Nawyajeewa Ayurveda

මැදින් පුර පසළොස්‌වක පොහොය...

මැදින් මහේ සඳ මෝරාගෙන එත්ම සැදැහැතියන්ගේ සිත්සතන් බුදු බැතියෙන් ඔදගැන්වෙන සිදුවීමක්‌ නිරායාසයෙන් ම සිහියට නැගෙයි. එනම් බුදුරදුන් විසිදහසක්‌ පමණ වූ භික්‌ෂු මහා සංඝයා වහන්සේ පිරිවරා ස්‌වකීය ජන්ම භූමිය වූ කිඹුල්වත්පුර නුවරට වැඩම කරවීම සඳහා ගමනාරම්භ කිරීමයි. වෙසක්‌ පොහෝ දිනයෙහි කිඹුල්වත්පුරයට සැපත්වීමේ අරමුණ ඇතිව මැදින් පොහෝදා ආරම්භ කළ මෙම ගමන නිසා සිදු වූ අනුස්‌මරණීය සිදුවීම් ගණනාවක්‌ ම තිබේ. ඒවා අතර ඥතීන්ගේ මානය බිඳහෙළීම, යමාමහ පෙළහර පැවැත්වීම, යශෝධරා දේවියට චන්දකින්නර ජාතකය දේශනා කිරීම, රාහුල කුමරු හා නන්ද කුමරු පැවිදි කරවීමට අවශ්‍ය පියවර ගැනීම, කාන්තාවන් පළමු වරට බුදු සසුනේ පැවිදි වීමට අවසර ඉල්ලීම හා සුද්ධෝදන මහරජු මාර්ගඵල ලැබීම යනාදිය ප්‍රමුඛත්වය ගනියි.

මේ අනුව බුදුරදුන් ස්‌වකීය ඥති වර්ගයා වෙනුවෙන් ධර්ම දායාදය පිරිනැමීමේ අරමුණින් යුක්‌තව ඓතිහාසික ගමනක්‌ ඇරඹූ මංගල දිනයක්‌ ලෙස මැදින් පොහෝ දිනය නම් කළ හැකි ය. ඥති වර්ගයාට පමණක්‌ නොව රජගහනුවර සිට කිඹුල්වත්පුර නුවර දක්‌වා වූ සැට යොදුනක්‌ මග දෙපසට අයත් ගම්දනව්වල ජනතාවට ද ධර්ම දායාදය පිරිනැමීමේ ආරම්භක පියවර ද එයම විය.

පෙර ඇසළ පොහොය දිනෙක රාත්‍රි කාලයේ සිදුහත් කුමරු කිඹුල්වත්පුර නුවරින් නික්‌මුණු තැන් පටන් මහත් සේ කම්පාවට පත් සුද්ධෝදන මහරජු තම පුතු දැකබලා ගැනීමේ බලවත් ආශාවෙන් පසු විය. බුද්ධත්වයෙන් පසුව බිම්බිසාර රජුගේ පාලනය යටතේ පැවැති මගධ රාජ්‍යයේ වේළුවනාරාමය නම් වූ සුන්දර ආරාමයෙහි බුදුරදුන් වැඩවෙසෙන බව දත් පියරජු උන්වහන්සේට කිඹුල්වත් පුරයට වැඩමවන ලෙස ආරාධනා කරන මෙන් දන්වා ඇමැතියකු ප්‍රමුඛ දූත කණ්‌ඩායමක්‌ රජගහනුවර වේළුවනාරාමයට පිටත්කොට යෑවී ය. එම පිරිස එහි ගොස්‌ බුදුරදුන් වෙතින් බණ අසා පැහැදී පැවිදි වූ අතර රජුගේ ඉල්ලීම ඉටු නොකළහ. මෙසේ ඇමැතිවරු නවදෙනෙක්‌ සහිතව නව වාරයක්‌ ම දූත පිරිස්‌ පිටත්කොට යෑවූ නමුත් ඉන් එක ද පුද්ගලයෙක්‌ හෝ නැවත නොපැමිණිය හ. පෙර සේම සිදුවූයේ ඔවුන් බුද්ධශ්‍රාවකයන් බවට පත්වීම පමණෙකි. දස වැනි වාරයේ දී සිදුහත් කුමරු උපන් දිනයේ ම උපත ලැබූ කාළුදායි ඇමැතිවරයා දහසක දූත කණ්‌ඩායමක්‌ ද සමග රජගහනුවර වේළුවනාරාමයට පිටත්කර හැරීය. බුදුරදුන්ගෙන් ධර්මය අසා පැවිදිවීම සඳහා ද රජුගෙන් අවසරය ලබාගත් කාළුදායි සහපිරිවරින් යුක්‌තව කිඹුල්වත්පුර නුවර සිට රජගහනුවර වේළුවනාරාමයට ගියේ ඉමහත් සොම්නසිනි. එහිදී බුදුරදුන් හමු වූ කාළුදායි බණ අසා පැවිදිව රහත් ඵලය ද ලබා ගත්තේ ය.

ඉක්‌බිතිව කාළුදායි තෙරුන්ගේ පැවිද්දෙන් දින හත අටක්‌ ගතවිය. ඒ සමගම කාලගුණය ද බෙහෙවින් ම යහපත් වූ වසන්ත සමය උදාවිය. බුදුරදුන්ව සිය ජන්මභූමියට වැඩමකරවීම සඳහා මේ සුදුසුම කාලය බව කාළුදායි තෙරණුවෝ වටහා ගත්හ. එබැවින් බුදුරදුන් වෙත එළඹි කාළුදායි තෙරණුවෝ සිත්ඇදගන්නා සෞන්දර්ය වර්ණනාවකින් යුක්‌තව රජගහනුවර සිට කිඹුල්වතට යන සැට යොදුන් ගමන් මග වර්ණනා කළහ. මෙම මග වැණුමෙන් යුත් ආරාධනය පිළිගත් බුදුරදුන් විසිදහසකට අධික භික්‌ෂු පිරිස පිරිවරා ස්‌වකීය ජන්ම භූමිය බලා ගමනාරම්භ කළහ. සියොතුන්ගේ විවිධ නාදයන්ගෙන් සමන්විත මං මාවත් මැදින් දිය කඩිති, බඩවැටි අතරින් වැඩම කළ බුදුරදුන්ගේ මෙම අසිරිමත් ගමන මුළු ලොවම සනසාලන පරිසර පාද යාත්‍රාවක්‌ විය. මෙසේ දෙමසක්‌ පා ගමනින් වැඩම කළ බුදුරදුන් ප්‍රමුඛ සඟගණ වෙසක්‌ පොහෝදා කිඹුල්වත් පුරයට වැඩම කළහ.

අදවන් මැදින් පොහෝ දිනෙක ඇරඹුණු බුදුරදුන්ගේ කිඹුල්වත්පුර චාරිකාව ශාසනික වශයෙන් සුවිශේෂී සිද්ධි මාලාවක මූලාරම්භය විය. එබැවින් මැදින් පොහෝ දිනයේ වැදගත්කම මෙනෙහිකොට දාන, සීල, භාවනා යන ත්‍රිවිධ පුණ්‍ය ක්‍රියාවන්හි යෙදෙමින් මෙම දිනය අනුස්‌මරණය කිරීමට සැවොම අදිටන් කරගත යුතුය.

ඌරුගමුවේ අස්‌සජී හිමි

🔆 අපගේ page යට කරන්න⬇️
https://www.facebook.com/nawyajeewa0613/

🔆 පහත link එකෙන් අපගේ එකට එකතු වන්න.⬇️
https://www.facebook.com/groups/295147374858876/?ref=share_group_link

#අපේ_සිංහල_වෙදකම #සිංහල_වෙදකම #නව්‍යාජීව #මැදින්_පෝය #පෝය


*** තෙරුවන් සරණයි ***

💠රුධිර දායකයෙකු විය හැක්කේ කාටද?

🔶පහත සඳහන් මූලික සුදුසුකම් සපුරාලන ඕනෑම පුද්ගලයකුට රුධිරය පරිත්‍යාග කළ හැකියි.

