AyurCare

කඩල යනු පෝෂණ ගුණ රැසකින් සපිරි රසවත් ධාන්‍ය වර්ගයක්.

මේවායේ අපේ ශරීරයට අත්‍යවශ්‍ය ප්‍රෝටීන්, යකඩ ,තයමීන්, රයිබොෆ්ලේවින් සහ කැල්සියම් වැනි පෝෂණ ගුණ රැසක් අන්තර්ගත වෙනවා.එබැවින් කඩල ආහාරයට ගැනීමෙන් අපට ලැබෙන සෞඛ්‍ය ප්‍රතිලාභ රැසක් පවතිනවා.ඒ වගේම කඩල, බොහොමයක් රෝග සඳහා ඉතාමත් ගුණදායකයි.එපමණක් නොව ඔබ නිර්මාංශ පුද්ගලයෙක් නම් කඩල නිතර ආහාරයට ගැනීම ඔබේ සෞඛ්‍ය සඳහා බෙහෙවින් ප්‍රයෝජනවත් වෙනවා.

ඉතින් කඩල ඇට තම්බා, තෙම්පරාදු කර ,වෑංජනයක් ආකාරයට මෙන්ම රොටී,තෝසේ ආදී විවිධ ආකාර වලට ඔබට ආහාරයට ගැනීමේ හැකියාව පවතිනවා.එමඟින් අස්ථි ශක්තිමත් වීමේ සිට රක්තහීනතාවය සමනය කර ගැනීම දක්වා ප්‍රතිලාභ රැසක් ලබා ගන්න ඔබටත් පුළුවන්.ඉතින් කඩල ආහාරයට ගැනීමෙන් ඔබට ලැබෙන සෞඛ්‍ය ප්‍රතිලාභ කිහිපයක් ගැන බලමු.

කඩල ආහාරයට ගැනීමෙන් හිසකෙස් සම්බන්ධ ගැටළු රැසක් වළක්වා ගන්න ඔබටත් පුළුවන්.එය ඔබේ හිසකෙස් වර්ධනය ප්‍රවර්ධනය කර හිසකෙස් කැඩීම වළක්වාලීමට ඔබට සහාය වෙනවා.

කඩල ඇට වල මැංගනීස් ඛනිජ ලවණ වන තයමින්, මැග්නීසියම් සහ පොස්පරස් වැනි සෞඛ්‍ය අත්‍යවශ්‍ය පෝෂක ගණනාවක් අන්තර්ගත වෙනවා.එබැවින් කඩල ආහාරයට ගැනීමෙන් ඔබේ ප්‍රතිශක්තිකරණ ශක්තිය ඉහළ නංවා ගන්න ඔබටත් පුළුවන්.

බඩවැල් ආශ්‍රිත ගැටලු රැසක් සමනය කිරීමට කඩල වලට හැකි බව අධ්‍යනයකින් පවා හෙළි වී තිබෙනවා.එසේම කඩල, ආහාර ජීර්ණ පද්ධතියෙන් ද්‍රව්‍ය සංචලනය වීමට සහ මලබද්ධය වළක්වාලීමට උපකාරී වෙනවා.

කඩල ආහාරයට ගැනීමෙන් දෙවන වර්ගයේ දියවැඩියා ඇති වීමේ අවදානම අවම වෙනවා .

ඔබේ අස්ථි සෞඛ්‍ය සඳහා හොඳම ආහාරයක් වශයෙන් කඩල හඳුන්වා දෙන්නට පුළුවන්.ඒවා විටමින් K වලින් පිරී ඇති හෙයින් ඔබේ අස්ථි ශක්තිමත් හා නීරෝගී කිරීමට දායක වෙනවා.

LDL කොලෙස්ටරෝල් මට්ටම අඩු කිරීමට කඩල ඇට බෙහෙවින් උපකාරී වෙනවා.එසේම කඩල සතුව හෘද වාහිනී රෝග මෙන්ම අංශභාගය ඇතිවීමේ අවදානම අවම කිරිමේ හැකියාව ද පවතිනවා.

සමේ ඇතිවන සියුම් රේඛා, රැළි වැටීම්, අඳුරු ලප මෙන්ම අඳුරු වීම වැනි සම සම්බන්ධ ගැටළු රැසක් සමනය කිරීමට කඩල උපකාරී වෙනවා.එබැවින් ඔබේ සම තරුණ හා පැහැපත් ලෙස තබා ගැනීමට ඇති හොඳම ක්‍රමයක් නම් කඩල ඇට ආහාරයට ගැනීමයි.

කඩල ආහාරයට ගැනීම අක්ෂි සෞඛ්‍ය සඳහා ඉතාමත් ගුණදායකයි.මන්දයත් කඩල වල ඇස් පෙනීම වැඩි දියුණු කිරීමට සහාය වන විටමින් A අඩංගු වෙනවා. එබැවින් කඩල ආහාරයට ගැනීමෙන් පැහැදිලි හා වඩා හොඳ දැක්මක් ලබා ගැනීමට ඔබට පුළුවන්.

කඩල කියන්නේ යකඩ වලින් පොහොසත් ප්‍රභවයක්.එම නිසා එය ඔබේ ශරීරයේ ඛනිජ ලවණ අවශ්‍යතාවය තෘප්තිමත් කිරීමට මෙන්ම රක්තහීනතාව ඇති වීමේ අවදානම අවම කිරීමට ද ඔබට උපකාරී වෙනවා.

කඩල ඇට වල ෆයිටෝ-ඊස්ට්‍රජන් (ශාක හෝමෝන) මෙන්ම සැපොනින් (ප්‍රතිඔක්සිකාරක) අන්තර්ගත වෙනවා. මෙම සං‍යෝග පියයුරු පිළිකා ඇතිවීමේ අවදානම අඩු කිරීමට උපකාරී වෙනවා

අධි රුධිර පීඩනයෙන් පෙළෙන පුද්ගලයින් සඳහා ද කඩල ඉතාමත් ගුණදායකයි.මන්දයත් එය රුධිර නාල වල පවතින ගැටළු සමනය කර රුධිර පීඩනය යථා තත්වයට පත් කිරීමට උපකාරී වෙනවා.

ඇඟ දැවිල්ල වැනි රෝගයකින් පෙළෙන්නේ නම් කඩල තම්බා ආහාරයට ගැනීමෙන් එම තත්ත්වය මඟ හරවා ගන්න ඔබටත් පුළුවන්.

කුඩා දරුවන් සිටින මව්වරුන් සඳහා කඩල ආහාරයට ගැනීම ඉතාමත් ගුණදායකයි.මන්ද කඩල ආහාරයට ගැනීමෙන් මව් කිරි වර්ධනය වෙනවා.

නිතර ඇතිවන කැස්ස සමනය කිරීම සඳහා ද කඩල ඇට ආහාරයට ගැනීම ඉතාමත් ගුණදායකයි.

කඩල කියන්නේ පෝෂණ ගුණ රැසක් සපිරි රසවත් ධාන්‍ය වර්ගයක් බව දැන් ඔබට පැහැදිලියි.ඇත්ත වශයෙන්ම කඩලවල අහිතකර ගුණයක් නොමැති තරම් ය.නමුත් බොහෝ කෑම අහිතකර වන රෝගීන්ට කඩල ද අහිතකර විය හැකි බව මතක තබා ගන්න.

නීරෝගීමත් බව සඳහා සෞඛ්‍ය සම්පන්න ආහාර වැඩ් වැඩියෙන් ගැනීමටු සිතට ගනිමු.
ලෝක ආහාර දිනය අදයි...

ඔබේ ඔසප් චක්‍රය අක්‍රමවත් ද?

ස්ත්‍රියක් නිරෝගී බව අනාගතයේ නිරෝගී දරුවකු ලබා ගැනීමට හැකියාව පවතිනවා යන්න නිර්ණය කල හැකි ඉතා වැදගත් සාධකයක් තමයි ක්‍රමවත් ඔසප් චක්‍රයක් පැවතීම.මෙහි අක්‍රමිකතා පැවතීම නොසලකා හැරිය යුතු තත්ත්වයක් නොවෙයි.එය දරුවන් ලබා ගැනීම මෙන්ම ප්‍රජනක ඉන්ද්‍රියයන් ආශ්‍රිතව ඇතිවන දීර්ඝකාලීන රෝග තත්ත්ව වලටද හේතු විය හැකියි.

