NAILA Methodist Church

VAKARAUBUKA - 26/06/2026
ULUTAGA: KO JISU NA TUCAKE TALE KEINA BULA.
LESONI: JONI 11:25-26

TIKINA KOULA – 25:
"Oi au na vu ni tucake tale, kei na vu ni bula: ko koya sa vakabauti au, kevaka sa mate ena bula ga."

NA KENA I VAKAMACALA
E vakadeitaka eke ko Jisu e dua na i tukutuku veivakurabuitaki, ni sai koya na vu ni tucake tale kei na vu ni bula. E na dua na yasana, e vakatakila ko Jisu na nona kaukauwa vaKalou, na i tukutuku ni nuinui kei na bula tawa mudu. E na dua tale na yasana, ko Ma**ca e raica na veika e na yaco ni oti na mate, ka sega ni raica rawa ni tu e yasana na nona Turaga.
Na veivakadeitaki e solia ko Jisu, “ko koya sa vakabauti au, kevaka sa mate ena bula ga.” E solia e dua na dina ni bula tawa mudu vei ira tamata vakabauta. Na i tukutuku oqo e lakosivita na vakasama yalani ni bula vakatamata ki na veika vakayalo, tawamudu ka tawa vesuki rawa.
E vica na ka eda vulica.
1. Ko Jisu ga na i sau ni noda lomatarotaro kecega. Na mavoa se tuvaki ca beka na bula, na tauvimate balavu, kei na vuqa na leqa me da kauta kece ki vua.
2. Era kaya beka na wekamu kei na nomu i tokani ni sa sega ni rawa. De ko sa tovolea e vuqa na gaunisala me sotavi kina na nomu leqa. Na vosa i Jisu eke e tukuna vakasigalevu ni rauti keda kei na i colacola bibi eda colata.
3. Na nomu tagi ni kacivi se mate edua na wekamu voleka.
4. Na nomu yalolailai kei na rere ni vaka e yaco na veika e sega ni namaki.
5. Na yali ni kaukauwa ko a vakanuinui kina.
6. Ko Jisu na vu ni Tucake-Tale kei na Bula. Ko Jisu nai sau ni taro.
ULUTAGA ME MASULAKI:
Sovaraka yani vei Jisu na nomu leqa kecega.

1) - E SEGA WALEGA NI KAYA KO JISU NI NA SOLIA NA TUCAKE TALE KEINA BULA, SAI KOYA SARAGA NA TUCAKE TALE KEINA BULA
**JONI 11:25 - Sa kaya vua ko Jisu, Oi au na vu ni tucake-tale, kei na vu-ni-bula: ko koya sa vakabauti au, kevaka sa mate, ena bula ga:

2) IA SA YALATAKA KO JISU, NI KO IRA ERA VAKABAUTI KOYA ERA NA VAKATURI CAKE MAI NA MATE MERA BULA KA TAWA MUDU.
** JONI : 11 : 26 - ia ko koya yadua sa bula ka vakabauti au, ena sega sara ni mate. Ko sa vakadinata na ka oqo, se segai?

TINITINI

E vakayagataka tale ko Jisu ena tikina oqo na Vosa me kilai kina ko koya, "Oi Au".
E sega walega ni kaya ko Jisu ni na solia na tucake tale kei na bula; e tukuna ni sa i Koya saraga na Tucake Tale kei na Bula!

Ena tikina e 25, e vosa tiko o Jisu me baleta na mate vakayago. O ira era na vakabauti koya era muri koya era na mate ga, me vaka ga sa yaco tiko ena vica vata na drau na yabaki sa oti. Ia e yalataka ko Jisu ni ko ira era vakabauti Koya era na vakaturi cake tale mai na mate.

E dusia tale ko Jisu ena tikina e 26, me baleta e dua tale na mate, oya na mate tawamudu, era na sega ni sotava na nona tamata yalodina. Na mate e kena ibalebale na tawasei.

Sa kena I balebale koya, ni ko ira na nona tamata yalodina ena nodra vakabauta era na sega ni sotava na ikarua ni mate, se na vei tawasei tawamudu mai vua na Kalou.
NAI VAKATAKILA I JONI 2:10 - Kakua ni rerevaka e dua na ka ko na vosota: raica, na tevoro ena biuti kemudou eso ki na vale ni veivesu, mo dou vakatovolei kina; ia dou na vakararawataki ka bogi tini: dou gumatua mo dou yacova na mate, au na qai solia vei kemudou nai sala ni bula.

