Lesika la THOLE khaoha

LENA LE FATS'E U LE TS'ABE(97)
........Sehoanka a qahamisa litsebe a ikotla li pokotho a netefatsa bohloki a re:monna ke ile ka li busetsa ho meleko eane, ne ke batla le ha e ka lla e lle ho bona ba le tlase koana ho banna bane ba borona ba hataneng holimo.

Leluma a re;he banna!ba lo letsetsa bo Mphaufele hona joale ba ba joetse ka rona.....ho re banna ba khotlile mariba, ha ho ea ka kenang mokoting e bile re ea tla ho bona. Ache banna mona teng re e hlothetse sefing.

Ka bona ho re banna bana e hlile ba utloile bohloko hoo e kang ba ka itabanya fats'e mona. Emong a leba morao a nto re;he banna!, ha re folofeleng leraha pele mets a epsha re a talimile. Re hloka ho ea lata bane ba bang re nke mehala eno re letsetse bahlankana bana hona joale.

Ha ba fihla ba nka mehala ba Tobe letsa bo mphaufele ea kena e sa hane mehala..motho a araba. Hoa hla hoa a raba ena Mphaufele a re;he banna ke letseba ka bolehe lona, *a tjekeletsa ka mahlapa a hlanolang letlalo* ha u bone ha le hlotsoe ho nka li qeto ka bashana ba ha ho rona. Se keng la etsa letho ho bano ba setseng, tlohong koano ho rona le tlo e tsa ka moo le batlang re tsoe re le ruta motloang oa p**a.

Banna bana ba heso ba arabella thateng, emong a re ; holokile re ea tla ho lona mono, re ea ba tlohella bana. Ha ntle re hloka lona le tlo re fa banna bane beo le ba ko entseng. Ke hona le tlo ba hlatsa.

Ba nyahlatsa mehala ena ba e busetsa ho beng ba eona, joale ba thetha matsapa a bona fats'e joale ba kenya mehlare ea nku thekeng, ba li qhaneha, ba kena tseleng pelo li sothehile mehopolo e le moo ho uooang teng.

Re ile ra sa la re lisitse poso haholo re fokola boholo bo liketse mpeng ea le fats'e hoba 'nete ke ho re mosebetsi ona o hlokeha o 'ne o tsoele pele.

E se e le khale banna bana ba tlohile, e ka re tla tloahela ho re ba se ba ile. Re qhanollotse likobo re li katetse re li lutsi holimo.

Ke ile ka hopola ho re ke lo hloela banna bane ba theohileng ke be ke khutle. Ka thola banna ba heso meriri e innoe metsing ho tlola liphororo ho theoha marameng, phaka li khelelletse li satalletse methapo ho luma mechini e sefang mobu, ka nqena motho o hlokohla a hlokola mobu o arohe lejoeng.

Ba mponts'a mosebetsi o neng ba se ba o entse, ka nyoloha ke khothetse ke bile ke re ke lo joetsa banna bane be ke ba sihileng ka holimo ho re khoiti tsa mokoti li fofonela lihoete le ka lefifi...a se khora ke tlaka le ea raha, ha khoeli ena e fela re tlo kenya seporo ho leba Lesotho.

Ka re bito ka holimo, ke khile ka lebonyo le bolaeang likhama, ka utloa ke hata seretse fats'e ka isa mahlo hang.....

Khaolo ke ea mashome a robong le metso e robeli e hlahlamang.

Lena le fats'e u le ts'abe.

LENA LE FATS'E U LE TS'ABE(95)
....Ka 'nete ke kopa le re ts'oareleng bo ntate rona ha re tsebe letho, re libone li ntho tsena ha li etsahala re ne re sena ho ka thiba batho ba baholo ho rona ha ba e tsa ketso tsena.

Emong oa likhami a hula ntho thekeng, a re: haee!.

Ba shebana mahlo a tletse li khalase, motho a pulufetse sefahleho e ka masumu oa lithako.motho o loana le pelo ea hae, o tutlana le maikutlo ka nqa engoe. Pelo e re tabola naha u lo oa moo ho senang le ea ka u tholang. Ha maikutlo le ona a re... Khomosha ha le se le beile thulusi ka ntle e be ho felile, ha ho na le thuso ea ho isa liatla holimo u kopa mohau.

Hoa khotsa e mong a re hela lona:hamba!,

Ba otla fats'e ka mangole matsoho ba a bopile a ntse a le ka morao, emong a kopa ts'oarelo a itlama ka ho re o tla fana ka motho emong le emong eoo ba mobatlang.

Emong oa likhami tsena a atamela a beile koae lehlakoreng la molomo mosi ona o foqoha hasesane ho nyoloha ka lerama,, a buoa a ntse a kobile leihlo joalo, a fihla a nka thupa-mpe ena ho e mong, a e khamolla malokobe a nto re:he banna felang ka pela mahlo a rona hona joale joale,,, ke le balla hararo fela, ha ntse le re Naka naka haufinyana mona ke le romella linotsi tsa semana li le senye ts'obotsi.

