The Real Sigma

مش من عادتي اكتب بوستات طويلة بس فيه كذا نقطه حابب افضفض مع الناس الى متبعانى هنا فيهم نتاج شوية افكار ف دماغي، عسى انها تكون ذات فايده لاي حد بيعمل محتوي.

طول ما انت بتحاول تبنى حاجه وبتحاول تعمل ده بشكل Public قدام الناس انت لازم تبقي محضر نفسك طول الوقت للانتقاد. وانا كنت ضد الحقيقة دي لمده طويلة جدا قبل ما ابدا انشر محتوي، اصل ليه مثلا جزء من الناس ممكن تبقي ضد شخص بيتكلم ف حاجه مش غلط.

بس لما تعمقت في صناعة المحتوي اكتشفت ان اوقات كتير الناس مش بتكون ضدك لاجل انك غلط. هم بيكونوا ضدك لاجل ان نفوسهم من جوا مش سويه. ف ايه اسهل طريقة يكون راضي بيها عن نفسه؟ بكل بساطه انه يهدم اي حد حواليه.

ف انت هتتكلم في فيديو بمصطلحات بالانجليزي (لان الصناعة كلها دي اللغه بتاعتها) -> هو مش هيروح يذاكر انجليزي ويتعب نفسه، لا هيقولك انتوا قرفتونا ما تتكلموا عربي.

هتشارك معلومات مجانيه مع الناس -> هيقولك انت بتعمل ده عشان تبيع الكورس بتاعك (طبيعي ببيع الكورس بتاعي الى بعمل منه فلوس كتير اوي لاني شاطر فى الى انا بعمله وعشان ابيع كويس ف انا لازم افيد الناس بشكل مجاني الاول)

هتشارك النجاحات الى انت بتحققها في البيزنس بتاعك بهدف التشجيع -> انت بتعقدوا الشباب ليه بدل ما تسهلوها عليهم.

انا شوفت ده مع صناع محتوي كتير شطار في شغلهم وانا بتعلم منهم، وشوفت ده كمان في كومنتات عندي.

ليه بقول وبشارك ده؟ بشارك ده لان فيه شريحة كبيره من الناس الى متابعيني بيبنوا بيزنس وعاجلا ام اجلا هيكونوا معرضين للفئه دي من المجتمع.

ف عايز اوضحلهم ان انا لما كنت بشوف النوع ده من الكومنتات كنت بتخض، وكنت بشك ف نفسي، لدرجه انى كنت بحس اني نصاب. مش انا بس، كل حد بيشارك وشه على النت وبيتكلم مر بالمرحلة دي (انا بس جريئ كفايه انى اشارك احساسي).

لما الوقت ده يجيلك والناس تشوفك، ركز على نص الكبايه المليان.
انت عملت impact قد ايه؟
انت تعبت قد ايه عشان تكون ف المكان الى انت فيه النهاردا؟
انت رضيت ضميرك قدام ربنا واخلصت ف عملك ولا لا؟

هي دي الـKPIs الي تقيس عليها نجاحك..مش تعليقات الناس. وطول الوقت افهم ان الزمن الى احنا فيه ده العواطلي والمليونير عندهم نفس الـconnection على النت وعندهم نفس الـaccess على فيسبوك. ف طبيعي هتشوف ده عندك وتشوف ده عندك.

بالتوفيق للجميع.