The dancing kitchen

මේ ලෝකේ මිනිස්සු විවිධාකාරයි කිව්වාට මේ තරම් විවිධාකාරයි කියලා හිතුවද..? එකම ගේ ඇතුළේ ජීවත් වෙන තුන්දෙනාට රස තුනක්..?

ෆ්‍රේයා උදේට කද්දි මම හාල් පාස්තා ලට පට දාලා තිබුණ කබඩ් එක අස් කරන්න ගත්තා. එකින් එක එයා ඉස්සරහා මේසේ උඩ තියද්දී ප්‍රශ්නය කෝටියකට උත්තරත් දෙන්න උනා. සූශි රයිස් පැකට් එකක කාලට පොඩ්ඩක් වැඩි වෙන්න තිබුණ පැකට් එකත් මේසේ උඩ තිබ්බා. ඊගාවට කොළ දෙකක් විතරක් ඉතුරු උන නෝරි පැකට් එකත් තිබ්බා. හරි, මැඩම්ට ඒක මීටර්. අපි අද රෑට සූශි කමු කිව්වා 🥴
මමත් ඉතිං මේ කෙල්ල මොනා හරි කිව්වාම ඉටි මල වගේ දිය වෙනවානේ. ඉස්කෝලේ දාන්න යන්න කලින් ෆ්‍රීසර් එකේ තිබ්බ ඉස්සෝ ටිකකුත් අයිස් යන්න එළියෙන් දාලම ගියා.

සූශි හදමු කිව්වා ඔක්කෝටම ඇති වෙන්න සූශි රයිසුත් නෑ නෝරිත් නෑ. ඉතිං ඉස්සෝ හතර දෙනෙක් පැන්කෝ වල දවටලා අරන් බැද්දා , දැන් සූශි ෆිලිං එකට දාන්න දෙයකුත් නෑ. වෙලාවට ගෙනාව අඹ ගෙඩියක් ෆ්‍රිජ් එකේ තිබුණා. ඕක කැපුවේ නැත්තේ පහුගිය ටිකේ ෆ්‍රේයාට හොඳටම කැස්ස නිසා. ඒ උනාට සූශි එකට දාන්න දෙයක් නැතිම නිසා කපලා පොඩි තීරු දෙකක් සූශි මයෝ එක්ක දාලා ඉස්සෝ ටිකත් තියලා රෝල් කලා. හරි එකක්.

අපි දෙන්නාට පොකේ බෝල් දෙකක් හදනවා කියලා හිතුවට ඉතුරු බත් මදි දෙන්නාටම. අනිත් ඉස්සෝ ටිකට ගම්මිරිස් කුඩු, සෝයා සෝස්, ස්වීට් පප්‍රිකා, ලුනු දාලා තෙල් හැන්දක් දාලා පෑන් ෆ්‍රයි කලා. ඒකෙන් බාගයක් හස්බන්ඩ්ගේ පොකේ එකට දැම්මා. තව අහුවෙන්
අහුවෙන, දකින දකින ඒවා දාලා ඒකත් හැදුවා.

ඉතුරු ඉස්සෝ ටිකට හිතෙන හිතෙන ඒවා දාලා හැදුවා සැලඩ් එකක්. ගෙනාවා වකාමේ පැකට් එකක් ෆ්‍රීසර් එකේ තිබුණා. ඒකෙන් ටිකකුත් ඩීෆ්‍රොස්ට් කරලා ගත්තා..

මට කෑම ටික දැක්කම හිතුනේ යකූ තුන්දෙනෙක් ඉන්න ගෙදර මෙහෙම නම් හත් අට දෙනෙක් ඉන්න ගෙයක් උනොත් මෙතන හෝටලයක් කරන්න වෙනවානේ කියලා...