Ulutaga ni kua ko Jisu na tucake tale keina bula, oqori na noda I nuinui.
* Ke sa kavoro se mavoa na vuvale ko Jisu ena rawa ni vaka tucake taka tale ka vakabula na nodaru vuvale
* Se cava na dredre ko sotava tiko nikua na wekaqu, ko ira na luveda, sega na cakacaka, rogoca ca beka ena dua na ka se leqa cava ga ko sotava tiko, qai nanuma ga ko Jisu na tucake tale keina bula.
* Sa kila oti tiko ko Jisu na nomu leqa, sa kacivi iko tale tikoga ena yacamu, sa vo ko iko mo dabe sobu ga tacake ena masu vua ena vakabauta.
KO JISU NA TUCAKE TALE KINA BULA

E. M. E. N. I
Me kalougata saka noda vuvale vakaturaga.
(Ai katalau vakayalo ni matakacaca)

LOTULEVU - 25/06/2026
ULUTAGA: KO JISU NA KATUBA.
LESONI: JONI : 10:7-9

TIKINA KOULA – 9:
“Oi au na katuba: kevaka sa curu kina e dua na tamata ena vukuqu, ena vakabulai, ka na dau curu mai ka daucuru yani, ka na kune kakana”.

NA KENA I VAKAMACALA
Ni oti na nona vakabulai na tamata mataboko, sa semati koya sara ko Jisu ki na veitalanoa kei ira na i liuliu ni lotu; ka sa vakabibitaka na nona i tavi, ni sa i koya na katuba ni veivakabulai kei na i sema kaukauwa vua na Kalou. E vakadeitaki ira ko Jisu ni ko ira e ra curu ena katuba e na vukuna era na vakabulai, na yalayala ni nodra maroroi ka taqomaki. Na veivakadeitaki oqo e lakosivita na veika vakayago ka solia na i nuinui ni bula vakayalo vei ira na tamata vakabauta. Na curu mai kei na curu yani e vakatakila na galala kei na kena rawa ni vakayagataki vakarawarawa na veika e vakarautaka ko Jisu. E boroya e dua na i yaloyalo ni bula vakasinaiti ni tu na kakana kei na veimaroroi loloma ni dua na i vakatawa vinaka.
Eda vulica ena lesoni oqo:
1. Meda tovolea na rawati ni bula marau kei na vakacegu, ia na bula oqo e solia duadua ga ko Jisu.
2. E na gauna ni veilecayaki e da donumaka, na vosa “Oi au na katuba” e dua na bikini ni noda vakanuinui kei na yalodei ena noda i lakolako.
3. Sa i Jisu na katuba kina bula vakayalo, ka vakakina na bula tawa mudu; me da kakua ni curuma tale e dua na katuba ni na vakasesei kina na bula. Na veikatuba era tatadoladola tu oqo e matada, ka veisureti tu mai na kedrai raiarai kei na rorogo ni domodra, ia sa kenai tinitini na rusa ni bula.

ULUTAGA ME MASULAKI:
Vakavinavinakataka ni soli tu na galala mo nei Jisu.

1) ESO NAI VAKATAWA ERA SEGA NI KATUBA DINA NI SIPI ERA SA BUTAKOCI IRA NAI VAVAKOSOLOTU KA SINAI E LOMADRA NAI VADI CA ERA SEGA NI ROGOCA NA DOMODRA NA SIPI.
**JONI 10:7-8
[7] Sa qai kaya tale vei ira ko Jisu, E dina, e dina, au sa kaya vei kemudou, Oi au na katuba ni sipi. [8] Ko ira kece sa liu mai vei au era sa daubutako ka daukovekove: a sa sega ni vakarogoca na nodra vosa na sipi.

2) KO JISU NA KATUBA KAI CURUCURU NI BULA VEI IRA KECEGA ERA VAKABAUTI KOYA ERA NA KUNEA VUA NA NODRA VAKACEGU.
**JONI 10:9 - Oi au na katuba: kevaka sa curu kina e dua na tamata e na vukuqu, ena vakabulai, ka na daucuru mai ka daucuru yani, ka na kune kakana.

TINITINI
Eda vulica ena lesoni oqo ni sega ni dua tale na sala meda rawata kina na bula tawamudu, ia ko Jisu ga. O koya na katuba e dolava na sala vei ira kece era vakabauti Koya. O koya sa curu ena katuba oqo ena rawata na veivosoti kei na bula vou.