එසේනම් අපි විමසා බලමු නිරෝගී ආර්තවයක ලක්ෂණ මොනවාද කියල

ආයුර්වේදානුකූලව විමසා බලන විට,

වැඩිවියට පත් වූ ස්ත්‍රියකගේ
-චන්ද්‍ර මාස 1කට වරක් එනම් දින 28කට වරක් සිදුවන
-නොඇලෙන සුලු
-දාහ වේදනාවෙන් තොරවූ
-දින 3-5ක් පවතින්නාවූ
ප්‍රමාණය ඉතා අධික හෝ අල්ප නොවූ (අංජලී 4ක ප්‍රමානය -80ml)
-රත් පැහයට හුරු වූ ( රතු ඔලිඳ ඇටයක පැහැය,හාවාගේ රුධිරයේ වර්ණය,රතු නෙලුම් පෙති යුෂ වර්ණය..) යෝනිමාර්ගයෙන් පිටවන රුධිරය නිරෝගී ආර්තවය ලෙස හැදින්විය හැකියි.
-එමෙන්ම සේදු විට පැල්ලම් නොසිට ඉවත් වී යා යුතුය.

මේ ලක්ෂණ වලින් වෙනස් වී පවතින ඕනෑම තත්ත්වයක් ඔසප් අක්‍රමිකතාවක් ලෙස හදුනා ගත හැකියි.

ඒ අනුව

-ඔසප් 2ක් අතර කාලය ඉතා දීර්ඝ වීම හෝ කෙටි වීම ( දින 25- 35අතර සිදු වීම සාමාන්‍ය ලෙස සැලකිය හැකියි)

-අධික වේදනාවෙන් යුතුව ඔසප් රුධිරය පිටවීම ( වේදනානාශක භාවිතා කිරීම අත්‍යවශ්‍ය වීම)

-ඔසප් පවතින දින ගණන දින 2කට වඩා අඩු වීම හෝ දින 7කට වඩා වැඩි වීම

-අධික රුධිර වහනයක් සිදු වීම හෝ ඉතා අල්ප.රුධිර ප්‍රමාණයක් පිටවීම (දිනකට භාවිතා කරන සනීපාරක්ෂක තුවා ගණන මගින් මෙය නිර්ණය කල හැක)

-රුධිරය සමග තද පැහැයෙන් යුත් කැටිති පිටවීම ( ගර්භාෂයේ තුනී බිත්ති ගැලවීයාම නිසා මද වශයෙන් කැටිති තිබිය හැකි වුවත් අධික ලෙස පවතින කැටිති ස්වභාවය අස්වාභාවික විය හැක)

-ඔසප් 2ක් අතර කාලයේදී මද වශයෙන් නිතර රුධිරය පිටවීම

-රුධිරයේ වර්ණය ඉතා තද කලු පැහැයට හුරු වීම හෝ ලා රතු පැහැයෙන් යුක්ත වීම

මෙලෙස ඔසප් අක්‍රමිකතා ඇති වීමට හේතු මොනවාද ???
-ගර්භණීත්වය හෝ මව් කිරි ලබාදීම
-මානසික ආතතිය
-නිසි පෝෂණය නොලැබීම
-සමහර රෝගී තත්ත්වයන්
-සමහර රෝගවලට ගන්න ඖෂධ
-හෝමෝන අඩංගු උපන් පාලන ක්‍රම
-සිරුරේ බර වැඩිවීම
-සිරුරේ හෝමෝන අසමතුලිතතාව(PCOD)

මෙලෙස ඇතිවන අක්‍රමිකතා වලට අවධානය යොමු නොකොට නිසි ප්‍රතිකාරයක් වෙත යොමු නොවී නොසලකා හැරීමෙන් විවිධ රෝගාබාධ වලට ලක් වීම මෙන්ම අවශ්‍ය අවස්තාවේ දරුවකු ලබා ගැනීමට නොහැකි විම බොහෝ කාන්තාවන් අත්විදින තත්ත්වය බවට පත් වී තිබේ.

නිවැරැදි ලෙස ආයුර්වේද ප්‍රතිකාර වලට යොමු වීම මගින් මෙම තත්ත්වය ඉතා හොදින් සුව කල හැකි අතර එහිදී ඖෂධ මෙන්ම නිවැරැදි ආහාර පාන ,ජීවන රටාව පිලිබදවත් අවධානය යොමු කිරීම සිදු විය යුතුයි.

ලෙඩ වලින් බේරෙන්න වෙරළු ආහාරයට ගන්න...

වෙරළු ශ්‍රීලංකාවට හා ඉන්දියාවට ආවේණික ශාකයකි. 15m ක් පමණ උසට වැඩෙන වෙරළු ගස පළල්ව පැතිරුණු අසමමිතික හැඩයක් ඇති වියනකින් යුක්තය. පෙබරවාරි, මාර්තු හා සැප්තැම්බර්, ඔක්තෝම්බර් යන මාස වලදී වෙරළු මල් හටගනී. වරකට විශාල වශයෙන් පිපෙන වෙරළු මල් වලින් එයටම ආවේණික සුවඳක් නිකුත් වේ. සාමාන්‍යයෙන් ඕවලාකාර හැඩැති වෙරළු ගෙඩි ඒවායේ විශාලත්වය, රසය සහ පැහැය යනාදියෙන් විවිධත්වයක් පෙන්වයි.

ඒ අනුව දේශීයව හඳුනාගත හැකි වෙරළු ප්‍රභේද ලෙස,

• මස් වෙරළු
• පොල් වෙරළු
• ගල් වෙරළු
• නිල් වෙරළු (විදේශයෙන් හඳුන්වා දී ඇත.)

ආදී ලෙස වෙරළු වර්ග ගණනාවක් හඳුනාගත හැකිය.

ගල් වෙරළු යනු ආහාරයට නොගන්නා වෙරළු විශේෂයකි. එහෙත් එහි බීජයේ මදය කොට්ටම්බා මෙන් ආහාරයට ගන්නා බවද පැවසේ. ඉහත කී වෙරළු විශේෂ ශ්‍රී ලංකාවේ උද්භිද උද්‍යාන වල හා ගෙවතු වල දක්නට ලැබේ.

ඉදුණු ඵල නැවුම් පලතුරක් ලෙස ද, පැසුණු ඵල තම්බා හෝ අච්චාරු ලෙස සකසා ගැනීමෙන් ද ආහාරයට ගනී. ඉදුණු ඵල යොදාගෙන රසවත් බීම හා ආහාර වර්ග පිළියෙල කළ හැකි අතර, වෙරළු ඵල හා පත්‍ර ආයුර්වේදයේ දී පාචනය, අතීසාරය, හිස්හොරි හා පටපණුවන් මර්ධනයට ඔසු ලෙස භාවිතා කරයි. වෙරළු මී මැසි පාලනයේදී රොන් ලබාගැනීමේ ප්‍රභවයක් ලෙස ද යොදාගනි. එසේම වෙරළු උද්‍යාන අලංකරන කටයුතු වලට භාවිතා කළ හැකි අලංකාර ශාකයකි.

වෙරළු වල පෝෂණය :-

වෙරළු රසවත් මෙන්ම පෝෂණ ගුණයෙන් ඉහළ පලතුරකි.

වෙරළු 100g ක ඇති පෝෂණය

• ජලය - 80.2g
• ශක්තිය - 72Kcal (කිලෝ කැලරි)
• ප්‍රෝටීන් - 1.2mg
• කාබෝහයිඩ්‍රේට - 16.2g
• කැල්සියම් - 18mg
• පොස්පරස් - 29mg
• විටමින් C - 30mg
• මේදය - 1.2g
• කැරොටින් - 330mg
• තයමින් - 20mg
• රයිබොෆ්ලෙවින් - 0.4mg

දේශීය වෙදකමේදී වෙරළු භාවිතය

දියවැඩියාවට ප්‍රත්‍යක්ෂ ගුණ දෙන හොඳම දේශීය පලතුරකි වෙරළු. ඔබ දියවැඩියාවෙන් පෙලෙන අයෙකු නම් මෙහි සත්‍ය අසත්‍යතාවය ඔබට අත්දැකිය හැකියි. හොඳට ඉදුණු වෙරළු ගෙඩි 15 ක් පමණ දිනකට ආහාරයට ගන්න. මෙය උදේ, දවල්, සවස ඕනෑම වෙලාවක ගත හැකියි. රාත්‍රී කාලයේදී ආහාර ජීර්ණය ප්‍රමාද වී සිදුවන නිසා වෙරළු රාත්‍රියට ආහාරයට ගතහොත් එහි නියම ප්‍රතිඵල ඔබට ලබාගන්නට නොහැකි වේවි. මේ විදිහට සති 02ක් වෙරළු ආහාරයට ගෙන ඔබ ඔබගේ සීනි මට්ට්ම පරීක්ෂා කරගන්න. එවිට ඔබේ රුධිර සීනි මට්ටම පහත ගොස් ඇති බව ඔබම අත්දකීවි.

