ALCOR

STILL LIFE

gouache
35*50

اللوحة دي كانت دراسة لازاي نطلع لوحة اكنها معمولة زيت بس هي اصلا جواش

انا كواحدة بحب خامة الزيت جدااا ونتايجه بس مشكلتي معاه ريحته وريحة التربانتين اللي بتخلي ماما بتبقي عايزة تطردني من الشقة من صعوبة ريحته 😂😂 فكان بالنسبالي اللي هو ايه دا انا ممكن اطلع نفس نتيجة الزيت بس بجواش ومنغير ريحة التربانتين فكان بالنسبالي اكتشاف رهيب يعني بس الصراحة الزيت ياخد بوينت في حتة دمجه يعني علي اد مانا فرحانه بنتيجة الجواش في اللوحة وان كذا حد افتكرها زيت علي اد مالموضوع كان صعب فعلا لان الجواش معروف عنه أنه بينشف بسرعة طبعا فعشان تدمج جزء لازم تبقي سريع

المختصر المفيد مافيش خامة سهلة 100% بس ممكن نعرف نتأقلم معاها مع التعود 😁

✨ ETERNITY PRODUCTS ✨

القصة ابتدت باننا اخدنا مادة تدريب والحمد لله ادتهلنا دكتور ايمان البنا وكانت من الدكاترة اللي مبيفرقش معاهم منهج ولا درجات كان بجد كل همها فعلا اننا نكون اتعلمنا حاجة تفيدنا في سوق العمل وفعلا هي خلال المادة دي خلتنا نعمل كل الخطوات من بداية الفكرة لغاية التنفيذ والماركتنج

ابتدينا بقا ازاي؟؟
اول حاجة اتقسمنا جروبات عشان نكون اخدنا مهارات ال teamworking و النقاش وتقسيم الشغل
طبعا مش دايما كنا بنتفق بس كنا متفهمين ان دا طبيعي
وبعد كدا عملنا زي tour مع الدكتور وشركة الاسماعيلية في وسط البلد وكان فكرة المشروع اننا نعمل زي souvenirs عن وسط البلد بس تكون عملية كمان فكل تيم اختار حاجة بتميز وسط البلد ويشتغل عليها انا والتيم بتاعي اختارنا الاسانسيرات القديمة ونزلنا تاني وتالت عشان نجمع صور للاسانسيرات الموجودة وموقعهم ولو فيه قصص للعمارات دي بما انها قديمة زي قصة عمارة الايموبيليا
وبعد كدا بدأنا نعمل brainstorming ونطلع افكار كتير ونعملهم سكتشات وعملنا كذا presentation عشان نعرضهم للدكتور
بعد كدا عملنا زي تجربة لكل فكرة بخامات بسيطة
وبعد كدا بقا جت مرحلة التنفيذ فبدأنا نسأل ونجرب لغاية مطلعنا بالحاجات الجامدة دي

1_ سلسلة نحاس باسم ولوجو شركة STIGLER وهي من اشهر الشركات اللي صنعت اسانسيرات قديمة ومنتشرة جدا في وسط البلد واخترنا النحاس عشان كان مستخدم كتير جدا في الاسانسيرات وعمارات زمان

2- انسيال بلوجو شركة OTIS وهي بردو من أشهر الشركات اللي عملت اسانسيرات قديمة ولحد الان مستمرة وهي اللي عاملة السلالم الكهرباء الموجودة في المترو

3- حلق شركة OTIS

4- نوت بوك وفيها فواصل صور لاشهر الاسانسيرات القديمة باسم العمارات زي عمارة يعقوبيان والسكاكيني ومعلومات غريبة عنهم بالعربي والانجليزي

5- بازل

6- ميدالية مفاتيح لشركة شندلر وهي شركة اسانسيرات بردو عجبنا اوي دا عشان كان فيه الاسم بالعربي كمان فشكله كان مميز جدا

7- كتاب خروجات فيها لوكيشن المكان ب qr code تعمله سكان يفتحلك لوكيشن العمارة اللي فيها الأسانسير علي جوجل مابس وفيها كمان ترشيحات منا لأماكن قريبة لكل عمارة فيها اسانسير قديم معروفة زي كشري ابو طارق والعبد واماكن زي كدا تانية تجربهم عشان تعيش خروجة حلوة وقديمة في نفس الوقت ولازم تتصور صورة تذكارية لليوم وتحطها في الكتاب

بس كدا قصة المرادي كانت طويلة شوية بس دي فعلا كانت رحلة طويلة واستمتعت فيها جدااا مكانتش مجرد مادة بالنسبالي

من معرض ملتقي المبدعين الدولي 😁

FIRST OFFICIAL GALLERY FOR ALCOR 😆

مستنياكوووووووووو

STEPS vs FINISH 😵‍
oil color on paper
50*70

الصورتين دول مش مراحل للوحة لا دول لوحتين لنفس التكوين ..
ايه بقا اللي خلي دا يحصل ؟؟
اللي حصل ان احنا كنا بنتابع مع الدكتور في الشات اللوحات عشان لو فيه تعديل (والصراحة الدكتور دي من اكتر الدكاترة اللي تعبت معانا واستفادنا منها كتير ربنا يكرمها) المهم فبعت للدكتور اللوحة في مرحلة المونوكروم بتاعتها وبدأت الون فبعد شوية الدكتور شافتها وعجبتها جدا مرحلة المونوكروم عندي فسألتني لو عايزة الونها عشان كانت عايزاني اسيبها كلوحة مونوكروم بس للاسف كنت بدأت الونها بس الصراحة الريأكشن كان كيوت جداااا وقولت خلاص هعمل نفس اللوحة تاني مونوكروم والصراحة كنت قلقانة شوية انها متطلعش زي اللي قبلها بس الحمد لله طلعت حلوة وفرحانة جدا انها قالتلي كدا عشان دا اللي اداني دافع اني اعمل نفس اللوحة تاني وانا مش متضايقة 🥰❤️❤️