A hula thipa pokothong, a potela ka morao ho bona a fihla a ba ngoapa hampe fela moo a fasollang mehala eneng e ba tlamme,a raha emong ka seeta li lula tsena a ba a oa ka lifuba. Ha a phahama moo,,,a tseremala e ka hoja o oa butsoeloa ho kena hlatheng.

Emong oa likhami a re he banna, ho nkhang joale...he monna Leluma, sheba seeteng.. sa be se hakile khoampha-hali ea lethete lehlakoreng mona. Ke eoo a e hatileng nakong eoo a potileng ka morao a lokolla banna bana a re ba itjebe ka sekaja ba felloe...ho bonahala emong bolokoe bo ne bo se bo monyotse ka maqaqailana.

Leluma o ile a utloa bohloko bo mali ha a nahana ho re joale o se a lokela ho ea hlatsoa ka la hae letsoho joale. A re ho ja o hatile tjena e be banna bana ba rongoetsoe tsaeta ho ne ho tla be ho le betere haholo.

Ba lula fats'e banna ba mahonyopo lifahleho, joale hoa taboloa letlapa ho raloa 'mpa oa ntoa. Ha lephirima ho kenoa tseleng ho ts'ets'ethoa tse metako ea mali a batho. Pele ba phahama Leluma a botsa Sehoanka a moshebile ka mahlo a maketseng a re:monna mehala ela e kae hle re ikhakanye ka eona re letsetse bo Mphaufele.

Sehoanka a qahamisa litsebe a ikotla li pokotho a netefatsa bohloki a re:monna ke ile ka li busetsa ho meleko eane, ne ke batla le ha e ka lla e lle ho bona ba le tlase koana ho banna bane ba borona ba hataneng holimo.

Leluma a re;he banna!ba lo letsetsa bo Mphaufele hona joale ba ba joetse ka rona...

Khaolo ke ea mashome a robong le metso e supileng e hlahlamang.

Lena le fats'e u le ts'abe.

LENA LE FATS'E U LE TS'ABE(95)
..... Oa h**eng a re: bo ntate taba ena ea ho re le timme mehala ka bo eona e se e phetletse mohatla oa nku masholu. Ba ntse ba re tehela mehala empa joale se makatsang ho bona ke ho re mehala eohle ha e kene.taba eoo fela ke eona e ba semang litlhokonyana......

Ba hulela moea ka hare lipounama li sesefetse, eaka ba tla nyahlatsa ntho tseo ba li fupereng.Ba talimana ka mahlo a nyatsanang ba khotsa a bothathalasi. Ba khorhela mehala e neng ba e sunya lenala ba e honametse ka mahlo.

Hoa hlaha melaetsa e botsang na ba ho kae, na ba se ba fihlile na, lijo na ba reketsoe tsa ho menya khoeli kapa ke bohashana ba ho nyaea ts'otsoa li pounameng fela.

Hoa hla hoa araba bona banna bana ba likhami.le hona ba araba ka ho tata hohle. Emong a re:li teng bo ntate, se re le ka tlase, na le ea fihla lona tje?

Ke ho potlaka, emong ka nqane ena a re;bo ntate potlakang re tlo kenang fats'e, letle le s**ile ka moo, banna bana ha ba re rekela lijo ho hang.

Ba tlo hlokomela ha ba qeta ho li beha fats'e ho re joale mona ba kokositse ka moratheng. Ba talimana hape ba bona ho re joale tjena ba lokela ho phahama mona ba e late letailana. Ba nka ba babeli ba bana ba litleneng, ba tsamaea le bona ba hahlaula ka maoto.

Tseleng mona ba re:he banna!, re hloka le re joetseng na banna ba ha bo rona ba qetuoe ke bo mang. Ha e ba ka hara rona mona ho na le ea ntseng a le hlabele phieo hle le anyeng e le hona joale matsete ana pele pelo tsa rona li suoela phateng tse lesoe.

Banna bana ba hla ba bona fela ho re tsela ena e lebisa mane moo ba neng ba li hela batho teng. Ba qala ba tona mahlo, ba batla ho hulana joalo ka nyalasi ea lelinyane e hana ho ea naheng.

Likhami tse maloro a thata tsena tsa re:he banna! re hloka fela le re joetse 'nnete, le refe seo re se hlokang le tsebe ho itsamaela.

Emong oa ba litleneng a re: bontate ka'nete rona re ne re le teng empa a se rona ba entseng joalo, ke bona bo abuti Mphaufele le ba bang. Rona re ne re le teng ka litopo fela le maikutlo a rona ho ne ho se moo a kenang ho banna bano.

Ba atamela selomong sa ne se sebehali, moo ho lahletsoeng batho ba bangata fela. Ha ba fihla ho sona emong oa likhami a re: banna re ea lumela le buile 'nete, le rona re ea le kholoa banna. Re ea le lokolla banna tsoahang le mona he,,, ka lebelo banna. (bacho joalo ba ba supisa ha ntle selomong mane).

Bashana bana ba shebana meokho ea tsurutla, motho a re;bo ntate ke siea lelapa laka le mosali oaka le ngoana e monyane a sotsoe le ka lehlakeng. Ka 'nete ke kopa le re ts'oareleng bo ntate rona ha re tsebe letho, re libone li ntho tsena ha li etsahala re ne re sena ho ka thiba batho ba baholo ho rona ha ba e tsa ketso tsena.

