Biken Chege

এঝের বিঝু ফুলুন কধন, দাগদন বিঝু পেঘ;
সাজি উত্থে য়েল ঝারানি, ন' কমের দুঘো ধেঘ!
পিত্থিমীর বেক জাগানিত বিঝুর খুজির বার
মুরোল্যা বুগর চাঙমা মনত বিঝু র'বো দরার!

পেঘ দাগিলে, ফুল ফুদিলে মনে কয় বিঝু পালেবার
দিনমাধান গম নেই, জাদভেই মরদন দুক্কান বারেবার!
আগ'সান রেং নেই, গম নেই মনানি বাঝি নেই ইক্কে
রেঙোচাক সুনো ন' যায় মুরোল্যার পধে, সুনিবং কক্কে?

মনে কয় ধুনিয়ান পিনিনে, সুলোম্মো উরিনে বেরেবার;
লাঙ'নির আহ্'দ ধরি কোচপানার নাগর ওই মাদেবার,
বিঝু দিনত ফুল তুলি পোত্যাআমলত ফুল গোজেবার
বিঝুগুলর সোত্থানি মেয়োনি, চেঙে, কাজালঙত খেবার!

আঝা দ' আঘে বিঝু দিনর থুমো দিনত সংসমাজ্যালোই
আদামর বুরোহ্ -বুরিহ্ ঝু জানেই গাধেইনে বত্তালোই,
পুরোনর পজ্ঝন সুনিসুনি ইঁ পোরে আঝি যেই পুরোনত
লিঘি লিঘি পুরোন কধা, সুমরি থবং বিজগর পাদাত!

খালিক, ইরুক দিনমাধানে সিয়েন দ' ন' কয় এবারা;
কানি উদন চবাসালত্তুন জাদভেই, মরদন ইক্কে যারা,
তারার কাননি সুনি, দিনমাধান রেনি চেই মন ন' আক্কোয়
বিঝু দিনত ইক্কে আর্ মনে ন' কয় বেরেবার সমাজ্যা ঝাক্কোয়!

সাজন্যা লামিলে চেরেপুক্কোন দাঙর দাঙর র' সারিলে
কিয়েগান কেঝান গরে, যুনি মরেও দুরি নেযে মারন,
মিজে পেজত ফেলে আন্ধারত নেযেই গুলিয়ে ফেলান
সালেন ম' কোচপেয়েউনর কি অভ', জাত্তুর কি অভ'!

বিঝু দিনত রং যুনিও দেঘা যায় পধে পধে ব্যানারত
একবুক দরলোই আহ্'দন তারা বুঝা যায় তারার আরুগত!
বিঝু তুই, চেদনর নাঙ ওই এয, জাগে যেচ অঝার বন্দা
সাতসাজি এক গরিবার, সাতভেই একগরিবার দি যেচ ঝোন্দা....
বিঝুরে তুদি

Biken Chege

১০.০৪.২০১৯ খ্রিঃ
২৭১০ সাক্যব্দ
সো.য়া.মা

ফটো ফেসবুক, গিরোচ্ছো সিধু কতঞূতা পাদেলুং...

ফুদিবো পহর, আন্ধার ভাঙিনে;
এব নুও রং, নুও দিন বন্দা জাগেনে।
কুরি ফুলোন ফুদিবাক তুম্বাজে
পেক্খোন দুও মিলিবাক আগাজে।
কিজিঙত ফুদিবো পহর,
গুমোরত জুলিবো চেরাক, তর মর।
আঙোচ্ছের যেধক নিগুচ্যাবল-
ঊধি যেব, ঊধিব; এব নুও দিনর ধল।
তারুমত জোলিবো বোম্বা, জুমত;
তারাউন জোলিবাক, আন্ধার মনত।
অসবন যেধক তর আ মর,
ছেয় ওই যেব, উরিব; ভিজিব এলে ঝর।
ইজোরত্তুন বাঝি রবো কানসুঘ আনিবো;
অনতিত্যার জীংহানি সুঘোপহর দেঘিবো।
ধান সিজিওন ধুলিবাক, আল্যেং ঝারিনে
রানজুনী উদিবো সাতরং সিধিনে!

