SkillCamps

بس بقولك ايه لازم نحب نتعلم 🙂

واحد من ضمن المواقف المصممة عشان تبقى بهارات تتكتب و تتسجل و نفتكرها و نضحك، و كمان الناس من خلالها بتختبر مهاراتها القيادية، و الهدوء اثناء العاصفة، موقف بيحكيه احد الحاضرين:
​كنا قاعدين بعد العشا والجو هادي، فجأة لقينا المشرفين بيتحركوا بقلق وبدأنا نسمع كلمة "ثعبان" بتتردد. طبعاً في اللحظة دي الكل اتخض، واللي كان قاعد على الأرض قام وقف، والناس بدأت تبص تحت رجليها بتوتر مش عارفين يروحوا فين.
​واحد قال : "يا جماعة، مفيش حاجة هتبان في الضلمة والهرجلة دي، خلونا نتحرك بس لحتة فيها نور ونقف هناك لحد ما يفهمونا فيه إيه."
​بمنتهى البساطة، روحنا وقفنا تحت عمود نور قريب، وبقينا كاشفين الأرض حوالينا. فضلنا واقفين دقيقتين بنبص لبعض وبنضحك ضحك عصبي، لحد ما المشرف جه وقال خلاص يا شباب هو مشي بعيد، ​الموقف عدى، بس اكتشفنا إننا كنا محتاجين بس نعرف نعمل إيه بدل ما إحنا واقفين بنبص لبعض وخلاص.

ببساطة، التعليم الغامر هو طريقة تعلم يخوض فيها المتعلم تجربة مباشرة وكاملة داخل بيئة أو موقف مشابه للواقع، بحيث إنه يشارك ويتفاعل مع كل الي حواليه، بدل الاكتفاء بالقراءة أو الاستماع.
يعني بدل ما تتعلم نظرياً بس، بتغوص في الموقف كأنك بتعيشه فعليًا، و ده بيساعد على الفهم والتذكر بشكل أفضل.

التعلّم في الهواء الطلق (Outdoor Learning)
هو نوع من التعلم يحدث خارج القاعات الدراسية التقليدية، غالبًا في الطبيعة أو بيئة مفتوحة، بحيث يشارك المتعلمين في أنشطة عملية وتجريبية بتساعدهم على اكتساب المعرفة والمهارات من خلال التجربة والملاحظة المباشرة.
أهمية النوع ده من التعلم:
إنه بيعزز التفاعل الاجتماعي والعمل الجماعي بين المتعلمين.
بينمي المهارات العملية وحل المشكلات بطريقة تطبيقية.
بيقوي الاتصال بالطبيعة ويحفز الإبداع والتفكير النقدي.
بيزيد من الانتباه والتركيز مقارنة بالتعلم داخل القاعات
بيخلي التعلم أكثر متعة واستدامة في الذاكرة لأنه يعتمد على التجربة المباشرة.

SkillCamps:
هدفنا نسهّل عملية التعلم ونحوّلها لتجربة غامرة وممتعة.
من خلال أنشطة عملية ومشاريع حقيقية وتجارب خارجية، بنساعدك تطوّر مهاراتك التقنية وطريقة تفكيرك، وتتعرف على طبيعة الشغل اليومي في سوق التكنولوجيا.
كل تجربة معانا مصممة عشان تخليك جاهز تتعامل مع تحديات الواقع بكل ثقة وكفاءة.

Run out of you 🏃‍➡️

رحلوفوبيا :
دي كلمة معناها الخوف من انك متكونش حاجز اي رحلة قريب

المتنبي الجامد قال:

عيدٌ بِأَيَّةِ حالٍ عُدتَ يا عيدُ
بِما مَضى أَم بِأَمرٍ فيكَ تَجديدُ

كلمة عيد في معجم "الغني" معناها الاحتفال بحدث ديني أو تاريخي، و غالبا بيبقي الاتنين مع بعض حدث ديني له أصل تاريخي. بالإضافة إن في برضو عيد اجتماعي.

و مش اصل تاريخي بس ده بجانب التوقيت نفسه و الحدث الاصلي، بيبقي في معني مقدس، في معظم الأعياد بيبقي في تركيز علي معني ما قومي أو ديني.

الأعياد من المظاهر الحضارية المبهجة الي بتبين ثقافة و هوية الشعوب، من خلالها ممكن تندمج و تتناغم مع سكان المكان الي انت فيه.

كلمة عيد جاية من العودة والإعادة و دي صفة التاريخ، لذلك العيد بيحصل فيه تذكير بشئ ما، فكرة ما عظيمة، فمن المعروف إن غرض الأعياد هو احياء ذكري، زي ميلاد المسيح مثلا أو ذكري تضحية النبي ابراهيم بذبيحة بدلا من ابنه النبي اسماعيل.