Emong oa likhami a hula ntho thekeng, a re:

Khaolo ke ea mashome a robong a metso e mets'eletseng e hlahlamang.

Lena le fats'e u le ts'abe.

LENA LE FATS'E U LE TS'ABE(94)
........Ba re ba khutle hang hang mokoti ha o sa sebetsa. Ba leka ho rapela sekhooa ba kopa ka tiho, eaba banna bana ba hoapile mahlo ba re ha ho ntho eoo le tlang ho e thola mona. Ha eba le batla ho kena mokoting, re hloka le refe ho re na Mphaufele o ho kae, le ho re na re ka mothola joang. Le be le re joetse ho re na ke mang a bolaileng Saole le motsekisa eng......

Ba ile ba koba li hloho, ba themelekana, ba hoerehana ho se karabo. Le bona ba bona ho re e hlile ba se ba le ka hare ho lemena la litau joale, 'me ho hlakile ho re ke emong kapa bohle ba tlang ho fetoha sehlabelo ka jeno.

Banna bana ba heso ba nna ba khoaqatsa lifahleho hoa fineha li lelu. Ba e pheta hape taba ena khetlong lena e se e akha ka hare mantsoe a boimanyana.

Ba lits'oela li hehla li le joang. Ba qala ka ho bolela ho re na motho ea neng a fane ka abuti oa Liau khale koana ke mang. Le ea faneng ka Saule ha a ne a rongoe hae ho isa chelete, le a mobolaileng. Le ho re na ba ka fumaneha ho kae.

Ho ne ho se ho hlakile ho re ba se ba arahane ho ba bona ba ne ba se ba le mokoting o mong theko koana. Ho utloahetseng o ntse o ikarabella ho ba bang ba mapolesa, le ho ja e se bana ba rona. Batho bana ha ba tsoa mokoting ona ba ilo kena ho o mong, ba ja ka mehlare e 'meli.

Hoa utloahala ho re ba bang ke ho na ba qetelang ba tlotla ha moraonyana. Ka nepo ba ne ba tlo fihla rona re se re tsamaile ho ba nako ea rona e se e felile. Empa ra ba emela re bile re theohela re sa ema fela.

Ha 'na ha kena methoaela e mona e huloang ka nko fela ho ea koana le koana,le ho kena litlolong tsa molao. Empa setsomi le nakeli se ea e nka ha fela se e so ts'oase. Ba nna ba folleloa letotong ba emelana ho se ho sena puisano le bane ba salletseng morao.

Banna bana ba heso ba ile ba nka mehala ea thekeng ea ban ba seng ba le teng, ba e ts'oara ba e tima ka ofela. Ache!, hoa fihla nako eane eoo ho seng ho sena ba kenang hohang. Ba makala haholo ba ba ba nahana ho re e se be ho na le ea ntseng a nts'a mosi ka lengope hara bona mona, ba mpa ba makatsoa ke ho re na joang ho ba mehala eohle e tingoe.

E se e le khale joale ho letiloe ka thata ha holo,, ho ntse ho se nko e tsoang lemina. Oa h**eng a re: bo ntate taba ena ea ho re le timme mehala ka bo eona e se e phetletse mohatla oa nku masholu. Ba ntse ba re tehela mehala empa joale se makatsang ho bona ke ho re mehala eohle ha e kene.taba eoo fela ke eona e ba semang litlhokonyana.

Khaolo ke ea mashome a robong le metsi e mehlano e hlahlamang.

Lena le fats'e u le ts'abe.

LENA LE FATS'E U LE TS'ABE(93)
....Le ntse le anyesoa e le koalata bo ntate ha ho ntse ho thoe khauta e ipatile pakeng tsa majoe, makhomosha ana a nyoloha e tlotsitse 'mele ba e hlatsoa ha ba fihla sakeng la litau koana....

Ba "muso ba fetlamela holimo, ba ipotsa ho re na ebe khauta e monyohile joang liatleng tsa bona empa ba s**ile mekoallo ba re ba lisitse ka leihlo le fetang la 'mesa mohloane.

Ba tsoela pele ba re:ha le ke keng la re nehela seo re se hlokang ache bontate le rona re lokela ho khiba joalo ka ba moreneng, re ts'oehlele joalo ka koenyana e qalang ho anya. Lona re le seng re e sebetse sekhomosha re bana ba Moshoeshoe re ea tsebana na re ka thibana ho kae moo re tlang ho utloa ka pele.

Ba 'muso ba lumellana le ena ba oma ka lihloho..ba bobothetse lifahleho. Motho a lumela a bile e ka o tla ronta a ba nna a rahe sehlahla ha sesanyane-nyana.

Hoa buoa emong oa 'muso a lelekela ho fera litaba tsa 'moka ono ena a re;banna le tla thola ntho eoo le e batlang se khathatseheng,e tla re bo oela fats'e re tla be re fane ka lintlha li felletse. Re ea tsamaea banna beso, re se re tlo hlahella hasesane haholo ho tloha hona joale, re tlo lula re tonne leihlo le tsebe tsa rona li le fats'e ho utloela hoohle ho ka re hlahang tsome. Monna Liau re tla ts'epela ho uena ka hohle, ha hona le manyofonyofo u tle u re bitse re tla tla ka ho potlaka.