আঝার বঝরর যেধক আন্ধার;
পহর ওই উদিবো মনর বন্দার।
জুমগাবুর জুমরান দেঘেয় নাজিবো
নুন্যসীল, তাগলক সমার পেই আঝিবো।
নুও দিনর সবন
বিকেন চেগে
৯.৪.২০
মায়াসোটা, আমনগুধি
রঅভেদ
নিগুচ্যাবল -তোচ্ছে, দুঘ খাবানা
জুমগাবুর-তুজিম জুম, ভরনভিরোন জুম
জুমরান-দোল, সৌন্দর্য
অসবন-দুঃসবন, বজং চিদে

ধনগুলো, ত' কধা ভঝান ইধোত উধে মর, ভঝান;
তর কধানী, তর আঝিউন , তর সবনানি; বেক্কানি,
হালিক তুই ইরুক নেই, আঝি যেওচ রাজপধত
তরে আর', কায় পেবার চাঙ, মিসিলর স্লোগানত!

এচ্যা ভালক বঝর, ভালক খুচ তুই কায় নেই, কায়;
মাত্তর তর বিপ্লবী কধানী মরে এয' কায় এই জাগায়,
কলেজ তর থুম ন' অহ্'ল', য়েমানর আহ্'দত মরিলে-
স্লোগান ভরন ঐ মিসিলত পরান দালি তুই তাদিলে!

কোয় পারচ, মর ইউনিভার্সিটি থুম উয়ে তুই নেই গরি;
তর মরনার পিরে থরি থরি মুই ওই উত্তোং বর্মাছুরি,
এচ্যা চিজিবোর নাঙান "ধনগুলো" থোই দোং মুই-
কধে, বেজার পেলে কি তুই ত নাঙান থোই দিনে মুই?

ইরুক, ও ধনগুলো! তরে ভঝান গরচ উয়ে জাদত;
জেকজেক বিপ্লবী কমি যাদন, বেজা খাদন তেঙাত
সবন দেঘে সবন আহ্'রা, মাত্তল ইরুক বিপ্লব আহ্'রা
ধনগুলো, তরে মুই খাগড়াছড়ির পধে পধে চাঙ, তারা!

ধনগুলো, চিরোহিত্তে তিরোজি বন্দা অহ্'রান সবনত;
তর সমারে বাংখোত বঝি মাদিদুং চাঙ বিপ্লবীর মাত,
আগেদুং চাঙ লারেয়র এগেক্কো কামজারি প্যাজ-
তুই নেই মুই ইরুক, বলআহ্'রা এক তিরোজী ভিরেজ!

ধনগুলো, তর লেখ্যা চিধিয়ানি সুন্ধগত্তুন খুলি মাদাং;
সক্কে দ্বিচোঘত্তুন উদক্কান নুনজো গরি ঝরি ঝরি যায়,
চান্দবীর পহরত বেক কধা পুরি ত' কধা চিদত ফুদি থায়
ত'সান কন লোরবো ইরুক দিনত কাররে কায় ন পাই!

ধনগুলো, তুই সুনর!

Biken Chege
চোত ২৭১৩ সাক্যমাব্দ
৪.৪.২০২২
জুমারাম, চাদিগাঙ

ভাতজরা ফুলুর গজরবো যুনি তরে দোং, তরে;
গুজিয় লবে কি তুই, আহ্'ত তানি লবে কি তুই?
মর তিন কুরি বঝরর কোচপানা যুনি, যুনি তরে দোং
বুরোহ্ কোয়নে মু ফিরেয় নিবেনি তুই, গুজিবে কি তুই?

জীংকানির পধত কবিতার সমারে কধা কধে কধে ;
লাঙরমেয়্যা ন পেয়্যা এক্কো তিনকুরি বঝরর লাঙ,
গল্প, প্রবন্ধ, উপন্যাসর সমারে দিন গোঙাদে গোঙাদে
লাঙমেয়্যার জালত ন পোচ্ছে গাবুর বুরোহ্ মুই!

কধে, তুও যুনি তরে মর তিনকুরির ভাতজরা দোং;
গুজিয় লবে কি তুই মর তিনকুরির গাবুর বুরোরে?
তর নোনেয় কধা, লুলং চেইথানা মরে গাবুর গরে-
মর আয়োজ জাগে এককুরি বঝরর গাবুর অহ্'বের!

গাবুরী, তর আঝিবো, ত' রবো বুঘত সেল মারিল;
তর কধার ফস্স মরে পুনংচান সাজে জাগেল।
মুই ইক্কে তরে নিনে সবন দেঘং দোল এক্কান জুমর
কধে এ বয়ঝত কি সবন দেঘি ন পারে, সবন কি দুচ?

