Shan State Channel

တန့်ယန်းတွင် မိုးသည်းထန်စွာရွာသွန်းပြီး မြေထိန်းနံရံပြိုကျ၊ အမျိုးသမီးတစ်ဦး သေဆုံးကာ နေအိမ်အချို့ ပျက်စီး

Shan State Channel News
ဇွန်လ ၈ ရက်၊ ၂၀၂၆ ခုနှစ်

ရှမ်းပြည်နယ်မြောက်ပိုင်း၊ တန့်ယန်းမြို့နယ်အတွင်း မိုးသည်းထန်စွာ ရွာသွန်းမှုကြောင့် မြေထိန်းနံရံပြိုကျကာ နေအိမ်အချို့ ပျက်စီးခဲ့ပြီး အမျိုးသမီးတစ်ဦး သေဆုံးခဲ့ကြောင်း စုံစမ်းသိရှိရသည်။

ယနေ့ ဇွန်လ ၈ ရက်နေ့၊ နံနက် ၄ နာရီခန့်တွင် တန့်ယန်းမြို့နယ်အတွင်း မိုးသည်းထန်စွာ ရွာသွန်းခဲ့ပြီးနောက် အမှတ် (၆) ရပ်ကွက်၊ နယ်မြေ (၅) တွင် မြေပြိုမှုဖြစ်ပွားခဲ့ခြင်းဖြစ်သည်။ အဆိုပါရပ်ကွက်ရှိ အိမ်အမှတ် (၁၅) နေ ဒေါ်အေးယင်း၏ နေအိမ်အနောက်ဘက်ရှိ မြေထိန်းနံရံမှ ကျောက်များနှင့် မြေသားများ ပြိုကျလာပြီး နေအိမ်ပေါ်သို့ ပိမိခဲ့ခြင်းဖြစ်သည်။

ယင်းမြေပြိုကျမှုကြောင့် နေအိမ်အတွင်းရှိ အသက် (၄၉) နှစ် အရွယ် ဒေါ်အေးယင်းမှာ ခန္ဓာကိုယ်တွင် ပြင်းထန်သော ပေါက် ပြဲဒဏ်ရာများ ရရှိကာ အခင်းဖြစ်ပွားသည့်နေရာ၌ပင် သေ ဆုံးသွားခဲ့သည်။ ထို့အပြင် မြေပြိုကျမှုကြောင့် အဆိုပါနေအိမ်၏ အနောက်ဘက်ခြမ်းတွင် ထိခိုက်ပျက်စီးမှုအချို့များ ရှိခဲ့ကြောင်း သိရသည်။

ဖြစ်စဉ်ဖြစ်ပွားပြီးနောက် သက်ဆိုင်ရာ တာဝန်ရှိသူများက အခင်းဖြစ်ပွားရာနေရာသို့ ချက်ချင်းသွားရောက်၍ လိုအပ်သည့် စစ်ဆေးမှုများနှင့် ကူညီကယ်ဆယ်ရေးလုပ်ငန်းများကို လုပ်ဆောင်ခဲ့သည်။

မိုးရာသီကာလအတွင်း တန့်ယန်းမြို့နယ်တွင် မိုးသည်းထန်စွာ ရွာသွန်းမှုများ ဆက်တိုက်ဖြစ်ပေါ်နေသဖြင့် တောင်စောင်းနေအိမ်များနှင့် မြေထိန်းနံရံအနီး နေထိုင်သူများအနေဖြင့် မြေပြိုမှုအန္တရာယ်ကို အထူးဂရုပြုကြရန် ဒေသခံများက သတိပေးနှိုးဆော်ထားသည်။


#တန့်ယန်းမြို့
#မိုးသည်းထန်စွာရွာသွန်း
#မြေထိန်းနံရံပြိုကျ
#သေဆုံးမှုရှိ

-Photo Local

နမ့်ခမ်း၊ ကောင်းတပ်ရွာ ယမ်းပေါက်ကွဲမှုသင့် ပြည်သူများအား SSPP/SSA မှ ငွေကျပ်သိန်း ၅၀၀ ကျော် တန်ဖိုးရှိ ပစ္စည်းနှင့် ငွေသားများ ထောက်ပံ့

