Atfal Club

قبل ما طفلك يمسك القلم… فيه مهارات صغيرة لازم إيده تتعلمها الأول ✋
في الجزء الأول من سلسلة "قبل ما يمسك القلم" هنشتغل على مهارة الشد والسحب من عمر 9 شهور لحد سنتين من خلال ألعاب بسيطة جدًا في البيت باستخدام شريط لاصق، كور، مجسمات وأدوات آمنة.
الأنشطة دي بتساعد الطفل يستخدم صوابعه أكتر، يتحكم في إيده بشكل أفضل، ويبدأ يبني المهارات الدقيقة اللي هيحتاجها بعدين في الإمساك بالقلم والكتابة.
جربي نشاط مناسب لعمر طفلك، وخلي اللعب دايمًا تحت إشرافك.
احفظي الفيديو عشان ترجعي له وقت النشاط، وابعتِيه لأي أم عندها طفل في السن ده ❤️
وقوليلنا في التعليقات: طفلك عنده كام شهر أو كام سنة؟

تفتكروا العربية هتمشي أسرع إمتى؟ 🚗👀
النهاردة في «جرب واكتشف مع ليل» جرّبنا نفس العربية على طريق بميل مختلف… وخلّينا ليل هو اللي يلاحظ الفرق بنفسه.
في السن ده، مش مهم الطفل يحفظ مصطلحات علمية كبيرة قد ما المهم إنه: يلاحظ، يقارن، يتوقّع، ويجرّب بإيده.
اعملي Save للفيديو واعملي التجربة مع طفلك في البيت بكتاب وعربية صغيرة، وجرّبوا تغيّروا الميل وتشوفوا إيه اللي هيتغيّر. 💛
وتابعينا عشان نكمل مع بعض تجارب بسيطة تبني التفكير العلمي من بدري.

نشاط سيدنا سليمان والنملة- أنشطة دينية للأطفال...
مش لازم نحكي للطفل القصة ونطلب منه يسمع وبس 💛
لما نحوّل القصة للعبة بسيطة يشارك فيها بإيده، يتحرك، يلعب ويجرب… المعلومة بتقرب له أكتر ووقت التعلُّم نفسه يبقى ممتع ولطيف.
في النشاط ده استخدمنا قصة سيدنا سليمان والنملة من سلسلة قصص الحيوان في القرآن 🐜
بأدوات بسيطة جدًا: كوبايات، مكعبات، ومطبوعات النشاط.
عايزة تعملي النشاط مع طفلك؟ اكتبي «مطبوعات» في الكومنتات وهنبعتلك ملف الطباعة 💛
#النملة

قبل ما يمسك القلم… خلينا نجهّز إيده الأول ✋✏️
مهارة بسيطة زي إنه يمسك الحاجة، يتحكم فيها، ينقلها ويحطها في مكانها بتفرق جدًا في تجهيز إيد الطفل للمهارات الدقيقة اللي هيحتاجها بعد كده في مسك القلم والكتابة.
في الريل ده هنوريكي إزاي نبدأ من سن صغير جدًا ونطوّر نفس المهارة خطوة خطوة: من الكور الكبيرة باليد، للبوم بوم، للمعلقة، وبعدها الملقاط… وكل مرة نزود التحدي على قد قدرة الطفل. 💛
المهم مش إننا نبدأ بالأصعب، المهم نبدأ بالمستوى المناسب لطفلك ونكبر النشاط معاه بالتدريج.
اعملي Save للفيديو عشان ترجعي له وقت اللعب، وابعتيله لأم ممكن تستفيد منه 🤍
ولو أول مرة تشوفينا، اعمليلنا Follow وتابعينا في سلسلة «قبل ما يمسك القلم» عشان نجهّز أطفالنا للكتابة خطوة خطوة.
تعليم_باللعب PreschoolActivities ToddlerActivities

🔍✨ جرب واكتشف مع ليل — الحلقة 01

في أول حلقة من السلسلة، ليل بيجرب بنفسه ويكتشف: مين بيمتص المية… ومين لأ؟ 💧

مش هنقول له الإجابة جاهزة. هنسأله، نخليه يتوقع، يجرب، يلاحظ، ويوصل للنتيجة بنفسه.

في التجربة دي عرفنا إن بعض الخامات زي الإسفنجة والقماشة بتمتص المية وبتدخلها جواها، بينما خامات تانية المية بتفضل على سطحها من بره.

وده هو هدف سلسلة «جرب واكتشف مع ليل»: مش بس نعلم الطفل معلومة جديدة… لكن نساعده يفكر، يجرب، ويسأل ويكتشف بنفسه. 🧠✨

جربوا النشاط في البيت، وممكن تختبروا خامات تانية كمان.