কধে, তরে যুনি গোজাং তিনকুরির ভাতজরাফুল মর;
সে ফুলুন কি ত মনর সুন্ধুগত লোই পারিবাক জাগা তর?
মর তিনকুরি বঝরর দমি যেয়্যা কোচপানা কি লভে?
তর আধর ট্যাটুবো কি মর আধত আগেয় দি যেবে?

কধে গাবুরী, এ বয়ঝত কি কোচপেই ন পারে কাররে;
কোচপানাত কি বয়জর সুধোম আঘে এ মেদনীর বুঘত?
কোই পারচ, ইরুক মুই লেঘা লেঘি ন জানং, ন পারং-
মনান বানা তরে বাচ্ছে থাই তরে, তর কধা আঝিরে!

মর আর' গাবুর অহ্'বের তিরোজ জাগে মন কোনত;
দ্বিবে চোঘত সাজে এক্কান দিয়েন আঝা আ সবন,
হালিক মুই দ তিনকুরি বজস্যা এক্কো বুরোহ্ গাবুর-
ম' মনর কোচপানা কি কন' গাবুর তিরোজী বুঝিবাক?

তিনকুরির ভাতজরাফুল

Biken Chege

৩ চোত ২৭১৩ সাক্যমাব্দ
৩.৪ ২০২৩
জুমারাম, চাদিগাঙ

আরুক: নেট

রভেদ
তিনকুরি- ৬০

ম ঘরান পুরি যায়, ম আদামান পুরি যায় যক্কেসক্কে;
মাত্তর ম মনান পুরি ন যায়, তাদি উধে নুঅ সাঅজে।
এ বজুম্মত্তির বুঘত কন' য়েমানর সেদাম নেই, সেদাম-
ম মনর ঘরান, ম মনর সবনান পুরি ছেই গরিবার!

কধে, মানুজর সবন কি পুরি ফেলেইদি পারে, পুরি;
মানুজর সবন পুরি কি দি পাচ্ছোন কন সাজক য়েমানে?
মুই কঙ, সাজগে কিচ্ছু ন পারে ; তে দরায় বেক খুজে-
কাররে মারে ফেলে চেদনর মরণ দ ন অয়, মরণ!

এ মেদিনীর বুঘত যিধু সবনচজ্জাদাগি খারা কন;
সে জাগাত, সে চাগালাত, সিধু অয় লোরবোর জাগন।
সেনে কঙ, মারি কাবি, মেদুল গরি কাররে বানী ন পারে-
কারর পিধত দ্বিসত কেজি বস্তা তুলিদি উধেইদি ন পারে।

মুই সবন দেখ্যা এক্কো মুরোল্যা বন্দার তিরোজি পুঅ;
মর লোয়ত বিজকগিরি, রাধামন খারা খেলন, খারা।
মর চিদেত লারমা, রনু খা, কালেন্দিদাগি সরিত বদন-
গায়গদর কেয়্যাত বেকবুলিউন এই সমার ওই আঝন!

ঘর পুরি, জাগা কারিহ্ মরে তুই পারিদে নই দমে;
জনমসলাত যক্কে কন অসিজিয়ে দমে ন পারন মরে,
কধে য়েমান নিলোজ সাজক তুই কেনে দমে পারিবে?
সে সেদাম, সে বল তসান্যার আঝার সাজগরও নেই!

এ মাদিত, এ মেদিনীত লারেয় গরি বাজি জেম মুই;
তুই আয়, তুই তাদ ; দমেয় এব্বে যেধুং নই এ মুই।
মরে তুই নানাক্কান নাঙ দি পারচ, মাত্তর ম সচ্চ মর-
তর অসিজির আঁচ, অসিজির বান্ ভাঙিবার জুগোলাঙ সাচ!