🔹වයස අවුරුදු 18 - 60ත් අතර ගැහැනු පිරිමි දෙපාර්ශවයටම.
(ප්‍රථම වරට රුධිරය පරිත්‍යාග කරන්නේ නම් ඔබගේ උපරිම වයස් සීමාව ලෙස අවුරුදු 55 සලකනු ලැබේ)
🔹බර කිලෝග්‍රෑම් 50ට වඩා වැඩි අයකු විය යුතුයි.
🔹සාමාන්‍ය වැඩිහිටියකුගේ බර කිලෝ ග්‍රෑමයකට රුධිර මිලි ලීටර් 70 පමණ අඩංගු වේ. උදාහරණයක් ලෙස කිලෝ ග්‍රෑම් 50ක් බර වැඩිහිටියකුගේ රුධිර ප්‍රමාණය මිලි ලීටර් 3500 කි (50×70ml/kg). රුධිර දායකයාට කිසිදු බලපෑමක් ඇති නොවන ආකාරයට මුළු රුධිර ප්‍රමාණයෙන් 13% ක් දක්වා ප්‍රමාණයක් ඉවත් කළ හැකියි. සාමාන්‍ය රුධිර දායකයෙකු ගෙන් රුධිර ඒකකයක් ලබා ගන්නා අතර (ආසන්න වශයෙන් 450ml) එවිට ඉහත සීමාව ඉක්මවීම සිදු නොවේ එබැවින් බර කිලෝග්‍රෑම් 50ට අඩු අයට රුධිරය පරිත්‍යාග කළ නොහැකිය.

🔸හිමොග්ලොබින් ප්‍රමාණය

🔹රුධිර පරිත්‍යාගශීලියකු වීමට නම් රුධිරයේ හිමොග්ලොබින් ඩෙසිලීටරයකට ග්‍රෑම් 12.5 (g/dl) කට වඩා තිබිය යුතුයි.
🔹ගර්භනී මාතාවන්ට හා වෙනත් රෝග තත්ත්වයන් ගෙන් පෙළෙන අයට රුධිරය පරිත්‍යාග කළ නොහැකිය.
🔹විදෙස්ගත වී යළි මෙරටට පැමිණ අවම මාස තුනකට වඩා වැඩි විය යුතුය.
🔹අවදානම් හැසිරීම් වලින් තොර පුද්ගලයෙකු විය යුතුයි.

🔸අවදානම් හැසිරීම් ලෙස

🔹ලිංගික සබඳතා එක් අයෙකුට සීමා නොවීම.
🔹පිරිමියෙකු වෙනත් පිරිමියෙකු සමග ලිංගික සම්බන්ධතා පැවැත්වීම.
🔹කෙදිනක හෝ ගණිකා වෘත්තියේ යෙදී සිටීම
🔹පසුගිය වසර තුළ අවදානම් ලිංගික ඇසුරක් පැවැත්වීම.
🔹කෙදිනක හෝ එන්නත් ආකාරයෙන් මත්ද්‍රව්‍ය ලබාගෙන තිබීම.

🔴දණ්ඩ නීති සංග්‍රහයේ 262. 263 වගන්ති අනුව දැනුවත්ව රෝගයක් පැතිර වීමට කටයුතු කිරීම දඬුවම් ලැබිය හැකි වරදකි.

🔹ඔබ ලේ පරිත්‍යාග කිරීමට පෙර පැය හතරක් ඇතුළත ප්‍රධාන ආහාර වේලක් ලබාගෙන තිබිය යුතුය
🔹මත්පැන් නොවන දියරමය පාන වැඩිපුර පානය කරන්න.
🔹පෙර දිනයේ පැය හයක් හෝ ඊට වැඩි නින්දක් ලබා තිබිය යුතුය.
🔹පහසු සැහැල්ලු ඇඳුමකින් සැරසී සිටීම වඩාත් යෝග්‍ය වේ.

🔸ඔබ ලේ දීමෙන් පසුව

🔹අවම වශයෙන් මිනිත්තු විස්සක් පමණ රුධිරය පරිත්‍යාග කළ ස්ථානයේ රැඳී සිටීම වැදගත් වේ.
🔹සුළු ආහාරයක් හා දියරමය පානයක් ලබා ගත යුතුය.
🔹ඉදිරි පැය හතර තුළදී වැඩිපුර දියර පානය කරන්න.
🔹රුධිරය ලබා ලබාගැනීමට එන්නත් කටුව ඇතුළු කළ ස්ථානයේ ඇලවූ ප්ලාස්ටරය පැය 12ක් පමණ නොගලවා තබන්න.
🔹අධික වෙහෙසකර වැඩ කිරීමෙන් හෝ රුධිරය ලබාදුන් අතින් බර එසවීමෙන් වලකින්න

🔸රුධිරය පරිත්‍යාග කළ හැකි කාල පරතරය

🔹මාස 4කට වරක් රුධිරය පරිත්‍යාග කළ හැකිය රුධිර පට්ටිකා පමණක් පරිත්‍යාග කරන දායකයෙකුට සති 2කට වරක් එය කළ හැකිය.

🟢පුදදෙමු ලේ බිඳක් රැකගමු ජීවිතයක්

📑විමසීම්
ජාතික රුධිර මධ්‍යස්ථානය,
අංක 555/5D,
ඇල්විටිගල මාවත,
නාරාහේන්පිට,
කොළඹ 5.

☎️ දුරකථන
0112369931 - 5
🖨️ ෆැක්ස්
0112369937 / 0112369939
📧 විද්‍යුත් තැපෑල
[email protected]
🖥️ වෙබ් අඩවිය
nbts.health.gov.lk

📝පෙර පලවූ ලිපි
මිහිමත ජීවය රැදි අමුර්තය "රුධිරය"⬇️
https://m.facebook.com/story.php?story_fbid=133231828456654&id=100303925082778

❤️මිතුරන් දැනුවත් වීම සදහා කරන්න.

🔆 අපගේ page යට කරන්න⬇️
https://www.facebook.com/nawyajeewa0613/

🔆 පහත link එකෙන් අපගේ එකට එකතු වන්න.⬇️
https://www.facebook.com/groups/295147374858876/?ref=share_group_link

#නව්‍යාජීව
#ආයුර්වේද
#අපේ_සිංහල_වෙදකම #සිංහල_වෙදකම #රුධිරය

*** තෙරුවන් සරණයි ***

මෙතරම් කලක් තුළ කළ පිං සෑහේවා
පතනෙමි එන භවයේ ඔබ මිනිසෙකු වේවා..🙏🙏

Nawyajeewa Ayurveda updated their business hours.

💠අක්මාව පිරිසිදු කලහැකි ආහාර වර්ග.

✒️අක්මාව යනු අප ශරීරයේ තිබෙන වැදගත් අවයව වලින් එකක්. සිරුරේ නිසි ක්‍රියාකාරීත්වයට අවශ්‍ය ප්‍රෝටීන කොලෙස්ටරෝල් වගේම ආහාර ජීර්ණයට අත්‍යවශ්‍ය වන පිත නිපදවීමක් සිද්ද කරන්නේ අක්මාව මගින්ය.
✒️ අක්මාව මිනිස් දේහයේ පවතින දෙවන විශාලතම ඉන්ද්‍රියයි. නමුත් අන්තරංග අවයව වලින් විශාලතම අවයවයි. මෙය දේහයේ වූ විශාලතම ග්‍රන්ථියයි.
මෙය අප ශරීරයට අවශ්‍ය විටමින් කාබෝහයිඩ්‍රේට් හා ඛනිජ ලවණ රැස්කර තබා ගනී.මිනිස්සුන්ගේ වගේම අනෙකුත් ශීරපායි සියලුම සතුන්ගේ ආහාර ගබඩාවක් තමයි අක්මාව. එය ඕනෑම සතෙකුගේ පෝෂණ ගුණයෙන් ඉහළම මාංශ කොටසද වනවා. අපි පීකුදු නමින් හදුන්නන්නේ එයයි.
✒️අපි ගන්නා ආහාරවල තිබෙන රසායනික විශේෂයෙන් මත්පැන් හා රසායනික බෙහෙත් වර්ග බිඳ හෙලීමක් අක්මාවෙන් සිදු කරනවා. කාලයක් තිස්සේ සැර බෙහෙත් වර්ග හෝ මත්පැන් බීමෙන් අක්මාවට සිරෝසිස් වැනි රෝග තත්ත්ව වැලදීමට හේතු වෙන්නේද මේ කාරණා.

