AFTERCLAP

📍Sanctuary Nam Ngum Beach Resort

ທຣິບ ພັກກາຍພັກໃຈ 2 ມື້ 1 ຄືນ ທີ່ໃຫ້ຄວາມຮູ້ສຶກຄືໄປທ່ຽວທະເລ, ພ້ອມກັບທີ່ພັກທີ່ເຫັນມາແລ້ວວ້າວແຮງ.

ທັງຍັງມີກິດຈະກຳໃຫ້ພ້ອມຫລີ້ນອີກຫລາກຫລາຍຢ່າງບໍ່ວ່າເປັນການນັ່ງຈິບເຄື່ອງດື່ມເບົາໆພ້ອມກັບຮ້ອງເພງທີ່ salad boat, ປັ້ນລົດຖີບ, ຕີບານຊາຍຫາດ, ທີ່ເດັດແມ່ນກິດຈະກຳທາງນ້ຳທີ່ຊ່ວຍຄາຍຮ້ອນເຂົ້າອາກາດຊ່ວງນີ່ສຸດໆກໍ່ຄື jet ski, kayak, paddle boat ແລະ stand up boat.

ສະຖານທີ່ຕັ້ງຢູ່: ບ້ານ ທ່າເຮືອ, ເມືອງ ວັງວຽງ, ແຂວງ ວຽງຈັນ.
ກ່ອນໜ້າຈະຮອດ ເມືອງວັງວຽງ 25 ຫລັກ.

ໜຶ່ງປີຜ່ານໄປ..

📍ຫາດຊາຍແຄມຂອງ, ບ.ຫ້ວຍຫລ້າ, ມ.ສັງທອງ, ນະຄອນຫລວງວຽງຈັນ.
_
“ວິວທີ່ແປບໃໝ່ ກັບ ເພື່ອນທີ່ຮູ້ໃຈ ຈະມີສິ່ງໃດສວຍງາມໄປກວ່ານີ້”
ຫາດແຄມຂອງໃກ້ກັບເຂດຊະນະຄາມ ທີ່ມີກ້ອນຫີນລັກສະນະແປກຕາພົ້ນຂື້ນມາໃນຊ່ວງນ້ຳຂອງແຫ້ງ ໃຫ້ຄວາມສວຍງາມແບບແປກໃໝ່ທີ່ເຮົາບໍ່ເຄີຍເຈິ.
ພ້ອມກັບເລື່ອງວຸ້ນໆຂອງໄວລຸ້ນໃກ້ໄລຍະສຸດທ້າຍທັງ 7ຄົນ ທີ່ເປັນແກ້ງໝູ່ທີ່ສະໜິດສະໝົມກັນມາຕັ້ງແຕ່ສະໄໝຮຽນມັດທະຍົມ, ທີ່ຕ້ອງການຫາສະຖານທີ່ທ່ຽວ ໃຊ້ເວລາຮ່ວມກັນ ພ້ອມທັງພັກຜ່ອນຟື້ນຟູກາຍໃຈທີ່ອອ່ນລ້າຈາກບັນຫາທີ່ທຸກຄົນໄດ້ໄປປະເຊີນມາໃນໂລກກວ້າງ ມານັ່ງໂອ້ລົມເຫລົ່າສູ່ກັນຟັງ; ແລະວາງບັນຫາເບື້ອງຫລັງ ແລ້ວປົດປ່ອຍຕົວຕົນໂຕເອງອອກມາໃຫ້ເໝືອນກັບເດັກນ້ອຍອີກຄັ້ງ.
ສຳລັບການເດີນທາງມາຫາດຊາຍຈຸດນີ້ແມ່ນໃຊ້ເວລາປະມານ 1ມຊ ຈາກ ປ້ຳນ້ຳມັນ ປຕທ ດອງດາ ໄລຍະທາງປະມານ 60-70ກມ, ລຽບແຄມຂອງມາກາຍສາມແຍກປາກຕອນຈົນສຸດທາງຢາງ ແລ້ວມາອີກປະມານ 3-4 ກມກໍ່ຮອດຈຸດໝາຍ. ( ໝາຍເຫດ. ຫ້າມແບກເຄື່ອງໄປຫລາຍຖ້າບໍ່ຢາກໜ້າມືດເພາະຍ່າງລົງຫາດປະມານໂລໜຶ່ງໄດ້😂 ).
ຂອບໃຈອຸປະກອນແຄັມປິ້ງ

