Chef NOLA

البريوش (الشوريك)

المقادير :

11/4 حليب دافئ
1 معلقه كبيره خميره
2 معلقه كبيره سكر
4 كوب دقيق
1 بيضه ،، رشه ملح ،، 2 معلقه كبيره زبده ،، 1 معلقه كبيره خل ،، معلقه صغيره نسكافيه
الطريقه :
نضيف الحليب الدافي مع السكر والخميره ونسيبها لمده عشر دقايق تخمر بعد كده نضيف البيضه والدقيق نعجن لما يتعجن نضيف معلقه الزبده ونعض لحد العجينه ماتنام في الاخر نضيف معلقه الخل وده سر أنه يكون هش نركنها حوالي نص ساعه تخمر وبندأ نفردها مستطيل ونضيف عليه الزبده الصور موضحه طريقه التشكيل بعد التشكيل في كوبايه نضيف معلقتين لبن ومعلقه النسكافيه ندهن الوش بالفرشه ونضيف عليه شويه سمسم وحبه البركه ونتركها عشر دقايق وندخلها فرن حامي مسبقا علي درجه حراره 170 بتاخد حوالي تلت ساعه او ماتخرج أغطيها بفوطه مطبخ عشان تكون طريه
وصحه وهنا

رمضان يعني قطايف او كنافه هي دي الحاجه الاصلي بلاها افتكاسات 😀

قطايف بالكريمه والمكسرات 😋😋
المقادير
قطايف ،، كريمه ،، مكسرات ،،زيت للقلي
الطريقه :
سهله وبسيطه جداااا قفلي القطايف علي شكل قرطاس او قمع بالضغط جامد علي الجوانب وحمريها في زيت غزير اول ماتتحمر طلعيها علي مناديل مطبخ عشان تمتص الزيت 👇
الكريمه :
كوب كريمه دريم ضيفي عليه نص كوب لبن بارد اضربيها بالمضرب خمس دقايق
كله كده تمام 👌
هناخد القطايف المحمره ونحشيها بالكريمه ونضيف عليها اي مكسرات موجوده عندك بعد فرمها خفيف انا ضفت عليها لوز لو موجود فسدق بيكون حلو جداا وصحه وهنا 💕
طبعا لازم تدخل التلاجه عشان الكريمه بس بجد تحفه 😋😋

صباحوا كنافه نابلسيه 👌
بتعمولها بجبنه موتزاريلا ولا عكاوي؟؟
الكنافه النابلسيه الجامده جدا 😂😂
المقادير
1/2 كيلو كنافه
1 كوب سمن بلدي ممكن يقل معلقتين حسب نوع الكنافه
1/4 كوب سكر بودر ،، 1/4 معلقه من اللون الاورنج ،، جبنه موتزاريلا حسب الحاجه ،، قليل من السيرب أو عسل أبيض
الطريقه
تفرم الكنافه في الكبه او ندخلها الفريزر ونفرمها ناعمه جدا نضيف عليها السكر ونضيف اللون علي السمن ونضيفه علي الكنافه ونقلب كل المكونات مع الكنافه
في صنيه هنفرد الكنافه ونضغط عليها جامد ونضيف الجبنه الموتزاريلا ونحاول نبعدها عن الاطراف ندخلها علي فرن حامي او ممكن علي الشعله من فوق او ماتاخد اللون الاحمر الجميل نطلعها ونقلبها وتسقي بالسيرب او العسل ذوقتها بالبندق المجروش وممكن الفستق
وصحه وهنا 💕

أحلي زبادي بيتي 😋

المقادير :
١- كيلو لبن حليب
٢- علبه زبادي
الطريقه :
نغلي اللبن ونسيبه لحد ما يكون دافي بالمضرب اليدوي نقلب فيه علبه الزبادي ممكن تصبيه في كوبيات اوبولات اوفخار حسب الامكانيه ندفئ فرن البوتجاز وندخل فيه البولات لمده ٦ ساعات في نص الوقت لو لاقتي الفرن بارد شغليه دقيقتين مش اكتر من كده وهيكون عندك احلي زبادي
ولو عايزه دسمه قليل بعد ما اللبن يغلي دخليه التلاجه وشيلي القشطه من وش اللبن ممكن نعمله في طاجن الفخار ويدخل الميكرويف دقييقتن اللبن يدفي ونسيبه نفس التوقيت ويكون عندك احلي زبادي
وصحه وهنا

