐𑐸 𑐰𑑂𑐫𑐰𑐳𑑂𑐠𑐵 𑐫𑐵𑐣𑐵𑐟𑑅𑐐𑐸 𑐡𑐸 𑑋 𑐳𑐵𑐬𑑂𑐎 𑐡𑐾𑐫𑑂𑐫𑐵 𑐥𑐬𑑂𑐫𑐚𑐎𑐟𑐫𑑂𑐳𑑄 𑐩𑑂𑐴𑐟𑐶𑑄 𑐣𑑂𑐫𑐵𑐳𑑅 𑐟𑐎𑐵 𑐰 𑐳𑐵𑐬𑑂𑐎 𑐧𑐵𑐴𑐾𑐎𑑄𑐫𑐵 𑐣𑐵𑐐𑐬𑐶𑐎𑐟𑐫𑑂𑐳𑑄 𑐩𑑂𑐴𑐟𑐶𑑄 𑐡𑑂𑐰𑑅𑐕𑐶 𑐟𑐎𑐵 𑐥𑐸𑐮𑐵𑑅 𑐢𑐬𑐴𑐬𑐵 𑐐𑐫𑐾𑐦𑐂 𑑋 𑐰𑐶𑐱𑐶𑐲𑑂𑐚 𑐳𑑄𑐬𑐔𑐣𑐵 𑐳𑐘𑑂𑐔𑐵𑐮𑐣 𑐮𑐶𑐳𑐾𑑄 𑐰𑑂𑐫𑐰𑐳𑑂𑐠𑐵𑐥𑐣 𑐰𑐶𑐎𑐵𑐳 𑐳𑐩𑐶𑐟𑐶 (𑐐𑐛𑐣) 𑐁𑐡𑐾𑐱, 𑑒𑑐𑑘𑑑 𑐎𑐠𑑄 𑐮𑑂𑐴𑐵𑐥𑑄 𑐎𑐫𑐵𑑅 𑐢𑐬𑐴𑐬𑐵 𑐳𑐘𑑂𑐔𑐵𑐮𑐣𑐫𑑂 𑐴𑑅𑐐𑐸 𑐏𑑅 𑑋 𑐠𑐐𑐸𑐣𑐾 𑐩𑐒𑑂𑐳𑐶𑐬 𑑖 𑐐𑐟𑐾𑐫𑐵 𑐩𑐣𑑂𑐟𑑂𑐬𑐶𑐥𑐬𑐶𑐲𑐡𑑂𑐫𑐵 𑐧𑐿𑐛𑐎𑑄 𑐢𑐬𑐴𑐬𑐵 𑐳𑐬𑑂𑐰𑐳𑐵𑐢𑐵𑐬𑐞𑐫𑐵 𑐣𑐶𑑄𑐟𑐶𑑄 𑐔𑐵𑐫𑐾𑐎𑐾𑐐𑐸 𑐰 𑐮𑑂𑐴𑐵𑐥𑑄 𑐳𑑂𑐰𑐷𑐎𑐺𑐟 𑐫𑐵𑐫𑐾𑐐𑐸 𑐣𑐶𑐬𑑂𑐞𑐫 𑐫𑐵𑑅𑐐𑐸 𑐏𑑅 𑑋