Shan State Channel
ဇွန်လ ၅ ရက်၊ ၂၀၂၆ ခုနှစ်

ရှမ်းပြည်နယ်မြောက်ပိုင်း၊ နမ့်ခမ်းမြို့နယ်၊ ကောင်းတပ်ကျေးရွာတွင် မေလ ၃၁ ရက်နေ့က ဖြစ်ပွားခဲ့သော ယမ်းသိုလှောင်ရုံပေါက်ကွဲမှုကြောင့် ဒေသခံ ၆၀ ကျော် သေဆုံးခဲ့ရပြီး ၁၀၀ ကျော် ထိခိုက်ဒဏ်ရာရရှိခဲ့ကာ ကောင်းတပ်ကျေးရွာအပါအဝင် အနီးနားရှိ ကျေးရွာ (၆) ရွာမှ အိမ်ခြေ (၆၀၀) ကျော် ထိခိုက်နစ်နာခဲ့ရသည်။

အဆိုပါ ထိခိုက်နစ်နာသူများအတွက် ရှမ်းပြည်တိုးတက်ရေးပါတီ၊ ရှမ်းပြည်တပ်မတော် (SSPP/SSA) မှ ငွေကျပ် သိန်း (၅၀၀) ကျော် တန်ဖိုးရှိ ငွေကြေးများနှင့် ဆန်အိတ်များကို ကူညီထောက်ပံ့ပေးခဲ့ကြောင်း SSPP Info ၏ မှတ်တမ်းများအရ သိရှိရသည်။

SSPP/SSA အနေဖြင့် အိမ်ခြေဦးရေနှင့် ထိခိုက်နစ်နာမှုအပေါ် မူတည်၍ အောက်ပါအတိုင်း ထောက်ပံ့ပေးအပ်ခဲ့သည် -
• ကောင်းတပ်ကျေးရွာ (အိမ်ခြေ ၂၀၀ ကျော်): ငွေကျပ် သိန်း (၂၀၀) နှင့် ဆန် (၄၀) အိတ်
• မန်ခမ်းကျေးရွာ (အိမ်ခြေ ၁၅၆): ငွေကျပ် သိန်း (၇၀)
• ပန်လုံကျေးရွာ (အိမ်ခြေ ၉၀ ကျော်): ငွေကျပ် သိန်း (၅၀) နှင့် ဆန် (၁၀) အိတ်
• ကောင်းနောင်စန့်ကျေးရွာ (အိမ်ခြေ ၁၁၀): ငွေကျပ် သိန်း (၅၀)
• စယ်ဟိုင်းကျေးရွာ (အိမ်ခြေ ၃၁): ငွေကျပ် သိန်း (၄၀)
• ပန်ထိုလင်ကျေးရွာ (အိမ်ခြေ ၃၀ ကျော်): ငွေကျပ် သိန်း (၄၀)

အထက်ပါ ထောက်ပံ့မှုများအပြင် စာရေးတန်းရပ်ကွက်မှ ကွယ်လွန်သူ အဖွားအိုတစ်ဦးအတွက် အလှူငွေ သိန်း (၁၀) နှင့် ကောင်းတပ်ကျေးရွာမှ ပြင်းထန်စွာ ဒဏ်ရာရရှိထားသည့် အသက် (၇) နှစ်အရွယ် အမျိုးသမီးငယ်လေးအတွက် ငွေကျပ် သိန်း (၁၀) ကိုလည်း ထောက်ပံ့ပေးအပ်ခဲ့သည်။ ယင်းသို့ ထောက်ပံ့မှုအားလုံးတွင် စုစုပေါင်း ငွေကျပ် သိန်း (၄၇၀) နှင့် ဆန် (၅၀) အိတ် ပါဝင်ကြောင်း SSPP Info ၏ ထုတ်ပြန်ချက်အရ သိရသည်။

SSPP/SSA အနေဖြင့် တိုင်းရင်းသားညီအစ်ကို မောင်နှမများအကြား လူမျိုး၊ ဘာသာနှင့် နိုင်ငံရေးခံယူချက်များကို မခွဲခြားဘဲ လူသားချင်းစာနာထောက်ထားမှု အခြေခံဖြင့် ကူညီပံ့ပိုးပေးလျက်ရှိပြီး၊ ပြည်သူလူထု၏ အကျိုးစီးပွားအတွက် ဆောင် ရွက်နေသည့် မည်သည့်အဖွဲ့အစည်းကိုမဆို မိတ်ဖက်များအဖြစ် အစဉ်တန်ဖိုးထားကြောင်း ထုတ်ပြန်ထားသည်။