قولولنا في التعليقات: إيه خامة جديدة تحبوا ليل يجربها؟ 👇

قبل ما طفلك يمسك القلم… خلّيه يمزّق ورق! ✋📄

نشاط بسيط جدًا، لكن فائدته كبيرة؛ لأن تمزيق الورق بالإيد بيساعد الطفل على:

🟢 تقوية عضلات اليد والأصابع
🟢 تحسين التحكم في حركة الأصابع
🟢 استخدام الإيدين معًا بتناسق
🟢 الاستعداد تدريجيًا لمسك القلم والكتابة

ابدئي بورق خفيف وسهل التمزيق، وسيبي طفلك يجرب على راحته. وبعدها ممكن تستخدموا القصاصات في عمل لوحة فنية جميلة. 🎨

جربوا النشاط، واكتبوا لنا: طفلك استمتع بالتمزيق ولا كان محتاج مساعدة؟ 💛

احفظي الفيديو علشان ترجعي له وقت النشاط، وتابعي سلسلة **«قبل ما يمسك القلم»** لمهارات وأنشطة جديدة.

طب إيه فايدة الأنشطة والتجارب دي؟ 🤔

الطفل مش بيكون «بيلعب وخلاص»…

كل مرة يمسك، ينقل، يركّب، يوازن أو يجرّب؛ هو في الحقيقة بينمّي مهارات مهمة:

🖐️ بيقوّي عضلات إيده وأصابعه.
👀 بينمّي التآزر بين عينه وإيده.
🧠 بيتعلم التركيز والتفكير وحل المشكلات.
✨ وبيكتشف بنفسه من خلال التجربة.

والأجمل إننا مش محتاجين ألعاب غالية أو تجهيزات معقدة…
أحيانًا أدوات بسيطة موجودة في البيت تقدر تصنع تجربة تعليمية كاملة.

لأن الطفل في السن ده بيتعلم أفضل لما يلمس، ويجرّب، ويستكشف… وهو بيلعب. 💛

أي نشاط من اللي في الفيديو حبيتي تجربيه مع طفلك؟ 👇

احفظي الفيديو علشان ترجعي له وقت النشاط، وتابعي Atfal Club لأفكار تعليمية بسيطة وممتعة. 🌱

التعليم_المبكر

ممكن نشاط بسيط جدًا زي الكرمشة والتكوير يبان مجرد لعب…
لكن في الحقيقة هو بيساعد طفلك يبني مهارات مهمة جدًا قبل ما يمسك القلم ✋✏️

لما يكرمش الورقة ويكوّرها، هو بيتمرّن على:

تقوية عضلات اليد والأصابع

تحسين التحكم في الحركة

التآزر بين العين واليد

الاستعداد لمهارات الكتابة بعدين

ومش لازم كل نشاط يبقى لعبة غالية.
أحيانًا ورقة واحدة تقدر تعمل فرق كبير.

👶 مناسب من 2–4 سنوات
العمر إرشادي، لأن كل طفل بيتطور بطريقته وسرعته.

جربيه النهارده مع طفلك، وقولي لنا:
إيه كان أسهل عليه… الكرمشة ولا التكوير؟

FineMotorSkills KidsActivities LearningThroughPlay

✋ قبل ما يمسك القلم… خلينا نجهز إيده للكتابة الأول.
الكتابة مش بتبدأ بالقلم والورقة. ✏️
قبلها في مهارات صغيرة الطفل محتاج يتدرب عليها من خلال اللعب والحركة والتجربة.
وعشان كده بدأنا سلسلة «قبل ما يمسك القلم» 💛
هنشارك فيها أنشطة بسيطة تقدري تعمليها في البيت، تساعد طفلك يستعد تدريجيًا لمهارات ما قبل الكتابة… من غير ما يحس إنه بيتدرب.
وفي نشاط النهارده، بنشتغل على الضغط والعصر 🧽💧
بإسفنجة، شوية مية، ولعبة بسيطة… الطفل بيضغط ويعصر وينقل المية، وفي نفس الوقت بيتدرب على التحكم في حركة إيده والتنسيق بين العين والإيد.
والأجمل؟
هو شايفها لعبة ومهمة ممتعة… وإحنا عارفين قد إيه إيده بتتعلم أثناء اللعب. ❤️
📌 احفظي الفيديو وجربي النشاط مع طفلك.
وتابعينا، لأن دي مجرد البداية من سلسلة
«قبل ما يمسك القلم» ✋✏️
أنشطة_منزلية تنمية_مهارات_الأطفال