𑐢𑐬𑐴𑐬𑐵𑐫𑑂 𑐠𑑅𑐐𑐸 𑐳𑐰𑐵𑐬𑐷 𑐳𑐵𑐢𑐣 𑐥𑐵𑐬𑑂𑐎𑐶𑐒 𑐫𑐵𑐫𑐾𑐧𑐮𑐾 𑐥𑑂𑐫𑐔𑐵𑑅 𑐡𑐹𑐐𑐸𑐫𑐵𑐟 𑐑𑑁𑐕𑐶𑐫𑐵 𑐣𑐷𑐟𑐎𑐵 𑐰 𑐣𑐶𑐔𑐵𑑅 𑐡𑐹𑐐𑐸𑐫𑐵𑐟 𑐗𑐶𑐟𑐎𑐵 𑐎𑑂𑐰𑑅𑐕𑐶𑐣𑐵𑐟𑑅𑐐𑐸 𑐡𑐸 𑑋 𑐢𑐬𑐴𑐬𑐵 𑐮𑐵𑐐𑐵𑐫𑑂 𑐡𑐸𑐴𑐵𑑄 𑐰𑐣𑐾𑐐𑐸 𑐣𑐶𑑄𑐟𑐶𑑄 𑐣𑑂𑐫𑐫𑐟𑐎𑐵 𑐢𑑂𑐫𑐧𑐵 𑐥𑐸𑐮𑐾𑐩𑐵𑑅𑐐𑐸 𑐰𑑂𑐫𑐰𑐳𑑂𑐠𑐵 𑐫𑐵𑐣𑐵𑐟𑑅𑐐𑐸 𑐡𑐸 𑑋 𑐢𑐬𑐴𑐬𑐵 𑐳𑑂𑐟𑐩𑑂𑐨𑐫𑑂 𑐬𑐵𑐲𑑂𑐚𑑂𑐬𑐶𑐫 𑐩𑐴𑐟𑑂𑐰𑐫𑐵 𑐰𑐶𑐖𑑂𑐘𑐵𑐥𑐣 𑐫𑐵𑐫𑐾𑐟 𑐑𑑁𑐕𑐶𑐫𑐵 𑐣𑑂𑐫𑐵𑐡𑑂𑐰𑑅 𑐟𑐎𑐵 𑐥𑐸𑐮𑐾𑐩𑐵𑑅𑐐𑐸 𑐰𑑂𑐫𑐰𑐳𑑂𑐠𑐵 𑐫𑐵𑐣𑐵𑐟𑑅𑐐𑐸 𑐡𑐸 𑑋 𑐰𑑂𑐫𑐵𑐰𑐳𑐵𑐫𑐶𑐎 𑐨𑐶𑐜𑐶𑐫𑑀 𑐕𑐵𑐫𑐵𑐒𑑂𑐎𑐣𑐫𑐵 𑐣𑐶𑑄𑐟𑐶𑑄 𑐑𑑁𑐕𑐶𑐫𑐵 𑐣𑑂𑐫𑐵𑐡𑑂𑐰𑑅 𑐰 𑐎𑐶𑐥𑐵𑐫𑐵 𑐣𑐶𑑄𑐟𑐶𑑄 𑐑𑑁𑐕𑐶𑐫𑐵 𑐡𑑂𑐰𑑅𑐕𑐶 𑐟𑐎𑐵 𑐥𑐸𑐮𑐾𑐩𑐵𑑅𑐐𑐸 𑐎𑑂𑐰𑑅𑐕𑐶𑐣𑐵𑐟𑑅𑐐𑐸 𑐡𑐸 𑑋

𑐳𑐱𑐳𑑂𑐟𑑂𑐬𑐫𑐵 𑐥𑑂𑐬𑐰𑐎𑑂𑐟𑐵𑐫𑑂 𑐜𑐶𑐁𑐂𑐖𑐷 𑐠𑐵𑐥𑐵

𑐫𑐾𑑃, 𑑔 𑐠𑐶𑑄𑐮𑐵𑐠𑑂𑐰 : 𑐳𑐱𑐳𑑂𑐟𑑂𑐬 𑐥𑑂𑐬𑐴𑐬𑐷 𑐧𑐮 𑐣𑐾𑐥𑐵𑐮𑑄 𑐳𑐸𑐔𑑄 𑐀𑐢𑐶𑐎𑐵𑐬𑐷 𑐮𑐶𑐳𑐾𑑄 𑐥𑑂𑐬𑐰𑐎𑑂𑐟𑐵𑐫𑐵 𑐨𑐵𑐮𑐵 𑐳𑐱𑐳𑑂𑐟𑑂𑐬 𑐥𑑂𑐬𑐴𑐬𑐷 𑐣𑐵𑐫𑐧 𑐩𑐴𑐵𑐣𑐶𑐬𑐷𑐎𑑂𑐲𑐎 (𑐜𑐶𑐁𑐂𑐖𑐷) 𑐩𑐣𑐶𑐲 𑐠𑐵𑐥𑐵𑐫𑐵𑐟 𑐧𑑂𑐫𑐹𑐐𑐸 𑐡𑐸 𑑋

𑐠𑑂𑐰𑐳𑐶𑐧𑐾𑑄 𑐣𑑂𑐴𑑂𑐫𑑅 𑐳𑐸𑐔𑑄 𑐀𑐢𑐶𑐎𑐵𑐬𑐷 𑐮𑐶𑐳𑐾𑑄 𑐥𑑂𑐬𑐰𑐎𑑂𑐟𑐵 𑐖𑐸𑐫𑐵𑐔𑑂𑐰𑐣𑐵𑐡𑐷𑐩𑑂𑐴 𑐳𑐱𑐳𑑂𑐟𑑂𑐬 𑐥𑑂𑐬𑐴𑐬𑐷 𑐣𑐵𑐫𑐰 𑐩𑐴𑐵𑐣𑐶𑐬𑐷𑐎𑑂𑐲𑐎 𑐎𑐵𑐮𑐶𑐡𑐵𑐳 𑐢𑑁𑐰𑐖𑐷 𑑓𑑐 𑐡𑑃𑐫𑐵 𑐳𑐾𑐰𑐵 𑐃𑐫𑐵 𑐴𑐸𑐣𑐶𑑄 𑐀𑐣𑐶𑐰𑐵𑐬𑑂𑐫 𑐀𑐰𑐎𑐵𑐱𑐫𑑂 𑐠𑑂𑐫𑐣𑐵𑐡𑐷𑐐𑐸 𑐢𑐸𑑄𑐎𑐵𑑅 𑐳𑐱𑐳𑑂𑐟𑑂𑐬 𑐥𑑂𑐬𑐴𑐬𑐷 𑐣𑐵𑐫𑐰 𑐩𑐴𑐵𑐣𑐶𑐬𑐷𑐎𑑂𑐲𑐎 𑐠𑐵𑐥𑐵𑐫𑐵𑐟 𑐩𑑂𑐴𑐶𑐐𑑅𑐣𑐶𑐳𑐾𑑄 𑐄𑐐𑐸 𑐨𑐵𑐮𑐵 𑐧𑑂𑐫𑐹𑐐𑐸 𑐳𑐱𑐳𑑂𑐟𑑂𑐬 𑐥𑑂𑐬𑐴𑐬𑐷 𑐧𑐮 𑐥𑑂𑐬𑐢𑐵𑐣 𑐖𑑂𑐫𑐵𑐎𑐸𑐠𑐶𑑄 𑐢𑐵𑑅𑐐𑐸 𑐡𑐸 𑑋