-AFTERCLAP

#ຫາດຊາຍແຄມຂອງ #ບ້ານຫ້ວຍຫລ້າ #ຫວ້ຍຫລ້າ #ສັງທອງ #ຊະນະຄາມ

📍Don khouvieng, Namngum, Thalat, Laos
_
ທຣິບ 2 ມື້ 1 ຄືນທີ່ເດີນທາງບໍ່ໄກຈາກຕົວເມືອງເພຶ່ອມາແຄັມປີ້ງ.
“ດອນຄູວຽງ” ດອນທີ່ຕັ້ງຢູ່ໃນອ່າງນ້ຳງື່ມ ຫລືທີ່ຮູ້ກັນກໍຄືດອນທີ່ມີ “ຫາດຊາຍຂາວ” ໃຫ້ຄວາມຮູ້ສຶກຄ້າຍຄືກັບຫາດຊາຍແຄມທະເລ.
ແຕ່ບໍ່ເປັນຕາມແຜນ ພໍຮອດເຮົາບໍເຈິຫາດຊາຍຂາວ ເພາະນ້ຳໃນອ່າງນ້ຳງື່ມໄລຍະນີ້ຍັງມີປະລິມານຫລາຍ, ຫາດຊາຍຂາວທີ່ເຮົາຫວັງໄວ້ຍັງຈົມຢູ່ໃນນ້ຳ.
ສຸດທ້າຍ, ເຖິງຈະບໍ່ເປັນໄປຕາມແຜນ ແຕ່ສິ່ງທີ່ເຮົາໄດ້ມາແທນ ຄືວິວອີກຟາກຂອງດອນຄູວຽງ ທີ່ເຮົາບໍ່ໄດ້ຄາດຄິດວ່າຈະພົບ ມັນສວຍງາມ ແລະ ຄວາມຮູ້ດີໄປອີກແບບ..
ສຳລັບການເດີນທາງທີ່ຈະມາດອນຄູວຽງນີ້ແມ່ນ ເຮົາເດີນທາງມາຂື້ນເຮືອທີ່ທ່າເຮືອນາເຜີຍ ແລ້ວກໍ່ຈ້າງເຮືອມາສົ່ງທີ່ດອນ ໃຊ້ເວລາປະມານ 1.30 ຫາ 2ຊມ ກໍ່ເຖິງຈຸດໝາຍ.
-AFTERCLAP

