ORV

Aktualmente ORV tin 13 klas di aspirante i studiantenan ku ta sigui nan trayekto di formashon serka nos.

Den e post aki bo por haña un bista di tur e 13 formashonnan ku ta den proseso aktualmente.

Pa sèptèmber, i òktober 2026 nos lo kuminsá ku algun formashonnan nobo ku ta inklui:
- Basis Politie Opleiding (BPO) 2026-1.
- Basis Beroepsopleiding Beveiliger (BBB) 2026-1,
- i tambe e formashonnan di Voortgezette Politiemedewerker voor Senior Politiemedewerker (VPO) 2026-2 i 2026-3.

ORV ta deseá tur nos aspirante i studiantenan hopi éksito den nan trayekto di formashon.

Den kuadro di e implementashon di e Wetboek van Strafvordering (WvSv) nobo, ORV a organisá un entrenamentu pa dosentenan selektá ku lo forma parti di e ehekushon di futuro entrenamentu i tayernan di WvSV.

E entrenamentu a kuminsá djaluna, 15 di yüni 2026, i a keda fasilitá dor di Inspektor di polis i Hefe di Districto San Nicolas di Korps Politie Aruba, Sra. Haydee Nadal den kolaborashon ku Sra. Monique Dennaoui, Officier van Justitie, OM.

Sra. Nadal, kende tambe a fungí komo dosente na Politie Instituut Aruba (POI) durante 12 aña, a bish*ta Kòrsou spesialmente pa entrená, brinda guia i sosten den e preparashon pa e implementashon di e WvSv nobo akí.

Durante e entrenamentu, e partisipantenan a traha riba preparashonnan didáktiko, interkambiá konosementu, i aplikashon práktiko di e WvSv nobo.

Awe, durante e último dia di entrenamentu, tur partisipante a risibí un sertifikado ku ta rekonosé ku nan ta kapas pa duna entrenamentu i tayer tokante e WvSv nobo, i splika e diferensia entre e leinan bieu i e leinan nobo.

Djaluna, 15 di yüni 2026, klas di Penitentiaire Inrichtingswerkers (PIW) 2026-2 di SDKK - Sentro di Detenshon i Korekshon Kòrsou a kuminsá nan formashon ofisialmente serka nos.

Despues di e introdukshon di e promé klas di PIW den luna di aprel 2026, e di dos grupo akí awor ta kuminsá nan propio trayekto di formashon. Durante e dos simannan akí, nan lo sigui e promé parti intensivo di nan formashon, pa despues kontinuá ku un programa enfoká riba e konosementu i abilidatnan nesesario pa nan futuro funshon den e sektor penitensiario.

Riba djaluna, 1 di yüni, klas di Kerntaken Opsporing a kuminsá ku nan kurso, ku ta konsistí di un trayekto di tres siman. E kurso akí ta un kolaborashon entre College van Korpschefs, ORV, Politieacademie (PA) i Politie Instituut Aruba (POI), i ta keda fasilitá dor di Sr. Rosalina di KPC, i dosentenan Sr. Weber di PA, Sr. Tromp di POI Aruba.

Den e potrètnan por mira e partisipantenan durante un práktika di investigashon na un sitio di krímen (plaats delict onderzoek), kaminda nan ta pone e teoria den práktika i fortalesé nan abilidatnan investigativo.
Korps Politie Aruba

ORV Ta Tur Tur ku Bluewave!

Djaluna, 8 di yüni 2026, ORV a reuni personal, aspirante i studiantenan na nos edifisio prinsipal pa un evento spesial titulá . E evento akí a keda organisá komo muestra di sosten i apoyo na nos selekshon nashonal di futbòl ku lo representá Kòrsou den Mundial próksimo.

E evento di e anochi akí tambe a forma parti di e inisiativa i a konta ku e desvelo di nos banner ofisial di ORV i Bluewave, ku ta simbolisá nos sosten durante e temporada di Mundial. Tambe nos a hisa nos bandera di ORV i Bluewave i iluminá e edifisionan di ORV ku lus blou, un gesto simbóliko pa mustra e orguyo ku ORV ta sinti pa nos selekshon nashonal. E lusnan blou a keda ofisialmente sendé dor di Direktora di ORV, Sra. Alpha Falbru, kende a resaltá e importansia di union, sosten i partisipashon den aktividatnan ku ta demonstrá nos apoyo, tantu den ORV komo den nos sosiedat. E lusnan blou akí lo sende den oranan di anochi durante henter e temporada di Mundial.