Ha ba cho joalo ba qhomela sepalangoang sa bona ba betseha. Ea ba baile.

Hoaka hoa khutsa ha sesane pele, ho se ea buoang, ka ofela re iname re ntse re thuisa taba ena ea likhami tsena, motho a bona ka mahlo a moea ho re mona teng e se e le ha e fankha.

Banna bana ba re ho rona re boele mokoting ha bona ba tla sa la ba laola boemo ka holimo,ba supa ha nna ke lokela ho sa la ke tle ke tsebe maemo na ke a feng e sa le ka nako.

Ba theoha maoto a le boima bahlankana empa pelo li thabetse khauta, ho mpa ho hana 'mele fela.

Hoa fihla banna ba tlang ho re ephola, le hona ba fihla ba nkha kokosi tse mona tsa bo "follow me", likipa ba apere tsa bo UZZI le bo Ellese lipoti ba hlomme tsa bo Nike, maotong ba roetse li eta tse hlaisitseng maqaqailana.

Ha ba fihla fela banna bana ba ba beha seatla ba re ba ithipote joalo ka batho.. Ba qamakana ba themelakana, ha ho ea nang le karabo.

Ba re ba khutle hang hang mokoti ha o sa sebetsa. Ba leka ho rapela sekhooa ba kopa ka tiho, eaba banna bana ba hoapile mahlo ba re ha ho ntho eoo le tlang ho e thola mona. Ha eba le batla ho kena mokoting, re hloka le refe ho re na Mphaufele o ho kae, le ho re na re ka mothola joang. Le be le re joetse ho re na ke mang a bolaileng Saole le motsekisa eng.

Khaolo ke ea mashome a robong le metso e mene e hlahlamang.

Lena le fats'e u le ts'abe.

LENA LE FATS'E U LE TS'ABE(92)
........A tsoela pele motho eane a re; re tlo ruta banna bana puoo eoo ba tlang ho e ts'oara ka eona khoeli ena fela, re tla qala pele ka ea ho kena mona. Ha motho a palloa re moromela 'tsaeta' (masihloane).......

Khoeli e ile ea fela puoo e sentse e kena lelemeng. Bashana ba haeso khotso e ile ea khutlela ho bona hape, joale hoa theoheloa.

Ha nako ea rona e fela, ra nyoloha li k'hoehla li re imetse mahetla. Hloho li le putsoa nts'i li roalelletse lerole motho a hlaha e ka tali e tsoa ka phofong.

Ha ba fihla ka holimo, ba kopana le rona re se re eme lipasha re ena le banna bana ba likhami tse robileng maloro batho ba ikamohileng libopeho. Ba fihla ba re shatata joale ba leotsa litsebe tsa e ba lethoethoe.

Mong a qala a re:banna beso mokoti ona ke ea rona, ha ho sa tla ba le nthoena ea ho fetolana le bana ba ikentseng bo khoale ntlhajana. E ne e le ha ba qetela ka eno eoo ba e phephileng ha ba tloha mona. Re se re ba file melaetsa ho re sekhooa se hlamane, ha e ba ba batla ho tla inoesa ka mpotjoana ba ka nna ba atamela. Fela ba tsebe ho re ho ea morao ho kanna ha e ba tlhorong ea thaba.

Ka kitiletsa thabong mona moo ke teng, ka utloa ke le morolo ke itumela ka banna bana. Ka sheba mehaeso ka bona e ntse e otla ka lihloho hlathe li lelekisa tsebe.

A tsoela pele a re: ba ne ba le entse koala tsa ho phumuloa mekokotlo mona ba le hloa ho limo ba le theoha ka leshano, bona mahabo bona koana ba tsejoa e le liberekane, ha lona le tsejoa le le mehulana ntlheng. Banna bano ba ne ba fetotse le bana ba 'muso bo tsipasehole, ba ba roka a naketsana ka eoo baneng ba bafa eona e ka hoja le fats'e le ba timme ba le kokotela bosiu le mots'eare.

Ka qekotsa emong ea neng a emelletse pelenyana mane,, ka bona a leletse a hutsi linko tsena a finne selelu eka phoko ka nako ea monehelo. Ka bona ho re lebona e hlile ke hona ho apohang lesira, joale ba bona ho re e sa le e le lithotho tsa ho shoa le 'moko.

Ba tsoela pele ka taba tsa bona, khetlong lena a fetoha a sheba ka ho ba 'muso a teteantse nyao lentsoe e le le bolatsi,,, a re;bo ntate ha le ke keng la re akhella koakoa lerumo le thebe ka 'nete re tlo hloloa ho thibella khauta ha etsoa pakeng tsa menoana, eea le metsi ho likela mehohlong. Le ntse le anyesoa e le koalata bo ntate ha ho ntse ho thoe khauta e ipatile pakeng tsa majoe, makhomosha ana a nyoloha e tlotsitse 'mele ba e hlatsoa ha ba fihla sakeng la litau koana.