📍Mt. Phadang, Phukaokauy, Laos 🇱🇦
_
“ຜາດ່າງ ປ່າສະຫງວນພູເຂົາຄວາຍ” ດິນແດນທີ່ກວ້າງໃຫຍ່ ສັກສິດ ແລະ ມີຕຳນານເຫລົ່າຂານ.
ສຳລັບຄົນທີ່ຕ້ອງການປະຈົນໄພ ແລະ ທ່າທາຍຕົນເອງຂື້ນໄປອີກຂັ້ນ, ການທີ່ຈະເດີນທາງຂື້ນໄປເທິງນັ້ນຕ້ອງໃຊ້ ກຳລັງກາຍ ແລະ ກຳລັງໃຈຢ່າງຫຼາຍ.
ການເດີນທາງເພື່ອຂື້ນຜາດ່າງນັ້ນຫຼາຍຂັ້ນຕອນ ແລະ ໃຊ້ເວລາ, ໂດຍເສັ້ນທາງທີ່ເຮົາມານັ້ນ ເລີ່ມຈາກຂື້ນເຮືອຈາກທ່າເຮືອ ບ້ານນາເຜີຍ ມາ ບ້ານດ່ານສາມ ໃຊ້ເວລານັ່ງເຮຶອ 1.30ມຊ, ຈາກນັ້ນເຮົາກໍ່ເລີ່ມຢ່າງຂື້ນພູ 14ກລ (ລວມໄປ-ກັບ 28ກລ ແລະ ໃຊ້ເວລາຍ່າງທັງໝົດ 13ມຊ), ແນະນຳໃຫ້ໄປນອນແຄ້ມປິ້ງຈະເໝາະສົມກວ່າ.
ສິ່ງທີ່ສຳຄັນແມ່ນເຮົາຕ້ອງໄຕ່ລະດັບຄວາມສູງຈາກຈຸດທີ່ເຮົາເລີ່ມຕົ້ນຍ່າງແມ່ນ 200ມ ຈາກໜ້ານ້ຳທະເລ ໄຕ່ຂື້ນໄປຮອດຈຸດໝາຍທີ່ຄວາມສູງ 1550ມ.
ສຸດທ້າຍ, ການປະຈົນໄພທີ່ມີຄວາມລຳບາກ ແລະ ຕ້ອງໃຊ້ຄວາມອົດທົນ ມັນກໍ່ໃຊ້ເສີມສ້າງໃຫ້ ສິ່ງທີ່ເຮົາໄດ້ພົບໃນການເດີນທາງນັ້ນ ສວຍງາມ, ມີຄຸນຄ່າ ແລະ ໜ້າຈົດຈຳຂື້ນໄປອີກ..

-AFTERCLAP


#ຜາດ່າງ #ພູເຂົາຄວາຍ

One day trip in #ອ່າງນ້ຳຊວງ
ສະຖານທີ່ພັກຜ່ອນແຄມນ້ຳ ກາງເຕັ້ນແຄັມປີ້ງ ຫຼື ປິກນິກ ສຳລັບຄົນທີ່ມີເວລາໜ້ອຍ.
Live a life "ຊິວິດຄືການໃຊ້ຊີວິດ" ຄືຄຳເວົ້າທີງ່າຍໆແຕ່ເຮັດໄດ້ຍາກ ທຸກຄົນລ້ວນແລ້ວແຕ່ຢາກມີຊ່ວງເວລາທີ່ໄດ້ພັກຜ່ອນ ໄດ້ອອກໄປທ່ຽວ ໄດ້ເຮຮາກັບໝູ່ ແຕ່ວ່າກໍ່ເຮັດໄດ້ຍາກເພາະທຸກຄົນຕ່າງກໍ່ມີພາລະໜ້າທີ່ທີ່ຕ້ອງໄດ້ຮັບຜິດຊອບ.
ອ່າງນ້ຳຊວງ ຈຶ່ງເໝາະສົມສຳລັບນິຍາມຄຳນີ້ ເພາະບໍ່ໄກຈາກຕົວເມືອງ, ຫົນທາງສະດວກ ໃຊ້ເວລາເດີນທາງປະມານໜຶ່ງຊົ່ວໂມງກໍ່ຮອດ.
ສຸດທ້າຍນີ້, ຕ້ອງຂໍຂອບໃຈອະປະກອນແຄັມປີ້ງ NatureHike Laos ທີ່ເຮັດໃຫ້ທຣິບນີ້ສົມບູນແບບຂື້ນ🙏🏻

-AFTERCLAP

1ປີຜ່ານໄປ ຍັງຄົງປະທັບໃຈ ແລະ ຢາກໄປອີກ..