Komo parti di e inisiativa akí, a desvelá tambe un dekorashon temátiko di futbòl den nos kantina, kaminda personal, studiantenan i bish*tantenan por saka potrèt òf graba video, i disfrutá di e ambiente deportivo durante e temporada di Mundial den nos kantina.

E anochi a sera ku un brindis entre personal, studiante i aspirantenan den un ambiente festivo, tur na blou.

Un danki spesial ta bai na e tim di Nation pa nan kontribushon den hasi esaki posibel.

ORV ta deseá nos selekshon hopi éksito den Mundial i ta reafirmá ku .

Klas di Basis Beroepsopleiding Beveiliger (BBB)-2024-I ku a kompletá nan formashon ku éksito den luna di mart, a huramentá djaweps, 4 di yüni 2026 durante un seremonia spesial organisá pa e personal di SDKK - Sentro di Detenshon i Korekshon Kòrsou

ORV ke felisitá klas di BBB-2024-I un biaha mas ku nan logro i ta desea nan tur klase di éksito den nan karera profeshonal.

Djarason, 3 di yüni 2026, a tuma lugá un seremonia di entrega di sertifikado na 10 agente polisial di e kuerponan polisial di Kòrsou, Aruba, Sint Maarten i Karibe Hulandes, huntu ku personal di ORV i Warda Kosta, ku a kompletá ku éksito e kurso di Instructeur Toetser Geweldsbeheersing (ITG).

E kurso akí, ku a dura un aña, a tuma lugá bou di ouspisio di Kolegio di Hefenan di Kuerpo Polisial i tabata dirigí na fortalesé e konosementu i abilidatnan di e kursistanan den e area di instrukshon i kòntròl di violensia.

Entre e 10 partisipantenan ku a risibí nan sertifikado, nos dosente físiko, Sr. Nadir Daniel, a keda sertifiká despues di a pasa ku éksito e èksamen práktiko di tiru i e parti teorétiko relashoná ku kòntròl di violensia.

ORV ta felisitá Sr. Daniel ku e logro importante akí i ta dese’é hopi éksito den su futuro labor komo instruktor. Tambe nos ke desea tur kursista pabien i éksito.

Djabièrnè, 29 di mei 2026, ORV a organisá un Blue Nation Matchday, un aktividat spesial kaminda sinku klas di studiantenan i aspirantenan a kompetí kontra di otro den diferente wega di futbòl.

Bou di guia di nos dosente físiko, Sr. N. Daniel, e Blue Nation Matchday a sirbi komo team building, i muestra di apoyo na nos selekshon di Kòrsou, ku lo partisipá den Kopa Mundial próksimamente.

E aktividat a resultá un gran éksito, ku tur klas partisipando den un ambiente amikabel, deportivo i yen di entusiasmo. Na final, klas di Penitentiaire Inrichtingswerkers (PIW) 2026-I a sali komo kampion di e torneo⚽️🏆

ORV ta yama danki na tur partisipante pa nan entusiasmo i kontribushon na e dushi dia akí, i un pabien na e klas di PIW 2026-I!💙⚽

Klas di BPO 2025-I a risibí un entrenamentu durante nan lèsnan semanal di "Guia di Hóben", brindá pa Sr. Hermanus, kende ta traha komo "jeugdtaakaccent" i miembro di e servisio di rechèrche.

Riba invitashon di dosente Niraima Daal di The Wisdom Connection , Sr. Hermanus a kompartí su eksperensia i konosementu ku e aspirantenan. Huntu ku Sra. Daal, nan a fasilitá diferente rolspel pa praktiká i demonstrá na e aspirantenan, kon pa aktua i de eskalá konflikto, ora nan ta brinda asistensia na hoben.

Esaki ta e promé di e tres seshonnan ku e grupo lo risibí den e trayekto akí.