Khaolo ke ea mashome a robong le metso e meraro e hlahlamang.

Lena le fats'e u le ts'abe

LENA LE FATS'E U LE TS'ABE(91)
....Re mpa re tla hloka fela ho re ho se be le mohlang chelete e bang siko hoba ho ts'oaroa teng re ntse re tla ts'oaroa, empa ha ke batle le ha re ka robaletsa litlamong le ha ele letsatsi le le leng fela.....

Ka oma ka hloho khotso e le e nyanyabetsang le methapo ea thabo. Hlathe e le e koba-kobisang tsebe, ka pelong ke re khetlong lena masepa a tlilo imela banyeli...tang-tang e tlilo khangoa ke lerole la eona.

Ra arohana ha mekhotlo ena e kena hlatheng e qobokisa liselo. 'Na ka kena ke se ke tantietse mangole ke phesha ka ropo ho leba tlase banneng ba melaka ea lerole la mokoti.moo ho seng moea o fokang o phutlela.

Ka theoha ke apere khotso ho se sekoli ha ke hopola banna bana ba heso batho ba apereng ntoa. Ka bona ho re joale ke hona ha re tlilo sunya peke mobung.

Ka mora khoeli e fele, ba ile ba fihla banna bane ba heso, ba fihla ba se ba le mekhoelebe, linko li le poko ba fihla ba re;he monna Liau, mokoti ona e se e le oa rona ha hona ea tlang ho kena mona. U ka mpane oa bitsa ba bang ho tloha hae koana ho tla lopolla bana ba keneng. Bohle ba tlang ho kena mona ba se ba tla kena ka litaelo tsa rona.

Ka beha monoana tlasa selelu ka beha mahlo nqaelengoe, ka kopanya malepa ka ho panya ha nts'i ka nto bobothela ka re: Banna letsoa kae e leng hona le hlahang ka nako ee khomo li se li soebehlile mohoang tje!.

Ba araba ba koentse telu, ba re: Liau monnaeso moo ba u hlabileng teng re ka se tlo hloma e ka ha ho oa etsahala letho. Empa re re ba ka se phete ba kena mona, ba ka se phete ba u bata lena le sa ts'eloeng ke nta hape.

Ka khotsetsa tlase ke khotsa ka thabo ka re;hmmk le reng na banna!, le re hle re nke mokoti oo ebe oa rona!.

Emong a re:ha ho sa tla ba le motho ea tlang mona a re o oa tipa. Ntle le haeba monna Liau u tihisa ho re ba nne batle uena u tla re khaketsa le ha le ntse le sa theohele... moo a se lebote re ka itholela tu.

Ke ile ka bona li tla li le lerotho morao mane, ka bona ho re ha nkeng ka phahamela lepoqo lena ke tlilo ba tlasa lieta tsa bahlankana ba metse emeng. Ka oma ka hloho ka re joale banna le ea buoa. Empa re tlo etsang joang ho re batho baa se kene koano hape?

Hoa araba emong a re; monna oa heso mona ha hona li heke, empa re tlo kena ka pasa. Ea senang eona ha a kene koano.

Ka batla ke eba litsebe ho re na joale lipasa eeare re sena tsona bohle ebe joale ho tlo sebetsoa joang.

A tsoela pele motho eane a re; re tlo ruta banna bana puoo eoo ba tlang ho e ts'oara ka eona khoeli ena fela, re tla qala pele ka ea ho kena mona. Ha motho a palloa re moromela 'tsaeta' (masihloane).

Khaolo ke ea mashome a robong le metso e 'meli e hlahlamang.

Lena le fats'e u le ts'abe.

Lesika la thole khaoha.

E reng ke le hlabolle hanyane.
..Ka kena ka koala lemati,ka bona ho se le berebere lemating mona. Nxah! ka qhoaholla lebanta, ka bo beha mangoleng motho big Q,ka nanabela pampits'ana ena e solang mamphemphe. ka e koetla ka letsoho joale se ke lutsi ho sa 'ntepisi se senang lerapo' ke se ke e metse molaetsa oa ho tloha male g koana ho ea fihla nts'ing tsa botheleha lethete.

Ka kokomosa,ka kokomosa ha ho nko hotsoa lemina,fela ke ea utloa ho re mona teng tau e matha ka sekoja. Ka nahana kapele h**e he banna!serao sena sets'aba fela mophats'imo oona oa phaposi ena,e tsoe ha se ea tloahela ho siea ntho ka metsing ka 'nete,ha ntle se nka ho e tsa joalo e le bohlasoa.

Ka hloesetsa maoto holimo m***a moo ho pharamang li lula teng.sa tsaleha fela sa re! joale sa e tsa ntho eoo se e tloaetseng. Ka hula moea ka atolosa likhopo,ka khotlanya nyao ka mena phatla...
..Ka honyetsa likhopo,ka thaetha senna..ka utloa hotla ntho morao maane e tla buuutle,ka ba ka mathisa leleme molomong m***a,ka khothala khilik!...banna!hoa ea hoa lengoa matsieng.