“ຕາດຊາວວາ ຕາດທີ່ມີທິວທັດອັນສວຍງາມ ແລະ ທຳມະຊາດອັນອຸດົມສົມບູນ”.
ເປັນການຍ່າງປ່າເພຶ່ອໄປນ້ຳຕົກທີ່ເຮັດໃຫ້ຂ້ອຍຮູ້ຕື່ນເຕັ້ນຫຼາຍ ເພາະເຫັນວ່າຍັງມີທຳມະຊາດອີກບ່ອນທີ່ມີຄວາມຂຽວງາມ ອຸດົມສົມບູນ ແລະ ໄດ້ພົບເຫັນພືດພັນຫຼາຍສະນິດທີ່ຂ້ອຍບໍ່ຄິດວ່າຈະພົບເຫັນ.
ຕາດຊາວວານັ້ນນອນຢູ່ໃນເຂດປ່າສະຫງວນແຫ່ງຊາດພູເຂົາຄວາຍ, ບ້ານພູເກົ້ານາງ, ເມືອງທຸລະຄົນ, ແຂວງວຽງຈັນ.
ຕາດແຫ່ງນີ້ເໝາະສົມລັບຄົນທີ່ມັກໃນການປະຈົນໄພ ເພາະການເດີນທາງນັ້ນມີຫຼາຍຂັ້ນຕອນຄື ຕ້ອງໄດ້ຈ້າງໄກ້ທ້ອງຖີ່ນເພຶ່ອນຳທາງໃຫ້ໂດຍເພິ່ນເກັບນຳ 300,000ກີບ, ແລ້ວກໍ່ນັ່ງເຮືອຈາກທ່າເຮືອນາເຜີຍໄປບ້ານພູເກົ້ານາງປະມານ 30ນາທີ ເຊິ່ງຄ່າເຮືອທີ່ຈ້າງໄປແມ່ນ 240,000ກີບ ສາມາດນັ້ງໄດ້ 7ຄົນ, ຈາກນັ້ນກໍ່ຕ້ອງໄດ້ຍ່າງໄປຕື່ມອີກ 6ກລ ເຊິ່ງເປັນການຍ່າງຂື້ນພູ ແລະ ເຂົ້າປ່າ ຈະໃຊ້ເວລາປະມານ 3-4ຊມ ຈຶ່ງຈະຮອດນ້ຳຕົກຕາດ.
ສຸດທ້າຍນີ້, ເຮົາມາທ່ຽວທຳມະຊາດແບບນີ້ກໍ່ຢ່າລືມຮັກສາຄວາມອາດຊ່ວຍກັນ ຫ້າມຖີ້ມຂີ່ເຫຍື້ອຊະຊາຍຕ້ອງເອົາກັບລົງມາໃຫ້ໝົດ ແລະ ຢ່າຕັດຫຼືທຳລາຍຕົ້ນໄມ້ພືດພັນຕ່າງໆເພຶ່ອໃຫ້ມັນຍັງຄົງຢູ່ສວຍງາມແບບນີ້ຕະຫຼອດໄປ.

-AFTERCLAP

ເຂົາວ່າ “SUPER FULL MOON“ ຂອງເດືອນສີ່ນັ້ນງາມທີ່ສຸດໃນຮອບປີ.

ຊ່ວງນີ້ທຸກຄົນເປັນຈັ່ງໃນຍັງສະບາຍດີບໍ່?
ຕອນນີ້ຄວາມຮູ້ສຶກຄື dejavu ທັນທີ, ປີກາຍນີ້ເດືອນສີ່ບ້ານເຮົາກໍ່ຖືກຊ່ວງພະຍາດລະບາດຈົນໄດ້ lockdown ຂ້ອຍເອງກໍ່ນັ່ງຖ່າຍຮູບເດືອນເຕັມແບບດຽວກັບປີນີ້ເລີຍ.
ຖ້າເຮົາຈະມູມດີຂອງຊ່ວງພະຍາດລະບາດນີ້ ມັນກໍ່ເຮັດໃຫ້ເຮົາປັບໂຕ ເຮັດຫຼາຍສິ່ງຢ່າງ ເຊັ່ນວ່າ ການທີ່ເຮົາໄດ້ພັກຜ່ອນຈາກການເຮັດວຽກໜັກມາຕະຫຼອດປີ, ເຮັດສິ່ງທີ່ຢາກເຮັດແຕ່ບໍ່ມີໂອກາດໄດ້ເຮັດ, ໄດ້ໃສ່ຊີວິດກັບຄອບຄົວຫຼາຍຂື້ນ ແລະ ສິ່ງທີ່ສຳຄັນແມ່ນການທີ່ເຮົາໄດ້ຢູ່ກັບຕົນເອງ ໄດ້ມີໂອກາດຄິດແລະທົບທວນກ່ຽວກັບຕົນເອງຫຼາຍຂື້ນ...
ສຸດທ້າຍນີ້, ກໍ່ຂໍໃຫ້ທຸກຄົນຢູ່ບ້ານຢ່າງປອດໄພ ແລະ ມີຄວາມສຸກ..