Me vaka na katuba ni vale e dua ga meda curu vakadodonu kina ki loma, sa vaka kina ko Jisu na sala duadua ga ni noda curu kina me noda kina na matanitu ni Kalou.

Eda vulica talega ni ko Jisu na katuba ni Veitaqomaki, veimaroroi keina veivosoti.
Na sipi era na taqomaki ni ra tiko ena loma ni bai ka curu mai ena katuba. Sa vaka talega kina na noda bula vakayalo; ni da tiko vei Jisu, ena taqomaki keda mai na veitemaki, na lasu kei na veivakarusai ni meca.

Sa levu na katuba era sa veisureti tiko mai ena gauna oqo, meda qarauna sara vakavinaka meda kua ni curu kina baleta eda na rusa, eda na mavoa. eda na dravudravua kina. Kaya ko Jisu, "Oi au na katuba," oqori na katuba meda curu kina ena vakabauta.

Ko Jisu na katuba eda curu kina eda kune ka vinaka, ni da curu lesu eda kau ka vinaka, ia, nida curu yani ka curu mai eda na kuneya na vakacegu ni yaloda.

Na vosa ni Turaga ko Jisu “Oi Au Na Katuba” e vakavulici keda ni:
O Koya na katuba ni veivakabulai.
O Koya na katuba ni veitaqomaki.
O Koya na katuba ni bula e sinai.
O koya gona, meda curu vei Karisito ena vakabauta ka bula tiko ga ena nona veitaqomaki kei na nona loloma.

E. M. E. N. I
Me kalougata saka na noda vuvale vakaturaga.
(Ai katalau vakayalo ni Matakacaca)

VUKELULU | 24/06/2026
ULUTAGA : KO JISU NA VAKATAWA VINAKA.
LESONI : Joni 10:11–14

TIKINA KOULA – 11:
“Koi au nai vakatawa vinaka: sa solia nona bula nai vakatawa vinaka ena vukudra na sipi.”

NA KENA I VAKAMACALA
E vakayagataka ko Jisu, “Oi au na i vakatawa vinaka” me vakadewataka vei ira na Farisi kei iratou na tisaipeli na veimaroroi kei na i vakarau ni dua na i liuliu vinaka, ka sega ni dua na i liuliu saumi na nona cakacaka. E via vakatakila talega ga na vakacabo bula e na vukudra na tamata kecega.
Na tikina oqo e vakatakila na i sema ni dua na i vakatawa kei na nona sipi; ka buli cake e na veivakabauti, veitaqomaki kei na veiliutaki. E vinakati na veivakabauti me ra liutaki na tamata ena sala dodonu me muri. Ka dodonu me ra taqomaki mai na veimeca kecega, ka vakarautaki na veika kece e gadrevi kina na bula. Na dina ni cakacaka vaka i vakatawa oya me solia na nona bula kei na nona gauna ki na nona veiqaravi ena loloma.
Eda sa vakananumi me da kila ka ciqoma ni ko Jisu e soli Koya me baleta na noda vakabulai; ka sa tuberi keda ki na bula vakacegu dina.
Sa i tukutuku ka sinai kina na Loloma, vei maroroi kei na cabobula ni vakatawa me baleti keda na nona sipi.
E dusia vakamacala ni da ka malumalumu, ka sega ni rawa ni da taqomaki keda. E da tuberi me vaka na sipi kina vanua vei co kei na bati ni uciwai, ka da taqomaki mai na manumanu kila.
E da vaqarai ni da yali me vaka na sipi sa lako sese.
ULUTAGA ME MASULAKI:
Vakavinavinakataka na nona veimaroroi, veitaqomaki kei na loloma ni noda Turaga ko Jisu Karisito, na i Vakatatawa Vinaka.