✒️නිරෝගීව ජීවත් වීමට සිතන ඕනෑම කෙනෙකුට මූලිකම අවශ්‍යතාවයක් අක්මාවට අහිතකර දේ නොගැනීම වගේම අක්මාවට ගුණදායක ආහාර ගැනීමෙන් එහි ක්‍රියාකාරීත්වයට පහසුවක් සැපයීම ඉතාම වැදගත්.

🔅පහතින් දැක්වෙන්නේ එම අක්මාව පිරිසිදු කරගත හැකි ආහාර වර්ග 10කි. නිතරම මේ ආහාර ගැනීමෙන් ඔබට අක්මාවේ රෝග ඇතිවීමේ අවදානම සැලකිය යුතු ලෙස අඩු කර ගැනීමට හැක.

🔶ඕට්ස්

🔹කොලෙස්ටරෝල් ගැටලු තිබෙන කොයි කාටත් වෛද්‍යවරුන් නිර්දේශ කරන ආහාර ලැයිස්තුවේ ඉහළම තිබෙන්නේ ඕට්ස්. ආහාරවල අඩංගු ශරීරයට අහිතකර(L D L CHOLESTEROL) එල් ඩී එල් කොලෙස්ටරෝල් ශරීරයට උරා නොගෙනම මලපහ සමඟ බැහැර කිරීමට උදව් වන ද්‍රාව්‍ය ආහාරමය තන්තු වලින් ඕට්ස් පිරී තිබීම එයට ප්‍රධානතම හේතුවය. මේ නිසා නිතරම ඕට්ස් ආහාරයට ගන්නා කෙනෙකුගේ අක්මාවේ නිපදවන කොලෙස්ටරෝල් සිරුරට හිතකර
( H D L CHOLESTEROL) එච් ඩී එල් කොලෙස්ටරෝල් වීමේ ප්‍රවණතාවය සැලකිය යුතු තරම් ඉහළය.
ඕට්ස් අක්මාවට ගුණදායක වන අනෙක් හේතුව වන්නේ එහි ඇති බීටා ග්ලූටන් නැමැති සංයෝගයයි අක්මාවේ මේදය තැන්පත් වීම අවම කරවීමට ඉහල හැකියාවක් ඇති බව පර්යේෂණවලින් හෙළිවී ඇත.
නිතරම ඕට්ස් ආහාරයට ගැනීම මගින් අක්මාවේ ප්‍රමාණය ඉක්මවා මේද තැන්පත් වීමේ අතුරු ප්‍රතිඵලයක් වන අක්මා පිළිකා හට ගැනීමේ අවදානම පහත හෙලන්නේ මේ හේතුව නිසාවෙනි.

🔶අලිගැටපේර

🔹විටමින් E වලින් පිරි පුන් අලිගැටපේර ග්ලයිසීමික් අගය ඉතා අඩු නිසා එයින් අක්මාවට විශාල සහනයක් සැලසේ. අක්මාවේ සෛල ක්‍රියාකාරිත්වයට උදව් වන විටමින් හා ඛනිජ ලවණ විස්සකට වඩා එක් ගෙඩියක අඩංගු වේ.
නිතරම අලිගැටපේර සීනි නොමැතිව ආහාරයට ගැනීම වඩාත් සුදුසුයි.

🔶ඔලිව් තෙල්

🔹ශරීරයේ බොහෝ අවයවවලට බොහෝ ගුණදායක ඔලිව් තෙල් අක්මාවටත් ගුණදායක බව ඔබ දන්නවාද. මෙම ගුණයට හේතු වන්නේ ඔලිව් තෙල් සතු ඉහල අසංතෘප්ත මේද ප්‍රතිශයි. මෙහි ප්‍රධාන සංඝටකය වන ඔලෙයික් මේද අම්ලය නිසා ඔලිව් තෙල්වල 70%අඩංගු වන්නේ අක්මාවට ඉතාම හිතකර අසංතෘප්ත මේදයයි. ශරීරයට ලබා ලබාගන්නා අසංතෘප්ත මේද ප්‍රතිශතය වැඩි වීම අක්මාවේ සෛල වල නිරෝගී බවත් ක්‍රියාකාරිත්වයක් ඉහළ නංවන්න විශාල ලෙස දායක වේ.
ඔලිව් තෙල් නිතරම ආහාරයට ගන්නා මැදපෙරදිග රටවල අක්මා රෝග වැළඳීමේ ප්‍රවණතාවය අඩුවීමට මෙය ප්‍රධාන හේතුවක් ලෙස සැලකේ.

🔶මිදි

🔹බ්ලූ බෙරි වලට පසුව වැඩිම ප්‍රතිඔක්ෂිකාරක සාන්ද්‍රනයක් අඩංගු ආහාරයක් විදිහට මිදි අපට සැලකිය හැක. ලංකාවේ බ්ලූ බෙරි සොයා ගැනීමට අපහසු නිසා හැකි සෑම විටම මිදි ආහාරයට ගැනීම වඩාත් සුදුසු වේ.
මස් මාංශ ආදියෙන් ලැබෙන ප්‍රාන්ස් මේදය අඩංගු මුක්ත ඛණ්ඩක වලින් වැඩිම හානියක් සිදුවන්නේ ඒවා ගබඩා කර තබාගන්නා අක්මාවේ ශෛලවලට නිසා මිදිවල ඇති ප්‍රතිඔක්ෂිකාරක සංයෝග අක්මාවට හරිම වැදගත් වේ. මිදි ගෙඩියේ ඇටවල ප්‍රතිඔක්ෂිකාරක ගෙඩියට වඩා වැඩි සාන්ද්‍රනයක් අඩංගු වේ.මිදි ගෙඩිය සමග මැදි ඇටයද සපාකෑම හරිම වැදගත්

🔶සුදු ලූනු

🔹මෙය අපේ ශරීරයට බොහෝ ගුණ දෙන ආහාරයකි. අක්මාවේ එකතු වී තිබිය හැකි විෂ රසායනික දියකර හරින එන්සයිම නිෂ්පාදනය උත්තේජනය කිරීමට සුදුලූනු සතුව සුවිශේෂී හැකියාවක් ඇති බව වරින් වර කෙරුණු පර්‍යේෂන මගින් තහවුරු වී ඇත.නිතර නිතර මත්පැන් බොන අයට බෙහෙත් වර්ග බොන අයට වැඩිපුර සුදුලූනු ආහාරයට සුදුසුයැයි වෛද්‍යවරුද උපදෙස් ලබා දේ.
එන්සයිම උත්තේජනයට අමතරව සුදුලූනුවල ඇති ප්‍රධානතම ක්‍රියාකාරී ඇලිසීන් අක්මාව පිරිසිදු කිරීමට අතිශය වැදගත් වෙනවා. සුදුලූනු යනු අපගේ ශරීරයට වැදගත් වන සෙලීනියම් යන මූල ද්‍රව්‍ය ලබා ගැනීමටත් හොදම ප්‍රභවයක්. සෙලීනියම් අක්මාවේ පමණක් නොව සිරුරෙහි බොහෝ අවයව වල නිසි ක්‍රියාකාරිත්වයට අත්‍යවශ්‍ය සුද්‍ර පෝෂකයක්.

🔶බීට් රූට්

🔹අක්මාවට වඩාත් ගුණදායක බීට් රූට් හි විටමින් A විටමින් B 6 හා යකඩ වලින් ඉහළ බීට් රූට් වලින් අපේ අක්මාව පිරිසිදු කරන සංයෝග ගණනාවක් සිරුරට ලබා ගැනීමට හැක.
ස්වභාවිකව සීනි අඩංගු නිසා බීට්රූට් යුෂ පානයක් ලෙස සකසා ගැනීම වඩාත් සුදුසුයි.
නිරෝගී අක්මාවක් පවත්වා ගැනීමට බීට්රූට් යුෂ නිතර පානය කිරීම බෙහෙවින් වැදගත් වනවා.