هل بقي كل حاجة موجودة في الحياه تستحق الاحتفال يعني مثلا هل العمال وجب وجود يوم الاحتفال بيهم ؟ مش تقليل منهم بس اشمعني، ليه مفيش عيد لرجال الأعمال مثلا، طيب عيد الام هل الأم كدا اتعشت بالنسبة لها يعني لما تعملها يوم في السنة زي العمال.

الانسان التايلاندي بيحتفل مثلا بالجاموس، عندهم عيد اسمه بافلو ريسينج فيستيفال، بيدربوا الجاموس و يتسابقوا بيها، ودي بدأها الفلاحين عندهم تقديرا لجهود الجاموس معاهم في الزراعة.

معنديش مشكلة مع تقدير الاشياء الثمينة او الحيوانات السمينة بس احنا اندمجنا اوي في تقدير الاشياء بهذه الطريقة، كفاية يا عم بخ.

في اللغة الإنجليزية كلمة صوم "Fasting" والمقصود بيها التطهير "purification" عكسها كلمة عيد "Feast" الاحتفال، التعاكس هنا في مظاهر الحدثين التطهير فيه صبر و مقاومة و الاحتفال فيه إجازة و فرحة.

هل بقي الفرحة دي بتحصل ولا زي ما المتنبي قال بتفكرنا بشوق و ذكريات ناسف لعدم رجوعها ؟

الحقيقة في نوع من الاكتئاب خاص بالاعياد اسمه كآبة ما بعد العيد بيجي ساعات في العيد نفسه عشان حضرتك متوقع ديما إنه هيبقي احسن عيد، فالواقعي إن العيد مش شرط كل سنة يبقي سعيد، فبنغرق بقي من الصدمة و ناسف علي ما مضي من طفولة خالية من الالتزامات و مليئة بالهدايا الساذجة.

و الحقيقة برضو إن احنا بنتشعبط في حدث حلو عشان يتكرر في نفس الوقت السنة الي جاية مع إن في أيام في السنة بتبقي احلي كتير من ايام العيد. بنحزن علي العيد الاساسي و نعمل الايام الحلوة عيد لوحدها.

الحقيقة العيد الحقيقي هو العيد المفاجئ، اليوم الي بيعدي بسلاسة و يحصل فيه انتصارات صغيرة أو كبيرة، مش شرط نسجل وقته المهم نسجل قيمته.

اقلك علي حاجة فكك من الهري ده كله عيد يعني اكل.

https://www.ucg.org
https://www.britannica.com

في ظاهرة غريبة بتحصل كل سنة في نهر ميكونج في تايلاند وهي خروج كرات مضيئة من النهر في ليلة ما معروفة، و تفضل ترتفع لغاية ما تختفي.

في تفسيرات علمية كتير -بس مفيش حاجة أكيدة- زي إنها كرات غاز الميثان بتطلع من انفجار ما تحت المياه.

بس طبعا كعادة صديقنا الإنسان إنه لازم يتخيل قصة جميلة حوالين الموضوع عشان تكتمل الإثارة.

الانسان التايلندي بيعمل احتفال بيشهده مئات الآلاف من السياح كل عام علي جانب نهر ميكونج بيتفرج فيه علي هذه الكرات الغريبة. بيعتبرها تنفس كائن الناجا الي عايش تحت الماء الي بيصحي كل سنة في الوقت ده في نهاية الصوم البوذي الطويل و يخرج كرات النار مشاركة وجدانية منه بعد الصيام كعيد زي العيد الصغير عندنا !!

الناجا عند البوذيين والهندوس هي كائن شبه الثعبان او نص بني آدم نص ثعبان واللي بيقدر ياخد أشكال مختلفة، وبيعتبر بالنسبالهم الاله الغني للعالم السفلي، لانه حارس لمملكة تحت الماء تسمي بال "ناجا لوكا" وهي كنز جميل ملئ الأحجار الكريمة.

تايلاند بلد جميل فيها حاجات تظهر حاجات تختفي.

كل ده مش مهم، المهم نعرف نروحها يوما ما.

المصدر :
https://www.taylorfrancis.com

ممكن تسافر لوحدك، و ممكن تسافر مع واحد بس من اصحابك، ممكن تسافر عشان متبقاش لوحدك، ممكن تسافر عشان تفصل، ممكن. ممكن تقعد في البيت عادي، لو سافرت بعيد السكة لازم تحلي، اذكر سبع فوائد للسفر قبل ما تسافر، متقولش فيهم المتعة، المتعة قبل السفر، و ممكن بعده، وانت هناك صلي علي قلبك يحبه، افتح كتاب المكان و اقرا كل سطر فيه، هترجع بناس كتير يكملوا حكايتك، كل مرة ناس جديدة، حوش للسفر و هو هيحوشلك، كل مرة بألف مرة.