දැකලා තියෙනවාද මගේ බ්‍රෙක්ෆස්ට් ටෝස්ට් වලට මම වැඩිපුරම එකතු කරන මගේ චිලි ඔයිල් එක...? ඒ අපේ ගෙදර නොවරදින කෑමක්. එකක් ඉවර වෙද්දි එකක් හැදෙනවා. ගොඩාක්ම මගේ බ්‍රෙක්ෆස්ට් ටෝස්ට් වලට තමා මම එකතු කරන්නේ. මේක හදාගෙන තියාගත්තාම ඕනම දෙයක් කන්න පුළුවන් මේකත් එක්ක. ස්ටීම් හරි පෑන් ෆ්‍රයි කරපු හරි ඩම්ප්ලිං මේකත් එක්ක කලවම් කරලා ඩම්ප්ලිං ලොරියක් උනත් කන්න පුළුවන්. බිත්තර බදින්න, ස්ක්‍රැම්බල් එග්ග් උඩින් එකතු කරන්න, අවකාඩෝ ටෝස්ට් වලට, ඔයාට මේකෙන් හදන්න පුළුවන් කෑම ජාති ගොඩායි.

පහුගිය ටිකේ කිහිප දෙනෙක්ම මැසේජ් කරලා රෙසිපි එක ඉල්ලුවා.එ වෙලේ හදපු එකේ ටිකක් තිබුණා. මම රෙසිපි පෝස්ට් එකක් විදියට දාන්න හිතනවා නම් විතරයි කිරලා මැණලා කෑම හදන්නේ. නැත්නම් ඔක්කොම වෙන්නේ ඇහේ මිම්මට. ඉතිං මගේ චිලි ඔයිල් එක ඉවර උන වෙලේ මේ සැරේ ඔක්කොම කිරලා මැණලාම හැදුවා ඔයාලා වෙනුවෙන්ම.

මම මේ අමුද්‍රව්‍ය වලට අමතරව අමතරව rice vinegar එකතු කරනවා. ඒත් මම මේක හදන වෙලේ මගේ rice vinegar එක ඉවරයි. ඔයාට තියෙනවා නම් 1 තේ හැන්දක් වගේ එකතු කරන්න. නැත්නම් ඒත් ප්‍රශ්නයක් නෑ..

⚠️මතක ඇතුව heatproof glass bowl හෝ glass jar එකකට ඔක්කොම අමුද්‍රව්‍ය ටික එකතු කරලා ඒකට හොඳටම රස්නේ තෙල් එකතු කරන්න. නැත් නම් ඔයාගේ භාජනය පුපුරන්න බලයි. ප්ලාස්ටික් භාජන කොහෙත්ම ගන්න එපා.
⚠️මම ගත්තේ sunflower oil ඔයාට පොල් තෙල්, ඔලිව තෙල්, තල තෙල් වගේ නැතුව අනිත් තෙල් වර්ගයක් ගන්න පුළුවන්. උදාහරණයක් විදියට canola oil, peanut oil, seeded oil, soya oil.
⚠️හොඳටම නිවුනම මේක හොඳට වහලා ෆ්‍රිජ් එකේ තියාගෙන කන්න පුළුවන් මාසයක් උනත්. අපේ ගෙදර නම්
උපරිම මාසයක් වගේ තමා මේක තියෙන්නේ. සමහර මාස වල ඊටත් අඩුයි.

මේ ඔරිජිනල් විදිය නෙමේ. මට පහසු, මම කැමති අමුද්‍රව්‍ය එක්ක මම දැන් කාලයක ඉඳන් හදන්න පුරුදු වෙලා ඉන්න මගේම රෙසිපි එක..

-heatproof ceramic/glass bowl එකකට කෑලි මිරිස් 50 ග්‍රෑම් එකතු කරන්න. දැන් ඒකට පොඩියට කපාගත්ත සුදුළූණු බීක් 4ක් එකතු කරන්න. පොඩියට කපාගත්ත සම්පූර්ණ ළූනු ගහක්, තල ඇට හැඳි 2ක් (ඔයාට ඇලර්ජික් නම් මේක අත අරින්න) දුඹුරු සීනී තේහැඳි 1/2ක්, ලුනු ඔයාට කැමති තරම්, සෝයා සෝස් තේහැඳි 3ක්, රයිස් විනිගර් මේසහැදි 1ක්, තක්කාලි සෝස් මේසහැදි 2ක්. මේ ටික කලවම් කරලා පැත්තකින් තියන්න.