👮‍♂️📢🇳🇵📰🔰🎖️

𑐣𑑂𑐴𑐹𑐡𑐶𑐮𑑂𑐮𑐷𑐂 𑐰𑐵𑐫𑐸 𑐥𑑂𑐬𑐡𑐹𑐲𑐞 𑐟𑐔𑑂𑐰𑐮

𑐣𑑂𑐴𑐹𑐡𑐶𑐮𑑂𑐮𑐷, 𑑔 𑐠𑐶𑑄𑐮𑐵𑐠𑑂𑐰 : 𑐮𑐶𑐥𑐵𑑄𑐐𑐸 𑐃 𑐀𑐥𑑂𑐰𑑅𑐐𑐸 𑐰𑐵𑐫𑐸 𑐥𑑂𑐬𑐡𑐹𑐲𑐞𑐫𑐵 𑐴𑐸𑐣𑐶𑑄 𑐨𑐵𑐬𑐟𑐫𑐵 𑐣𑑂𑐴𑐹𑐡𑐶𑐮𑑂𑐮𑐷𑐫𑐵 𑐣𑐵𑐥𑐣𑐵𑐥𑑄 𑐖𑑅𑐏𑑅𑐫𑐵 𑐮𑐵𑐐𑐵𑐫𑑂 𑐦𑐫𑑂𑐫𑐵 𑐐𑐸𑐞𑐳𑑂𑐟𑐬 𑐳𑑀𑐩𑐧𑐵𑑅 𑐏𑐟𑐬𑐣𑐵𑐎 𑐳𑑂𑐟𑐬𑐫𑑂 𑐠𑑂𑐫𑑄𑐐𑐸 𑐣𑐵𑐥𑑄 𑐎𑐸𑑃𑐫𑐵 𑐢𑑂𑐰𑐵𑐟𑐸𑐐𑐸 𑐟𑐐𑐶𑑄𑐩𑑄 𑐨𑐵𑐬𑐟𑐷𑐫 𑐬𑐵𑐖𑐢𑐵𑐣𑐷 𑐳𑐴𑐬𑐫𑐵 𑐀𑐥𑑂𑐰𑑅 𑐢𑐫𑐵𑐠𑐾𑑄 𑐠𑐵𑐫𑑂𑐫𑐵𑐟 𑐟𑐥𑐸𑐣𑐵𑐟𑑅𑐐𑐸 𑐡𑐸 𑑋

𑐎𑐾𑐣𑑂𑐡𑑂𑐬𑐷𑐫 𑐥𑑂𑐬𑐡𑐹𑐲𑐞 𑐣𑐶𑐫𑐣𑑂𑐟𑑂𑐬𑐞 𑐧𑑀𑐬𑑂𑐜𑐫𑐵 𑐎𑐠𑑄 𑐰𑐶𑐱𑐾𑐲 𑐫𑐵𑐣𑐵𑑅 𑐡𑐶𑐮𑑂𑐮𑐷𑐫𑐵 𑐥𑐹𑐬𑑂𑐰𑐷 𑐮𑐵𑐐𑐵𑐟 𑐰 𑐖𑑅𑐏𑑅𑐫𑐵 𑐮𑐵𑐐𑐵𑐫𑑂 𑐰𑐵𑐫𑐸 𑐐𑐸𑐞𑐳𑑂𑐟𑐬 𑐳𑐹𑐔𑐎𑐵𑐒𑑂𑐎 (𑐊𑐎𑑂𑐫𑐹𑐁𑐃) 𑐠𑑂𑐫𑑄𑐩𑐠𑑂𑐫𑑄 𑑔𑑕𑑐 𑐏𑐣𑐾𑐡𑐹𑐐𑐸 𑐡𑐸 𑐐𑐹𑐐𑐸𑐎𑐶 𑐰𑐵𑐫𑐸 𑐥𑑂𑐬𑐡𑐹𑐲𑐞 𑐩𑐵𑐥𑐡𑐞𑑂𑐜𑐫𑐵 𑐳𑐣𑑂𑐡𑐬𑑂𑐨𑐫𑑂 ‘𑐐𑐩𑑂𑐨𑐷𑐬’ 𑐀𑐰𑐳𑑂𑐠𑐵 𑐟𑐵𑐫𑐾𑐎𑐵𑐟𑑅𑐐𑐸 𑐡𑐸 𑑋