1) NAI VAKATAWA ENA DAU TAQOMAKI IRA NONA SIPI MAI NA KEDRA MECA IA ENA DAU TIKOGA KEI IRA NONA SIPI.
**JONI 10:11-12
[11] Oi au nai vakatawa vinaka: sa solia na nona bula nai vakatawa vinaka e na vukudra na sipi. [12] Ia ko koya sa voli na nona cakacaka, ka sega ni koya nai vakatawa, ka sa sega ni taukeni ira na sipi, sa raica na wolifa ni sa lako tiko mai, ka sa biuti ira na sipi ko koya, ka dro; a sa kati ira na wolifa, a sa vakatolosevi ira:

2) NAI VAKATAWA VINAKA SA KILAI IRA NONA SIPI. KO IRA TALEGA NA NONA SIPI ERA SA KILAI KOYA NAI VAKATAWA VINAKA.
**JONI 10:13-14
[13] sa dro ko koya sa voli na nona cakacaka, ni sa vakakina ko koya, ka ni sa sega ni daunanumi ira na sipi. [14] Oi au nai vakatawa vinaka: ia kau sa kilai ira sa noqu, ia ko ira sa noqu era sa kilai au.

TINITINI
Sa vakavulici keda nai Vakatawa se Dauniveiluitaki ko Jisu ena lesoni nikua.
E dusia tiko ko Joni ni ko Jisu nai Vakatawa sa lesi mai vua na Kalou, o koya e tu vua na veitaqomaki vakayalo, na bula e vakaibalebale, ka kauta mai na bula me solia vei keda kece sara na tamata

Ena gauna oqo sa levu nai Vakatawa keina i iliuliu ca ka ra nanuma ga na nodra bula, ia, ko Jisu e vakaraitaka na loloma sega ni dau nanumi koya, ka vakamacalataka ni veivakabulai e kune ena noda veiwekani voleka kei Koya, na duavata, kei na nona solia nona bula ena vukuda.

E tukuna ko Jisu ena tikina - 11, ni ko koya nai Vakatawa vinaka. Sa dusia oqo ni veika kece mera maroroi kina vakavinaka na sipi sa tu vua. Sa dodonu kina vei keda na tamata meda qisia e lomada me sa noda I Vakatawa ko Jisu Karisito duadua ga.

E duidui vakalevu sara na iVakatawa Vinaka mai vua na dauveiqaravi saumi. Ni yaco mai na leqa, era na dro na dauveiqaravi saumi baleta ni sega ni nodra na sipi. Ia na iVakatawa Vinaka e tu vakarau me solia na nona bula ena vukudra na nona sipi.

Ena gauna oqo e levu sara na Vakatawa, Liuliu vakalotu keina veiliutaki cava ga, sa tu ga yalodra ena I lavo keina veika mera tiko vinaka kina, e qai karua ni ka ko ira na sipi

Na loloma dina e sega ni nanuma ga na nona vinaka, ia e vakarau ga me solia nona bula ena vukudra na wekana. Oqo sara ga na loloma e vakaraitaka ko Jisu vei keda meda rawa talega ni solia noda bula ena vukudra na wekada.

Na Joni 10 e vakavulica ni:
Sai Jisu na Katuba Dina ni veivakabulai.
Sai Jisu na i Vakatawa Vinaka ka solia na nona bula ena vukuda.
Sai Jisu na Turaga e kila vakavinaka na nona tamata, ka kacivi ira me ra muri Koya me rawata kina na bula vakasinaiti kei na bula tawamudu

E. M. E. N. I
Me kalougata saka noda vuvale vakaturaga.
(Ai katalau vakayalo ni matakacaca)

TUSITI - 23/06/2026
ULUTAGA: KO JISU NA RARAMA KEI VURAVURA.
LESONI: JONI : 8:12

TIKINA KOULA - 12:
"Sa qai vosa tale vei ira ko Jisu, ka kaya, Oi au na rarama kei vuravura: ko koya sa muri au ena sega ni lako ena butobuto, ena tu ga vei koya na rarama ni bula."