চেদন্যা লোরবোর জিদল্যা মন

Biken Chege

ফাগুন ২৭১৩ সাক্যব্দ (সাকমাব্দ)
২৩.৩.২০২২
জুমারাম, চাদিগাঙ

বরগাঙর পারত আঝারবিজি গাচ্ছোর গরাত বঝি
ভাবি যাঙ ত' কধা এভ' মুই পরানদা, গাবুর সাজি।
ত' কধা ভাবদে পুরি ফেলাং মুই ইক্কে তিন পরমা
যুনি বিচ্ছেচ ন' অয় তর সমক খেম ধরিনে বর্মাহ্!
ইধোত আঘেনি তর পরানদা যক্কে ঝারত ধেই যিয়ে?
সক্কেবো, যক্কে ভূসনছরাত চাঙমাউন কাবা খেয়্যে।
ইধোত আঘেনি তর পরানদা, তরে একপল্লা আর্মিয়ে ধচ্যন
ক্যাম্পত নেযেই দুরি বানী যিয়েনপাই মনজক্কা গোচ্ছোন!
এচ্যা তুই নেই, নেই ত' আঝিরঙর দোল আরুগর আঝি
নেই মর ইক্কে যারে মারিম মুই কোচপানার মিধে ঝাজি!
কিজেনি তুই কধক বঝর অহ্'লে আন্ধারত লুঘি গেলে
কোই পারচ কধক কান্যং, ত' সমাচ্যা ধুলুরে দ্যালে!
ননাবি বাবরে ত'সান ন' পারং ঝাজি মারি মুই
মদ খেই পুরি থাই জীংহানি মর উয়ে নাদা ভুই!
তুই থেধে পরানদা, ঘর বানীদং দিজনে সুঘে থেধং আঝিয়ে
কাম গরিদঙ ধরাধোচ্ছে , কধা কধঙ জুনপোচ্ছে।
সেত্তে দ' ত' কধ ভাবি চিধেনর ফুগুদিকানা চেই যাঙ
বোয়েরর মিধে মাত্তলে তরে ভাবি মুই এভ' আহ্'ঝি যাঙ!
ত' কধা ভাবদে পুরি ফেলাং মুই ইক্কে তিন পরমা
বিশ্চেচ ন' অহ্'লে সমক খেই পারিম ধরিনে বর্মা....
‌
পরান দা তরে ভাবি
২২.৩.২০১৯ খ্রিঃ
২৭১১ সাক্যব্দ
ঢাক
ফটো ক্রেডিট: Natsumi chakma harada

রাঙেই যেম ম' মনান জনমান বানা তরে চেই;
গোঙেই যেম জীংহানি জনমান তরে কায় পেই,
কেওক্রাডং মুরোবোত উদি তরে দাগি যেম
সংখ গাঙর পারত বঝি ত' আরুক আগেই থোম!
পানিকুরি পেক্কুনি চেঙেয়ানত উরি উরি বেরেলে
মেয়োনি গাঙ' পারত খেতখেত্থিয়ে ভরি উদিলে,
তরে লোই আঝি যেম সুভলং তানজাঙর দোলত
বাঝি বেই সুনে তরে য়েল দোল আমা জুম ইজোরত।
ত' খাদির আলামত সাজেবং দীঘোল এক জীংহানি
সুধোমর জাঙালে আহ্'দি গিরি সাজেবং ঘর বানী,
মেক্কানি উরি উরি বুদুলি বুদুলি ধেই গেলে দুরোত
জামিজি ধেলাত ধুলোন বানী ধুলিবং সক্কে ধুলোনত!
সারাল্যা চিল্য খরানর দেবাবোত দুয়ো মিলি উরিলে
দুর ঝারর আহ্'রিকুরিবো মেয়েরয়ে দাগি দাগি উদিলে,
ফাগুনর আভা আনিবং ফেরেয়, হিলোর চাগালাত
রেং কারি গীদ গেবং গেংহুলির ধঘে ধঘে ইজোরত!
‌.
দাঙাতিরোজ

Biken Chege

১০.৩.১৯ খ্রিঃ
৫.১.২৭১১ সাক্যব্দ
বান্দরবান,,,
PC.. Fb

ভালকভিলোন কার'লোয় কধা ন অহ্'য়, কার'লোয় লাঘতপাপি ন অহ্'য়। কধা ন অহ্'লে লাঘতপাপি ন অহ্'লে কি সদরউনও সাদাঙা অহ্'ন?

বসন্ত এচ্ছে ভিলে পিনোন ইরি শাড়ী কেত্তে পিনানাহ্;
পিনোন পিনি বসন্তরে কেত্তে পাত্তুরুতুর ন' জানানা?
বসন্ত এচ্ছে ভিলে কি জাদর পোঝাক ইরি দিবে তুই-
বসন্ত এচ্ছে ভিলে কি জাদর পোঝাগরে গরিবে থুই!