දියවැඩියාවට විතරක් නෙවෙයි ශරිරයේ හටගන්නා විෂ සහිත තත්වයන් සමනය කිරීම, හෘදයාබාධ ඇතිවීම වැළැක්වීම, පිළිකා සෛල වර්ධනය වීම වැළැක්වීම, ආහාර දිරවීම පහසු කිරීම, ශරීරයේ තැන්පත් වන මේද ප්‍රමාණය අඩුකිරීම, සම ශක්තිමත් කිරීම හා ලේ පිරිසිදු කිරීම ආදී බොහෝ ගුණ ඔබට වෙරළු ආහාරයට ගැනීමෙන් උරුම වෙනවා.

වෙරළු ගෙඩි වල විතරක් නෙවෙයි වෙරළු කොළ කියන්නෙත් දේශීය වෙදකමේ හිස්හොරි මර්ධනය කිරීමට යොදාගන්නා ප්‍රමුඛ පෙලේ ඖෂධයක් වගේම එදිනෙදා භාවිතා කළ හැකි හොඳ අත්බෙහෙතක්. හිස්හොරි මර්ධනය කිරීම සඳහා වෙරළු කොළ අඹරා එහි ඉස්ම හිසේ ආලේප කිරීම ද හිසෙහි හටගන්නා බොහෝ රෝග තුරන් කරගැනීම සඳහා දියනෑමට විනාඩි 20 කට පමණ පෙර වෙරළු කොළ, ගොඩපර සමඟ කොටා එහි යුෂින් හිස සේදීම ද සිදුකළ හැකියි.

වෙරළු වලින් සැකසෙන රසවත් ආහාරපාන

වෙරළු බීම

මේ සඳහා හොඳට ඉදුණු වෙරළු ගෙඩි විස්සක් විතර ගන්න. ඇටය ඉතිරි වෙන්න මද ටික කපා ගන්න. මෙයට වතුර බෝතල් බාගයක් දමන්න. එයට ලුණු ටිකක් හා අවශ්‍ය පරිදි සීනි එක්කරන්න. හොඳට මද ටික පොඩිකරගන්න. බ්ලෙන්ඩර් කළත් කමක් නැත. වඩාත් රසවත් වීමට අයිස් කැට කීපයක් හා කසකසා ඇට ටිකක් එක් කරන්න. මෙය ඉතා රසවත් ගුණවත් පානයක්. ශරීරයේ මේදය නසයි. බඩගින්න නිවාගනී. උදරය බසී. කාන්තාවන්ගේ මාස් දිනවලට ඉතාම ගුණයි. ශක්තිය උදාකරයි. කිරිමව්වරුන්ට කිරි වර්ධනය කරයි.

වෙරළු අච්චාරු

වෙරළු කහ එක්කර තම්බා ගන්න. මේ සඳහා විනාකිරිද ටිකක් එක්කර ගන්න. මෙයට ලුණුඇඹරැල්ලා ගෙඩි කීපයක් පොත්ත ශුද්ධ කර කෑලි කපා එක්කරන්න. අන්නාසි, ඇඹුල් ලොවි, අඹ ජපන් බිලිං (ඇඹුල් නෙල්ලි) මිරිස් කුඩු සමඟ තම්බාගත් වෙරළුවලට දමා හොඳට කලවම් කරගන්න. අවශ්‍යනම් සීනි ස්වල්පයක් එක්කරගන්න. විනෝද චාරිකාවක් යන විට රැගෙන යාමට සවස් වරුවේ විනෝද අවස්ථාවකට ගැළපෙන සිංහල ආහාරයක් වශයෙන් සඳහන් කිරීමට හැකි අතර මෙයින් උදරයේ ඇති රෝග නිවාරණය සිදුවේ. බඩ පිපුම ආහාර දිරවීම අජීර්ණතාවයන් සුව කිරීමට මෙම අච්චාරුවට හැකියාව ඇත.

වෙරළු ව්‍යාංජනය

වෙරළු මදයට රතුළූණු, අමුමිරිස්, උම්බලකඩ, තුනපහ, මිරිස්කුඩු, කහකුඩු ස්වල්පයක් දමා දියකිරෙන් තැම්බෙන්නට හැර පසුව ඒවා මිටිකිරෙන් සිඳුවා පිසගන්න.

සුව නින්ද කැන්දන චර්‍යා හා ප්‍රතිකාර විධි...

ආහාර, නින්ද, බ්‍රහ්ම චර්‍යාව ආයුර්වේදයේ හඳුන්වන්නේ ත්‍රයෝ උපස්තම්භ ලෙසයි. එනම් නිරෝගී බව රඳා පවතින ප්‍රධාන උපස්තරයන් තුන ලෙසයි.

අපගේ ජීවිත කාලයෙන් අඩක්ම නින්දට ගෙවී යන්නේ යැයි පොත පතේ සඳහන් වේ. මිනිසාගේ පරමායුෂ වසර සියයක් නම් ඉන් අඩක්ම නින්දට ගෙවී යන බව ඉපැරණි මතයයි. අපගේ නින්දේ ප්‍රධාන කොටස් හතරකි. නින්දේදී මිනිස් මොළය මේ අදියර හතරේ දී වෙනස් වෙනස් විද්‍යුත් ආවේග වලින් සංඥා නිකුත් වේ.

අවදි තත්වයේ සිට නිදි බර තත්වයට සංක්‍රමණය මීට අයත් ය. මෙය සංක්‍රාම සමය ලෙස හැඳින්වේ. එය පළමු අදියරයි. රැයක ඔබගේ නින්දෙන් 45% ක් පමණ දෙවන අදියරට
අයත් වේ. ගැඹුරු නින්දට පිවිසීම තුන්වන අදියර යි. ඉතා ගැඹුරු නින්ද මෙලෙස හතරවන අදියරට අයත් වේ.

ප්‍රමාණවත් නින්දක් නොලැබීම හේතුවෙන් සෞඛ්‍ය ගැටලු රාශියක් ඇති වේ. ආයුර්වේද වෛද්‍ය ක්‍රමය තුළ නින්ද නොයෑම හඳුන්වන්නෙ "අනිද්‍රාව" ලෙසයි. බටහිර වෛද්‍ය ක්‍රමයේදි එය "Insomnia" නමින් හඳුන්වයි. ප්‍රධාන වශයෙන් වාත දෝෂයද, එමෙන්ම පිත් දෝෂය ද අධිකව කිපෙන සිරුරක කායික දෝෂ හේතුවෙනුත් දුක, භය, ක්‍රෝධය, ආවේගශීලි බව නිසා වන රජස් ආධි මානසික දෝෂ කිපීමද අනිද්‍රාවට හේතු වේ.

කෙනෙක්ට කෙටි කාලීනව පවතින අනිද්‍රාව සමහරෙක්ට දීර්ඝකාලීනව පැවතිය හැකියි.
වයස්ගත වන විට ස්වභාවිකව සමහරෙක්ට නින්ද නොයෑම සිදුවන්නේ වාත දෝෂය වයස්ගත වන විට කිපෙන නිසයි. එමෙන්ම වාත ප්‍රකෘතික පුද්ගලයාට නින්ද නොයෑමේ ගැටළු පහසුවෙන් ඇති විය හැකියි.

කෙනෙකුට නිදහසේ ඇස් දෙක පියවෙනවා කියන්නෙත් ඇත්තටම ඒක ලොකු පිනක ප්‍රති විපාකයක්. ප්‍රමාණවත් නින්දක් නැතිව, හරියට තියා කොහෙත්ම නින්දක් නැතිව "අනිද්‍රාව", "Insomnia" වගේ සැලකිය යුතු රෝග තත්වයන් වලින් අද සමාජයේ බොහෝ පිරිසක් නිහඬවම පීඩා විඳිනවා.

නින්ද කියන දේ පුද්ගලයෙකුට කෙතරම් වැදගත් දෙයක් ද යන්න කෙනෙකුගේ නීරෝගීතාවයට හේතුවන ප්‍රධාන ස්ථම්භයන් 03 වන ආහාර, බ්‍රහ්මචර්‍යාවට අමතරව නින්ද ද ඇතුලත් කර තිබීමෙන් ඔබට සිතාගත හැකියි නේද?

ඉපැරණි පත පොත පවසන ආකාරයට අපේ ජීවිත කාලයෙන් හරිම අඩක් වැය වන්නේ මෙම නින්ද සඳහායි. නින්දකට පිවිසෙන විට අපේ මොළය අවස්ථා හතරකදී එකිනෙකට වෙනස් විද්‍යුත් ආවේග සංඥාවන් නිකුත් කරනු ලබන බවත් එලෙස නින්ද ප්‍රධාන අදියර හතරකට බෙදා වෙන් කල හැකි බවත් දැක්වෙනවා.