-මේ අතරතුර තෙල් මිලිලීටර් 300ක් වගේ හොඳටම රත් කරන්න. ඊට පස්සේ ඒ තෙල් එක අර කෑලි මිරිස් බෝල් එකට එකතු කරන්න.

-ඔක්කොම හොඳට කලවම් කරලා හොඳටම නිවෙන්න තියන්න. ඊට පස්සේ පිරිසිදු වියළි වීදුරු බෝතලයකට දාලා ෆ්‍රිජ් එකේ ඇසුරුම් කරලා තියාගන්න.

හැදුවොත් මාවත් මතක් කරන්න. මහන්සි වෙලා ලියනවට ලයික් කරලා ශෙයා කරලා දෙන්න පුළුවන් නම්. 🌸

හවස් වෙද්දි රෙසිපි වීඩියෝ එක අරගෙන එනෝ...

සතිඅන්තේ මගේ බත් පිඟාන. අපේ ගෙදර මුළු සතියේම light meals, low carb meals කාලා කලා සතිඅන්තේ වෙනකම් ඉන්නේ අපි දෙන්නා කටට රසට බත් ටිකක් කන්න. හැබැයි ඉතිං දෙන්නම දෙයියනේ කියලා අර මුළු සතියේම බොහොම අමාරුවෙන් කට පාලන කරලා අඩු කරගත්ත බර තත්පරේට වැඩි කරගන්නවා සතිඅන්තේ. මගේ මේ සතියේ මෝඩ ප්ලෑන් එකටයි සතිඅන්තේ බඩජාරි ප්ලෑන් එකටයි අපේ මනුස්සයාත් මට හැම සතිඅන්තේම බත් එක කාලා ඉවර උනාම බනිනවා. ඊළඟ සතිඅන්තේ නම් මෙහෙම ගොඩාක් උයන්න එපා කියන කෙනාම තමා ඊගාව සතිඅන්තේත් හීමීච්චා වගේ ගිහින් දෙවැනි වතාවටත් බත් බෙදාගන්නේ...

සාමාන්‍යයෙන් මම දන්න ගොඩාක් අය බීට් කන්න මාරම ආසයි. හැබැයි මම නෑ. ඉස්සර ඒ කිව්වේ හැබැයි මීට අවුරුදු හතර පහකක් වෙනකම්ම මගේ අකමැතිම ලිස්ට් එකේ උඩින්ම තිබුනේ බීට්. මම ඉස්කෝලේ යන කාලේ නම් කෑවේම නැති තරම්. වෙන හේතුවකට නෙමේ රතු පාටට. දැන් මේක කියෙව්වාම ආයේ ඔයා බීට් කද්දි මාව මතක් උනොත් මට බනින්න එපා. ඒ ඉතිං ඉස්කෝලේ යන වයස උන්න මගේ ඔළුවට බීට් දැක්කම හිතුණ දේ. මම බත් එක රතු පාටට දකින්න කැමති නෑ. මට ඒක නිකන් බත් එකේ ලේ ගොඩාක් වගේ පෙන්නේ. මම ඒ දවස් වල අපේ අම්මාට බීට් එකේ හැන්ද අනිත් හොදි වලටවත් දාන්න දෙන්නේ නෑ. හැබැයි ඉතිං මෙහේට ආවට පස්සේ ටික ටික ගොඩාක් දේවල් වයසත් එක්ක හොඳ උනා. දැන් ඉතිං තිහත් පැනලානේ, බීට් ගොඩාක් හෘද වස්තුවට හොඳ කෑමක් ඒ හින්දා දැන් මම පොඩ්ඩ පොඩ්ඩ කනවා. ඉඳලා හිටලා උයනවා. හැබැයි ෆ්‍රේයාට නම් බීට් තියෙනවා නම් බත් කන්න මුකුත් ඕනා නෑ. ඊයේ දෙපාරක් බත් කෑවා බීට් එක්ක. ලංකාවට ගිය වෙලේ කවී නංගී _scrumptious_diaries හම්බඋනා පළවෙනි වතාවට. මාව දැක්ක ගමන් කිව්වේ ඔයා නේද බීට් කන්නේ නැත්තේ කියලා 🙊 එයාට මාව මතක තිබිලා තියෙන්නේ ඒ පොයින්ට් එකෙන්.

