Parokia Inmaculada Concepcion Aruba

PROME LECTURA

Lectura for di dos carta di San Pedro

2 Pe 3,12-15.17-18
Rumannan stimá, warda riba e dia di Señor su huicio y haci lo posibel pa e yega pronto. Pasobra ta riba e dia ey shelo lo kima y ta destrui y e astronan lo dirti caba na nada. Pero nos ta warda riba e shelo y tera nobo caminda tur hende lo biba un bida recto, tur esaki di acuerdo cu loke Dios a priminti. P’esey anto, mi kerido rumannan, como boso ta warda pa e cosnan aki tuma luga, haci boso maximo esfuerso pa Dios haya boso puro y sin mancha, y pa boso ta na paz cu nE. Realisa cu e pasenshi cu Señor tin cu hende ta sirbi pa duna nos e oportunidad pa haya salbacion.
P’esey, kerido rumannan, ya como boso sa e cosnan aki caba, sea alerta pa boso no laga eror di hende sin escrupulo lastra boso bay cu ne, pone boso cay fo’i riba e fundeshi firme caminda boso ta pará. Pero sigui crece den gracia y conocemento di nos Señor y Salbador Hesu-Cristo. Gloria na djE, awor y pa semper! Amen!
Palabra di Dios.
SALMO RESPONSORIAL

S 90
R. Señor, Bo a keda un refugio di un generacion te na otro.
Fo’i prome cu seronan a nace y mundo a mira luz di dia, si, fo’i tur semper y pa semper Bo ta Dios. R.
Bo ta haci hende bolbe na tera bisando: Bolbe bira stof, yiunan di hende. Si den Bo bista mil aña no ta mas cu e dia di ayera cu a pasa, no mas cu un warda di anochi. R.
Setenta aña nos bida por dura, ochenta pa esnan cu tin forsa y mayor parti ta molester y dolor; tempo ta bula, lihe nos ta bay. R.
Yena nos mainta cu Bo amor y tur nos bida nos lo canta y hubila. Mustra nos, Bo sirbidonan, Bo trabou, laga nos yiunan mira Bo gloria! R.
ACLAMACION PROME CU EVANGELIO

Huan 14
Aleluya, aleluya.
Mi ta caminda, berdad y bida—asina Señor ta bisa. Ningun hende no por yega cerca Tata, sino pa medio di Mi.
Aleluya.
EVANGELIO
+ Proclamacion di Evangelio di Hesu-Cristo segun San Marco

Mc 12,13-17
Den e tempo aya e sacerdotenan importante, e doctórnan di ley y e ancianonan a manda algun fariseo y algun hende di Herodes pa cohe Hesus den trampa cu su mes palabranan.
Nan a acerc’E y bis’E:
“Maestro, nos sa cu Bo ta un hende honesto; Bo no ta preocupa Bo cabes cu loke hende ta pensa, pasobra Bo no ta husga segun aparencia. Ma segun berdad Bo ta siña hende con Dios kier pa nan biba. Bisa nos: Ta corecto pa paga impuesto na emperador di Roma? Mester pag’e of no?”
Hesus a mira cu nan tabata hunga rol; p’esey El a contesta:
“Pakico boso ta busca moda di laga-Mi cay den trampa? Trece un moneda pa Mi mira.”
Nan a trece un p’E y Hesus a sigui bisa:
“Ken su nomber y imagen ta aki riba?”
Nan a contesta:
“Di emperador.”
E ora ey Hesus a bisa nan:
“Wel, duna emperador loke ta di emperador y duna Dios loke ta di Dios.”
Nan a keda masha asombra.
Palabra di Señor.

PROME LECTURA

Lectura for di dos carta di San Pedro
2 Pe 1,1-7

Simeon Pedro, sirbido y apostel di Hesu-Cristo, na esnan cu a ricibi un fe mes precioso cu esun di nos, pa medio di justicia di nos Dios y Salbador Hesu-Cristo. Gracia y paz sea cu boso abundantemente pa medio di boso conocemento di Dios y di nos Señor Hesus. Su poder divino a duna nos tur loke nos mester pa hiba un bida dedica na Dios, pa medio di nos conocemento di Esun cu a yama nos pa medio di su mes gloria y obra maraviyoso. Pa medio di e cosnan aki, El a duna nos su promesanan cu ta di gran balor y hopi importancia. Asina boso por huy di e decadencia di e mundo aki, cu ta consecuencia di mal deseonan, y boso por tuma parti den e naturalesa di Dios. Siendo cu El ta duna nos tur loke nos mester, haci tur loke ta na boso alcanse pa boso fe conduci boso na un bon comportacion; e bon comportacion ey na conocemento; conocemento na dominio propio; dominio propio na perseverancia; perseverancia na respet pa Dios; e respet ey na cariño pa e rumannan; y laga e cariño ey conduci boso na amor.

Palabra di Dios.

SALMO RESPONSORIAL

Salmo 91

R. Mi Dios, mi ta confia den Bo!

Abo cu ta biba bou di amparo di Altísimo, ta hospeda den sombra di Dios Omnipotente, bisa Señor: “Mi refugio, mi forti, mi Dios, den kende mi ta pone mi confiansa!”

R. Mi Dios, mi ta confia den Bo!

Lo Mi salba esun cu tene na Mi; lo Mi hals’e, si e tin respet pa Mi Nomber. Ora e yama-Mi, lo Mi contest’e; den problema Mi ta hunto cu ne; lo Mi libr’e y colm’e cu honor.