🔶බ්‍රෝකොලි

🔹ශරීරයේ ඕනෑම අවයවයක අඩංගු විෂ වර්ග ඉවත් කිරීමට බ්‍රෝකොලි හෙවත් මල් ගෝවා වලට තිබෙන හැකියාව ඉතාම ඉහලයි. ලෝකය පුරා බොහෝ රටවල කෙරුණු පර්‍යේෂන මගින් නිතරම බ්‍රෝකොලි ආහාරයට ගැනීම අක්මාව, වකුගඩු ඇතුළු අවයව වල විෂ එක් රැස් වීම අවම කර ගැනීමට සමත් බව තහවුරු වී ඇත. අක්මාවේ ප්‍රතිවිෂ එන්සයිම නිපදවීමට අවශ්‍ය පෝෂක ගණනාවක් බ්‍රෝකොලි වල අඩංගු වේ. සිරෝසිස් වැළඳී ඇති රෝගීන්ට වෛද්‍යවරුන් පවා බ්‍රෝකොලි ආහාරයට ගැනීම සුදුසුයි යැයි නිර්දේශ කරයි. මෙය තන්තුවලින් ඉතා ඉහළයි ශරීරයේ මේද පාලනයට උපකාරී වේ

🔶ලින්නා මසුන්

🔹අක්මාවේ විෂනසන එන්සයිම වල මනා ක්‍රියාකාරීත්වයට උදව්වන අතරම අතිරේක මේද තැන්පත් වීම පාලනය කිරීමටත් ඔමේගා 3 වලට හැකියාව ඇත. ශරීරය කොලොස්ටරෝල් මට්ටම අවම කිරීමටත් ඉදිමුම් අවම කිරීමටත් ඔමේගා 3 මේද අම්ලයට ඇති හැකියාව පර්යේෂණ බොහොමයකින් තහවුරු වූ දෙයකි. මෙවැනි ගුණ රැසක් සහිත ඔමේගා 3 මේද අම්ල ලබාගන්න තිබෙන බොහොම පහසුම හා ලාභදායී ක්‍රමය වන්නේ ලින්නා මසුන් ආහාරයට ගැනීමයි. නිතරම ලින්නා මසුන් ආහාරයට ගන්නේනම් ඔබට අවශ්‍ය ප්‍රෝටීන වැඩිහරියක් පහසුවෙන් ලබාගැනීමේ හැකියාව ඇත. එමගින් අක්මාවට අහිතකර මස් මාංශ වර්ග ආහාරයට ගැනීමේ අවශ්‍යතාවයද අවම වේ.

🔶ග්‍රීන් ටී

🔹සෞඛ්‍යයමත් පානයක් ලෙස ලොව පුරා ජනප්‍රියයි. ජපන් ජාතික පුද්ගලයින් දහස් ගනනක් යොදාගෙන කල පර්‍යේෂනයකින් තහවුරු වී ඇත්තේ දිනකට ග්‍රීන් ටී කෝප්ප දෙකක් බීමෙන් අක්මාව ආශ්‍රිත රෝග වැලඳීමේ ප්‍රවණතාව 43% අඩු බවයි. ග්‍රීන් ටී අක්මාවට ගුණ දායක වීමට ප්‍රධානතම හේතුව වන්නේ එයට රසය ලබා දීමට හේතුවන පොලිෆීනෝල වලට අක්මාවට විෂදායක රසායනික බිඳ හෙළිමේ හැකියාවක් ඇති බවයි. මේ නිසා අප ගන්නා ආහාරවල ඇති විෂ රසායනික අක්මාවේ තැන්පත් නොවී දියකර හැරීමට එය උපකාරී වනවා බඩ අඩු අඩුකිරීමට වාගේම තවත් බොහොමයක් පැතිවලින් ප්‍රයෝජනවත් වේ.

🔶ලෙමන්

🔹නිතර මත්පැන් පානය සුදුසු නැත. නමුත් ඔබට මත්පැන් පානය නවත්වා ගැනීමට නොහැකි නම් එයින් අක්මාවට සිදුවන හානිය අවම කර ගැනීමට සාන්ද්‍ර ලෙමන් යුෂ ආහාරයට එක්කර ගැනීම වැදගත්. හැකිතරම් ලෙමන් යුෂ පානය කිරීම මගින් අක්මාවේ ඇති සෛල විනාශය බොහොම සැලකිය යුතු අන්දමින් පාලනය කර ගැනීමට හැකියාව ඇත.එය චීන පරීක්ෂණයකින් පවා තහවුරු කර ඇත. ලෙමන් යුෂ වල ඇති අම්ල සංයෝජනය මගින් ඇල්කොහොල් බිඳ හෙළීමට විශාල පහසුවක් ලබා දෙන නිසා අක්මාව වෙහෙස වීම අවම කර ගැනීමට හැක. ලෙමන්වල විටමින් C බහුල නිසා ඒහි අඩංගු ප්‍රතිඔක්සිකාරක ගුණය අක්මාවේ ක්‍රියාකාරිත්වය ඉහළ නැංවීමට උපකාරී වන බව ඇතැම් පර්යේෂණවලින් තහවුරු වී ඇත. ඔබ නිතර නිතර මත්පැන් පානය නොකරන කෙනෙක්නම් සාන්ද්‍ර ලෙමන් යුෂ නොබී එයට වතුර කලවම්කර බීම තමා වඩා වැදගත්.

🟢අක්මාවේ ගැටලු ඇති වුවහොත් කරන්නාවූ ප්‍රතිකාර වල මිල ඉතා අදිකය. ඇතැම් විට ජීවිතය බේරාගැනීමට අක්මාවට කොටස් බද්ධ කිරීමට සැත්කම්පවා සිදුකිරීමද සිදුවියහැක.

🟢මෙම ආහාර ගැනීමෙන් ඔබට අක්මාවේ ඇතිවෙන ගැටලු වලින් ආරක්ෂා වී නිරෝගීව ජීවත් වීමට හැකියාව ඇත.

✨️මිතුරන් දැනුවත් වීම සදහා කරන්න.

🔆 අපගේ page යට කරන්න⬇️
https://www.facebook.com/nawyajeewa0613/

🔆 පහත link එකෙන් අපගේ එකට එකතු වන්න.⬇️
https://www.facebook.com/groups/295147374858876/?ref=share_group_link

📝පෙර පලවූ ලිපි
🔶අක්මාවේ තෙල් - Fatty Livar ⬇️
https://www.facebook.com/100303925082778/posts/111150377331466/

#නව්‍යාජීව
#අපේ_සිංහල_වෙදකම #සිංහල_වෙදකම #ඕට්ස් #බීට්රූට් #මිදි #ලෙමන් #බ්‍රෝකොලි #ලින්නා #ග්‍රීන්ටී #සුදුලූනු #අලිගැටපේර #ඔලිව්තෙල්

****තෙරුවන් සරණයි****

💠මුරුංගා කොල

✒️ වසර 4000ට පෙර සිට මුරුංගා ආහාරයක් වගේම ඖෂධ වශයෙන් යොදාගෙන ඇත. කිසිම රසායන පොහොරක් නොමැතිව ස්වභාවිකව වැඩෙන මුරුංගා ශාකයේ කොල සෞඛ්‍යයට වාසි ගෙනෙන බහුකාර්ය ආහාරයකි.

🔹රුධිර පීඩනය අඩු කිරීමට,
🔹රුධිරයේ සීනි මට්ටම පාලනයට, 🔹කොලෙස්ටරෝල් වලට,
🔹අස්ථි ශක්තිමත් කර ඔස්ටියෝපොරෝසිස් රෝග තත්ත්වයන්ද වලකාලීමට,
🔹ආහාර දිරවීමට,
🔹ඇස් පෙනීම වර්ධනයට,
🔹ප්‍රතිශක්තිකරණයට,
🔹සමේ රෝග වලට හිසකෙස් වලට
🔹ගැබිණි මව්වරුන්ට හා දරුවන්ට අවශ්‍ය පෝෂණය ලබා දීමට,
🔹හෘද රෝගවලට වගේම පිළිකා සෛල නාශකයක් ලෙසත් මෙය ගුණදායකයි
🔹දරුවන්ගේ පනු අමාරුවට

✒️මන්දපෝෂණය ඇති ප්‍රදේශවල එය මර්ධනයට ව්‍යාපෘතියක් ලෙස මුරුංගා වගාකර ප්‍රචලිත කිරීම සිදු කරමින් ඇත.