NA KENA I VAKAMACALA
E vosa ko Jisu e na dua na nodra solevu na Jiu, na gauna e dau levu kina na cina e ra vakayagataki, me vakatakila na nona veituberi na Kalou e na loma ni lekutu. E qai kaya kina ko Jisu, "Ko i au na rarama kei vuravura," me rawa ni vakatakilai koya ena i vakatakilakila ni cina, ka ni sa i koya ga na rarama dina vakayalo.
Ni vosa ko Jisu ena tikina oqo, sa vakatakilai koya ni sa sega ni nodra ga na Isireli, ia sa Rarama me baleti vuravura kece. "O koya yadua sa muri au ena tiko vua na rarama ni bula ka na sega ni lako ena butobuto." E vakabibitaka na Turaga ni sa i koya ga na i vurevure vakayalo Dina. E ra na liutaki vakadodonu na tamata ena bolebole ni bula, ni sa rarama ko koya. E vakatakila na Turaga na sala kina bula tawa mudu, me ra galala mai na butobuto kei na mate vakayalo.
E vica na ka eda vulica ena lesoni oqo.
1.Sa ka bibi na muri Jisu ena veisiga ka ni sa tiko vua na rarama dina ni bula. Eda sa sureti kina veiwekani vinaka kei Jisu.
2. Eda sa sureti talega ki na dua na bula e matata ka vakaibalebale ni sa cilavi keda na rarama i Jisu.
3. Me da gumatua ka lako tani mai na bula butobuto ki na galala kei na bula.
4. Me da vakanamata kina nona veiliuataki, nona i vakavuvuli, ka vakadewataka na nona rarama vei ira era sotava na butobuto ni bula.
ULUTAGA ME MASULAKI:
Me liutaki keda na rarama ni Kalou.

1) EDA NA SEGA NI LAKO ENA BUTOBUTO ENA VUKUI JISU KARISITO NI SAI KOYA GA NA RARAMA NI BULA.
**JONI 8:12 - Sa qai vosa tale vei ira ko Jisu, ka kaya, Oi au na rarama kei vuravura: ko koya sa muri au ena sega ni lako e na butobuto, ena tu ga vei koya na rarama ni bula.

2) E MAI RARAMA VAKAYALO NI VURAVURA KO JISU KARISITO MEDA KUA NI VESUKI KINA ENA BUTOBUTO ENA
VUKU NI NODA VAKABAUTI KOYA.
**JONI 12:46 - Au sa lako mai ki vuravura meu kena rarama, me kakua ni tiko ena butobuto ko koya yadua sa vakabauti au.

TINITINI
Na rarama e dua na vosa vakatautauvata bibi ena iVolatabu ka vakatakilakilataki kina na nona tiko na Kalou, na nona dina, na nona vinaka, kei na veivakararamataki vakayalo.

Ena vakabauta Vakarisito, na rarama e vakaraitaka na lagilagi kei na kaukauwa ni Kalou, ka vakatakila talega na nona qaqa na Kalou vei ira na veika ni butobuto, nai valavala ca, kei na mataboko vakayalo.

Na rarama e dusia na veidusimaki ni Kalou ena bula ni tamata, e vakavulica na sala dodonu meda muria, ka vakasavasavataka na lomada mai nai valavala ca.

Me vaka e kaya o Jisu, “Oi Au na rarama kei vuravura,” e vakaraitaka ni o Koya ga e rawa ni kauti keda tani mai na butobuto ni valavala ca ki na rarama ni bula kei na veivakabulai.

Eda rawa ni vulica ena lesoni nikua ni butobuto e vakaraitaka nai valavala ca, na yalowai vakayalo, keina sega ni kila Kalou. Ni sa lako mai ko Jisu me rarama kei vuravura, e dusia na dina ni Kalou me vakaraitaka na sala ni veivakabulai. Me vaka ga ni rarama e cemuria tani na butobuto, sa vakakina ko Jisu ena Nona vakasevaka tani na kaukauwa ni valavala ca ena noda bula na tamata.

Sa dodonu kina kevaka eda sa vakabauti Jisu Karisito meda biuta tani na cakacaka ni butobuto ka bulataka na rarama ni valavala dodonu, dina keina savasava.

Eda vulica talega ni ko Jisu e dusimaki keda ki na sala ni bula. Ni sega na rarama I Karisito e rawarawa na noda sese keina tarabe. Ena vaka kina na noda bula vakayalo ni sega ni tiko kina ko Jisu sa ka levu sara na noda sese ka butusevata na sala ni bula..

Sa dodonu kina meda vakararavi tiko ga vei Jisu ena noda vakatulewa, cakacaka kei na veiqaravi, ni sai Koya duadua ga e rawa ni tuberi keda kina rarama ni bula tawa mudu.

Kevaka sa sega ni waqa na cina ni valenicina ena dua na bogi era na voca na waqa ka sega ni curu rawa kina i curucuru. Ia ke sa yali e lomada na rarama ni Vosa I Karisito sa Vosa talega na bula oqo.