01). අවදි තත්වයේ සිට නිදිබර තත්වයට කෙමෙන් සංක්‍රමණය වීම (සංක්‍රාම සමය) පළමු අදියර ලෙස ද,
02). සමස්ත නින්දෙන් 45% ක් පමණ දෙවන අදියරට ද,
03). ගැඹුරු නින්දට පිවිසීම තුන්වන අදියර ලෙස ද,
04). ඉතා ගැඹුරු නින්දට පිවිසීම සිව්වන අදියර ලෙස ද,

සැලකෙනවා.

කෙනෙකුට මෙලෙස නින්ද තම ජීවිතයෙන් ක්‍රමයෙන් අහිමි වී යාමට බලපාන බොහෝ හේතු සාධක තිබෙන අතර ආයුර්වේදය තුළ එය විස්තර වන්නේ වාත දෝෂය හා පිත් දේෂය අධිකව කිපෙන සිරුරක හටගන්නා කායික දෝෂයන් නිසාත්, බිය, දුක, ක්‍රෝධය, ආවේගශීලී බව ආදිය නිසා රජස් ආදී මානසික දෝෂයන් කිපීමත් මෙම නින්ද නොයෑම හෙවත් අනිද්‍රාවට හේතුවන බවයි.

කෙනෙකුට මෙය කෙටිකාලීනව බලපැවැත්විය හැකි වුවත් තවත් අයෙකුට මෙය දීර්ඝකාලීනව පැවැත්විය හැකියි.

වයස්ගත වන විට කෙනෙකුට ජීවිතයෙන් නින්ද ක්‍රමයෙන් අහිමිවී යාමට හේතුව වන්නේ, වයසත් සමඟ වාත දෝෂය කිපීමට ලක්වීමයි. ඇත්තටම එය එය ස්වභාවික සංසිද්ධියක්.
නින්ද නොයෑමට හේතු

නිදි වර්ජිත බව පුරුද්දක් වීම.
ජීවන ගැටළු
ආහාර පාන
දුම්පානය
අධිකව මත්පැන් පානය
ක්‍රෝධය, වෛරය, බිය, ශෝකය ආදී සිතෙහි ඇති වන පීඩාකාරි අදහස්
ව්‍යායාම මදකම
විවාහ ජීවිතයේ ගැටළු
නින්ද නොයාම ගැන නිතර සිතීම
දහවල් නිදා ගැනීම
ආමාශගත ආබාධ
කාංසාව හා මානසික ආතතිය
ශරීර ආබාධ ද
මෙයට හේතුවක් වේ.

උකුළු ප්‍රදේශයේ වේදනාව, හෘද රෝග, ආමාශයේ තුවාල, පෙනහළු ගත රෝග, කොන්දේ ආබාධ, ස්නායු ගත රෝග ආදිය ද මෙලෙස නින්දට බාධා ඇති කරයි.

ප්‍රතිකාරයන් ලෙස

සුබවාදීව ජීවිතය දෙස බලන්න.
ඔබේ ගැටළු අනෙක් අය සමඟ
සුහදව කතා කරන්න.
කායික ආබාධ පවතී නම් වෛද්‍යවරයකු
හමුවන්න.
මානසික තත්වය ගැන ද විමසිලිමත් වන්න
ජීවන රටාවේ වෙනසක් කරන්න.
ප්‍රමාණවත් ලෙස ව්‍යායාම් කරන්න.
සමබර ආහාර වේලක් ගන්න.
භාවනාව, සංගීතය හා යහපත් කායික මානසික පුරුදු නින්ද සඳහා යහපත් පුරුදු ලෙස ජිවිතයට එක් කරගන්න.

බලවත් ලෙස නින්ද නොයෑමේ (insomnia ) තත්වයක් පවතී නම් සුදුසුකම් ලත් වෛද්‍යවරයකු හමුවන්න.

රණවරා, බෙලිමල්, ඉරමුසු වැනි පාන වර්ග දෛනික පානයන් අතරට එක් කරගන්න.
මෙවැනි රෝගීන්ට නෙල්ලි ,ගොටුකොළ ගුණදායකය.

වෛද්‍ය උපදෙස් පරිදි තමාට සුදුසු තෛලයක් තෝරාගෙන භාවිතා කිරිමට හැකිනම් එය වඩාත් සුදුසුය.

වතුරත් බෙහෙතක්ද?

ජලය කියන්නේ ශරීරයට අත්‍යවශ්‍ය සාධකයක් කියන එක අපි හැමෝම දන්නා කරුණක්. කිසිම අපහසුවකින් තොරව තවමත් පිරිසිදු පානිය ජලය සොයා ගන්න පුළුවන් වටපිටාවක ජිවත් වෙන අපි, ජලය පානයෙන් ලැබෙන වැසි ගැන හරියට තේරුම් අරගෙන නැති නිසා වර්තමානයේ බොහොමයක් ලෙඩරෝග වලින් පීඩා විදිනවා.

නිරෝගීව ජිවත්වීමට පෝෂ්‍යදායී ආහාර වේලක් වගේම ජලයද අත්‍යවශ්‍ය සාධකයක්. සාමාන්‍යයෙන් අපේ ශරීරයට දවසකට වතුර වීදුරු 08ක් වත් පානය කිරීම අත්‍යවශ්‍යයි. නමුත් ඔබ දවසකට වතුරු වීදුරු 08ක් බොන්න ඕනේ කියලා, ඔබට මතක් වුන වෙලාවක එකපාරම වතුර විදුරු ගණන් බොන එක නම් වැරදියි. මොකද ඒකෙන් වෙන්න නැති ලෙඩ හදාගැනීමක් විතරයි.

️ශරීරයේ බර අනුව එක් එක් පුද්ගලයා දිනකදී පානය කලයුතු ජලය ප්‍රමානය සරලව ගණනය කල හැකියි.ඒ අනුව තමාගේ බර 30න් බෙදූ විට ලැබෙන අගය තරම් ප්‍රමානයක් දිනකදී අපගේ ශරීරයට ජලය අවශ්‍යය.
ඒ අනුව ඔබේ බර 60kg නම් ඔබ දිනකට වතුර ලීටර2ක් පානය කල යුතුයි.

ඔබ වතුර බොද්දි කරන තවත් වැරැද්දක් තමයි, කෑම ගන්න අතරතුර වතුර බොන්න පුරුදු වෙලා ඉන්න එක. එමගින් ආමාශයෙන් ශ්‍රාවය වන ආමාශයික යුෂය තනුක වී ආහාර දිරවීමේ ගැටලු ඇති වෙන්න පුළුවන් වගේම කෑම කාලා ඉවර වෙච්ච ගමන් වතුර විදුරු ගණන් බොන එකත් ශරීරයට හොද නැහැ. කෑම කෑවට පස්සේ වතුර උගුරක් දෙකක් බොන එක වගේම පැය 1/2 කට පස්සේ වතුර උගුරු කිහිපයක් බොන්න පුරුදු වෙන්න එකත් හොදම ක්‍රමය විදිහට හදුන්වන්න පුළුවන්.

ඒ වගේම ව්‍යායාම කරපු ගමන්, කෑම ගොඩක් අරන් ඉන්න වෙලාවටත් එකපාර වතුර ගොඩක් බොන එකත් සුදුසු වෙන්නෙ නැහැ.

පුරුද්දක් විදිහට ඔබ උදෑසන හිස්බඩ මද උණුසුම් වතුර වීදුරුවක් බොන්න.
ආයුර්වේදයේදී පුද්ගලයකු නිරෝගීව සිටීමට සිදු කලයුතු චර්‍යාවන් අතර ප්‍රධාන තැනක් මෙයට හිමි වෙනවා.
නින්ද නිසා පැය 8 ක් විතර වේලිච්ච ඔබේ ශරීරයට මේ වැටෙන වතුර වීදුරුව නිසා ඔබේ මුළු ශරීරයම ප්‍රාණවත් කරන්න උදව් වේවි. හැබැයි වතුර බීලා පැය 1/2 ක් විතර යනකම් කිසිම ආහාරපානයක් ගන්න එපා. ඒ වගේම ඔබ ගැස්ට්‍රික් රෝගයෙන් පීඩාවිදිනවානම් මේ පුරුද්දෙන් ඔබට යහපත් ප්‍රතිඵලයක් ලබා ගන්න පුළුවන් වේවි. ඒ වගේම ඔබ තරමක් ස්ථුල පුද්ගලයෙකු නම් උදෑසන අවදි වූ වහාම මදරස්නෙ වතුර වීදුරුවකට මී පැණි තේ හැඳි 1/2 ක් පමණ දමා බොන්න එය ස්ථුලභාවය මට්ටු කරන්න ඔබට උදව් වේවි.