𑐮𑐶𑐥𑐵𑑄𑐐𑐸 𑐕𑐸𑑄 𑐡𑐶𑑄 𑐠𑐸𑐏𑐾 𑐡𑐶𑐮𑑂𑐮𑐷 𑐰 𑐠𑐸𑐎𑐶𑐫𑐵 𑐖𑑅𑐏𑑅𑐫𑐵 𑐮𑐵𑐐𑐵𑐫𑑂 𑐦𑐫𑑂𑐫𑐵 𑐐𑐸𑐞𑐳𑑂𑐟𑐬 𑐳𑑂𑐫𑐣𑐵𑐰𑐣𑐵𑑅 𑐩𑐣𑐹𑐟𑐫𑐾𑐟 𑐳𑐵𑐳𑑅 𑐮𑑂𑐴𑐵𑐫𑐾𑐟𑐎𑑄 𑐠𑐵𑐎𑐸𑐫𑐵 𑐔𑑂𑐰𑑄𑐐𑐸 𑐣𑐵𑐥𑑄 𑐫𑐎𑑂𑐰𑑅 𑐢𑐫𑐵𑐠𑐾𑑄 𑐳𑐬𑐎𑐵𑐬𑐷 𑐀𑐳𑑂𑐥𑐟𑐵𑐮𑐫𑑂 𑐳𑐵𑐳𑑅 𑐳𑐩𑑂𑐧𑐣𑑂𑐢𑐷 𑐮𑑂𑐰𑐔𑑄 𑐎𑑅𑐥𑐶𑑄 𑐧𑐶𑐬𑐵𑐩𑐷𑐟𑐫𑑂 𑐮𑑂𑐫𑐵𑑅 𑐀𑐥𑑂𑐰𑑅𑐫𑐵𑐰𑑄𑐐𑐸 𑐳𑑂𑐠𑐵𑐣𑐷𑐫 𑐩𑐶𑐜𑐶𑐫𑐵𑑄 𑐢𑐵𑑅𑐐𑐸 𑐡𑐸 𑑋

𑐳𑐵𑐰𑐢𑐵𑐣𑐷𑐫𑐵 𑐣𑐶𑑄𑐟𑐶𑑄 𑐡𑐶𑐮𑑂𑐮𑐷𑐫𑐵 𑐀𑐢𑐶𑐎𑐵𑐬𑐷𑐥𑐶𑑄𑐳𑑄 𑐳𑑂𑐠𑐵𑐣𑐷𑐫𑐫𑐵𑐟 𑐩𑐖𑐶𑐩𑐐𑐵𑑅𑐐𑐸 𑐖𑑂𑐫𑐵𑐫𑑂 𑐧𑐵𑐴𑐾𑐎𑑄 𑐥𑐶𑐴𑐵𑑄 𑐰𑐫𑐾𑐐𑐸 𑐰 𑐕𑐸𑑄 𑐣𑑄 𑐖𑑂𑐫𑐵 𑐏𑑃 𑐩𑐡𑐫𑐾𑐎𑑄 𑐥𑐶𑐴𑐵𑑄 𑐩𑐰𑐫𑐾𑐟 𑐣𑐶𑐬𑑂𑐡𑐾𑐱𑐣 𑐧𑐶𑐳𑐾𑑄 𑐳𑑂𑐰𑐵𑐳𑑂𑐠𑑂𑐫 𑐳𑐸𑐖𑐵𑐟 𑐖𑐵𑐬𑐷 𑐫𑐵𑑅𑐐𑐸 𑐡𑐸 𑑋