-Afterclap

ຫຼາຍຄັ້ງທີ່ຂ້ອຍໄດ້ຂື້ນໄປທີ່ "ພູຜາໄດ" ແລະ ທຸກໆເທຶ່ອທີ່ຂ້ອຍຂື້ນໄປກໍ່ບໍ່ເຄີຍຜິດຫວັງເລີຍ ຂ້ອຍຍັງຮູ້ສຶກຕື່ນເຕັ້ນ, ມັນຍັງຄົງສວຍງາມໄປຕາມລະດູ.
ທຸກເທຶ່ອທີ່ໄປຈະແມ່ນການຍ່າງໄປ-ກັບ, ແຕ່ວ່າຄັ້ງຈະແຕກຕ່າງເພາະເປັນການໄປແຄ້ມປິ້ງ ເພື່ອຮັບບັນຍາກາດຂອງຜາໄດໃຫ້ເຕັມທີ່ເຮົາກໍ່ເລີຍຕ້ອງການປະຫຍັດເຮື່ອແຮງພະລັງງານຂອງໂຕເອງ ໂດຍການຈ້າງລົດ"ອີແຕັນຂອງໄທບ້ານ" (ມັນເປັນທີ່ໄທບ້ານປະດິດຂື້ນມາເອງເພື່ອໃຫ້ເໜາະສົມກັບການໃຊ້ງານໃນເທິງພູຄົງເຂດນັ້ນ) ເຊິ່ງເຂົາເຈົ້າຈະພາເຮົາໄປສົ່ງເຖິງຕີນພູເລີຍ ຄ່າລົດແມ່ນ 7ແສນກີບຕໍ່ຖ້ຽວສາມາດຂື້ນໄດ້10ຄົນ ໃຊ້ເວລາປະມານ 1ຊມ 30 ນາທີ, ຖືວ່າປະຫຍັດແຮງແລະເວລາໄປໄດ້ຫຼາຍຈາກທີ່ເຮົາຍ່າງໄປແຕ່ໝູ່ບ້ານ 5-6ຊມ ຈຶ່ງຮອດຕີນພູ, ແຕ່ແນວໃດກໍ່ຕາມເຖິງເຮົາຈະຮອດຕີນພູເຮົາກໍ່ໄດ້ຍ່າງຂື່ນພູໄປຕໍ່ອີກປະມານ 5ກມ ຈຶ່ງຈະຮອດເທິງຜາໄດແລະຈຸດທີ່ຈະຕັ້ງແຄ້ມ.
ສິ່ງທີ່ສຳຄັນໃນການໄປປະຈົນໄພແບບນີ້ກໍ່ຄືການກຽມໂຕໃຫ້ພ້ອມ ນ້ຳດື່ມເປັນສີ່ງທີ່ຂາດບໍ່ໄດ້ເພາະຢູ່ເທິງພູນັ້ນບໍ່ມີນ້ຳ ຄວນກຽມໄປປະມານ 2-3ລິດຕໍ່ຄົນ, ຕໍ່ມາອາຫານເຮົາຄວນກຽມແບບແຫ້ງບໍ່ບູດແລະນ້ຳໜັກເບົາທີ່ສຸດ, ສິ່ງຕໍ່ມາກໍ່ຄືເຄື່ອງນຸ່ງແລະທີ່ຢູ່ອາໄສ ເຮົາຄວນນຸ່ງແບບປິດດີທີ່ສຸດເພຶ່ອປ້ອງກັນຫຍ້າບາດໃນເວລາທີ່ຍ່າງຂື້ນ ກາງຄືນນັ້ນອາກາດໜາວເຢັນແລະມີລົມພັດແຮງ.
ຕໍ່ມາກໍຄືເຕັ້ນເຮົາຄວນເລືອກເຕັ້ນທີ່ນ້ຳໜັກເບົາເພຶ່ອສະດວກໃນການພົກພາແລະສິ່ງທີ່ສຳຄັນແລະສິ່ງທີ່ສຳຄັນເຮົາຄວນມີຖົງນອນເພາະອາກາດໃນຍາມກາງຄືນໜາວວວວຫຼາຍຍ, ສຸດທ້າຍທີ່ຂາດບໍ່ໄດ້ສຳລັບຂ້ອຍກໍຄືກ້ອງຖ່າຍຮູບເພຶ່ອບັນທຶກພາບຄວາມຊົງຈຳປະສົບການທີ່ເຮົາໄດ້ພົບ.
ສິ່ງທີ່ສຳຄັນທີ່ສຸດ, ການທີ່ໄປປະຈົນໄພໃນທຳມະຊາດແບບນີ້ຄືເຮົາຕ້ອງອານຸລັກຊ່ວຍກັນ ຢ່າໄປເຄື່ອນຍ້າຍຫຼືທຳລາຍ, ສີ່ງໃດທີ່ເຮົານຳຂື້ນໄປເຊັ່ນວ່າເຫື້ຍອຕ່າງໆຕ້ອງນຳລົງມາໃຫ້ໝົດ.
ສຸດທ້າຍນີ້,ຫວັງວ່າທຸກຄົນມັກສິ່ງທີ່ເຮົານຳສະເໜີ ແລະ ຂໍໃຫ້ທຸກຄົນມີຄວາມສຸກເມື່ອໄດ້ອອກໄປທ່ອງທ່ຽວ.
-AFTERCLAP