නිවැරදිව ජලය පානය කිරීමෙන් ඔබට වැළඳෙන බොහෝ රෝගාබාධවලින් මිදීමට අවස්ථාව පවතී.
මූලිකවම ආහාර මාර්ගය ආශ්‍රිතව ඇතිවන රෝගවලින් වැළකී සිටීමට ඔබට හැකිය. මලබද්ධය, අර්ශස්, ග්‍රහණි, ගෑස්ටයිට්‍රිස් (අම්ලපිත්ත) මෙහිදී විශේෂ වෙයි.

එමෙන්ම, හිස ආශ්‍රිතව ඇතිවන රෝග – ඉරුවාරදය, ආතතිය
කොඳු ඇට පෙළ ආශ්‍රිතව ඇතිවන රෝග,
විශේෂයෙන් බෙල්ල ආශ්‍රිතව ඇතිවන රෝග වළක්වාගත හැකිය.

අස්ථි සම්බන්ධ රෝග වළක්වාගත හැක.
උදා-(වාතකණ්ඨක) – උදෑසන නැගිටින විට විලුඹ බිම තැබීමට ඇති අපහසුතාව

ශරීරයේ ඇති අනවශ්‍ය මේදය හා කොලොස්ටරෝල් ඉවතට ගමන් කිරීම පහසු කරයි.

එසේම, සමහර රෝග සඳහා ජලය ඖෂධයක් ලෙසද භාවිත වන බවද සඳහන් කළ යුතුය. එමෙන්ම, වකුගඩු ආශ්‍රිත රෝග – මුත්‍රා ගල් ඇතිවීමද නිවැරදිව පිරිසුදු ජලය පානය කිරීමෙන් වළක්වා ගන්න පුළුවන්.

ජලය නිසි ලෙස පානය කිරීමෙන් ඔබගේ සම නිරෝගී වීම හා පැහැපත් වීම, සෛල නිතර අලුත්වැඩියා වීමෙන් ඔබේ වයසට යෑමේ වේගය අඩු කරයි.

මතක තබාගැනීමේ ශක්තිය හා සිතීමේ ශක්තිය වර්ධනය වේ.

පහසුව නිසා වර්තමානයේදී දෙමවුපියන් තම දරුවන්ට නිරන්තරයෙන් කෘතීම වසවිෂ සහිත ආහාර පාන ලබාදීමට පෙළඹී තිබෙනවා. ඔවුනට ජලය වැඩිපුර පානය කිරීමට දීමෙන් එම ආහාරවල ඇති විෂ ගතිය මූත්‍ර සමග පෙරී යාමට උපකාරී වේ.

ඔබ කාර්යබහුල පුද්ගලයෙක් වුනත්, පැය 1/2 කට සැරයක් වතුර උගුරු 3 ගානේ වත් බොන්න පුරුද්දක් ඇතිකර ගත්තොත් ඔබට නොදැනීම දවසට අවශ්‍ය ජල ප්‍රමාණය ලබා ගන්න පුළුවන්.එමගින් ඔබට බොහෝ ලෙඩ රෝග අඩු කර ගනිමින් නිරෝගීව සිටීමට හැකිවනු ඇත.

Sciatica හෙවත් ගෘද්‍රසී රෝගය

කොන්ද ප්‍රදේශයේ සිට කලවා කෙණ්ඩා ප්‍රදේශයට පැතිර යන වේදනාව ආයුර්වේද වෛද්‍ය විද්‍යාවේ ගෘද්‍රසී රෝගය නමින් හැඳින්වේ. විශේෂයෙන් මෙය පාද වල පිටුපස ප්‍රදේශය ඔස්සේ පහලට විහිදී යයි. සමහර අවස්ථා වලදී මෙය කටී (කොන්ද/තුනටිය) ප්‍රදේශයේ පමණක් පවතින අතර තවත් සමහර අවස්ථා වලදී පාද වල පමණක් පවතී. බහුලවම හමු වන්නේ කොන්ද ප්‍රදේශයේ සිට පාද දක්වා පැතිර යන වේදනාව සහිත අවස්ථාවන්ය.

කොඳු ඇට පෙලෙහි ඇතිවන ස්නායු තෙරපීම මෙම රෝගයට හේතුව ලෙස දැක්වේ. මේ සඳහා ඉතා සාර්ථක ප්‍රතිකර්ම ආයුර්වේද වෛද්‍ය විද්‍යාව සතු වේ. වේදනා නාශක, ශල්‍යකර්ම ආදියෙන් තොරව ඉතා සරල ප්‍රතිකර්ම මගින් මෙම රෝගය බොහෝ දුරට සුව කරගත හැකි වන අතර මේ සඳහා බාහිර ආලේපන ඖෂධ සහ අභ්‍යන්තර ශාකසාර ඖෂධ භාවිත වේ. නිසි ආකාර ආයුර්වේද ප්‍රතිකාර මගින් සති දෙකක් වැනි කාලයකදී වේදනාකාරී රෝග ලක්ෂණ 90% ක් පමණ අඩු කරගත හැකි වේ.

ප්‍රතිකාර සඳහා විමසන්න

උදේට ඇඳෙන් නැගිට්ට ගමන් කකුල බිම තියන්න බැරිතරම් කැක්කුම ද?
යටිපතුලට උල් කටුවකින් හැමතිස්සෙම අනිනවා වගේ රිදුම් දෙනවා ද?
කොච්චර බෙහෙත් බිව්වත් ගුණයක් නැද්ද?

ඔබ දන්නවාද ලෝකයේ මිලියන දෙකකට ආසන්න පිරිසක් මෙම රෝගයෙන් පීඩාවට පත්ව සිටින බව.

නමුත් එම රෝගී තත්ත්වය විධිමත් වූ වෛද්‍ය ක්‍රම මඟින් සුවකර ගත හැකි බව සතුටට කරුණකි.

ඔබත් මෙවැනි අපහසුතා වලින් පෙළෙනවාද?

උදේට ඇදෙන් බිමට පාද තැබීමේ අපහසුව

විලුඹේ තද ගතිය සහ ඇව්දීමේ අපහසුතාවය

බොහෝ වෙලාවක් වාඩි වී සිටි තැනින් නැගිට සිටීමේ අපහසුව

පාදය ඉදිමීම

මස් කෙන්ඩ ප්‍රදේශයේ ඇතිවන වේදනාව සහ ඉදිමුම

කොන්ද කැක්කුම

පතුලේ හිරිය

දැවිල්ල

බොහෝ දෙනෙක් මේවනවිට පීඩා විදින රෝගී තත්වයන් ලෙස මෙය හදුන්වාදිය හැක.

බහුලවම මෙම තත්වය ඇතිවන්නන් ලෙස, අවදානම් කාණ්ඩ (Risk Factors)

වයස අවුරුදු 40 - 70 අතර පිරිස

අධික තරබාරුවෙන් පෙලෙන පුද්ගලයන්

බොහෝවිට අඩි උස පාවහන් පැලදින කාන්තාවන්

කාන්තාවන් සඳහා ප්‍රවණතාවය වැඩිය

අධිකව ඇවිදින සහ වැඩිවේලාවක් සිටගෙන සිටින අය

වැඩිපුර අසම බිම් මතුපිට රළු පොලොවේ අධිකව ඇවිදින අය

වකුගඩු ආසාදන තත්වයන්ගෙන් පෙලෙන පුද්ගලයන් හට ඇතිවේ.

යටිපතුල් වක්‍රතාවයහි ඇති විකෘතිතා

විලුබෙ හි ඇතිවන තියුණු අනින සුළු වේදනාව(Stabbing Pain).

උදෑසන අවදි වීමෙන් පසුව, පියවර කිහිපයක් ඇවිදීමට නොහැකි වීම.

කාර්යයක් කිරීමේදී වේදනාව ඇති නොවූවත් එය අවසන් වූ පසු වේදනාව ඇතිවීමට පටන් ගැනීම.

මේ සදහා බටහිර ප්‍රතිකාරවලදී කෙරෙනුයේ වේදනානාශක එන්නත් විදීම හෝ විලුඹ ආශ්‍රිතව ඇති කණ්ඩරාව ශල්‍යකර්මයකට බදුනු කිරීම හා වේදනා නාශක පෙති ලබාදිම සිදුකරයි..මෙය තාවකාලිකව සුවපත් වූවද බොහෝවිට කල්යාමත් සමග මෙම තත්වය නැවතත් ඇති වේ.

ආයුර්වේදය තුළ මේ සදහා චිකිත්සාව ඉතා සාර්ථකව දක්වා ඇති අතර ඒ සදහා විශේෂ පත්තු වර්ග හා තැවිලි වර්ගත් ඇත. ඒවා අවස්තානුකූලව යොදා ගත හැක. එය ඉතාම සාර්ථකය.