𑐕𑐐𑐹 𑐏𑐬𑑂𑐧 𑐠𑑂𑐫𑐣𑐷𑐣 𑐳𑐵𑐩𑐵𑐖𑐶𑐎 𑐳𑐸𑐬𑐎𑑂𑐲𑐵 𑐎𑑀𑐲𑐫𑑂 𑐫𑑀𑐐𑐡𑐵𑐣𑐫𑐵 𑐢𑑂𑐫𑐧𑐵

𑐫𑐾𑑃, 𑑔 𑐠𑐶𑑄𑐮𑐵𑐠𑑂𑐰 : 𑐳𑐬𑐎𑐵𑐬𑑄 𑐳𑐎𑐳𑐶𑐟𑑄 𑐳𑐵𑐩𑐵𑐖𑐶𑐎 𑐳𑐸𑐬𑐎𑑂𑐲𑐵𑐫𑑂 𑐡𑐸𑐟𑐶𑐣𑐾𑐐𑐸 𑐟𑐵𑐟𑐸𑐣𑐵 𑐣𑑂𑐴𑑂𑐫𑐵𑐎𑐹𑐐𑐸 𑐳𑐵𑐩𑐵𑐖𑐶𑐎 𑐳𑐸𑐬𑐎𑑂𑐲𑐵 𑐎𑑀𑐲𑐫𑑂 𑐠𑑂𑐫𑑄𑐩𑐠𑑂𑐫𑑄 𑐕𑐐𑐹 𑐀𑐬𑑂𑐧 𑐟𑐎𑐵 𑐖𑑅𑐏𑑅 𑐫𑑀𑐐𑐡𑐵𑐣 𑐢𑑂𑐫𑐧𑐵 𑐡𑐸𑐟𑐶𑐣𑐾 𑐢𑐸𑑄𑐎𑐹𑐐𑐸 𑐡𑐸 𑑋
𑐎𑑀𑐲𑐫𑐵 𑐎𑐠𑑄 𑐁𑑅 𑐟𑐎 𑐩𑐸𑐎𑑂𑐎𑑄 𑐫𑑀𑐐𑐡𑐵𑐣 𑐢𑑂𑐫𑐧𑐵 𑑙𑑕 𑐀𑐬𑑂𑐧 𑑔𑑔 𑐎𑑂𑐰𑐟𑐶 𑑑𑑐 𑐮𑐏 𑑕𑑖 𑐡𑑂𑐰𑑅 𑐳𑑂𑐰𑐳𑑅 𑐰 𑑖𑑒 𑐟𑐎𑐵 𑐖𑑅𑐏𑑅 𑐠𑑂𑐫𑑄𑐐𑐸 𑐡𑐸 𑑋 𑐎𑑀𑐲𑐫𑑂 𑐁𑑅𑐟𑐎 𑐳𑐹𑐔𑐷𑐎𑐺𑐟 𑐬𑑀𑐖𑐐𑐵𑐬𑐡𑐵𑐟𑐵 𑑒𑑒 𑐡𑑂𑐰𑑅 𑐳𑑂𑐰𑐳𑑅 𑐰 𑐐𑐸𑑄𑐐𑐹 𑐠𑑂𑐫𑑄𑐐𑐸 𑐡𑐸 𑑋 𑐀𑐠𑐾 𑐴𑐾, 𑐳𑐹𑐔𑐷𑐎𑐺𑐟 𑐫𑑀𑐐𑐡𑐵𑐣𑐎𑐬𑑂𑐟𑐵 𑑒𑑖 𑐮𑐏 𑑔𑑑 𑐡𑑂𑐰𑑅 𑐳𑐔𑑂𑐕𑐶 𑐰 𑑘𑑙 𑐩𑑂𑐴𑑅 𑐖𑑅𑐏𑑅 𑐠𑑂𑐫𑑄𑐐𑐸 𑐡𑐸 𑑋 𑐎𑑀𑐲𑑄 𑐁𑑅𑐟𑐎 𑑑𑑗 𑐀𑐬𑑂𑐧 𑑖𑑔 𑐎𑑂𑐰𑐟𑐶 𑑘𑑘 𑐮𑐏 𑑓𑑔 𑐡𑑂𑐰𑑅 𑐏𑐸𑐳𑑅 𑐰 𑑘𑑔 𑐟𑐎𑐵 𑐖𑑂𑐰𑑅𑐫𑐵 𑐢𑑂𑐫𑐧𑐵 𑐡𑐵𑐧𑐷 𑐨𑐸𑐎𑑂𑐟𑐵𑐣𑐷 𑐫𑐵𑐫𑐾𑐢𑐸𑑄𑐎𑐹𑐐𑐸 𑐡𑐸 𑑋