යාන්තම් ගෝවා කෑල්ලක් තිබුණා. එහාටත් නැති මෙහාටත් නැති. පරිප්පු දාලා කිරට ඉව්වා ඒක. වෙන ළමයි පරිප්පු ඉල්ලා ඉල්ලා කද්දි ෆ්‍රේයා කන්න අකමැතිම කෑමක් පරිප්පු. ඊයේ බත් කැව්වේ එයාට හස්බන්ඩ්. මට කලින්ම ෆ්‍රේයා කිව්වා එයාට පරිප්පු එපා කියලා. ඒත් ඉතිං ඕක මට හස්බන්ඩ් බත් එක බෙදද්දි කියන්න අමතක උනා. අඩේ...!! බත් එක දැකලා හොටු පෙරාගෙන ඇඬුවේ නැතෑ පරිප්පු දාලා කියලා. ආයේ පරිප්පු වැදුන බත් එක්කම අයින් කරලා කන්න දුන්නේ හස්බන්ඩ්. හැබැයි ඒ වෙලේ ඒක මම කවන්න ගත්තා නම් කථාව ඔයිට වෙනස්. තාත්තාලානේ දුවලා ගහන ගහන පදේට නටනවානේ.. 😏

ආයේ ඉතිං ෆ්‍රේයාට චිකන් කෑල්ලක් එයා ෆ්‍රයර් එකේ දාලා අපි දෙන්නාට ඉතුරු ටික චිකන් කළුපොල් හැදුවා. මම ආසම චිකන් එහෙම කන්න. ඒ උනාට එච්චර කැටයම් දාලා උයන්න හෙනම කම්මැලි නිසා අවුරුද්දටම දෙපාරක තුන්පාරක් වගේ තමා හදන්නේ. රෙසිපි එක මෙතන.

https://www.instagram.com/p/CoUme0QIEAY/?igsh=MWN2M2x2bncya3JnOQ==

දැන් තමා රස පාර්ට් එක. වම්බටු කියන්නේ මම ආසම කෑම වලින් උඩින්ම තියෙන කෑමක්. අපේ අම්මා වම්බටු හදන්නේ ගැඹුරු තෙලේ බැදලා අරන් ආයේ කිරි දාලා උයනවා. මමත් උයනවා නම් එහෙම උයන්නේ හැබැයි දැන් ගැඹුරු තෙලේ බදින්නේ නෑ එයා ෆ්‍රයි කරනවා. මේ නම් එයා ෆ්‍රයි කරපු වම්බටු මෝජු. මම රෙසිපි එක දැක්කේ Iro’s Kitchen by Iromi අපේ ඉරෝගේ පේජ් එකෙන්. ඔයත් ගැඹුරු තෙලේ බදින්න අකමැති කෙනෙක් නම් මේ රෙසිපි එක ට්‍රයි කරන්නම ඕනා. හරිම ලේසියි වගේ රසයි. මට හාල්මැස්සන් තිබුණේ නෑ. ඒ හින්දා මම උම්බලකඩ ටිකක් දැම්මා ඒ umami ගතිය දැනෙන්න. අනික පොඩි ළූනුයි අමු මිරිසුත් ටිකයි තිබුණේ. ඒ උනාට අනිත් ඒවා එක්ක රසටම ආවා. ගොඩාක් ස්තූතියි ඉරෝ 😘

ඉරෝගේ බටු මෝජු රෙසිපි එක

https://www.instagram.com/reel/CnUXjrYqU9M/?igsh=MTBvZzZveXdmaWVoMA==

සිනීසම්බෝල බනිස්
බිත්තර බනිස්...
අද කරපු ඕර්ඩර් එක මේ. ඉතිං ගොඩාක් ස්තූතියි හැමෝටම 😘