#နမ့်ခမ်းကောင်းတပ်
#ယမ်းပေါက်ကွဲမှုကြောင့်
/SSAငွေ၅၀၀ကျော်ထောက်ပံ့

-Photo SSPP Info

အောင်ပန်းမြို့မှ ဒုရဲအုပ် နှင့် ပြည်သူ့စစ် ပူးပေါင်းပြီး ပြည်သူကို ပြန်ပေးဆွဲ ငွေညစ်ပြစ်မှုကျူးလွန်

Shan State Channel News
ဇွန်လ ၂ ရက်နေ့၊ ၂၀၂၆

ရှမ်းပြည် တောင်ပိုင်း အောင်ပန်းမြို့နယ်မှ ဒုရဲအုပ် ကိုယ်တိုင်ပါဝင်ပြီး ဌာနေပြည်သူ့စစ်နှင့် ပူးပေါင်းကာ ပြည်သူကို ပြန်ပေးဆွဲ ငွေညစ်သည့် ပြစ်မှုများ ကျူးလွန်နေကြကြောင်း သိရသည်။

အောင်ပန်းမြို့မှ မြို့မရဲစခန်း ဒုရဲအုပ် ကောင်းသူ ဆိုသည့် ရဲအရာရှိသည် PNA နှင့် ပူးပေါင်းကာ မြို့ခံ အမျိုးသားတစ်ဦးကို ပြန်ပေးဆွဲခေါ်သွားပြီး မိသားစုဝင်များထံ ငွေညစ်တောင်းဆိုခဲ့ကြောင်း စုံစမ်းသိရသည်။​

ဖြစ်စဥ်မှာ ပြီးခဲ့သည့် မေလ ၂၇ ရက်နေ့၌ ရဲအုပ်ကောင်းသူနှင့် PNA တပ်ဖွဲ့ဝင်များသည် အောင်ပန်းမြို့နေ အမျိုးသားတစ်ဦးကို ကားတစ်စီးဖြင့် ဖမ်းဆီးခေါ်ဆောင်သွားပြီး ငွေကြေးဖြင့် ပြန်လည် ရွေးစေခဲ့ကြောင်း အမည်မဖော်လိုသူ တစ်ဦးက Shan State Channel သတင်းဌာနကို ပြောသည်။​

"အဲ့ဒီအမျိုးသားနဲ့ သူစီးတဲ့ Honda Click 150 ယိုးဒယားဘီးကိုလည်း ယူသွားတာ။ လူကို ပိုက်ဆံ သိန်း ၈၀ နဲ့ ပြန်ရွေးဖို့ မိသားစုဝင်ထံ အကြောင်းကြားတယ်။ မိသားစုဝင်တွေလည်း သူတို့ တောင်းတဲ့ အတိုင်း ပိုက်ဆံကို ပေးလိုက်ကြရတယ်။ ဆိုင်ကယ်ကိုတော့ ပြန်မရဘူး" ဟု အမည်မဖော်လိုသူ တစ်ဦးက Shan State Channel သတင်းဌာနကို ပြောသည်။

ဒုရဲအုပ်ကောင်းသူဆိုသူသည် စလော့ဂိမ်းများအလွန်အကျွံကစားခြင်း၊ မူးယစ်ဆေးဝါး များ အလွန်အကျွံ သုံးစွဲခြင်း၊ မိန်းမကိစ္စ အလွန်လိုက်စားခြင်းတို့ကြောင့် ယခုကဲ့သို့ ပြန်ပေးဆွဲမှုများ လုပ်ဆောင်ခဲ့ခြင်းဖြစ်နိုင်ကြောင်း အထက်ပါ အမည်မဖော်လိုသူ ဆက်လက်ပြောပြချက်အရ သိရသည်။​

ပြန်ပေးဆွဲမှု ကျူးလွန်အပြီး ဒုရဲအုပ်ကောင်းသူ က ထွက်ပြေးသွားသော်လည်း ဇွန်လ ၁ ရက်ည ၈ နာရီဝန်းကျင်တွင် စခန်းသို့ ပြန်လည်ရောက်ရှိလာခဲ့သော်လည်း လက်ရှိအချိန်ထိ တစုံ
တရာ အရေးယူခံရခြင်းမရှိသေးကြောင်းလည်း သိရသည်။


#အောင်ပန်းမြို့
#ဒုရဲအုပ်ပြည်သူ့စစ်ပူးပေါင်း
#ပြည်သူကိုပြန်ပြေးဆွဲ

#အောင်ပန်းမြို့မ ရဲစခန်းကို တွေ့ရစဉ်။ (Citizen Photo)