𑐎𑑀𑐲𑐫𑐵 𑐎𑐠𑑄, 𑐍𑐲𑐢𑐷 𑐄𑐥𑐔𑐵𑐬, 𑐳𑑂𑐰𑐵𑐳𑑂𑐠𑑂𑐫 𑐮𑐶𑐳𑐾𑑄 𑐩𑐵𑐟𑐺𑐟𑑂𑐰 𑐡𑐵𑐧𑐷 𑐢𑑂𑐫𑐧𑐵 𑐣𑐶𑐐𑐹 𑐀𑐬𑑂𑐧 𑑕𑑑 𑐎𑑂𑐰𑐟𑐶 𑑒𑑐 𑐮𑐏 𑑙𑑔 𑐡𑑂𑐰𑑅 𑐔𑑂𑐫𑐵𑐳𑑅 𑐰 𑑒𑑒 𑐟𑐎𑐵, 𑐡𑐸𑐬𑑂𑐑𑐚𑐣𑐵 𑐮𑐶𑐳𑐾𑑄 𑐀𑐱𑐎𑑂𑐟𑐟𑐵 𑐡𑐵𑐰𑐷 𑑒𑑒 𑐎𑑂𑐰𑐟𑐶 𑑘𑑖 𑐮𑐏 𑑕𑑓 𑐡𑑂𑐰𑑅 𑐴𑐖𑐵𑐬 𑐥𑑂𑐫𑐳𑑅 𑐰 𑑗𑑕 𑐟𑐎𑐵 𑐖𑑂𑐰𑑅𑐫𑐵 𑐖𑐹𑐐𑐸 𑐡𑐸 𑑋 𑐀𑐠𑐾 𑐴𑐾, 𑐁𑐱𑑂𑐬𑐶𑐟 𑐥𑐬𑐶𑐰𑐵𑐬 𑐳𑐸𑐬𑐎𑑂𑐲𑐵 𑐡𑐵𑐧𑐷 𑐢𑑂𑐫𑐧𑐵 𑑒𑑙 𑐎𑑂𑐰𑐟𑐶 𑐣𑑂𑐴𑐫𑑂𑐐𑐹 𑐮𑐏 𑑗𑑒 𑐡𑑂𑐰𑑅 𑐳𑐔𑑂𑐕𑐶 𑐰 𑑑𑑖 𑐟𑐎𑐵 𑐰 𑐀𑐰𑐎𑐵𑐱 𑐡𑐵𑐧𑐷 𑐢𑑂𑐫𑐧𑐵 𑑑𑑔 𑐀𑐬𑑂𑐧 𑑖𑑑 𑐎𑑂𑐰𑐟𑐶 𑑗𑑓 𑐮𑐏 𑑑𑑔 𑐡𑑂𑐰𑑅 𑐣𑐶𑐳𑑅 𑐰 𑑗𑑑 𑐟𑐎𑐵 𑐖𑑂𑐰𑑅𑐫𑐵 𑐡𑐸 𑑋

𑐳𑐬𑐎𑐵𑐬𑑄 𑐮𑐶𑐥𑐵𑑄𑐐𑐸 𑐃 𑐰𑐿𑐡𑐾𑐱𑐶𑐎 𑐮𑐖𑐐𑐵𑐫𑑂 𑐰𑐣𑐷𑐥𑐶𑑄 𑐱𑑂𑐬𑐩𑐶𑐎𑐫𑐵𑐟 𑐣𑐵𑐥𑑄 𑐎𑑀𑐲𑐫𑑂 𑐀𑐣𑐶𑐰𑐵𑐬𑑂𑐫 𑐎𑐠𑑄 𑐧𑑂𑐰𑐟𑐶 𑐎𑐵𑐫𑐾𑐩𑐵𑑅𑐐𑐸 𑐰𑐵𑐢𑑂𑐫𑐎𑐵𑐬𑐷 𑐰𑑂𑐫𑐰𑐳𑑂𑐠𑐵 𑐫𑐵𑐫𑐾𑐢𑐸𑑄𑐎𑐵𑑅 𑐎𑑀𑐲𑐫𑐵 𑐥𑑂𑐬𑐨𑐵𑐰𑐎𑐵𑐬𑐶𑐟𑐵 𑐣𑐵𑐥𑑄 𑐀𑐥𑑂𑐰𑑅𑐐𑐸 𑐡𑐸 𑑋 𑐳𑑂𑐰𑐬𑑀𑐖𑐐𑐵𑐬 𑐱𑑂𑐬𑐩𑐶𑐎, 𑐄𑐡𑑂𑐫𑑀𑐐 𑐥𑑂𑐬𑐟𑐶𑐲𑑂𑐛𑐵𑐣 𑐣𑐵𑐥𑑄 𑐠𑐷𑐠𑐷 𑐳𑐒𑑂𑐑𑐳𑑄𑐳𑑂𑐠𑐵𑐫𑑂 𑐖𑑂𑐫𑐵 𑐫𑐵𑐣𑐵𑐔𑑂𑐰𑑄𑐥𑐶𑑄 𑐎𑐵𑐩𑐡𑐵𑐬 𑐣𑐵𑐥𑑄 𑐱𑑂𑐬𑐩𑐶𑐎 𑐎𑑀𑐲𑐫𑑂 𑐧𑑂𑐰𑐟𑐶 𑐎𑐫𑐵𑑅 𑐫𑑀𑐐𑐡𑐵𑐣𑐎𑐬𑑂𑐟𑐵 𑐖𑐸𑐂 𑐦𑐂 𑑋