Hoa theleha ntho e lengoe feela e phelang,ea re phara! metsi ana a ba a nshapa lirao tsena. Ho tloha moo ke itse ka re ho kokomosa ea ba tu!. Nxah,,aee! ka phahama ka hetla nthoaka, ka bona e khenne fela e ka seqo setsoa hanong la pokola. Ka sola marao Dimo ka lahla bohlasoa ka sotha lenakana le lokolla metsi..helek! hoa theooa a lumang joalo ka a khohloana tsa haeso koana, a bilika joalo ka a koetsa, le hona ana a hula ntho a e liketsa mokoting koana.

Ka itukisa msha ho thoeng Dimo,ka lokoletsa lebanta,ka otlolla baki eaka e boputsoa ba leeba,ka sisinya thae eaka,ka otlolla borikhoe lipokothong ka seatla, e ka ke ea bo hlohlora tjena.

Ka khutlisa mahlo ho netefatsa maemo pele ke tsoa monyako,,,leihlo la tla le qekolitse ho kang ho oele ka metsing ka maane.

Ka iphathatha lipokotho ke re e se ke ea ba semamina saka ke sona se oeleng,ka thola sentse se leteng e bile ntse se mennoe ka makhethe.

Ka hata leoto le le leng ka hoolla molala ka nyarela...he banna!!thepa eane ea wasco e sihelletse lehlaba lena morao. Ka khorohela lenakana lane hape ka bulela manyabolo,a etsa lerata lane lekang la khohloana,aooo....molimo! nthoane ea inama feela khohloana ena ea tlola holimo. Ka bona joale e sesa joalo ka sona seqo ha ntle.

Ka qamaka,ke sheba ho re na nka khotla-khotla kang ke rahase thepa ena ke tsoe ke e neha metsi ana a mathe ka eona ho e liketsa mokiting koana.ka bona hose letho pelaka,ntle lefono eaka le lebanta la borikhoe.

Nxha,,,ka qala ka ferekana joale. kapa nthoe ke etlame ka lebanta lee ke e betsetse ntle koa joalo ka letjeketjane!,kapa ke e nts'e ka moo ke e hate ka serethe see sa seeta ke e busetse ka moo e le lipherera ke e mule ka metsi aa a wasco hape!...kapa ke e tse joang na??

Ka e pheta ka amang hape metsi,molimo! ea koiliata fela nthoane ea khutla hape,ka bona e khutla e ntse ele joalo ho se le moo e khephohileng,,,,,

Kore tseba le motho a nkoang ke noka, e hle e mohlobolisi litloha feela...ka 'nete hoona hona ke linehelloa, ho ikhutlela ho le joalo feela,ho sa khephooa ho sena letho.hmmk!!

Moo ke ntseng ke loha mano,banna! ka utloa lets'eo le tlang le le ile honna mona. La a tamela monyako, ka utloa ho re ka la bo ausi. E mong a leka ho sututsa lemati a utloa le le thata,ke se ke le raile ka nko ea seeta moshana Big Q.

Emong a re:motho o teng ka mona, eaba ba ema hona monyako mona. Ka potlaka ka lata lenakana lane ka e leleka hape ka manyabolo,ka bona e honyela ka hlohong feela e bile e khutla, ka cho ka re metsi a na a wasco a leonya, ho ja e ne e le a haeso koana,a ka be a e joatlantse le mabota a e pomme thekeng m***a.
🙆‍♂️🙆‍♂️🙆‍♂️

Ke mang a ka tsebang pale eee??? Ke mofa moea oa 20.

Lesika la thole khaoha...

Watch the space....ke ne ke le mmokeng le Nkhono Makoenahali(mali a borena).

Molimo a etse Lesotho le Basotho ha ntle. Ke ea lerata.

Ho na le movie o tseleng hona joale...'me ke re itlhopheleng ho tla li tlholisanong tsa ho ba ka pela camera. Ke tla le joetsa letsatsi, nako le sebaka ho re na li tla ts'oareloa ho kae.

Hape ho na le thupelo ea ho qetela e tlang ho ts'oaroa haufinyana e le e etellang litlholisano pele. Ho kenoa fela ka 50 ranta motho ka mong,,, ho tseba mang, u ka nna ua fetola bophelo ba hau ka 50 ranta eno fela.

Ke kopa letleng ka bongata. Ntsoareng ka theko nako eohle bakeng sa lintlha tse ling. Lingoloa li ngata haholo tse hlokang fela batho ba li bapalang.

LENA LE FATS'E U LE TS'ABE(91)
.....Nkhono a re:hula marikhoe o tsamae u lo likela koana mohlabaneng u sa hetle, u fihle u its'ihlolle ha u qeta o a roake u a ts'ele ka mathe u a joetse a se ke be a u sala morao, le ha e le ka lephoka fela. Ha u ba qelele le ona o a otle ka majoe u a joetse a lo phara ba ntseng ba re ke nna ea bolaileng nna ha ke se boali. Tsamaea!....

Ka tsoa ke hoshola ho ea likela ka theteng ka koana, ka fihla ka hata ho lima lipotongoane, ka thaetha h***e bohlo-bohlo-bohlo,,, ka nyoloha se ntse ke roakana ka tse fetang tsa motho a li sang li tonki. Ha ke le moraonyana mane ka a kunketsa ka lipitla ke a otla a be a hasane.

