Janakeeya Vartha

കേരള ചരിത്രത്തിൽ ആദ്യമായി കളക്ടർക്ക് എതിരെ വിജിലൻസ് അന്വേഷണത്തിന് ഉത്തരവിട്ട് വിജിലൻസ് കോടതി
എറണാകുളം ജില്ലാ കളക്ടർ ഉൾപ്പെടെ 7 പ്രതികൾക്കെതിരെ വിജിലൻസ് പ്രാഥമിക അന്വേഷണം നടത്താൻ മൂവാറ്റുപുഴ വിജിലൻസ് കോടതി ഉത്തരവിട്ടു

കളമശ്ശേരി സ്വദേശിയും പൊതുപ്രവർത്തകനുമായ ബോസ്കോ കളമശ്ശേരി സമർപ്പിച്ച പരാതിയിൽ, എറണാകുളം ജില്ലാ കളക്ടർ കണയന്നൂർ ഭൂരേഖ തഹസിൽദാർ പോലിസ് സ്റ്റേഷൻ ഹൗസ് ഓഫീസർ കളമശ്ശേരി നഗരസഭ സെക്രട്ടറി ഉൾപ്പെടെ ഉള്ള 7 പ്രതികൾക്കെതിരെ പ്രാഥമിക അന്വേഷണം നടത്താൻ ഉത്തരവിട്ടു.
കേസിൽ ഒന്നാം പ്രതിയായി എറണാകുളം ജില്ലാ കളക്ടർ , മറ്റു സർക്കാർ ഉദ്യോഗസ്ഥർ, കളമശ്ശേരി നഗരസഭയിലെ ഉദ്യോഗസ്ഥർ, മുൻ സ്റ്റേഷൻ ഹൗസ് ഓഫീസർ, കൂടാതെ സ്വകാര്യ സ്ഥാപന പ്രതിനിധി എന്നിവരാണ് പ്രതിപ്പട്ടികയിൽ ഉൾപ്പെടുത്തിയിരിക്കുന്നത്.
പരാതിപ്രകാരം, തൃക്കാക്കര നോർത്ത് വില്ലേജിലെ സർവേ നമ്പർ 74/12 ൽ ഉൾപ്പെടുന്ന പൊതുതോട് അനധികൃതമായി മണ്ണിട്ട് നികത്തി കെട്ടിട നിർമ്മാണം നടത്തിയതിനെ തുടർന്ന് പ്രദേശത്ത് വെള്ളപ്പൊക്ക പ്രശ്നങ്ങൾ രൂക്ഷമായി. ഈ വിഷയത്തിൽ മുമ്പ് തോട് പൂർവസ്ഥിതിയിലാക്കാൻ കേരള ഹൈകോടതി ഉത്തരവിട്ടിട്ടും ബന്ധപ്പെട്ട അധികാരികൾ നടപടി സ്വീകരിക്കാതിരുന്നുവെന്നാണ് ആരോപണം.
പരാതിക്കാരൻ 2016 മുതൽ വിവിധ അധികാരികൾക്ക് പരാതി നൽകിയിട്ടും യാതൊരു ഫലപ്രദമായ നടപടിയും ഉണ്ടായില്ലെന്ന് കോടതിയിൽ ചൂണ്ടിക്കാട്ടി. ഇതിന്റെ അടിസ്ഥാനത്തിൽ സർക്കാർ ഉദ്യോഗസ്ഥരും സ്വകാര്യ വ്യക്തിയും തമ്മിൽ ഗൂഢാലോചന നടന്നിട്ടുണ്ടോ, അനധികൃത സാമ്പത്തിക ഇടപാടുകൾ ഉണ്ടായിട്ടുണ്ടോ എന്നത് പ്രാഥമികമായി പരിശോധിക്കേണ്ടതുണ്ടെന്ന് കോടതി നിരീക്ഷിച്ചു.
തുടർന്ന് പ്രാഥമിക അന്വേഷണം നടത്തി റിപ്പോർട്ട് സമർപ്പിക്കാൻ കോടതി നിർദേശം നൽകി.
ഈ ഉത്തരവ് പൊതുജന താൽപര്യ വിഷയങ്ങളിലും പൊതുസമ്പത്ത് സംരക്ഷണവുമായി ബന്ധപ്പെട്ട വിഷയങ്ങളിലും നിർണായകമായ നിയമനടപടിയായി വിലയിരുത്തപ്പെടുന്നു.