𑐎𑑀𑐲𑐫𑑂 𑐣𑐶𑐫𑐩𑐶𑐟 𑐎𑐠𑑄 𑐫𑑀𑐐𑐡𑐵𑐣 𑐧𑐶𑐂𑐥𑐶𑑄𑐳𑑄 𑐍𑐲𑐢𑑀𑐄𑐥𑐔𑐵𑐬, 𑐥𑐾𑐣𑑂𑐳𑐣 𑐣𑐵𑐥𑑄 𑐡𑐸𑐬𑑂𑐑𑐚𑐣𑐵 𑐀𑐱𑐎𑑂𑐟𑐟𑐵 𑐳𑐸𑐬𑐎𑑂𑐲𑐵 𑐫𑑀𑐖𑐣𑐵, 𑐁𑐱𑑂𑐬𑐶𑐟 𑐥𑐬𑐶𑐰𑐵𑐬 𑐳𑐸𑐬𑐎𑑂𑐲𑐵 𑐫𑑀𑐖𑐣𑐵, 𑐰𑐺𑐡𑑂𑐢𑐵𑐰𑐳𑑂𑐠𑐵 𑐳𑐸𑐬𑐎𑑂𑐲𑐵 𑐫𑑀𑐖𑐣𑐵 𑐀𑐣𑑂𑐟𑐬𑑂𑐐𑐟 𑐳𑐸𑐰𑐶𑐢𑐵 𑐎𑐵𑐫𑐾𑐡𑐂 𑑋 𑐎𑑀𑐲𑐫𑐵𑐟 𑐥𑑂𑐬𑐨𑐵𑐰𑐎𑐵𑐬𑐷 𑐡𑐫𑐾𑐎𑐾𑐟 𑐠𑐥 𑐳𑐶𑐬𑑂𑐖𑐣𑐱𑐷𑐮 𑐫𑑀𑐖𑐣𑐵 𑐴𑐫𑐾𑐩𑐵𑑅𑐐𑐸 𑐳𑑅 𑐣𑐵𑐥𑑄 𑐮𑑂𑐴𑑂𑐰𑐣𑐾𑐐𑐸 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐎𑑀𑐲𑐫𑑂 𑐫𑑀𑐐𑐡𑐵𑐣𑐫𑐵 𑐢𑑂𑐫𑐧𑐵 𑐀𑐥𑑂𑐰𑑅𑐫𑐵 𑐰𑑄𑐮𑐶𑐳𑐾𑑄 𑐮𑐐𑐵𑐣𑐷𑐫𑐵 𑐩𑐾𑐩𑐾𑐐𑐸 𑐳𑑂𑐬𑑀𑐟𑐟 𑐩𑐵𑐮𑐾𑐩𑐵𑑅𑐐𑐸 𑐏𑐣𑐾𑐡𑐹𑐐𑐸 𑐡𑐸 𑑋

𑐳𑐬𑑂𑐰𑑀𑐔𑑂𑐔 𑐀𑐡𑐵𑐮𑐟 𑐟𑑀𑐜𑐦𑑀𑐜 𑐰 𑐩𑐶 𑐟𑑅𑐐𑐸 𑐁𑐐𑐖𑐣𑐷𑐫𑐵 𑐡𑑂𑐰𑐥𑐣𑐫𑑂 𑐣𑐶𑐩𑑂𑐴𑐾𑐳𑐶𑐟 𑐖𑑂𑐰𑐣
𑐫𑐾𑑃, 𑑔 𑐠𑐶𑑄𑐮𑐵𑐠𑑂𑐰 𑐳𑑂 𑐣𑐾𑐥𑐵𑐮 𑐥𑑂𑐬𑐴𑐬𑐷𑑄 𑐳𑐬𑑂𑐰𑑀𑐔𑑂𑐔 𑐀𑐡𑐵𑐮𑐟 𑐟𑑀𑐜𑐦𑑀𑐜 𑐰 𑐩𑐶 𑐟𑑅𑐥𑐶𑑄 𑐣𑐶𑐩𑑂𑐴𑐾𑐳𑐶𑐟 𑐖𑑂𑐰𑑄𑐐𑐸 𑐡𑐸 𑑋