මේ සදහාද රෝගයත්, රෝග ඉතිහාසයත්, රෝගියාත් පරික්ෂාකර බලා වෛද්‍යවරයා විසින් ප්‍රතිකාර නීර්නය කළ යුතුය. ඉතා සාර්තක අභ්‍යන්තර ඖෂධ මෙන්ම බාහිර ඖෂධ දේශීය හා ආයුර්වේද ප්‍රතිකාර තුළ ඇති බැවින් ප්‍රතිකාර සදහා යොමු වීමෙන් ඉතාමත් කෙටි කලකින් නැවත ඇතිවීමකින් තොරව සුවපත් කළහැක.

. උඳුගොව්වෝ කෑම යනු හිසේ තැනින් තැන හිස කෙස් ගැලවී ගොස් පැල්ලම් වැනි කැපී පෙනෙන තට්ටය කොටස් ඇති කරනු ලැබීමකි.මෙය ස්වයං ප්‍රතිශක්තිකරණ රෝගී තත්වයකි.
ආයුර්වේද වෛද්‍ය විද්‍යාවේදී මෙම තත්වය ඉන්ද්‍රලුප්ත ලෙස හැදින්වෙන අතර බටහිර වෛද්‍ය විද්‍යාවේදී උඳුගොව්වන් කෑම කියා හදුන්වන්නේ Alopecia Areata කියන තත්ත්වයවේ. ඒත් මේ රෝගය වැළඳෙන ක්‍රමය කුමක්ද කියා මෙතෙක් සොයාගෙන නැත
උඳුගොව්වන් කෑම ඇති වන්නේ කුමන වයස් කාණ්ඩවල අයටද ?

මේ රෝගය සඳහා වයස් බේදයක් හෝ ස්ත්‍රී පුරුෂ බේදයක් කොහෙත්ම බලපාන්නෙ නෑ. කුඩා දරුවන්ට පවා මේ රෝගය වැළදෙන්න පුළුවන්
උඳුගොව්වෝ කෑම ඇති වීමට හේතු
ආයුර්වේදයේ සදහන් හේතුන්

බ්‍රාජක පිත හිස කරා පැමිණ හිස කෙස් හෙලීම බාහිර ක්‍රිමි ආසාදන හේතුවෙන්
වෙනත් හේතුන්
ශරීර අභ්‍යන්තර රෝග (immunological) නිසා මෙවැන්නක් ඇතිවන්න ඉඩ කඩ ඇත
එමෙන්ම මෙම රෝගී තත්වය ඇති අයෙක් පවුලේ සිටි නම් එම තත්වයට ගොදුරු වීමට වැඩි ඉඩක් තියෙනවා.
මෙම තතවය ඇති වන්නේ ජානමය හේතු නිසාද නැතිනම් මානසීක පීඩනය නිසාද යන්න තවම නිශ්චිතවම කියන්න බැහැ.
මීට අමතරව ඒ ඒ පුද්ගලයන්ට බලපාන මානසික පීඩාකාරී තත්ත්වයන් හේතු කරගෙන මේ චර්ම රෝගය ඇතිවිය හැකියි. රෝගී තත්ත්වයක් නිසා හෝ සමීපතමයකුගේ මරණයක් නිසා හෝ වෙනයම් කරුණක් හේතු කරගෙන ඇතිවන මානසික ව්‍යාකූලත්වය, ආතතිය හේතුවිය හැක
මෙය බෝ වන චර්ම රෝගයක්ද ?

කොහෙත්ම නෑ. වෙනත් කෙනෙක්ගෙන් තවත් අයෙක්ට මේ රෝගය බෝ වීමේ ප්‍රවණතාවක් නොමැත
රෝග ලක්ෂණ
මෙහි ප්‍රධාන රෝග ලක්ෂණය වන්නේ කෙස් වැටීමයි. එහිදි හිස්කබලේ කාසි ප්‍රමාණයේ පැල්ලම් සහිත වෙන විදියට කෙස් හැලීමට පටන් ගන්නවා.
රැවුල සහ ඇහි බැම ඇතුළුව හිසකෙස් වර්ධනය වන ඕනෑම තැනක මෙම තත්වය ඇති විය හැක
හිසේ කෙස් හැලීමට පෙර එම ප්‍රදේශයේ කැසීම හෝ දැවිල්ලක් ඇතිවීම සිදුවෙන්න පුළුවන්.
හිසකෙස් මුල විනාශ නොවන අතර එම නිසා කෙස්වල දැවිල්ල අඩු වුවහොත් හිසකෙස් නැවත වර්ධනය වීමට හැක.
මෙම තත්වය අත් පා වල නියපොතු වලටද බලපෑම් ඇති කරන්න පුළුවන්.
මෙහිදී මුළු හිස් කබලේම හිසකෙස් ගැල වී යාම හෝ ඉද හිට අවස්ථාවල මේ තත්වය මුළු සිරුර පුරා පැතිරීම වුවද දකින්න පුළුවන්.

උඳුගොව්වෝ කෑමෙන් පීඩා විදින අයට හිසකෙස් ආරක්ෂා කිරීමට ගත හැකි පියවර
* හිරු එළියට යන විට හිරු රැසින් ආරක්ෂා විය හැකි ආලේපන භාවිතා කරන්න.
* ඇහි බැම සහ ඇහි පිහාටු ආරක්ෂා වන හිරු රශ්මියෙන් ඇස් ආරක්ෂා කරන ආවරණ කණ්නාඩි පළඳින්න.
* හිස හිරු රැසින් රැක ගැනීමට තොප්පි, විග් සහ ස්කාෆ් වැනි හිස් ආවරණ භාවිතා කරන්න.
මෙම රෝගි තත්වය නිකරුනේ වැළදෙන්නේ හෝ බෝවන්නේ නැහැ.නමුත් හිසකෙස් හැලීයාම නිසා මානසිකව පීඩනයට ලක්විය හැක.

එලෙසම ආයුර්වේද වෛද්‍ය විද්‍යාවේදී මෙම තත්වයෙන් මිදීමට සාර්තක බාහිර ප්‍රතිකාර ඇත. එබැවින් නිවැරදි ප්‍රතිකාර සදහා යොමු වී ඉතා සාර්ථක ප්‍රතිඵල ලබාගන්න

නහර ගැට ගැසීම / ශිරා ග්‍රන්ථි ( Varicose veins)

වර්තමානය වන විට සෑම වැඩිහිටි පුද්ගලයන් හතර දෙනෙකුගෙන්ම එක් අයෙක් එනම් 23% ක ප්‍රතිශතයක් මෙම රෝග තත්වයෙන් පෙළෙයි. සාමාන්‍ය කට වහරේදී "නහර ගැට ගැසීම" ලෙස හදුන්වනු ලබන අතර බටහිර වෛද්‍ය විද්‍යානුකූලව " Varicose veins" ලෙස දක්වා ඇත.


නහර ගැට ගැසීම සුලභව හට ගනුයේ පාදය ආශ්‍රිතව වේ. පාදයෙහි ඇති අපිරිසුදු රුධිරය හෘදය කරා ගෙන යාමට විශේෂනය වූ ශිරා පද්ධතියක් පවතී. ගුරුත්වයට එරෙහිව රුධිරය පාද වල සිට හෘදය කරා ගෙන යාම පහසු වීමට මෙම ශිරා ආශ්‍රිතව එක් දිශාවකට පමණක් විවෘත වන කපාට පවතී. මෙම කපාට හරි හැටි ක්‍රියාත්මක නොවීම නිසාවෙන් රුධිරය යා යුතු දිශාවට විරුද්ධ දිශාවට ගමන් කිරීම නිසාවෙන් හෝ එම අපිරිසුදු රුධිරය පාදය ආශ්‍රිතව සංචිත වීම නිසාවෙන් Varicose vein හට ගනියි.
මෙහි දී විශාල වූ, ඉදිමුනු ශිරාවන් පාදයෙහි හට ගනියි.

නහර ගැට ගැසීම වේගවත් කරන හේතු

•ගර්භිණී කාන්තාවන්ට.( බොහෝ විට ගර්භිණී භාවය අවසන් වන විට මෙය යථා තත්වයට පත්වේ)
•අධික තරබාරු බව.

බොහෝ විට පුද්ගලයන් මේ සදහා ප්‍රතිකාර කිරීමට නැඹුරු නොවේ.නමුදු,
•පාදයෙහි ඉදිමුම.( විශේෂයෙන්ම වළලුකර ආශ්‍රිතව හට ගනියි)
•අධික වේදනාව.
•පාදයෙහි අපහසුව නිසා රෝගීන් ප්‍රතිකාර සදහා යොමුවේ.

ලක්ෂණ

•බොහෝ විට වේදනාව නොපවතී.
•ශිරාවන් ඉදිමී පිටතට ඉලිප්පී පවතී.