E. .M. .E. N. . I
Me kalougata saka na noda vuvale vakaturaga.
(Ai katalau vakayalo ni matakacaca)

MONITI - 22/06/2026
ULUTAGA: Ko Jisu Na Madrai Kei Na Wai Ni Bula Dina
LESONI: Joni 6:35-40

TIKINA KOULA - 35:
"A sa kaya vei ira ko Jisu, koi au na madrai ni bula; o koya sa lako mai vei au ena sega ni via kana; ia, ko koya sa vakabauti au ena sega ni via gunu tale."

NA KENA I VAKAMACALA
E a cavuti vaka tolu na vosa, ko i au na madrai ni bula e na wase ni vola oqo. E okati koya ko Jisu me madrai ni bula me vakadodonutaka na nanuma cala e ra raica na lewe vuqa ni oti na nodra vakani mai Kapenaumi. E vakadeitaka ko Jisu, ni o koya ga na madrai ni bula me vakatakila se ko cei ko koya kei na nona i naki. E tiko kina na nona i tavi; ni sa i vurevure dina ni bula; ka na vakaceguya na via kana kei na karamaca vakayalo.
E vica na ka eda vulica ena lesoni oqo.
1. Na Madrai e tiki ni nodra bula na tamata ena veisiga; ni tiko na madrai sa dusia ni sa tiko se sa rawa na bula ki na tamata yadua se vuvale. E dusia kivei keda ni da na marautaka ga na bula ena veisiga ni tiko o Koya na “Madrai ni Bula”.
2. Sa vakadeitaka ni o Koya duadua ga sa rawa kina na bula.
3. Sa vakananumi keda ni o Koya duadua ga e solia na bula vakacegu kei na bula tawamudu.
ULUTAGA ME MASULAKI:
Sureti Jisu me nomu Turaga ka nomu i Vakabula.

1) KO JISU NA MADRAI NI BULA OKOYA ENA VAKAOTIA NA NODA VIA KANA.
**JONI 6:35, - A sa kaya vei ira ko Jisu, Koi au na madrai ni bula: ko koya sa lako mai vei au, ena sega ni viakana; ia ko koya sa vakabauti au, ena sega ni viagunu tale.

2) E VINAKATA NA KALOU MEDA RAWATA KECEGA NA BULA TAWA MUDU.
** JONI : 7 : 40 -:Ia sai koya oqo na loma i Tamaqu, me ra rawata yadua na bula tawa mudu ko ira sa raica na Luvena, ka vakabauti koya; ia kau na vakaturi koya cake e na siga maimuri.

TINITINI
Sa vuqa na waloloi keina karamaca vakayalo sa tara tiko na noda vanua ena gauna e daidai. Sa vakadinadinataki ena levu ni tovo tawakilikili sa vakayacori tu ena keda maliwa.

Sa dusia ko Joni vei keda e dua nai tukutuku ni veisureti nei Jisu vei keda
ni sai koya na Madrai ena solia vei keda na vakacegu Vakayalo ni waloloi keina karamaca sa bika vakakevu sara na noda vanua.

Na madrai e ka bibi vei keda ena veisiga
ena noda bula vakayago na tamata. E vaka kina o Jisu ena noda bula vakayalo sa rui bibi meda kana ka gunu tiko mai vua ena veisiga kece sara.

Ni da lako mai vei Jisu ena qai vakani keda ena nona vosa kei na nona loloma, ka vakasinaita na noda bula vakayalo, me oti kina na noda waloloi keina karamaca.

Eda vulica talega ni tukuna ko Jisu ni o koya sa lako mai vua ka vakabauti koya ena sega ni via kana se via gunu tale vakayalo. Oqo e dusia ni ko Jisu duadua ga e rawa ni vakaceguya na gagadre ni yalo ni tamata. Na noda vakabauti koya e sega walega ni vakalougatataki keda ena gauna oqo, ia e solia talega vei keda na bula tawamudu ena matanitu ni Kalou.

Ko Jisu e sega walega ni solia na madrai kei na wai ni bula. O Koya ga na Madrai kei na Wai ni Bula Dina. O koya yadua sa lako mai vua ena vakasinaiti vakayalo, vakacegui, ka rawata na bula tawamudu. Eda uqeti meda dau toro voleka tiko ga vei Karisito Jisu ni sai koya na vu ni bula dina kei na vuni vakacegu tawamudu.

E. M. E. N. I
Me kalougata saka na noda matavuvale vakaturaga.
(Ai katalau vakayalo ni matakacaca)

Veika me qaravi ena lomani macawa mai qo
❤️❤️🙏🙏