𑐖𑐶𑐮𑑂𑐮𑐵 𑐥𑑂𑐬𑐴𑐬𑐷 𑐥𑐬𑐶𑐳𑐬 𑐫𑐾𑑃𑐫𑐵 𑐥𑐸𑐔𑐮𑑄 𑐳𑐬𑑂𑐰𑑀𑐔𑑂𑐔 𑐀𑐡𑐵𑐮𑐟 𑐟𑑀𑐜𑐦𑑀𑐜, 𑐩𑐶 𑐟𑐫𑐾𑐐𑐸 𑐰 𑐳𑐸𑐬𑐎𑑂𑐲𑐵𑐎𑑅𑐩𑐶𑐫𑐵 𑐮𑑂𑐰𑐵𑐨𑑅 𑐮𑐸𑐚𑐥𑐵𑐚 𑐫𑐵𑑅𑐐𑐸 𑐡𑑂𑐰𑐥𑐣𑐫𑑂 𑐗𑐵𑐥𑐵𑐫𑐵 𑐨𑐡𑑂𑐬𑐥𑐸𑐬𑐫𑐵 𑑒𑑘 𑐡𑑃 𑐡𑐸𑐩𑑂𑐴 𑐖𑑂𑐫𑑀𑐟𑐶 𑐠𑐵𑐥𑐵 𑐑𑐟𑐵𑐣𑐾 𑐰 𑐫𑐮𑐫𑐵 𑐩𑐴𑐵𑐮𑐎𑑂𑐲𑑂𑐩𑐷𑐳𑑂𑐠𑐵𑐣𑐫𑐵 𑑓𑑐 𑐡𑑃 𑐡𑐸𑐩𑑂𑐴 𑐳𑐸𑐱𑐷𑐮 𑐱𑑂𑐬𑐾𑐲𑑂𑐛𑐫𑐵𑐟 𑐖𑑂𑐰𑐣𑐵𑑅 𑐩𑑂𑐴𑐶𑐐𑑅 𑐳𑐵𑐬𑑂𑐰𑐖𑐣𑐶𑐎 𑐫𑐵𑑅𑐐𑐸 𑐡𑐸 𑑋

𑐥𑐬𑐶𑐳𑐬𑐫𑐵 𑐥𑑂𑐬𑐰𑐎𑑂𑐟𑐵 𑐮𑐶𑐳𑐾𑑄 𑐥𑑂𑐬𑐴𑐬𑐷 𑐄𑐥𑐬𑐷𑐎𑑂𑐲𑐎 𑑙𑐊𑐳𑐥𑐷𑑐 𑐥𑐰𑐣𑐎𑐸𑐩𑐵𑐬 𑐨𑐚𑑂𑐚𑐬𑐵𑐃𑑄 𑐰𑑄𑐐𑐸 𑐨𑐡𑑁 𑑒𑑔 𑐐𑐟𑐾 𑐖𑐾𑐣𑐖𑐷 𑐁𑐣𑑂𑐡𑑀𑐮𑐣𑐫𑐵 𑐗𑑂𑐰𑐮𑐫𑑂 𑐳𑐬𑑂𑐰𑑀𑐔𑑂𑐔 𑐀𑐡𑐵𑐮𑐟𑐫𑐵 𑐨𑐰𑐣𑐫𑑂 𑐟𑑀𑐜𑐦𑑀𑐜, 𑐩𑐶 𑐟𑐫𑐾𑐐𑐸 𑐣𑐵𑐥𑑄 𑐮𑐸𑐚𑐥𑐵𑐚 𑐫𑐵𑐫𑐾𑐐𑐸, 𑐳𑐸𑐬𑐎𑑂𑐲𑐵𑐎𑑅𑐩𑐶𑐫𑐵 𑐮𑑂𑐰𑐵𑐨𑑅 𑐮𑐸𑐚𑐥𑐵𑐚 𑐣𑐵𑐥𑑄 𑐥𑑂𑐬𑐡𑐬𑑂𑐱𑐣 𑐫𑐵𑐫𑐾𑐐𑐸, 𑐁𑐥𑐬𑐵𑐢𑐶𑐎 𑐖𑑂𑐫𑐵𑐫𑑂 𑐳𑑂𑐰𑐵𑑅𑐐𑐸 𑐡𑑂𑐰𑐥𑐣𑐫𑑂 𑐄𑐩𑐶𑐟 𑐖𑑂𑐰𑐣𑐵𑑅𑐐𑐸 𑐢𑐎𑐵𑑅 𑐢𑐫𑐵𑐡𑐷𑐐𑐸 𑐡𑐸 𑑋 𑐖𑑂𑐰𑑄𑐥𑐶𑑄𑐟 𑐖𑐶𑐮𑑂𑐮𑐵 𑐀𑐡𑐵𑐮𑐟 𑐫𑐾𑑃𑐥𑐵𑐏𑐾𑑄 𑐁𑐥𑐬𑐵𑐢𑐶𑐎 𑐄𑐥𑐡𑑂𑐬𑐰 𑐫𑐵𑐫𑐾 𑐩𑐖𑑂𑐫𑐹𑐐𑐸 𑐡𑑂𑐰𑐥𑐣𑐫𑑂 𑐣𑑂𑐴𑐫𑑂𑐣𑑂𑐴𑐸𑐫𑐵 𑐩𑑂𑐫𑐵𑐡 𑐠𑐥 𑐫𑐵𑐣𑐵𑑅 𑐀𑐣𑐸𑐳𑐣𑑂𑐢𑐵𑐣 𑐖𑐸𑐫𑐵𑐔𑑂𑐰𑑄𑐐𑐸 𑐥𑑂𑐬𑐰𑐎𑑂𑐟𑐵 𑐨𑐚𑑂𑐚𑐬𑐵𑐃𑑄 𑐢𑐫𑐵𑐡𑐶𑐮 𑑋