المهم انتوا ايه رأيكوا؟؟

MY LOVE FOR MONOCHROME
oil color on paper
29.7*42

تصميمات لمقرر تصميم مناظر وخلفيات باستخدام illustrator and AI
3*5

الفكرة من المادة دي كان اننا نعمل تصميمات ببرامح ادوبي او بالذكاء الاصطناعي لخلفيات لبرامج تلفزيون 🤓🤓

THE BEAUTY OF COLORS 🎨
plastic painting
100*70

انا شخص في العادي مبيحبش الالوان الكتير ,الالوان اللي بحبها هي الحيادية والترابية
بس اللوحة دي من اكتر اللوحات اللي حبيتها بجد 🥹💛

Pastel to oil painting ( digital )
oil painting

انا ليه سميت اللوحة دي pastel to oil painting؟؟ 🤔
اللوحة دي بدايتها كانت باستل بس الفينش بتاع الباستل معجبنيش فيها كان كل اما ازود في طبقات كان اكني معملتش حاجة وتبان انها مخلصتش بردو
ولما سألت المعيدة لو ينفع اشتغل عليها زيت قالتلي اه ينفع ,هتقولولي طب ماهو دا ديجيتال فمش هتفرق بس المفاجأة اللي خلتني اتفاجئ انا كمان انها حتي لو لوحة مش ديجيتال كان اقدر اني اشتغل فوق الباستل بالوان زيت و دي بالنسبالي كانت حاجة جديدة اعرفها وكمان طبقتها في اللوحات اللي مش ديجيتال

المهم ايه رأيكوا في اللوحة؟😁

Replica of con Il Busto di Gesso ( DIGITAL)
oil painting

قصة المرادي هتبقي عن الفنان اكتر من اللوحة اللي رسمها. 🙃

في محاضرة كلمتنا الدكتور عن فنان ايطالي اسمه جورجيو موراندي ,وكانت حابة جدا دمجه للالوان والظل والنور بس كلنا ساعتها استغربنا جدا تكويناته ,دا كان اكنه قال فين اساسيات التكوين يلا بقا نكسرها, اغلب لوحاته كانت حرفيا ضد كل اساسيات ازاي تعمل تكوين ناجح واستغربنا بردو جزء التجسيم عنده كان خفيييف جدا يكاد يكون مافيش تجسيم اصلا بس كان عنده لوحات طفرات كدا كتكوين وتجسيم زي ما درسنا ومنهم اللوحة دي عشان كدا اختارتها اني استنسخها.
المهم ان الصراحة لحد دلوقتي مش قادرة استوعب تكويناته وتكسيره لكل القواعد دي ,بس مش يمكن دا اللي شهره؟؟ 🤔🤔
الاختلاف حلو و دا اللي بيميز كل فنان عن التاني بس الاختلاف اللي بتكلم عنه هو الستايل مش تكسير القواعد والاساسيات.

انتوا ايه رأيكوا؟ ❤

اول تجربة موزاييك صناعي 🤓
40*40

قصة اللوحة دي قصة فعلا. بدايتها كانت اننا اخدنا مادة اسمها تصوير جداري كنا بنعمل لوحات علي مقاس فرخ كامل وكانت فكرة المادة أننا نعمل لوحات عشوائية منغير منفكر كتير ونشوف ايه اللي هيطلع. الصراحة أنا ماكنتش مقتنعة اوي بفكرة العشوائية بس مع الوقت بقيت بتعود شوية وكانت فيه حاجات بتطلع نتائج حلوة فعلا ،بعد كدا بقا اخدنا كادرات مقاسها 40*40 واخترنا منهم كادر ننفذه موزاييك صناعي ،الوقت كان ضيق جدا ولاول تجربة الموضوع كان صعب واتعورنا كتير والحمد لله يعني بس تجربة الموزاييك كانت تجربة لذيذة ،وكنت زي الكلاون 🤡 كل يوم اقول اني هخلصها النهاردة ومتخلصش لغاية يوم التقييم الساعة 6 الصبح وتقييمي كان الساعة 10 الصبح طبعا كان المفروض اسقيها اسمنت بس قولت أنا مش هخاطر عشان مش هيكون فيه وقت لتصليح اي كوارث وقعدت بقا اخلص باقي المطلوب للتقييم لغاية أما الساعة جت 10 وتلت نزلت من البيت وصلت الكلية 12 تقريبا ولحسن الحظ الدكتور بدأ تقييم متأخر والحمد لله عدت علي خير 🤕🤡

المهم بقا كنت عايزة اشوف بعد اما افنشها ففنشتها لما اخدت الإجازة. ايه رأيكوا؟ 😁

#موزاييك