අන්තීම ඕර්ඩර් එක අරන් යන්න එනකම් ඉන්නවා. මට දැන් මහන්සියි. උදේ ඉඳන් මේ ටික හදලා, ගෙදර වැඩත් ඉවර කලා. දැන් මහන්සි නිවෙන්න නිදාගන්න ඕනා 🥺

මම ඉපදුන දා ඉදන් මුහුදයි කළපුවෙනුයි වට වෙලා උන්නේ. ඒ හින්දා වෙන්න ඇති සමහර අය මුහුදට ආසා කලාට, මුහුද දිහා බලාගෙන ඉන්න ආසා උනාට මට නම් ඒ ආසාව මගේ කැමතිම ලිස්ට් එකේ අන්තීමටම තියෙන්නේ.

මුහුදට ආදරේ කියන අය ගැන මම මුකුත් කියන්නේ නෑ. ඒ ඒ අයට විවිධ හේතු ඇති මුහුදට ආදරේ කරන්න. අර තියෙන එකාට අගේ නෑ කියන සීන් එක තමා මට තියෙන්නේත්. ලංකාවේ ගෙවල් තියෙන්නේ මුහුදයි කළපුවයි එක්ක. අපේ තාත්තාට පිං සිද්ද වෙන්න කියලා ඉතාලි ආවා ඒ ආවා දා ඉදන් ජීවත් උනේම මුහුද ඇස් ඉස්සරහ තියාගෙන. 2016-2018 වෙනකම් අපි දෙන්නා මිලානෝ උන්නා. ඒ අවුරුදු දෙක විතරයි මගේ ඉතාලි ජීවිතේ අවුරුදු දාසයටම මුහුද නැතුව උන්නේ..

මම හරි ආසයි කඳුකර පරිසර වලට. කඳු දිහා බලාගෙන ඉන්න. හැම වෙලේම වහින චුරු චුරු වැස්සට, කොළම කොළ පාට පරිසරයට. උදේට තියෙන මන්දාරම් අඳුරට. කැලෑ මල් පිරුණු පාළු වතු වලට. ඒ දිහා බලාගෙන හවස් වරු ගෙවන්න. පොතක් කියවන්න. කෝපි කෝප්පයක් තොල ගාන්න.

කොටින්ම මම මුහුදුකරේ ඉපදුණ කඳුකර ජීවිතේට ලෝබකම් කරන වැල්ලේ කෙල්ලෙක්.

ඉතිං දැන් කියලාත් වෙනසක් නෑ. ගේ පිටිපස්සේ තියෙන්නේ මුහුද. හූවේ දුර. දැන් ඉතිං ටික ටික රස්නේ එන කාලෙනේ. අපි දැන් වැඩිපුරම කෝපි කෝප්පයක් බොන්න යන්නේ මේ පැත්තේ. ඒ උනාට මට තාමත් රිලෑක්ස් වෙන්න, සංසුන් වෙන්න බෑ මුහුද දිහා බලාගෙන. මාව නිවෙන තැනක් නෙමේ මුහුද. මේ මොහොත විඳින්න තව ගොඩාක් අය සල්ලි වියදම් කරන් මේ පැත්තේ එද්දි කොටින්ම කිව්වොත් ගේ පිටිපස්සේ, ඇස් ඉස්සරහා තියෙන දේ ගැන අගයක් නෑ මට නම්.

මට නම් ඕනා දවසක කන්දක් උඩ ගෙදරකට වෙලා හවසට මොනා හරි බේක් කරගෙන කුකුල් පැටව් ටිකක් ඇති කරගෙන පොතක් කියවන ජීවිතයක්...

ඒ වගේ ඔයාලට මොනාද එහෙම හිතෙන්නේ...