ඇතැම් විට,

•පාදයෙහි අධික වේදනාව.
•පාදයෙහි බර බව. (බොහෝ විට ව්‍යායාම වලින් පසුව සහ රාත්‍රියේ දී)
•කුඩා අනතුරක දී පවා අදාල ස්ථානයෙහි අධික රුධිර වහනයක් වේ.
•ඉදිමුම.( වළලුකර ආශ්‍රිතව)
•ශිරා ජාලයන් හට ගනී. (Spider veins)
•පාදයෙහි වර්ණය කළු පැහැයට නැඹුරු වේ.
•කැසීම.
•වියළි බව.
•කෙණ්ඩ පෙරලීම.
•පාදයෙහි සුදු පැහැති ලප ඇති වේ.



අවධානම් සාධක

•ආර්තවහරණය.
•ගර්භිණී භාවය.
•වයස අවුරුදු 50 ඉක්මවීම.
•දීර්ඝ කාලීනව සිටගෙන සිටීම.
•පවුල් ඉතිහාසයක් පැවතීම.
•තරබාරු බව.

•ලිංග භේදය( පිරිමින්ට වඩා කාන්තාවන්ට හට ගනී.එයට හේතුව කාන්තාවන්ගේ පවතින හෝමෝන මගින් ශිරාවන් ලිහිල් කිරීම විය හැකි බවට මතයක් පවතී), උපත් පාලන පෙති හෝ hormone therapy.

•රැකියාව(දීර්ඝ කාලීනව හිටගෙන සිටින රැකියා වල නිරත වීම)

නහර ගැට ගැසීම සදහා ප්‍රතිකාර ලෙස බටහිර වෛද්‍ය විද්‍යානුකූලව ශල්‍ය කර්මයන් සිදු කරයි. ආයූර්වේදයෙහි මේ සදහා ඉතා සාර්ථක චිකිත්සා පද්ධතියක් දක්වා ඇත. එය යටතේ කූඩැල්ලන් ඇල්ලීම මගින් අපිරිසිදු රුධිරය ඉවත් කිරීම වර්තමානයේ දී සුලබව කරනු ලැබේ.
මේ සදහා ප්‍රතිකාර කිරීමේ දී රෝගියා නිසි පත්‍යාපත්‍ය අනුගමනය කිරීම ඉතාමත්ම වැදගත් වේ. ඒවා අතරින් දේහයේ බර නියමිත මට්ටමේ පවත්වා ගැනීම, සිරුරෙහි ග්ලූකෝස් මට්ටම නියමිත ප්‍රමාණයෙහි පවත්වා ගැනීම ආදිය වැදගත් වේ. එමෙන්ම දේහයේ බලය වැඩි කරන ධාන්‍ය වර්ග, මස්, කුඩා මාළු, කිරි, බිත්තර, එලවළු, පළතුරු අනුභවය වැදගත් වේ.

ආර්ධාවභේධක (Migraine)


වර්තමානය වන විට පුදගලයන් අතර සුලභව දක්නට ලැබෙන රෝගයක් ලෙස Migraine දැක්විය හැක. එයිනුත් 90-95% ක් අතර ප්‍රමාණයක් මෙය වැලදෙනුයේ කාන්තාවන් හටයි. ආයූර්වේද වෛද්‍ය විද්‍යාවේ මෙය දක්වා ඇත්තේ ආයූර්වේදයේ ශාලාක්‍ය තන්ත්‍රය යටතේය. ශාලාක්‍ය තන්ත්‍රයේ ශිරෝ රෝග කාණ්ඩය යටතේ "ආර්ධාවභේදක" ලෙස ඔබ අප කවුරුත් දන්නා Migraine දක්වා ඇත. ආයුර්වේදයෙහි දක්වන පරිදි ආර්ධාවභේදක හට ගනුයේ හිසෙහි එක් අර්ධයක පමණි.

•නිදාන

බටහිර වෛද්‍ය විද්‍යාවට අනූව Migraine සදහා බලපාන හේතූන් මොනවාදැයි හරියටම දක්වා නැත. ඔවුන් පවසන පරිදි මෙය හට ගනුයේ මොළයට සපයන රුධිර ප්‍රමාණඅයෙහි වෙනස්කම් සිදු වීමෙනි. නමුදු ඔවුන් Migraine ඇති වීමට හේතු වන ප්‍රේරකයන් ( trigger factors) සහ අවධානම් සාධකයන් (risk factors) දක්වා ඇත.
නමුදු ආයූර්වේදයෙහි ඉතා පැහැදිලිව ආර්ධාවභේධක සදහා හේතු වන්නා වූ නිදාන කාරණයන් සහ ඒ සදහා සම්ප්‍රාප්තියක්( pathogenesis) දක්වා ඇත. ඒ අනූව,

•රූක්ෂ ආහාර වර්ගයන් අධිකව ආහාරයට ගැනීම.
•පමණ ඉක්මවා ආහාර අනුභවය.
•තද සුළගට නිරාවරණය වීම.
•අධික මෛථූනය.
•මල, මූත්‍රාදී වේගයන් ධාරණය කිරීම.
•අධිකව කය වෙහෙසවන ව්‍යායාම වල නිරත වීම.

ඉහතින් දැක්වූ නිදානාදී කාරණයන් නිසා කුපිත වන්නා වූ වාත දෝෂය තනිව හෝ කඵ (සෙම) සමග අනුබන්ධව හිසෙහි අර්ධයක් වෙත ගමන් කොට,
•බෙල්ලහි දෙපස
•ඇස අවට
•නලල
•නලල දෙපස
•කන

ආදියෙහි හිසෙහි අර්ධයක තියුණු වේදනාවක් ඇති කරයි. මෙම වේදනාව විටෙක තියුණු කැපෙන සුලු උපකරණයකින් හිස කපන්නාක් මෙනි. විටෙක මන්ථයකින් හිස මන්ථනය කරන්නාක් මෙන් වේ. සමහර විටෙක මේ රෝගී තත්වයේදී ඇසෙහි හා කනෙහි සාමාන්‍ය ක්‍රියාවන් වලටද බාධාවන් ඇති කරයි. මෙලෙස ආයුර්වේදයෙහි ආර්ධාවභේධකයේදී ඇතිවන වේදනාව දක්වා ඇත.

රෝග ලක්ෂන

මෙය බටහිර වෛද්‍ය විද්‍යාවේ අවධි කිහිපයක් යටතේ දක්වා ඇත.

01. Prodrome

මෙය Migraine ඇති වීමට පැය කිහිපයකට පෙර ඇතිවන අවස්ථාවයි. මෙම අවස්තාවේදී,

•ශබ්දය, ආලෝකය සහ ගන්ධයන් කෙරෙහි සංවේදනයක් ඇති වේ.
•කෑම ගැනීමට ඇති අකමැත්ත.
•පිපාසය.
•මල බද්ධය හෝ අතීසාරය.
•ශරීරයට අධික මහන්සියක් දැනීම.

02.Aura

මෙම අවස්තාවේ දී,
•රෝගියාට සැබැවින්ම නොපවතින කළු පැහැති තිත්, ආලෝක ධාරාවන් දර්ශනය වීම සිදු වේ. ( halucinations)
• පෙනීමේ දුර්වලතාවයන් ඇති වීම.( tunnel vision)
•රෝගියාට පැහැදිලිව කතා කිරීමට අපහසු වේ.
•කනෙහි නාදයන් ඇති වේ.
•රස, සුවද, ස්පර්ශය දැනීමේ වෙනස්කම් ඇති වේ.
•ඇතැම් විට ශරීරයේ අර්ධයක හිරියක් ඇති වේ.

03.Attack.

මෙම අවස්ථාවේ දී හිසෙහි තියුණු වේදනාව හට ගනී. ඒත් සමගම ඔක්කාරය, වමනය ද හට ගනී. බොහෝ විට වමනය වීමෙන් අනතුරුව හිසෙහි වේදනාව තරමක් දුරට අඩු වේ.

04.Postdrom.

මෙය අවසානම අවස්ථාව වේ. මෙහිදී,

•කෑම අරුචිය.
•ශරීරයට අධික මහන්සියක් දැනීම.
•ශරීරයේ වේදනාව ඇති වීම.
•අවධානම් සාධක (risk factors)

01. ලිංග භේදය
මෙය සැලකුවහොත් පිරිමින්ට වඩා තුන් ගුණයක් මෙම තත්වය කාන්තාවන්ට ඇති වේ.

02. වයස
ප්‍රධානවම වයස අවුරුදු 10-40 දී මෙය ඇති වේ. බොහෝ විට වයස අවුරුදු 50 න් පසු මෙම තත්වය කාන්තාවන්ගෙන් බැහැර වේ.