🟢මුරුංගා කොළ ආහාරයෙන් නිර්මාංශ ආහාර රටාවකට යොමුවී ඇති අයගේ ප්‍රෝටීන අවශ්‍යතාවයද සපුරා ගැනීමට හැක.
🔸අද වන විට වියළා කුඩුකර ගත් මුරුංගා කොල ලොව පුරා ජනප්‍රිය පෝෂ්‍ය අතිරේකයකි.

🔹මෙහි මැග්නීසියම්
🔹පොටෑසියම්,
🔹ප්‍රෝටීන්,
🔹යකඩ,
🔹විටමින්C,
🔹විටමින් B1,
🔹විටමින් B2,
🔹විටමින් B3,
🔹විටමින් B5,
🔹විටමින් B6 අඩංගුය.

🔶මුරුංගා කොල 100g ක 57.7 mg විටමින් C අඩංගුය. එම ප්‍රමාණය මිනිස් ශරීරයේ දෛනික විටමින් සී අවශ්‍යතාවයන් 70% පමණ වේ.

🔹තවද දොඩන් ගෙඩියක මෙන් 7 ගුණයක Vitamin Cද
🔹කිරි වීදුරුවක මෙන් 4 ගුණයක කැල්සියම් හා ප්‍රෝටීන්
🔹ආමන්ඩ් ඇටවල මෙන් 3 ගුණයක් යකඩ
🔹නිවිති වල මෙන් 3ගුණයක් විටමින් E
🔹ඉදුණු කෙසෙල් ගෙඩියක මෙන් 3 ගුණයක් පොටෑසියම්
🔹කැරට් වල මෙන් 4 ගුණයක් විටමින් A ද අඩංගු ය.

🔶මුරුංගා කොල මැල්ලුමක් ලෙස සකස්කරන ආකාරය.
🔸අවශ්‍ය ද්‍රව්‍ය.

🔹මුරුංගා කොල කෝප්ප 1 ක් පමන
🔹ගා ගත් පොල් කෝප්ප 1/4 පමන
🔹රතු ළූනු ගෙඩි 3ක්
🔹මිරිස් කරල් 2/3 ක් පමන
🔹කහ තේ හැදි 1/4
🔹ලුනු රස අනුව
🔹කරපිංචා

🔸සාදන ආකාරය

◾සෝදාගත් මුරුංගා කොල මිටියක් ලෙස ගෙන පලා ලියනවා සේ ලියාගන්න

◾ඉහත මුරුංගා කොල හැර අනෙකුත් සියල්ල ගා ගත් පොල් සමග හොදින් අබරා ගන්න.( බ්ලෙන්ඩර් , වංගෙඩියේ හෝ ගලේ)

◾එම මිශ්‍රණය ලියාගත් මුරුංගා සමග මිශ්‍ර කොට මැටි බාජනයක් ලිප තියා එයට තෙල් ටිකක් දා (ගිතෙල් හෝ තලතෙල් වඩාත් සුදුසුයි)අර මිශ්‍රණය දමා ගින්දර අඩුකර හැදි මිටෙන් කවලම් කර ගන්න. වතුර හිදී ගොස් තෙල් මතුවන තෙක් හැදි ගාමින් පිස ගෙන මිශ්‍රණය වියලි ස්වරූපයක් ( කුඩු කුඩු හැලෙනවා වගේ) වූ විට ලිපෙන් බා ටික වේලාවක් හැදි ගා රස විදින්න.

✨️මිතුරන් දැනුවත් වීම සදහා share කරන්න.

🔆 අපගේ page යට like කරන්න⬇️
https://www.facebook.com/nawyajeewa0613/

🔆 පහත link එකෙන් අපගේ Group එකට එකතු වන්න.⬇️
https://www.facebook.com/groups/295147374858876/?ref=share_group_link

#නව්‍යාජීව
#ආයුර්වේද
#අපේ_සිංහල_වෙදකම #සිංහල_වෙදකම #මුරුංගා #මුරුංගා_කොල #මැල්ලුම
_tree

*** තෙරුවන් සරණයි ***

💠නිරෝගී දිවියකට ආයුර්වේද දින චර්යා.

✒️වර්තමානයේ බොහෝ දෙනෙක් බෝ නොවන රෝග වලින් පීඩා විඳිනවා.ඒ වගේම අපේ රටේ ජනගහනයෙන් හතරෙන් එකක් ස්ථුලතාවයෙන් පෙලෙනවා.මේ තත්වයට ප්‍රධානම හේතුවක් ලෙස සලකන්න පුළුවන් වර්තමානයේ මිනිසුන් ගත කරන කාර්යබහුල ජීවන රටාව.ඉතින් අපි බලමු ආයුර්⁣වේදයේ දක්වලා තියෙන දින චර්යා කොතෙක් දුරට අපේ එදිනෙදා වැඩකටයුතු සමඟ ගලපගන්න හැකිද කියලා.

🔶බ්‍රහ්ම මුහුර්තයේ අවදි වීම

🔹බ්‍රහ්ම මුහුර්තයේ අවදි වීම. (ඉර උදාවට මිනිත්තු 96කට පෙර ). ආසන්නව මෙය උදෑසන 4.15 ත් 4.45 ත් අතර කාලයයි.
මෙ⁣ම කාලයේදී පරිසරයේ ඔක්සිජන් ප්‍රතිශතය ඉහළ මට්ටමක පවතින නිසා සෛල වලට ⁣ඉහළ ඔක්සිජන් ප්‍රමාණයක් ලැබෙනවා.

🔸බ්‍රහ්ම මුහුර්තයේ අවදි වීම තුලින්,

🔹ශරීරයේ ප්‍රතිශක්තිය වර්ධනය වීම
🔹රැධිරයේ Ph අගය සමතුලිත වීමට උපකාර වීම
🔹ශරීර වේදනාවන්, කෙණ්ඩා පෙරලීම වැනි තත්ව ශමනය වීම
🔹සැහැල්ලු මනසින් දවස පුරා කාර්යක්ෂමව වැඩකටයුතු කළ හැක
🔹ශාරීරික හා මානසික නිරෝගී බව
🔹අධ්‍යයන කටයුතු සඳහා ඉතාමත් සුදුසුය.

🔶උ්‍රෟෂ පාන

🔹උදෑසන හිස් බඩ මද උණුසුම් ජලය වීදුරැවක් පානය කිරීම
මෙමඟින්,
🔹රාත්‍රිය පුරා මුඛ කුහරයේ එක් රැස්වූ අහිතකර බැක්ටීරියා විනාශ කර මුඛ කුහරයේ නිරෝගී බව ඇති කරයි.
🔹මලබද්ධය ඇති වීම වළක්වයි.
🔹ආහාර මාර්ගය ආශ්‍රිතව රෝග ඇති වීම පාලනය කරයි .
🔹ශරීර බර අඩු කර ගැනීමට උපකාර වේ

🔶මල මූත්‍ර බැහැර කිරීම

🔹නිසි වේලාවට මල බැහැර කිරීම මඟින් ආහාර ජීරණ ක්‍රියාවලිය නිසි ලෙස සිදු වීමට උපකාර වේ.එමෙන්ම මල බද්ධ තත්ව ඇති වීම පාලනය වේ.