Ha ke hlahella le hae, ke bone e ka ho ja ke matsatsi a keresemese motseng ho tletse batho bana ba bapala hohle ho bile ho le lerata. Ke ile ka itsipa hanyane ke re ke utloe na e fela e le nna na, le ho re na ke hlile ke utloa ha ntle lerata lee, ke bona ha ntle batho baa.

Ka utloa ka motho ea nhoelehetsang, ka fetlama ha nyane ke bososetse,,, ke ea utloa ho re e fela e hlile e le nna. Ke araba ka bo its'epo, motho o oa mpotsa na ke tsoa kae. Ka hetla morao ka sheba ho re na e be motho eoo o mpone ha ke ea koa, na e be nka re ke tsoa theteng...kapa ke tla re ke tsoa kae. Ka araba ke sotheha joalo ka ngoana ea sebieng ka re;ntse ke le teng ne ke re ke otlolle maoto hanyane.

Ka bona ho re nkhono o ne a nkoetse mahlo ka bomo, le ho re ne ke se motho ho hang ho tloha mona ho likela bolikela.

Ha ke fihla a re ho 'na:ngoanaka ha ho motho ea ka u bolaeang ke ntse ke phela. Ha ho se ka u hlahelang se sebe ke le teng mona.

Ka ona ka hloho joale ka tsoa monyako ka lo bapala le thakatsaka.

Monna Liau, nkhono eoo oaka o ntse a phela monna. Ho ka se be le se re sokolisang ha ho se ho thoe motho o hlola matsoho, re tlilo molata ka ea mmooane.ke ne ke tla nka ba nna bana ba heso re ke re lo hloela Nkhono, empa joale ke ee ke bone ho re phaka tsa bone li se ntse li tlangoe, 'me ho ea supa ho re e hlile le bona ba entsoe joalo fela ka 'na. Ka hona se re s**i ka menyepetsi ha re ea ntoeng ngoana monna, ke ea rona melatsoa phokojoe e ka se re timelle le ha ho ka ba ha thoe re e lata ka khitla hoo motho a sa boneng le monoana oa hae.

Re mpa re tla hloka fela ho re ho se be le mohlang chelete e bang siko hoba ho ts'oaroa teng re ntse re tla ts'oaroa, empa ha ke batle le ha re ka robaletsa litlamong le ha ele letsatsi le le leng fela.

Khaolo ke mashome a robong le metso e 'meli e hlahlamang.

Lena le fats'e u le ts'abe.

LENA LE FATS'E U LE TS'ABE(90)
.....Boo phahame mona o tsoe ka tlung ka mona ke sa le ke le mong ha nyane, u batlile u shoa uena ngoana tooe.....

Ke ile ka tsoa ke fafohile mats'oafo ana, ka bona le ha ke theoha "setupung" mona e ka ke tloha ke oela, ke bona ho le hole hona hoo moo ke lokelang ho ea hata teng. Ha leoto le fihla ka ba ka utloa e ka ke itomme. Ka qamaka ka bona ho itse ngoelele, bana ke bane mane ba ipapalla ba sa natse motho ba inametse seo ba se etsang, letsatsi ke la lenyeta, holla lerutle le bitsoang letoai-toai.

Ka potela ka lethule la ntlo ka leba sakeng. Kojoana eneng ke e apere ena ka utloe e ka ke likhoele fela kobo ha e sa leeo. Ka fihla ka otla ka matsoho sakeng mona ke a kentse ka kobong ka nyarela ka sakeng. Namane ke eane ho elella hukung ea lesaka mane, ho latela tsela eoo e tepelletse ka eona fela ka bona ho re enale ka tlase ho matsatsi a mararo e hlehile. lintsintsi tsena li e homaretse hohle mona, li tsamaea li kena ka linkong ka mona, li bile li kena le ka mahlong e ntse e sisinyeha hanyane fela.

Ka qala ka touta ho re na e be nkhono e kile ea e ba ngaka neng, ha eka ha a na le lifaha tje. E bile o buoa ha ntle joalo ka motho ea tsebang taba tsa hae. Ebe ho ja ha a ka a omana ka motho eoo oa habo rona ke ne ke tlo tsebella kae ho re o tlilo sebetsa lebitla leo la hae, e le ho re ne ke le ea shoeleng ho ja ka apa taba ee pinyane sefubeng.hmmmk!, ka re;ntate molimo na e ne e se le ha ke tlo siea le fats'e lee ke ikela boea batho, ke so be le ha e se e le ngoana ea mong fela...

Lithoele... Lithoele!

Ke utloile e ka ke thungoa ka se thunya sane,, ke ile ka otloa ke letsoalo le nkhaolang mohao ona, ka nyamela fats'e ka ho potlaka...ke hutsi moea e bile e ka ke petle-petleletse joalo ka motho ea setluioeng ka molamo mokokotlong.

Nkhono a re:Lithoele keng uena, tloho re tlo qetela.

