Nimal Ranathunga

මේෂ ලග්න හිමියෝ යමක් කිරීමට සිතුවොත් එය කෙසේ හෝ කරයි. උනන්දුවෙන් හා උත්සාහයෙන් යුක්තය, නිර්භීතය. තරමක් ආඩම්බරය. ඔවුන්ට උසස් අදහස් ද ඇත. ඉවසීම අඩුය. එබැවින් රණ්ඩුවලට පැටලීමට කැමතිය. කොයි දේටත් ඉක්මන් වේ. ප්‍රශංසා ලැබීමට, ප්‍රසිද්ධියට කැමැති නිසා ඕනෑම අමාරු වැඩකට වුවද ඉදිරිපත් වෙයි. පටන් ගත් වැඩක් අතරමග නතර නොකරන අතර අවසානය දක්වාම උත්සාහය අත් නොහරී.
වැඩ කටයුතු අතපසු කිරීමට අකැමැති අතර කළ යුතු දේ එවේලේම කිරීමට සිතයි. කරන කියන හැම දෙයකින්ම ජය ගැනීමට කෙසේ හෝ උත්සාහ කරයි. කිසිවෙකුට යටත් වීමට කැමැති නැති අතර, අනුන් වෙනුවෙන් කැපකිරීමටද අකැමැතිය. හැමවිටම කැපී පෙනීමට, ප්‍රමුඛස්ථානය ගැනීමට තම බලය, ශක්තිය යොදයි.

නිතරම ආහාර අවශ්‍ය අතර ශරීර ශක්තිය ගැනද සැලකිලිමත් වෙයි. බාහිර අලංකාරයට, විනෝදයට කැමැති අතර පිරිසිදුකමද අගය කරයි. කාමාශාව අධික බැවින් විවාහ සහකරුට හෝ සහකාරියට ඉතා ලැදි වේ. ඔහුගේ හෝ ඇයගේ අදහස් ගැන සැලකිලිමත් වෙයි. තමාගේ දුර්වලකම් අන්‍යයන්ට නොපෙන්වන අතර ආත්ම වර්ණතාවට කැමැති බැවින් තමාගේ ගුණ කියන්නට ඉතා ලැදිවේ. මේෂ ලග්නකරුවන් යුක්තිගරුක අය වන අතර කෙළෙහිගුණ සළකන්නෙක්ද වෙයි. ඔවුන් හැමවිටම තමා ගැන විශ්වාසය තබයි.

අපට ප්‍රධාන වශයෙන් ආලෝකය ලබා දෙන්නේ සූර්යයා නිකුත් කරන කිරණවලින් බව අපි දනිමු. සූර්යයා පමණක් නොව ආකශයේ ඇති සියලු වස්තුවලින් කිරණ අප වෙත ලැබේ. කෙලින්ම කිරණ නිකුත් කරන වස්තු සූර්යයන් හෙවත් තාරකා නමින් හැදින්වේ. ඇතැම් ආකාශ වස්තු කෙලින්ම නිතර කිරණ නිකුත් නොකරන අතර සූර්යයාගෙන් ලබා ගන්නා කිරණ ආපසු පිටතට නිකුත් කරයි. (පරාවර්තනය) එසේ ආලෝකය පරාවර්තනය කරන ආකාශ වස්තූන් ග්‍රහයන් වශයෙන් හැදින්වේ. මෙසේ තාරකාවලින් වේවා, ග්‍රහයන්ගෙන් වේවා නිකුත් කරන කිරණ අප මත පතිත වේ. එම කිරණ අප කෙරෙහි ඇති කරන බලපෑම කෙසේවේදැයි දැනගන්නා විෂය ජ්‍යොතිෂයයි.

ජ්‍යොතිෂ කරුණු දැන ගන්නේ උපන් වේලාව අනුව සකස් කර ගන්නා ජන්ම පත්‍රයෙනි. ජන්ම පත්‍රයේ ප්‍රධාන අංගය ජන්ම කේන්ද්‍රය හෙවත් අහස් සිතියමයි. එනම් යම් ජන්මියකු උපත ලබන අවස්ථාවේ අහසේ ඇති හිරු සඳු ඇතුළු ග්‍රහයන් පිහිටා ඇති ආකාරය දැක්වෙන සිතියමයි. එම සිතියම කොටස් 12 කට බෙදා ඇති අතර මුල්ම කොටස උපන් ලග්නය ලෙස හැදින්වේ.