03. පවුල් ඉතිහාසය
මව්- පිය දෙපළෙන් එක් අයෙකු මෙම රෝගී තත්වයෙන් පෙළේ නම් එය දරුවන් වෙත සම්ප්‍රේශනය වීමට 50% ක් අවස්තාවක්ද, මව් -පිය දෙපළටම ඇත් නම් දරුවන්ට එය සම්ප්‍රේශනය වීමට 75% ක් අවස්තාවක්ද පවතී.

04. අනෙකුත් රෝගී තත්වයන් ( විවිධ මානසික රෝගයන්, depression, anxiety, bipolar disorder, sleep disorders, epilepsy)

Migraine triggers (ප්‍රේරක කාරණා)

01. හෝමෝනමය වෙනස්කම
•බොහෝ කාන්තාවන්ට ඔසප් වීමට දින කිහිපයකට පෙර
•ගර්භිනී සමයේ දී
•ඩිම්භ මෝචනය වන කාල සීමාවේ දී
•ආර්තව හරණය වීමට ආසන්නයේ දී •උපත් පාලන ක්‍රම වේදයන් යෙදීමේ දී (hormone replacement therapy)

02. මානසික ආතතිය

03.ආහාරමය හේතු
•චීස්, චොකලට්, ඇල්කොහොල්, රට කජු, කෝෆි
•Monosodium glutamate (MSG) යෙදූ කෘතීම ක්ෂණික ආහාර.

04.ආහාර වේල් මග හැරීම.

05.දේශගුණික වෙනස්වීම්.

06.විවිධ සංවේදන ( අධික ශබ්දය, තීව්‍ර ආලෝකය, අධික ගන්ධය)

07. විවිධ ඖෂධ භාවිතය (vaso dilation).

08. අධික ව්‍යායාමය.

09. දුම්කොල භාවිතය.

10.නින්දෙහි වෙනස්කම් සිදුවීම.

ඉහතින් දැක්වූ ආර්ධාවභේදක සදහා ආයුර්වේදයේ ඉතා සාර්ථක වූ චිකිත්සා පද්ධතියක් දක්වා ඇත. මේ අතරින් ප්‍රධානවම කෙරෙනුයේ නසය කර්ම වේ. එම නිසා ඉහත රෝග තත්වය ඔබට පවතී නම් සුදුසුකම් සහිත ආයූර්වේද වෛද්‍යවරයෙකු ලවා ප්‍රතිකාර ලබා ගැනීම සුදුසු වේ.

අර්ශස්

අර්ශස් යනු වර්තමානය වන විට බොහෝ දෙනෙකු පීඩා විදින්නා වූ ඉතාමත්ම පීඩාකාරී ගුද රෝග කාණ්ඩයකි.
බොහෝ දෙනෙකු පාහේ අර්ශස් අර්ථකතනය කරනුයේ මල පහ පිට කිරීමේ දී ගුද මාර්ගයෙන් ලේ පිට වීමයි. නමුදු සෑම විටෙකම මෙය නිවැරදි නොවේ. මක්නිසාද යත් ගුදයෙන් ලේ පිටවන්නා වූ තවත් ගුද රෝගයන් පවතී. ඊට අමතරව ආහාර ජීරණ පද්ධතියෙහි රෝග තත්වයන් නිසාද මෙසේ ලේ පිට විය හැක. එහෙත් ආහාර ජීරණ පද්ධතියෙහි ප්‍රශ්ණයක් නිසාවෙන් රුධිරය පිට වන්නේ නම් ඒවා පිරිසිදු ලේ පැහැයෙන් යුක්ත නොවේ. ඒවා දුඹුරු පැහැතිව මල හා මිශ්‍රරව පිට වේ.
ගුදයෙන් ලේ පිට වන අනෙකුත් රෝග අවස්ථා වනුයේ,
•අර්ශස්
•පරිකර්තිකා
•ගුද අර්බුද
අර්ශස් යන්න අර්ථකතනය කලහොත්, අර්ශස් සෑදෙනුයේ කුපිත වූ වාත, පිත, කඵ යන දෝශයන් ගුදය ආශ්‍රිත ත්වක් (සම), මාංශ, මේදස් දූෂණය කොට අපාන ප්‍රදේශයෙහි විවිධ ආකෘතීන් සහිත මාංසාංකුර ඇති කරයි. එනම් ගුද ප්‍රදේශයෙන් අංකුර හට ගැනීමක් සිදු වේ. බොහෝ විට රෝගීන් මෙය පවසන්නේ මල පිට කරන විට ගුදයෙන් යමක් එලියට එන බවයි. මෙය stages 4 කින් දැක්විය හැක.
Stage 1 - ගුදයෙන් කිසිවක් එලියට නොපැමිණේ. මල පිට කිරීමේ දී රුධිර වහනයක් සිදු වේ.
Stage 2-මල පිට කරන විට ගුදයෙන් යමක් පිටතට පැමිණේ. මල පිට කිරීමෙන් අනතුරුව ඉබේම එය ඇතුලට යයි. රුධිර වහනය තිබීම හෝ නොතිබීම විය හැක.
Stage 3-මල පිට කරන විට ගුදයෙ යමක් එළියට පැමිණේ. එය ඇගිල්ලෙන් ඇතුල් කල විට පමණක් ඇතුලට යයි. රුධිර වහනය තිබීම හෝ නොතිබීම වියහැක.
Stage 4-ගුදයෙන් යමක් පිටතට පැමිණේ. එය ඇගිල්ලෙන් ඇතුලු කලද ඇතුලට නොයයි. එළියේම පවතී. රුධිර වහනය තිබීම හෝ නොතිබීම විය හැක.

සෑම අර්ශස් කාණ්ඩයකදීම ලේ පිට වීම සිදු නොවේ. අර්ශස් වලදී පිරිසිදු රුධිරය පිට වේ. ලේ විදීමක් ආකාරයට පිට වේ. මීට අමතරව ඒ ඒ අර්ශස් ප්‍රභේදය අනූව ඇතිවන්නා වූ ලක්ෂන රාශියකි.

ඇති වීමට හේතු

•වාතාදී දෝශයන් කිපීමට හේතු වන්නා වූ ආහාර විහරණ සේවනය.
•විරුද්ධ ආහාර එක විට සේවනය.
•කෑ පිට කෑම.
•අති මෛථූනය.
•දණහිස් හකුලුවාගෙන නිතර සිටීම.
•අශ්වාදීන් පිට නිතරම යාම.
•මල, මූත්‍රාදී වේග ධාරණය.

අවධානම් අය

•මද ගින්න ඇති අයට.
•තණ, ලී ගල් කැට, වස්ත්‍ර යන මේවායේ ආඝාතයෙන්.
•ශීතල ජලය ස්පර්ශයෙන් මාංසාංකුර වැඩේ.

ලක්ෂණ

•ආහාර ගැනීමට ඇති අකමැත්ත.
•භෝජනය කල ආහාර දුක සේ දිරා යාම.
•කලවා අප්‍රාණික බව.
•බඩ ගුඩු ගුඩු ගෑම.
•ශරීරය කෘශ වීම.
•බඩේ ඝෝෂා පැවතීම.
•මල පිට වීමේ දී රුධිර වහනය.
•මල පිට කිරීමේ දී අධික වේදනාව.
•මල බද්ධය.
•ගුදයෙන් යමක් එළියට පැමිණීම.
•ශ්ලේශ්මල කොටස් පිට වීම.
•කැසීම.
•පාණ්ඩුව.

මේ සදහා සාර්ථක වූ චිකිත්සා පද්ධතියක් ආයූර්වේදයෙහි ඉතා පැහැදිලිව දක්වා ඇත. භේශජ, ශස්ත්‍ර, ක්ශාර, අග්නි ප්‍රතිකාර කිරීමෙන් සම්පූර්ණයෙන්ම මෙය සුව කල හැක.
මොවුන් හට කෙදි සහිත ආහාර (කොහිල), එලවලු, පලතුරු, පළා වර්ග, කිරි, වතුර වැඩියෙන් පානය කිරීම වඩාත් යෝග්‍ය වේ. ක්ශණික කෘතීම ආහාර, ඉස්සෝ, දැල්ලෝ, බල මාලු, අච්චාරු අපත්‍ය වේ. මල වේග ධාරනය ද නුසුදුසු වේ.
තවත් සැලකිලිමත් විය යුතු කරුණක් වනුයේ ගුදයෙන් ලේ පිටවීම අර්බුද එනම් පිළිකා අවස්තා වලදී ද ඇති විය හැකි අතර අදාල වෛද්‍ය උපදෙස් මත අදාල රසායනාගාර පරීක්ෂණ සිදු කොට නිශ්චිතවම රෝගය හදුනා ගැනීම ඉතාමත්ම වැදගත් වේ.