Ke ile ka buoa lentsoe le hana ho tsoa ka re;nnnkhhhhono, ke 'na eoo ke eatla. A ba furalla a potela ka tlung. Ka kokoloha butle ke ntse ke utloa letsoalo lena le ntutla ha bohloko le matha ka mokokotlo ho ea likela mohatleng mane. Ka phahama ka otloloha, ka qamaka ka bona ho ntse ho itsoe ngoelele ho se le moneketsane fela.

Ka kena ka tlung ke se ke le mobabi ke sa tsebe na ho hana kae, ka fihla nkhono a se a lokisitse metsi a ka tlalang sekotlolo sa sheleng. A re ke phothule 'mele ka ona, ka metsing ka mona ke mali a khoho le kilana ea eona, ho tsoakuoe le sepakha le khala la bafu. Hang ha ke qeta fela a kena honna hape ka lehare. Ha a ntse a phatsa mona o ntse a re;ho robale tse angoeng ke liatla tsaka, ha litsohele ba ntseng ba bapalla mabitleng ba ba sa nka senifi, tlohelang ngoanaka a phele.

Mona moo ke teng lenna ka ikutloa morolo, ke se ke bopile fela e bile ke ikutloa e ka re ke poho ke kokomohile.

Nkhono a re:hula marikhoe o tsamae u lo likela koana mohlabaneng u sa hetle, u fihle u its'ihlolle ha u qeta o a roake u a ts'ele ka mathe u a joetse a se ke be a u sala morao, le ha e le ka lephoka fela. Ha u ba qelele le ona o a otle ka majoe u a joetse a lo phara ba ntseng ba re ke nna ea bolaileng nna ha ke se boali. Tsamaea!

Khaolo ke ea mashome a robong le motso o le mong e hlahlamang.

Lena le fats'e u le ts'abe.

LENA LE FATS'E U LE TS'ABE(89)
........Ha ke hloke letho la bana bano hle, ke hloka ho lo sebetsa lebitleng mono fela u tla bona ha ho bola batho.

Ha acho joalo a be a phahama a hlohlora kojoana ea hae joale a etsoa monyako......ka phahamisa hloho, ka sola menyepetsi hang, ka nanya ka mora hae ke batla ho bona na o e tsang. A totoba ho ea kena ka ntlong engoe a khutla ka ts'oere meriana e 'meli e le li thupa, a re ke hakonose metsi ke tlo hlapa 'mele.

A re ke hlobole tsohle, ke eme hara ntlo ke tutubale ke mamele ena ha a ntse a nts'oara ke seke ka e tsa letho, ke se ke ka buoa letho.

Nkhono a atametsa lenyetana joale a tolisa 'mele oohle ke le ka lenyetaneng. Ha a qetile a re ke bule mahlo, a tula moriana o mong oa eba phofshoana, a fihla a mphatsa linotsoko tsohle ho ea tsoa ka maoto a re:ngoana teronko ho tloha ka jeno u e k'hoefe ka mathe ha u sa tla e bona ho hang, ha hona motho ea ka u ts'oarang ke ntse ke phela ua ba ua fihla teronkong. Ke bohloko ke ho re oile teronkong ke kula ke sa atlehe ho ts'oara lithebere tsaka.

He banna!, ka sa la ke maketse fela ho ba ke ne ke sa tsebe a sebelisa li thupa ka thata haholo. Empa he, ka re ke le behe phatleng ke thehe mekhanya.ke bohe ngoale ha e khiba.

Ha a qeta ho mpeha matsoho ke ile ka lula le ena fats'e ka nya matsete le hona ka a nya a le loso, ka li theoha meleka ka lihehla joalo ka ngoana a nyantseng ts'oene. Ka re;Nkhono ke ea tseba metsi a bobebe ho feta mali. Se o ke tlang ho u joetsa sona ke lekunutu le kang re ka be re koetse monyako mona li se phonyohe le ka sobana la nale.

A hula mahlo a nqekotsa e ka o oa nkutsoa a re;haebo! u reng joale, ha ko tle le tsona re utloe.

Ka moqoqela ho tloha ha re kena ntloana ts'oana, re kena re fetola mabitso re se re bitsoa ka a kobong tse thokoa le mesamong e lahlileng mmala, selemong se khoeli li robeli moo bosiu ba teng bo qalang ka hora ea boraro, moo re baloang joalo ka linku bosiu le mots'eare.

Ka qetella ka ho mojoetsa ho re Nkhono ke nna ea bolaileng motho eoo oa heso, ke ne ke sa tsebe Nkhono,,, le bo monghali mang mang mane e ne e ntse e le rona. Empa enoa ena o bolailoe ke letsoho laka.

Nkhono a roala matsoho hlohong a phahama a tapatapa ka maoto a re;Jonna,,, Jonna jooonaa, ngoana tooe u ntjoetsang joale!!,na u ua tseba ho re u ka be u sa phele ho ja fela bana baa ba ile ba nlokolla khale koa?, jonna ntate molimo ke ne ke tlo shoa ke lefu la pelo oee!.

Boo phahame mona o tsoe ka tlung ka mona ke sa le ke le mong ha nyane, u batlile u shoa uena ngoana tooe.

Khaolo ke ea mashome a robong a senang motso e hlahlamang.

Lena le fats'e u le ts'abe.