ທຸກຄົນຄວາມຢ້ານໃນຈິດໃຈເມື່ອພົບສິ່ງທີ່ບໍ່ຄຸ້ນເຄີຍ ແລະ ເຮົາພຽງກ້າວອອກໄປ ຍ່ອມມີສິ່ງໃໝ່ໆໃຫ້ເຮົາຮຽນຮູ້ຢູ່ສະເໝີ.

The Rock Viewpoint ທີ່ພູຜາມ່ານ ເປັນສະຖານທີ່ທ່ອງທ່ຽວສຳລັບຄົນທີ່ຕ້ອງການພັກຜ່ອນແບບມີເວລາໜ້ອຍໄປງ່າຍປະຫຍັດເວລາ ທີ່ສຳຄັນແມ່ນຄົນທີ່ຢາກລອງທ່ຽວແບບ Adventure ເຊັ່ນ ຂີ່ຊິບລາຍ, ໄຕ່ຂ້າມຂາວອູ່, ໄຕ່ຂ້າມຮັງແມງມຸມ, ຢ່າງປ່າ ແລະ ປີນຜາແບບ Via ferrata..

ດັ່ງນັ້ນ, ເຮົາເລີຍຢາກໃຫ້ທຸກຄົນໄດ້ມາລອງ, ມາສຳພັດທໍາມະຊາດຂອງປະເທດເຮົາວ່າສວຍງາມປານໃດ ແລະ ທີ່ສຳຄັນແມ່ນເຮົາຈະໄດ້ສົ່ງເສີມການທ່ອງທ່ຽວແບບລາວທ່ຽວລາວອີກດ້ວຍ.
The Rock Viewpoint at Phou Pha Marn

-AFTERCLAP


#ພູຜາມ່ານ #ລາວທ່ຽວລາວ