Sama Usef

صباح الخير، كيفك اليوم؟ كيف الشتا معك؟ شايف شو حلو هالطقس؟ حاول حبّو، والله بينحب، وأنا بنحب كمان..
من الفجر قاعدة بتختي، دقّلتي رفيقتي لما طلعت الشمس يلي عم تحاول تتخبى بين الغيوم، تَ اجي لعندها، واسيها بوحدتها، وطلعت أنا يلي بدو مين يواسيني بغربتي ووحدتي ويُتمي منّك..
شامم عطري؟ الهوا ما وصّلك ياه؟ عتبي عليه كبير، كيف هيك؟ وعدني هالطقس يخلّيك تشتقلي، او تحنّلّي، بكل التفاصيل، بس بعدو لهيدي اللحظة، ما جابك لعندي..
عملت قهوة للمرة التانية، قلت يمكن اوّل مرة بعدك بسابع نومة، بس صارت عشرة، معقولة ما وعيت؟
كنت متوقعة، ب هالطقس وبيوم الأحد بالذات، كون اسعد انسانة بالكرة الأرضية، بس على بُعدَك، صرت أوحَد وأوحَش إنسانة بالكرة الأرضية، طيّب كيفك؟
اليوم بدي اعمل اكلة بحبها، مش اطيب اكلة عندي، بس اكلة ما باكلها كتير ف بحنّلها وبشتهيها، ما سألتك، بتحب الفاصوليا العريضة؟ اذا بتحبها، تحجج فيها، عبالك تاكل منها، وتعا لقلبي، هالقد بسيطة الشغلة، بس هالقد معقّد غيابك..
دخلك، سؤال، شو يلي شاغلك عنّي؟ منّو نهار الأحد الكئيب يلي بتكرهو إجا، ليش مخلّيه يأثّر عليك؟ انو فيك تبعتلي رسالة، رايح على المطرح الفلاني، وبتلاقيني قبلك، بالصدفة يعني التقينا، وهيك بلكي بتتحسن نظرة لهيدا اليوم، وبذات الوقت بتصير أيامي إلها معاني، حتى نهار الأحد الموحِش..
طيّب، متل ما بدّك، تلفلف على حالك وكفّي نومتَك ت كفّي وحدتي مع هالكتاب يلي مش قادرة اقريه تَ ما اقسى عليك وعلى مشاعري، سامحك وانسى..
انتبه على حالي يلي فيك..
سلام..

-سَمَا #سما

كيفو حبيبي الحلو؟ ما تبلّش!! انتَ حلو وكتير، كتير كتير يا عمري انتَ! بتعرف انّي اشتقتلّك؟ اشتقت احكيك واشكيلك واجي لقلبك بدون اذن وخبرك عن الشغلات يلي مضايقتني بدون تردد، مش انتَ قلتلّي انّك بمقام بابا؟ وانتَ كنت أب فعلًا.. كيفهُن إيديك؟ بعدهن عم يوجعوك بالسقعة؟ وبعدك عم تحطلهن كريم او ناطرني ت تناديني وجبلك ياه بكل محبة وخوف؟ قد ما قلّك اشتقتلك قليل صدقني، دموعي يلي عم نزلوا بيكفوا تصدّقني؟
بتعرف، ما بدي عاتبك، مع اني متضايقة منّك، لانّك كنت حصتي، شي بخصني كتير، اختفيت فجأة، حتى بدون وداع..
بكل الاحوال، جاية خبرك انّك كنت معي اليوم بدون ما تقصد تكون..
بكل الحرب ما حدا اهتم بالنباتات الموجودة بالبناية، فخصصت هاليوم، اهتم فيهن، متل ما انتَ بتحب تهتم بكل شي حواليك، وبتحب الزراعة والحيوانات، قعدت ٤ ساعات سحبة وحدة، عم زبّطهن، لو كنت حدّي كنت ضحكت كتير، من كل قلبي، بدال الدموع يلي نزلوا.. وكنّا تناقرنا وتضحكنا على هَبَلي، ترجع اصغر منّي بحركاتك، بتعرف شو عم شوف هلأ؟ وجّك الحلو كتير، تعطيني بوسة ع الطاير وتضحكلي.. تؤبر قلبي، يا روحي انتَ، بتصدق شي؟ ما حبّيت حدا متلك وكان بمقام الأهل عندي.. على العموم سامحني، على محبتي الكبيرة وحنيني الظاهر..
سلام..