তরে কঙর নাগরী, তরে; বসন্ত বানা শাড়ীলোই নই
বসন্তরে লবিয়ত গত্তে শাড়ী ন লাগে, বসন্ত বানা শাড়ীর নই।
পিত্থিমীর যিধু যিধু বসন্ত এচ্ছে খুজির বান তুলি তুলি-
সে বন্দাউন শাড়ী ন পিনন, পিন্যন জাদর পিনোন-খাদি।

কধে নাগরী, সালেন তত্তুন কেত্তে পিনাহ্ পরিবো শাড়ী?
শাড়ী পিনেলি কি কনজনে অয়পারন রাজাঘরর রাণী?
কধে নাগরী কধে, কেত্তে তুই ছলং বদলেবার গরজী-
এ বেসুঞ্জুক দিনত কেত্তে নিজরে সচ ইরি দোর, কেত্তে?

নাগরী, ও নাগরী, বসন্ত পালাদে শাড়ী ন লাগে পিনদে;
বসন্ত পালাদে কেয়্যাত, আহ্'দত মেহেদী গুলা ন পরে,
তুই পিনোন-খাদি পিনি, মিন্তিপাদা গুলি সাজি পারচ-
এ সাজানাত জাদর চিন, জাদর সুধোম ফুদি উদিবো!

নাগরী, বসন্ত বানা শাড়ী পিন্যা জাদত্তে নই, তারাত্তে নই;
এ বসন্ত মেদিনীর বেক জাদত্তে, এ বসন্ত বেক বন্দাত্তে।
তত্তুন শাড়ী পিনাহ্ ন পরিবো বসন্তরে লবিয়ত গরদে-
ন পরিবো মেহেদীরে আহ্'দত, থেঙত গুলানা, ন পরিবো।

নাগরী দাঙর অহ্'নেয় কেত্তে বেজাদর সুধোমত মঝর;
বেজাদর ভাঝে, সুধোমে মিঝি কেত্তে জাদরে মারর, কেত্তে!
নাগরী, তুই কি ন পারচ এ দিনত, এ মাধানত জেইউধি-
জাদর সুধোম, জাদর কধায় মাদি মাদি দুন্নিবেরেবার!

নাগরী, তরে মুই ধারাচ গরং এ বেসুঞ্জুক দিনত কায় পেবার;
এ বেসুঞ্জুক দিনত কধা ধরাধচ্ছি জাদর কাম গরি যেবার,
হালিক, ইরুক তুই চিগোনকালর নাগরী নই, মন বদল্যে-
তুই ইরুক অহ্'মা জাদর সুধোমত মঝদে সচ্চরম পাচ, সচ্চরম!

নাগরী, তরে মুই জাদ, ভাচ বাজনির লারেয়র সমার চাঙ;
এ বন্দালাং নেয়্যা বন্দাত্তুন জাদ, ভাঝর সরান ছিনিবার চাঙ।
নাগরী, তুই যুনি এ ম'কায় থেলে, মেদিনীরে মুই গুদি ন রাগেম-
যেধকদিন জাদ, ভাঝর সরান ন অহ্'য় সেধকদিন লরি তাদি যেম!

নাগরী, তুই কি সুনর?
Biken Chege

২২০২২০২২
জুমারাম, চাদিগাঙ

[ কবিতাবো মাদেয় যারা শাড়ী পিনন, অহ্'লে তারা বেসুঞ্জুক পেবাক মনানত। মাত্তর জাদর এ নিরেতিত্যা দিনত, আমনে মাদি ন থে পারে। মাদা পরে, ঘুম্যবন্দারে জাগেবার।]

কোজ্জালত থোয়্যা নাকসাফুলুন চিধে অহ্'লাক, তরে দেনা ন অহ্'ল
মনানত থোয়্যা দ্বিয়েন কধা কুধু লুকদিল', তরে কনাহ্ ন অহ্'ল
বারিঝে ঝরি গেল, ফাউন এই থেগেল, ফুদিলাক আর নাকসাফুল-
মাত্তর তরে, তর চুলঝুধোত গুজেয়দি ন অহ্'ল, ন অহ্'ল কনখেব!

মরও ফিরানা ন অহ্'ল কধাদেনার ধগেধগে, কনখেব আদামত
জুনোপহরত বজানাহ্ ন অহ্'ল কায়কুয় উদোনত, কায়কুয় দ্বিজনর
মন কধার লবিয়ত গরাহ্'গরিহ্ ন অহ্'ল, কনখেব এ জীংকানিত
বানা দ্বিবে চোঘত, মনগুমোরত, কাগজর পাদাত সমরি গেল!