🔶දන්ත ධාවන හා ජිහ්වා නිර්ලේඛන

🔸ඖෂධීය දන්තාලේප භාවිතයෙන් දත් මැදීම මඟින්,

🔹මුඛ කුහරය ආශ්‍රිතව ඇති විය හැකි දත් කුහර වැනි රෝග තත්ව පාලනය වීම.
ජිහ්වා නිර්ලේඛන හෙවත් දිව මැදීම මඟින්,
🔹මුඛ කුහරය ආශ්‍රිතව දුඟද ඇති කරන ක්ෂද්‍ර ජීවීන් විනාශ වීම

🔶කවල /ගණ්ඩූෂ

🔸කවල - මුඛය සම්පූර්ණයෙන් පිරෙන ලෙස නැතිව තෙල් මද ප්‍රමාණයක් ගෙන එය මුඛය තුල එහා මෙහා කිරීම.

🔹ගණ්ඩූෂ -තෙල් මුඛය පිරෙන සේ ගෙන එය මද වේලාවක් මුඛය තුල රදවාගෙන සිටීම.
මේ සඳහා තල තෙල්, vergin coconut oil, sunflower oil, olive oil වැනි තෙල් භාවිතා කල හැකි අතර සුදුසු තෙල් වර්ගය ආයුර්වේද වෛද්‍යවරයෙකුගේ උපදෙස් මත තෝරා ගත හැක.
මෙමඟින්,

🔹මුඛ කුහරයේ නිරෝගී බව
🔹දත් මුල් දියවීම,විදුරුමස් වලින් ලේ ගැලීම,දත් කුහර සෑදීම,උගුර වියලීම,තොල් පැලීම වැනි මුඛය ආශ්‍රිත රෝග තත්ව ශමනය කරයි.
🔹දත්,විදුරුමස් හා හනු ශක්තිමත් හා නිරෝගී වීම
🔹මුඛ කුහරයේ නැවුම් බව
🔹ආහාර අරුචිය, මුඛ දුර්ගන්ධය වැනි තත්ව ශමනය වීම

🔶ව්‍යායාම

🔸උදෑසන ව්‍යායාම කිරීම වඩාත් සුදුසු වන අතර ව්‍යායාම සිදු කලයුතු නිශ්චිත කාල පරාසයක් නොමැති අතර නළල නාසය මතුපිට කිහිලි ආශ්‍රිතව හොඳින් දහදිය පිටවන හා ශ්වසන වේගය වඩාත් ඉහළ අවස්ථාවේදී ව්‍යායාම නතර කිරීම සුදුසුය.

🔹කායික හා මානසික ශක්තිය වර්ධනය වේ.
🔹ආහාර ජීර්ණ ක්‍රියාවලිය කාර්යක්ෂම වීම හා ශරීරයේ සැහැල්ලු බව
🔹සෛල වලට ඔක්සිජන් සැපයුම ඉහල යාම
🔹අධික ලෙස තැන්පත් වූ මේදය දහනය වීම
🔹හෘද රෝග,අධි රුධිර පීඩනය,සන්ධි රෝග ආදී වූ බෝ නොවන රෝග ඇතිවීම වැලැක්වීම

🔶යෝග

🔹දිනපතා යෝග අභ්‍යාස සිදු කිරීම තුලින් මානසික සුවතාව හා හෝමෝන සමතුලිතතාව ඇති වේ.

🔶අභ්‍යංග

🔸ඖෂධීය තෛල භාවිතයෙන් අභ්‍යංග (massage ) සිදු කිරීම.විශේෂයෙන් පාද හා හිසෙහි දිනපතා තෙල් අභ්‍යංග කිරීම මානසිකවද ඉතා සුවදායි බවක් ඇති කරයි.

🔹හිසෙහි තෙල් අභ්‍යංග කිරීම මගින් හිසකෙස් ගැලවී යාම,අකලට හිසකෙස් සුදු වීම,හිසේ කැක්කුම්,නින්ද නොයාම වැනි රෝගී තත්ව ශමනය වේ
🔹අත්, පා ආදියෙහි තෙල් අභ්‍යංග කිරීම මගින් රුධිර සැපයුම ඉහල යාම, සන්ධි රෝග ශමනය වීම,අත් පා වල සංවේදන ක්‍රියා ඉහල යාම,සමේ මෘදු බව හා සම පැහැපත් වීමද සිදු වේ.

🔶ආහාර

🔸ප්‍රසන්න මනසින් යුක්තව සමබල ආහාර වේලක් ගැනීම ඉතාමත් වැදගත්ය.ගන්නා ආහාර වේල සෑම විටම ආහාරයට ගැනීමට ප්‍රිය උපදවන රසකින් යුක්ත, නැවුම්ව,මද උණුසුම්ව ගැනීම යෝග්‍ය වේ.එමෙන්ම පෙර ගත් ආහාර වේල දිරවීමට පෙර නැවත ආහාර ගැනීම, ආහාර අරුචිය සහිත අවස්ථාවල ආහාර ගැනීම හා ඉතාමත් වේ⁣ගයෙන් හෝ ඉතාමත් සෙමින් ආහාර ගැනීම නොකළ යුතුය.

🔶නිද්‍රා

🔸නිරෝගී දිවියකට වැදගත්ම අංගයක් තමයි සුවදායි නින්දක්.සැහැල්ලු මනසින් නින්දට යාමත් කඩින්කඩ අවදි නොවන ඒකාකාරී නින්දක් ලැබීම මානසික ආතතිය දුරු කිරීම,අධික රුධිර පීඩනය වැනි හෘදය ආශ්‍රිත රෝග වලින් වැලකීමට උපකාරී වේ.
පුරුද්දක් ලෙස දහවල් නිදා ගැනීම අධික තරබාරු බව, හෘද රෝග ඇති වීමට හේතු වේ.

📝වෛද්‍ය ඒ.සී.එන්.සඳරත්න
BAMS(Hons)
University Of Colombo

✨️මිතුරන් දැනුවත් වීම සදහා කරන්න.

🔆 අපගේ යට කරන්න. අපගේ එකට එකතු වන්න.

#අපේ_සිංහල_වෙදකම #සිංහල_වෙදකම
#නව්‍යාජීව #දින_චර්‍යාව


*** තෙරුවන් සරණයි ***

💠පස් ගෝ රස

🔹කිරි -Milk
🔹මුදවාපු කිරි -Curd
🔹මෝරු - Whey
🔹වෙඬරු- Butter
🔹ගිතෙල් - Ghee

✨️මිතුරන් දැනුවත් වීම සදහා කරන්න.

🔆 අපගේ යට කරන්න. අපගේ එකට එකතු වන්න.

#නව්‍යාජීව
#අපේ_සිංහල_වෙදකම #සිංහල_වෙදකම
#කිරි #මුදවාපු_කිරි #වෙඬරු #ගිතෙල් #මෝරු #පස්_ගෝ_රස


*** තෙරුවන් සරණයි ***

Nawyajeewa Ayurveda updated their address.

💠නවම් පුන් පොහෝ දින ශාසනික වැදගත්කම

✒️දෙව් මිනිසුන්ගේ ශාස්තෘ වූ ගෞතම බුදුරජාණන් වහන්සේගේ උත්තම සම්බුද්ධ චරිතාපදානයේත්, සම්බුද්ධ ශාසනයේත් ශ්‍රේෂ්ඨතම සංසිද්ධීන් රැසක් සිදු වුණ සුපූජනීය දිනයක් ලෙස නවම් පුන් පොහෝ දින හැඳින්විය හැකි ය. සම්බුදු සසුන ශෝභාවත් කළ ධර්ම සේනාධිපති සාරිපුත්ත මහරහතන් වහන්සේත්, ධර්ම පුරෝහිත මොග්ගල්ලාන මහරහතන් වහන්සේත් අග්‍ර ශ්‍රාවක තනතුරු ලැබුවේ නවම් පුන් පොහෝ දිනක ය. එමෙන් ම ගෞතම සසුනේ ප්‍රථම මහා සංඝ සන්නිපාතය සිදු වූයේත්, තථාගතයන් වහන්සේ භික්ෂු සංඝයාට ඕවාද ප්‍රාතිමෝක්ෂය දේශනා කොට වදාළේත් අද වන් නවම් පුන් පොහෝ දිනක දී ම ය. පන්සාලිස් වසක් පුරාවට සදහම් අමා වැස්සෙන් තුන්ලොව නිවා සනසාලූ භාග්‍යවතුන් වහන්සේ, බුදු කිස නිමවා පිරිනිවන් පෑම පිණිස ආයු සංස්කාරය හළ වදාළේත් මෙවන් පොහෝ දිනක දී ම ය. එනයින් බලන කල නවම් පුන් පොහෝ දිනය බොදුනුවන්ගේ සිත් සැදෑ බැතියෙන් කුළු ගන්වන වැදගත් ශාසනික දිනයකි.