-سَمَا #سما

تتذكر لما عزمت حالي على الغدا عند خالتو؟ كانت عم تحضّر للكوسا المحشي، مش اطيب اكلة عندي ولا بتخطر ببالي او بشتهيها، بس قلتلك يومها اني باكلها بكل شهيّة تَ ما تتعذّب خالتو وتعمل شي تاني! وساقبت بلّش النزوح الأكبر بلبنان، اي اي يوم الإثنين، ٢٣ أيلول، ومعش خلّيتني اضهر من البيت، زعلت يومها، كان عبالي كتير آكل كوسا، يمكن لأن من إيدين خالتو..
ولما بلشت الأمور تتأزم ورجعت اجتمعت بخالتو، طلبت منها أكلة الكوسا، كنت عنجد مشتهيّتها.. ويا الله، بتذكر اديش ضحكت عليي، آكل وما بدي اشبع قد ما هي طيبة!!
واليوم، او بالأحرى، من مبارح حانن قلبي ع كوساية وحدة من ايدين خالتو، ما فيني اطلب منها شي وعذّبها، فحاولت اني اعمل طريقتها، حاولت، ويا ريتني ما حاولت ولا إجا على بالي، بكل لقمة اتذكر جمعتنا وكيف اجت طعمتني من ايدها ت ذوقها قبل ما تشيلها عن الغاز وانت مبسوط فيها، الكنّة وحماتها، بس انت كنت شوف الأم وبنتها..
الكوسا ما عادت طيبة، ولا عاد بدي اشتهيها.. تركتها لإيدين خالتو وضحكة عيونك..

-سَمَا #سما

ما عبالي سلّم، حاملة عتب كبير كتير..
ليش كل ما يصير معي شي بدي اركض لعندك؟ ليش كل الجهات ما بتوصّلني إلا إلك؟ ليش اخدتني من الكل وتركتني بالأخير لحالي؟
مبارح سمعت شغلات حلوة، للحظات كنت رح اجي ارتمي بحضنك وابكي من فرحتي، خبرك بفرحِةْ طفلة صغيرة شو عرفت وشو انحكالها، بس تذكرت انك برمت ضهرك ومشيت، من بعد ما كان كل عشمي فيك..
واليوم، كان بيني وبين الضرر او يمكن الموت، شعرة!! حملت تلفوني اتصل فيك وانهار على مسمعَك وقلّك ادّيش خايفة، رجعت تذكرت اني ما بعنيلك شي تتجي تطبطب عليي..
دخلك، كنت بتساهل من بعد كل اللي اعطيتَك ياه؟ كنت منقصة عليك شي؟ سؤال، انتَ عنجد حبّيتني؟ او قلبك إلفلي من المظهر الحلو والاهتمام؟
انسى، ما تجاوبني، كل شي إلو حِجج عندك!
بس بدي قلّك، كنت بتساهل انّي انحبّ متل ما حبّيت..
ويلّي وجّعني اكتر، قسوة قلبك عليي، وكأنّك ما عشت يوم حلو معي..
وبالمناسبة، حابة خبرك شي، ولا مرة الله تركني، اذا ما كان في حدا حدّي لا من اقارب ولا أصدقاء، ف هوّ حدّي، الله حدّي، يلي دايمًا بحس بلطفو وحبّو رغم تقصيري وأخطائي..
رح تقلي وهيّاكِ قلتيها، الله حدِّك شو بدِّك فيني؟ رح قلّك لان الله حدّي كنت اطلبك منه، يحميلي ياك، ما يفجعني فيك وادعيلك قبل ما ادعي لنفسي، ياما كنت انسى حالي لان كنت انتَ اهم من نفسي عندي..

مش عارفة انهي الرسالة، ويلي قلّك انتبه ع حالك وبحبَّك وويلي قلّك الله يصطفل فيك او يسامحك..

سامحني..

-سَمَا #سما