ප.ලි. ඔය pizza එකට කියන්නේ pizza Rossini කියලා. මේක කන්න ඕනා නම් පේසරෝම එන්න වෙනවා. මොකද මේ සිටි එකටම ආවේනික උන පීට්සා එකක් මේක.

මම ඔය හිටපු ගමන් යකා ගහපු වෙලාවල් වලට වනාගෙන උයාපුවා තමා ගොඩාක් වෙලාවට ඔයාලා දකින්නේ. ඒක සාමාන්‍යයෙන් වෙන්නේ සතිඅන්තේ ලං වෙද්දි. සාමාන්‍යයෙන් සතිය පුරාවටම අපේ ගෙදර කන්නේ එහෙන් මෙහෙන් මම එහා මෙහා කරලා ගන්න ඒවා.

මම දැන් අවුරුදු කිහිපයක ඉඳන්ම කොත්තු රොටි, මස් රොටි, බිත්තර රොටි, මාළු රොටි ඔය එකී මෙකී නොකී රොටි හැම එකටම වගේ ගන්නේ ෆ්‍රෝසන් පරාතා. ඕක එහාට මෙහාට කරලා මට රෙසිපි සීයයක් උනත් හදාගන්න පුළුවන් මේ වෙද්දි. ඉතුරු මස් හොදි තියෙනවා නම් මේවලින් ක්ෂණික කොත්තු හදනවා මම. උදේට අතට අහුවෙන අඩුම කුඩුම ඔක්කොම දාලා බිත්තර දෙකක් බීට් කරලා යාන්තමට ෆ්‍රෝසන් පරාතා එක පෑන් කුක් වෙද්දි අර බිත්තර එකත් දාලා බිත්තර රොටි හදනවා උදේට කන්න. ඔය වගේ ඉතිං වැඩ ගොඩයි මේ ෆ්‍රෝසන් පරාතා වලින්. හැබැයි මම අකමැතිම මේ පරාතා වල තියෙන පැණිරස ගතියට. ඒක නැත් නම් මේවා නියමයි.

මේ ටිකේම කෑව සැලඩ් එකට එයා ෆ්‍රයර් කරලා හදාගත්ත චිකන් බ්‍රෙස්ට් එකේ තව ටිකක් තිබුණා. සැලඩ් කෑවාත් ඇති, චිකන් කෑවත් ඇති කියලා හිතුන නිසා ඊයේ දවල් ඒ ටික කෑලි වලට අතින් කඩාගෙන තෙම්පරාදුවක් දැම්මා කැරට්, ගෝවා, ළූනු, සුදු ළූනු දාලා. ලුනු, ගම්මිරිස්, කෑලි මිරිස්, මිරිස් කුඩු, කහ කුඩුත් දාලා ඔක්කොම තෙම්පරාදු වෙද්දි air fryer කරගත්ත මස් ටිකත් එකතු කලා. අල තම්බන්න අල තිබ්බේ නෑ. ෆිලිං එක හරි. ඊට පස්සේ ෆ්‍රෝසන් පරාතා එක හොඳටම ඩීෆ්‍රොස්ට් කරන්න හොඳ නෑ. එතකොට නවාගන්න බෑ රොටිය. යකඩේ වගේ හයිය ගතිය පොඩ්ඩක් ගියාම ලාවට වැනෙන ගානට වෙනකම් ඩීෆ්‍රොස්ට් උනාම පරාතා එක හත්පොළේ ගාගන්නේ නැතුව නවාගන්න පුළුවන්. මතක ඇතුව ෆිලිං එක හොඳටම නිවෙනකම් ඉන්න. ඒක රස්නේ උනොත් ඔයාගේ ෆ්‍රෝසන් පරාත එක චුයින්ගම් එක වගේ ඇදිලා එන්නේ. අත්දැකීමෙන් කියන්නේ හොඳේ.

නවාගන්න විදිය. පෑන් එකේ රොටිය රත් කරගන්න විදිය වීඩියෝ එකක් ගේන්නම්. පේනවානේ, ඔය එක එක රොටි කන්න පරාතා රොටි හද හද ඉන්නම ඕනා නෑ.