R. Mi Dios, mi ta confia den Bo!

Mi ta pon’e disfruta di un bida largo y lo lag’e contempla Mi salbacion.

R. Mi Dios, mi ta confia den Bo!

ACLAMACION PROME CU EVANGELIO

Cf. Sant. 1,18

Aleluya, aleluya.

Tata kier a duna nos bida nobo pa medio di e Mensahe di Berdad, pa nos por tin e prome luga den su creacion.

Aleluya.

EVANGELIO

✠ Proclamacion di Evangelio di Hesu-Cristo segun San Marco
Mc 12,1-12

Den e tempo aya, Hesus a cuminsa papia cu e sacerdotenan importante, e doctórnan di ley y e ancianonan pa medio di parabola. El a conta nan: “Un dia tabatin un homber cu a planta un hofi di wendruif. El a ser’e cu un trankera, traha un baki pa fango e juice di e wendruifnan machica y tambe a traha un toren di vigilancia. Despues el a huur e hofi cu algun cunukero y a sali di biaha. Den tempo di cosecha, el a manda un sirbido bay tuma su parti cerca e cunukeronan. Pero e cunukeronan a cohe e sirbido, dun’e un halá di sota y mand’e bay man bashi. E doño a bolbe manda un otro sirbido cerca nan; nan a dal e sirbido aki na su cabes y maltrat’e. E doño a manda un otro sirbido; esun aki nan a mata. Asina nan a sigui haci cu tur otro sirbido cu tabata bini: algun nan a bati y otro nan a mata. A sobra e doño su yiu stimá so pa manda. Finalmente el a mand’e cerca nan. El a pensa: ‘Mi yiu si nan lo respeta.’ Ma e cunukeronan a bisa otro: ‘Esun aki ta e heredero! Ban, laga nos caba cu ne, ya nos ta haya su herencia!’ Nan a coh’e, mat’e y despues a tir’e pafo di e hofi. Kico doño di e hofi lo haci awor? E mes lo bin caba cu e cunukeronan y pasa su hofi pa otro huurdo. Nunca boso no a lesa den Scritura:

“E piedra cu e trahadonan a rechasa, a bira piedra principal. Ta trabou di Señor esey, algo milagroso pa mira.”

E sacerdotenan importante, e doctórnan di ley y e ancianonan tabata sa cu ta di nan e comparacion tabata trata. P’esey nan kier a cohe Hesus preso, ma nan tabatin miedo di e multitud; p’esey nan a bay lag’E.

Palabra di Señor.

FIESTA DI SANTISIMO TRINIDAD

PROME LECTURA

Dios ta un misterio. Loke si nos por bisa di djE: E ta yen di gracia y misericordia.

Lectura for di buki di Exodo
Ex 34, 4-6. 8-9

Den e dianan ey mainta tempran Moises a subi sero di Sinai, manera Señor a orden’e.

Señor a baha den un nubia bay para banda di Moises y menciona su mes Nòmber: Señor.

Señor a pasa dilanti di Moises y a bisa na bos halto:

“Ami ta Señor, un Dios generoso, misericordioso, cu pasenshi, bondadoso y fiel.”

Pura Moises a hinca rudia, buig te na suela y bisa:

“Señor, si Bo ke mi bon, ban cu nos.
Nos ta un pueblo terco,
pero pordona nos nos maldad y nos picanan.
Acepta nos como bo pueblo, bo propiedad.”

Palabra di Dios.

⸻

SALMO RESPONSORIAL

Dan 3

R. Na Dios eternamente gloria y honor.

Alaba sea Señor,
Dios di nos grandinan. R.

Alaba bo Nòmber santo y glorioso.
Alaba den tempel di bo gloria. R.

Alaba riba trono di bo reino.
Alaba, Abo cu sa di tur abismo. R.

Cu ta reina riba kerubino.
Alaba Bo ta den shelo y firmamento. R.

⸻

DI DOS LECTURA

Gracia, amor y union den Spirito ta marca un bida cristian, resultado di Dios su presencia den nos bida.

Lectura for di dos carta di San Pablo na cristiannan di Corinte
2 Cor 13, 11-14

Rumannan,

sea contento,
haci esfuerzo pa alcanza perfeccion,
tuma mi palabranan di curashi na serio,
sea un di pensamiento y biba na paz.

Y e Dios di amor y paz lo ta cu boso.

Cuminda otro cu un sunchi.

Tur ruman den fe ta manda cumindamento pa boso.

Gracia di Señor Hesu-Cristo,
amor di Dios y e comunion cu Spirito Santo ta duna
sea cu boso tur.

Palabra di Dios.

⸻

ACLAMACION PROME CU EVANGELIO

Rev 1

Aleluya, aleluya.

Gloria na Tata y na Yiu y na Spirito Santo,
na Dios cu ta, cu tabata y cu lo bini.

Aleluya.

⸻

EVANGELIO

Esun cu ta acepta Dios cu fe, lo tin bida. Esaki ta nos salvacion.

+ Proclamacion di Evangelio di Hesu-Cristo segun San Huan
Huan 3, 16-18

Den e tempo aya Hesu a bisa Nicodemo:

*“Asina tanto Dios a stima mundo cu El a duna su unico Yiu,
pa esnan cu kere den djE no bay perdi,
ma haya bida eterno.

Dios no a manda su Yiu na mundo pa condena mundo,
sino pa salba mundo pa medio di djE.

Lo no condena esun cu pone su confianza den e Yiu;
esun cu no kere den djE ta condena caba,
pasobra e no a kere den e unico Yiu di Dios.”*

Palabra di Señor.