فول مدمس بطريقه بسيطه وجديده 👌👌
المقادير :
1 كوب فول مدشوش
1/2 كوب عدس بجبنه
1 ليمونه 🍋 ،، 2 حبه طماطم🍅
الطريقه:
في حله بضيف الفول والعدس بعد الغسيل أكيد بضيف عليهم ميه كافيه تغطيهم علي النار 🔥 اول ماتغلي أطفي النار وبسيبهم نص ساعه
بولع النار 🔥عليهم مره تانيه وأضيف ليمونه سليمه والطماطم وأسيهم علي نار هاديه حوالي ساعه الا ربع ضيفي الملح 🧂وشويه فلفل بابيركا وكركم عليه تدي ليه لون حلو وكده كله تمام وكلي أحلي فول مدمس بطريقه سهله وسريعه
وقت التقديم أهرسيه بالبلندر او الخلاط والاضافات حسب ذوقك ممكن طحينه او خضار او توم
وصحه وهنا 🥀
ملحوظه
علي فكره الطريقه دي للناس اللي قشر الفول بيعمل عندها مشاكل صحيه وطبيعي انتي بتهرسي الفول لكن الناس اللي بتحب الفول حبوب أكيد لازم تستعمل الفول العادي والتدميس بالطريقه العاديه

البسبوسه 🍝🍝
المقادير:
2 كوب سميد بسبوسه
1 كوب سمن بلدي
1 كوب لبن
1 كوب سكر
1/2 معلقه صغيره بيكنج بودر

الطريقه :
ضيفي كل من سكر ، لبن ، سمن علي النار أول مايغلي أطفي النار وضيفي البيكنج بودر وقلبي لمده دقيقه وبعدين ضيفي السميد وقلبي كويس أدهني الصنيه بالطحينه البيضا ضيفي الخليط في الصنيه ودخليه الفرن علي درجه حراره 170
الصنيه مقاس 30

السيرب ( الشربات )
2 كوب سكر ،، كوب ونص ميه ،، 2 فص هيل (حبهان )
ضيفي كل المقادير علي النار حوالي عشر دقايق أطفي النار وضيفي نص معلقه صغيره فانليا ومعلقه سمن بلدي ومعلقه عسل جلوكوز اول ماتطلع البسبوسه وهي سخنه ضيفي عليها السيرب ( الشربات )سخن وقطعيها عشان الشربات يدخل جواهاوزينها بالمكسرات المحمصه ودخليها علي حراره الفرن وهو مطفي خمس دقايق لو المكسرات نيه بنضفها قبل دخول البسبوسه الفرن
حقيقي دي احسن طريقه عملتها للبسبوسه

وبالهنا والشفا 🍝🍝

صباحوا شاي كرك ☕️

طريقه تحضيره في البيت
2 معلقه شاي كبيره
3 فصوص هيل ( الحبهان )
3 قرنفل
1 معلقه كبيره جنزبيل بودر او قطعه صغيره فريش لو موجود وده أفضل
2 كوب ميه
2 كوب لبن حليب
3 وحدات من الزعفران الطبيعي ان وجد وده
افضل من لون الزعفران أكيد عشان النكهه
السكر حسب الرغبه
الطريقه
كسروله علي النار أضيف فيها الشاي مع كوبين ميه مع كل البهار يغلوا علي نار هاديه حوالي 5 دقايق وقبل ماينزل بحوالي دقيقه بضيف حوالي كوبين لبن حليب الاساس فيه اللبن المبخر لكن انا عملته بالحليب الطبيعي والسكر حسب الرغبه كان طعمه زي اكبر المحلات المتخصصه في الكرك
جرّبوه هيعجبكم وصحه وهنا

الكيك المالح
المقادير :
٣ بيض
كوبايه لبن
نص كوب زيت علي سمن
كوبايتين ونص دقيق
معلقه كبيره سكر
معلقه صغيره ملح
معلقه كبيره خميره فوريه
معلقه صغيره بيكينج بودر
حبه البركه وسمسم للتزين وشويه حبه البركه جوه مع العجين
مع كوبايه نسكافيه او شاي حقيقي أحسن من الكيك الحلو
الطريقه تحت الصور 👇🏻