ප්‍රථම මහා සංඝ සන්නිපාතය හා අගසව් තනතුරු පිරිනැමීම

උරුවෙල කාශ්‍යප – නදී කාශ්‍යප – ගයා කාශ්‍යප යන තුන් බෑ පුරාණ ජටිලයන් දහසක් පිරිවර සමඟින් ආදිත්තපරියාය සූත්‍රය අසා නිකෙලෙස් මහරහතන් වහන්සේලා බවට පත් වූ සේක.

සාරිපුත්ත – මොග්ගල්ලාන මහරහතන් වහන්සේලා ප්‍රමුඛ දෙසිය පනහක් පිරිවර රහතුන් සමඟ එක්දහස් දෙසිය පනහක් මහරහතන් වහන්සේලාගෙන් වේළුවනය ඒකාලෝක විය. තරු පිරිවැරූ පුන්සඳ මඬලක් සේ එහි වැඩ හුන් භාග්‍යවතුන් වහන්සේ, දම් සෙනෙවි සාරිපුත්තයන් වහන්සේත්, මහා ඉර්ධිලාභී මොග්ගල්ලානයන් වහන්සේත් සම්බුදු සසුනේ භද්‍ර වූ අග්‍ර ශ්‍රාවක යුගල බවට පත් කළ සේක. මින් ඒකාසංඛ්‍ය කල්ප ලක්ෂයකට පෙර අනෝමදස්සී බුදුරජාණන් වහන්සේ අබියස දී විවරණ සිරි ලබා පැතුම් පරිදි ශ්‍රාවක පාරමී ඤාණය සපුරා උන්වහන්සේලා අගසව් තනතුරු ලද බව බුදුරජාණන් වහන්සේ සඟ පිරිසට පහදා දුන් සේක.

සච්ච විභංග සූත්‍ර දේශනාවේ දී භාග්‍යවතුන් වහන්සේ අග්‍රශ්‍රාවකයින් වහන්සේලාගේ ගුණ කීර්තනය කොට වදාළේ මෙලෙසින් ය.

“පින්වත් මහණෙනි, සාරිපුත්ත මොග්ගල්ලානයන් ගෞරවයෙන් ඇසුරු කරන්න. සේවනය කරන්න. ප්‍රඥාවන්ත වූ ඒ දෙනම සබ්‍රහ්මචාරීන් වහන්සේලාට නිවන් මගට අනුග්‍රහ කරන්නෝ ය. සාරිපුත්තයන් ශාසනික දරුවන් බිහි කරන මව වැනි ය. සෝතාපත්ති ඵලය පිණිස හික්මවයි. මොග්ගල්ලානයන් දරුවන් වඩන කිරි මව් වැනි ය. ඉහළ මාර්ග ඵලයන්හි හික්මවයි.”

(භජථ භික්ඛවේ සාරිපුත්ත මොග්ගල්ලානේ, සේවේථ භික්ඛවේ සාරිපුත්ත මොග්ගල්ලානෝ. පණ්ඩිතා භික්ඛූ, අනුග්ගාහකා සබ්‍රහ්මචාරිනං. සෙය්‍යථාපි ජනෙත්ති, යදිදං සාරිපුත්තෝ. සෝතාපත්ති ඵලේ විනේති. සෙය්‍යථාපි ජාතස්ස අපාදේතා, යදිදං මොග්ගල්ලානෝ. උත්තමත්ථේ.)

එමෙන් ම පැවිදි ශ්‍රාවකයින් වූ භික්ෂූන්ට ආදර්ශවත් චරිත දෙක ලෙස භාග්‍යවතුන් වහනසේ පෙන්වා වදාළේ ද අගසව්වන් වහනසේලා ම ය. සම්බුදු මුවින් අපමණ පැසසුම් ලද සාරිපුත්ත – මොග්ගල්ලාන මුනිවරයන් වහන්සේලා අග්‍රශ්‍රාවක බවට පත් වූයේ අද වන් නවම් පුන් පොහෝ දිනක දී ය.

ඕවාද ප්‍රාතිමෝක්ෂය දේශනා කිරීම

නවම් පුන් පොහෝ දින අග්‍රශ්‍රාවක තනතුරු ප්‍රදානයෙන් පසු භාග්‍යවතුන් වහන්සේ රැස්ව සිටි සඟ පිරිසට ඕවාද ප්‍රාතිමෝක්ෂය දේශනා කළ සේක. සම්බුද්ධත්වයෙන් පසු පළමු වසර විස්ස තුළ හෙවත් ප්‍රථම බෝධියෙහි ශාසනය පිරිසිදු ව නිකැළැල් ව අර්බුදවලින් තොර ව පැවතුණි. රහතන් වහන්සේලා සුලභ, විමුක්තිකාමී අල්පරජස්ක ශ්‍රාවකයින් වැඩ සිටි ඒ අවධියේ විනය ශික්ෂාපද පැනවීමට කරුණක් ඉදිරිපත් නො වී ය. භික්ෂූන්ගෙන් එබඳු වැරදි අඩුපාඩු සිදු නොවූ බැවිනි. එබැවින් මුල් අවුරුදු විස්ස තුළ ශ්‍රාවකයන්ගේ හික්මීම පිණිස වදාළේ ඕවාද ප්‍රාතිමෝක්ෂය යි. එනම් පහත ගාථා රත්නයන් ය.

1. ඛන්තී පරමං තපෝ තිතික්ඛා
නිබ්බානං පරමං වදන්ති බුද්ධා
නහි පබ්බජිතෝ පරූපඝාතී
සමණෝ හෝති පරං විහේඨයන්තෝ

“ඉවසීම තමයි පරම තපස කියා කියන්නේ. ඒ අමා මහ නිවන සියල්ලට ම වඩා උතුම් බව, බුදුරජාණන් වහන්සේලා දේශනා කරනවා. අනුන් නසන කෙනා පැවිද්දෙක් වෙන්නේ නෑ. අනුන් ව වෙහෙසන කෙනාත් පැවිද්දෙක් වෙන්නේ නෑ!”

2. සබ්බ පාපස්ස අකරණං
කුසලස්ස උපසම්පදා
සචිත්ත පරියෝදපනං
ඒතං බුද්ධාන සාසනං

“සියලු පව් නොකිරීමත්, කුසල් දහම් උපදවා ගැනීමත්, තමන්ගේ සිත පිරිසිදු කිරීමත් යන මේවා බුදුරජාණන් වහන්සේලාගේ අනුශාසනය යි!”

3. අනූපවාදෝ අනුපඝාතෝ – පාතිමොක්ඛේ ච සංවරෝ
මත්තඤ්ඤුතා ච භත්තස්මිං – පන්තං ච සයනාසනං
අධිචිත්තේ ච ආයා්ගෝ – ඒතං බුද්ධානසාසනං

“අන් අයට නින්දා අපහාස නොකිරීමත්, අනුන්ට පීඩා නොකිරීමත්, ප්‍රාතිමෝක්ෂ සංවර සීලයෙන් යුතු වීමත්, භෝජනයේ පමණ දැනගෙන වැළඳීමත්, දුර ඈත සෙනසුන් සේවනය කිරීමත්, සමථ විදර්ශනා භාවනාවේ යෙදීමත් යන මේ කරුණු තමයි බුදුරජාණන් වහන්සේලාගේ අනුශාසනය වන්නේ!”