তুইও ন বাচ্চেলে মরে, তুইও কধা রাঘেই ন পারিলে এ খেব, তুই
মুইও ফিরি ন পারিলুং ত সিধু, ইরি ন পারিলুং জাদ বাজোনির আত্থের
হালিক ত কধা ইধোত উধে জুনোপহরর রেত্তুন লামি এলে, লামি
তরে নিনে কধা কবার আয়োজ জাগে নিগুচনিগুচ গরিনে!

কোজ্জালত থোয়্যা নাকসাফুল্যর বজও কম ন অহ্'ল, কম;
তর দাঙর পুঅবোর বজও দ কম ন পুরেল, দাঙর উয়ে তে।
মাত্তর কোজ্জালর নাকসাফুল্য ইরুক তুম্বাজ ন ছিদে বোয়ের মাত্তলত-
কধে, যুনি আর দেঘা অহ্'য় তর আ মর সক্কে কি কবেহ্ মরে?

মর দ আর আদামত, ঘরত ফিরানা ন অহ্'ব, মর ফিরানা অহ্'ধ নই
বাঙামাচ্চে আত্থেরবোঅ ইরানা ন অহ্'ব, লারেয়অ অহ্'ধ নই ইরানা
এ মাদির গরজে, জাদ বন্দার গরজে মত্তুন তরেয় যা পরিবো
লারেয়র জীংকানীন ন'গানর পাঙে বেই যা পরিবো গোদা উমরান……!

কোজ্জালর নাকসাফুল

Biken Chege

২২০২২০২২
জুমারাম, চাদিগাঙ

তুঙোবী, একদিন এ মেদিনীর বুগত কন এক হেনত
তর মর দেঘা অহ্'ব, সবন সবন খারা থুম অহ্'লে
সক্কে দ্বিজনে বরগাঙর ধাঘত কায়কুয় বঝি মাদিবং-
ধুপঝাক বগা, পানিকুরির উরনি চেই পাকাতিত মিজিবং।

তুঙোবী, কন একদিন বেলদুবোনিত দ্বিজনে এগত্তর অহ্'বং
সাজন্যা আভা যক্কে লামংলামং বাচ্ছে থেব
সক্কে তুই মরে গুমোরর বেক কধা হুলি মেলি লবিয়ত গরিচ
মুই সক্কে তর কধালবিয়ত পেইপেই পাকাতিত মিঝিম।

তুঙোবী, কোয় পারচ এ লারেয় উজু নই, এ লারেয় উচ্চো লয়
অহ্'য় তুঙোবী, লারেয় কাদাবেজেয়্যা এক্কান বাম
যিওত লুও ঝরে, পরান ছিনে, রোক্কে, আদুর ওই পরে-
হালিক তুং, এ লারেয় সরানর, সবনর সরান!

তুঙোবী, এ বরগাঙর পানিয়ান একদিন সুঘেয় যেব;
রাজঘরান ভাজাদি উদিবো অবিরিকবারাক গরি
আহ্'ভিলেজে তম্বার বারিঝে লামিবো, বারিঝে-
মাত্তর এ লারেয় থুম অহ্'ধ নই, থুম নেই লারেয়র।

তুঙোবী, তলোই মর একদিন দেঘা অহ্'ব সবন খারার থুমে
সক্কে বনরূপো বাজারত বেরেবং সংখুচ ফেলেয়
বিহারত যেই তথাগতরে গোজেবং আমনরে -
কধে সক্কে কি তুই মর সমার থেবে, তুঙোবী?

তুঙোবী, এ লারেয় এ সবন খারার লারেয় একদিন থুম অহ্'ব
বন্দালাংনেয়্যাউন একদিন উধি যেবাক পধেপধে
চিরোহিত্তে তিরোজ্যা জুমবলার রেং সুনিবে
কিজেক, জোগার সুনিবে সক্কে, যক্কে মুই ফিরিম।

তুঙোবী, এ সবন খারার লারেয় থুম অহ্'লে, এ লারেয়
সক্কে দ্বিজনে নিচিদে কধা কবং বরগাঙর ধাঘত বঝি
জুনোপহরর রেদত, আমা ঘরর ঘাধত, ন অলে তমার
জুনিপুগর সমারে, দুরর তারার সমারে বনজুরিবং সক্কে, বন!

তুঙোবী, তুই সুনর?

Biken Chege
১৯/ ২/২০২২
জুমারাম, চাদিবাম