විපස්සී, සිඛී, වෙස්සභූ ආදී දීර්ඝායුෂ්ක බුදුරජාණන් වහන්සේලාගේ ශාසනවල දී මෙම අවවාද ප්‍රාතිමෝක්ෂය පිරිනිවන් පානා තුරු ම ඒ ශාස්තෘන් වහන්සේලා විසින් උදෙසන ලදී. එනමුත් කකුසඳ, කෝණාගමන, කාශ්‍යප, ගෞතම යන සිව්බුදුවරයන්ගේ ශාසනවල දී ඕවාද ප්‍රාතිමෝක්ෂය උදෙසන ලද්දේ සම්බුද්ධත්වයෙන් පසු මුල් අවධියේ දී පමණි. ප්‍රථම බෝධියෙහි පැවිදි ශ්‍රාවකයන්ගේ තිබූ නිර්මල, විමුක්තිකාමී, පාරිශුද්ධ ස්වභාවය ක්‍රමයෙන් දුර්වල වී දුර්වලතා ඉස්මතු විය. එවිට බුදුරජාණන් වහන්සේ ආනිසංශ දහයක් පිණිස විනය ශික්ෂා පද පනවා, අඩ මසකට වරක් ඒවා උදෙසමින් පොහොය කිරීමට අනුදැන වදාළහ. එය හඳුන්වන්නේ ආණා ප්‍රාතිමෝක්ෂය නමිනි.

භාග්‍යවතුන් වහන්සේ ආයු සංස්කාරය අත්හැරීම

පන්සාලිස් වසක් පුරා දිනකට පැය 2ක් පමණක් විවේක ගනිමින්, දෙව් – මිනිසුන්ට අපමණ සෙත සැලසූ භාග්‍යවතුන් වහන්සේ සිය අසූවෙනි වියෙහි දී චාපාල නම් චෛත්‍යය ස්ථානය වෙත වැඩම කොට අග්‍රඋපස්ථායක ආනන්ද හිමියන් අමතා මෙසේ වදාළ සේක.

“පින්වත් ආනන්දය, ඡන්ද, චිත්ත, විරිය, විමංසා යන සතර ඍද්ධිපාද වැඩූ කෙනෙකුට කැමති නම් ආයුකල්පයක් වුව ද (වසර 120ක් හෝ ඊට මඳක් වැඩියෙන්) ජීවත් විය හැකි ය.”

තෙවරක් ම මේ අදහස ප්‍රකාශ කළ මුත්, ආනන්ද හිමියන්ගේ සිත පාපී මාරයා විසින් ග්‍රහණය කරගෙන සිටි බැවින්, සිහි එළවාගත නොහැකිව “එසේ වැඩ සිටින්නැ”යි ආරාධනා කළ නොහැකි විය. ඉන් පසු ආනන්ද හිමියන් ඉවතට ගිය කල්හී, පාපී මාරයා පෙනී සිට බුදුරජාණන් වහන්සේට පිරිනිවන් පානා ලෙස ආරාධනා කළේ ය. මින් තුන් මසකට පසු පිරිනිවන් පානා බව වදාළ භාග්‍යවතුන් වහන්සේ ‘ඉදිරි තුන් මස පමණක් සමාපත්තියට සමවැද ඉන් පසු නොසමවදින්නෙමී.’ යි සිහි නුවණින් යුතුව ආයු සංස්කාරය අත්හැරි සේක. එකෙණෙහි ම මහා භූමි චලනයක් සමඟින් අකුණු ගැසීම් ද සිදු වූ අතර ආනන්ද හිමියන් පැමිණ භූමි චලනයට හේතු විමසා දැනගෙන කල්පයක් වැඩ සිටින ලෙස ආරාධනා කළේ ය. එනමුත් ආයු සංස්කාරය හළ බැවින් තව තුන් මසකින් පිරිනිවන් පානා බව වදාරා බුදුරජාණන් වහන්සේ විශාලා මහනුවර කූටාගාර ශාලාවට වැඩම කළ සේක. එහි රැස් වූ භික්ෂූන් අමතා සත්තිස් බෝධි පාක්ෂික ධර්ම වදාරා, එම භික්ෂූන්ට අන්තිම අවවාදය ද කළ සේක. ඉන් පසු පාවා නගරය පසු කරගෙන කුසිනාරා නුවර මල්ල රජවරුන්ගේ උපවර්තන නම් සල් උයනට වැඩම කොට යමක ශාල වෘක්ෂයන් අතරෙහි පනවන ලද ආසනයෙහි සැතපුණ සේක. එකල්හී දෙව්බඹ පිරිස අහසෙහි දිව්‍යමය සුගන්ධයන්ගෙන් ද පුෂ්පයන්ගෙන් ද දිව්‍ය සංගීතාදියෙන් ද පූජෝපහාර දැක්වූහ. පිරිනිවන් මංචකයේ සැතපී සිටි භාග්‍යවතුන් වහන්සේ තමන් වෙත පැමිණි සුභද්‍ර නම් පරිභ්‍රාජකයා අමතා මෙසේ දේශනා කළ සේක.

“සුභද්‍රය, ආර්ය අෂ්ටාංගික මාර්ගය දක්නට ලැබෙන බුද්ධ ශාසනයක පමණයි පළමු ශ්‍රමණයා වන සෝතාපන්න ශ්‍රාවකයාත්, දෙවන ශ්‍රමණයා වන සකදාගාමී ශ්‍රාවකයාත්, තුන්වෙනි ශ්‍රමණයා වන අනාගාමී ශ්‍රාවකයාත්, සතරවෙනි ශ්‍රමණයා වන රහතන් වහන්සේත් පහළ වන්නේ.”

එම දම් දෙසුම අවසානයේ දී සුභද්‍ර තෙරුවන් සරණ ගොස් පැවිද්ද හා උපසම්පදාව ලබා සුළු මොහොතකින් සව් කෙලෙසුන් නසා අරහත්වයට පත් විය. එසේ සම්මුඛී අවසන් ශ්‍රාවකයා බිහි වූ පසු භාග්‍යවතුන් වහන්සේ අවසන් බුද්ධ අවවාදය මෙසේ වදාළ සේක.

“පින්වත් මහණෙනි, අවසන් වරට ඔබ අමතමි. සියලු සංස්කාර වැනසෙන සුලු ය. අප්‍රමාදී ව ධර්මාවබෝධ කර ගන්න.” (භන්දදානි භික්ඛවේ ආමන්තයාමි වෝ. වයධම්මා සංඛාරා, අප්පමාදේන සම්පාදේථ.)
ඉක්බිති භාග්‍යවතුන් වහන්සේ ප්‍රථම ධ්‍යානයේ පටන් නිරෝධ සමාපත්තියට ද නිරෝධ සමාපත්තියේ පටන් ප්‍රථම ධ්‍යානයට ද අනුලෝම ප්‍රතිලෝම වශයෙන් සමවැදී එයින් නැගිට යළි සතර වන ධ්‍යානයට සමවැදී සියලු සංස්කාර ධර්මයන්ගේ අනිත්‍යතාව ප්‍රකට කරමින් නිරුපාදිශේෂ පරිනිර්වාණ ධාතුවෙන් පිරිනිවන් පා වදාළ සේක. ඒ පිණිස ආයු සංස්කාරය අත්හැර වදාළේ අද වන් නවම් පුන් පොහෝ දිනක දී ය.

භාග්‍යවතුන් වහන්සේ සරණ ගිය අපත් ඒ අනිත්‍ය ධර්මතාව මෙනෙහි කරමින් ධර්මාවබෝධයට අප්‍රමාදී වෙමු.

(ඇසුර – පූජ්‍ය පණ්ඩිත මාපලගම සිරි කේමිස්සර හිමිපාණන්ගේ ‘පොහොය වර්ණනාව’ ග්‍රන්ථය.)

මහමෙව්නාවවාසී පින්වත් ස්වාමීන් වහන්සේනමක් විසින් සම්පාදිතයි.

ඒ සත්‍යානුභාවයෙන් සැමට සෙත් වේවා!!!

✨️මිතුරන් දැනුවත් වීම සදහා කරන්න.

🔆 අපගේ යට කරන්න.අපගේ එකට එකතු වන්න.

#අපේ_සිංහල_වෙදකම #සිංහල_වෙදකම #නව්‍යාජීව #නවම්_පෝය #පෝය


*** තෙරුවන් සරණයි ***